Nyasai Kuzwisisa
1. Cinyi Cinozwi Bhabhironi Guru
Tingaziya kudini kuti “Bhabhironi Guru” rinoimirira magereja ese ekunyepa? (Zvakapangidzwa 17:5) Rangarirai zvinoteera:
-
Rinooneka mu nyika yese. Bhaibheri rinoti Bhabhironi Guru, rakagara pamusoro pe ‘cikwata cakakura ce anhu uye no madzinza.’ Irona rino “umambo pamusoro pe madzimambo e nyika.”—Zvakapangidzwa 17:15, 18.
-
Irona ariimiriri sangano re zve matongerhwe e nyika kana kuti re zve kutengeserana. “Madzimambo e nyika” uye ‘anhu anoita bhizi’ acapona paricaparadzwa.—Zvakapangidzwa 18:9, 15.
-
Irona rinofundisa zvekunyepa nge zva Mwari. Irona rinozwi hure ngekuti rinobatana no umambo we anhu kuti rione mare uye kuti ribathwe zvakanaka. (Zvakapangidzwa 17:1, 2) Irona rinopausa anhu e nyika yese. Uye rakauraisa anhu akawanda.—Zvakapangidzwa 18:23, 24.
Kuhwirira pa fundo 13 cifundo 6
2. Mesiya Aizooneka Riini?
Bhaibheri rainga rareketa kare kuti Mesiya aizooneka mu masure me masumana 69.—Erengai Dhanyeri 9:25.
-
Hino masumana 69 aizotanga riini? Mugore ra 455 K.A.A. Panguwa iyona kamare, Govhernadhori Neemiya akaguma mu Djerusarema kuti ‘arigadzirisezve uye ariwakezve’.—Dhanyeri 9:25; Neemiya 2:1, 5-8.
-
Hino masumana 69 ainga akareba kudini? Uphorofiti umweni we Bhaibheri, unopangidza kuti zuwa rinokwanisa kuimirira gore. (Numero 14:34; Ezekiyeri 4:6) Hino sumana imwe, inoimirira makore 7. Mu uphorofiti we masumana, 69, i makore anokwana 483 (69 x 7).
-
Hino masumana 69 akapera riini? Kana tikaerenga makore anokwana 483 tecitangira mugore 455 K.A.A. tinoguma mu gore ra 29 K.A. a Hino irona, ndirona kamare gore rakabhabhatidzwa Djesu, uye akagara Mesiya!—Ruka 3:1, 2, 21, 22.
Kuhwirira pa fundo 15 cifundo 5
3. Marapirhwe Anobatanidza Pakuseenzesa Ngazi
Kuno marapirhwe ekuseenzesa ngazi ye munhu anonga ecirhwara, asi marapiro amweni aatenderhwi no aKristu—hingana kubviswa ngazi kana kuti kuicengeta kuti izoseenzeswe mu masure me kuoperarhwi.—Dheuteronomiyo 15:23.
Kunyazi zvakadaro, pano makwanza amweni e kurapa anotenderhwa. Akadai hingana kubviswa ngazi kuti iongororhwe kuitira kuti paonekwe kuti ano nhenda here, hemodiálise, hemodiluição, recuperação intraoperatória de células kana kuti o uso da máquina coração-pulmão. MuKristu umwe na umwe unodikana kudzisanangurira kuti ngazi ingaseenzeswa kudini paanonga ecioperarhwi, paanonga ecionekwa kuti ngazi yake ino nhenda here uye no zvimweniwo zvinonga zveciizwa pa mwiri pake pa nguwa iyona. Medhiko umwe na umwe ungakwanisa kuseenzesa makwanza akasiyana-siyana. Hino asati atendera makwanza api hawo e kuoperarhwi, ekuonekwa kuti ngazi yake ino nhenda here, kana kuti ekuraphwa, muKristu unodikana kunyasa kuzwisisa kuti ngazi yake icaseenzeswa kudini. Unodikana kudzibvunzisa mubvunzo dzinoti:
-
Asi zvakadini kana ngazi yangu ikaithwa kuti iyerere yecibva mu mwiri mangu yeciendeswa mu mbuto imwe kuti izohwirirezve mumasere me kanguwa? Hana yangu inozonditendera here kuti ndirumbwe ndeciiona hingana iciri ye mwiri wangu, zvekuti ndinonga ndisikadikani “kuidururira pasi here”?—Dheuteronomiyo 12:23, 24.
-
Asi zvakadini kana pa nguwa yekuraphwa ngazi yangu ikaduswa, yocinjwa uye yokandwazve (yoseenzeswa) mu mwiri mangu? Izvona zvaizobviringidza hana yangu here?
Kuhwirira pa fundo 39 cifundo 3
4. Kumbosiyana Pasikazi Kupfudzwa Mucato
Bhaibheri rinokohomedzesa makazado kuti agare ese. Irona rinosiya pamhene kuti aya akambosiyana aadikani kuwakazve. (1 Akorinti 7:10, 11) Asi pano migarire imweni ye zviro inoita kuti aKristu agume pa kusiyana.
-
Kana mwamuna asikatodi kuriritira mhuri: Mwamuna anoramba kuriritira mhuri, zvingaita kuti mhuri igume pa kutama kugara no zviro zvekurarama nazvo.—1 Timoti 5:8.
-
Kana mwamuna kana kuti mukadzi akagara ecipondwa: Izvona zvingaita kuti uthongo kana kuti upenyu wake ugare pa ngozi.—Agaratiya 5:19-21.
-
Kana mwamuna kana kuti mukadzi ecirambidzwa kuseenzera Djehovha: Izvi zvinoita kuti ushamwari we umwe wawo na Djehovha ugare pa ngozi.—Zviito 5:29.
Kuhwirira pa fundo 42 cifundo 3
5. Mazororo uye Mhemberero
AKristu aapembereri mazororo asikapfadzi Djehovha. Asi pangakwanisa kuoneka migariro yekuti muKristu umwe na umwe unodikana kuseenzesa hana yake yakafundiswa no Bhaibheri kuti asanangure zvekuita. Onai miezaniso minganani.
-
Kana munhu akati bofesta. Imwimwi mungakwanisa kumuti, “Maita basa”. Asi kana munhuwo akada kuziya kuti ngei musikarhyi khisimisi kana kuti kupemberera mazororo amweni, mungamupanganidzira nge zvazvo.
-
Mwamuna kana kuti mukadzi wenyu asiripi Mupupuri wa Djehovha, akamupika pa zororo kuti muende korhya kumba ke anyaukama. Kana hana yenyu ikamutendera kuti imwimwi muende, mungapanganidzira mwamuna kana mukadzi wenyu kuti kana pakaizwa tsika yakabatana ne kunamata ke kunyepa, imwimwi amuzoiti tsikeyo.
-
Kana patrau wenyu akamupasa mabhonu pa nguwa ye kupera ke gore. Zvakashata here kutambira? Azvizi hazvo kushata. Asi patrau wenyu ari kumupasai mabhonu aya ngekuti ari kupemberera kupera ke gore here, kana kuti ari kuda kumutendai nge basa ramakaita?
-
Munhu unomupasa cipo pa nguwa ye kupera ke gore. Pamweni iyena ungabhuya kuti: “Inini ndinoziya kuti imwimwi amupembereri zviro izvona, asi ndiri kuda kumupasai izvi.” Pamweni munhuwo uri kuda kupangidza rupo. Nge dii rimweni, zvakanaka kudzibvunzisa kuti: ‘Iyena uri kuda kuedza kutenda kangu here kana kuti uri kuda kuti inini ndipemberere mazororo aya?’ Mumasure me kurangarira izvona, cisananguro ce kutenda kana kuramba cipo icona ngo cenyu. Pa zvisananguro zvedu zvese, tiri kuda kugara no hana yakacena uye kugondeka kuna Djehovha.—Zviito 23:1.
Kuhwirira pa fundo 44 cifundo 1
6. Nhenda Dzinopaswana
Ngekuti tinoda anhu, isusu tinongwarira kuti tisapase anhu amweni nhenda dzinopaswana, kunyazi tecirhwara kana kuti tecirangarira kuti takabata nhenda. Tinoita izvona ngekuti Bhaibheri rinoti: “Ida mudoni wako hingana mushobo waunodzida.”—Aroma 13:8-10.
Tingaseenzesa kudini mutemo uu mu upenyu wedu? Munhu ano nhenda inopaswana, aadikani kupangidzira amweni rudo nge kuwapasa mabeju kana kuwakhumbatira. Iyena aadikani kutsamwa kana amweni akatama kumupika ku nyumba dzawo ecithyira kuti mhuri dzawo dzingabatawo nhenda. Uye kana aakuda kubhabhatidzwa, iyena anodikana kuziisa murongi we dare re akuru nge ndaa ye nhenda yaanayo kuitira kuti asabhabhatidzwe pamweno no amweni, ngekuti zvaizoita kuti amweni abatewo nhenda iyona. Munhu unoziya kuti pamweni akabata nhenda inopaswana, anodikana kutanga aongororhwa kuitira kuti aoneke kuti ano nhenda here asati atanga kunomorari no munhu umweni. Paanoita izvona, anonga ecipangidza kuti anorangarirawo amweni uye kuti aaripi kurangarira zvakamunakira basi, “asi zvakanakirawo amweni.”—Afiripi 2:4.
Kuhwirira pa fundo 56 cifundo 2
7. Nyaya dze Bhizi no dze Kutongwa
Tinokwanisa kuita kuti tisabatane no matambudziko akawanda, kana tikaita zvekutarirana zvitenderano zvine cokuita no mare kunyazi kana tecizviita no muKristu umweni. (Djeremiya 32:9-12) Kunyazi zvakadaro, aKristu angakwanisa kutama kupindirana pa nyaya dze mare uye no dzimweniwo. Nyaya dzakadaro, awona anodikana kudzigadzirisa nokukasika, mu runyararo ari airi.
Asi kana iri nyaya yakakura yakadai hinagana utsotsi kana kuti kusvipisa zina re munhu umweni? (Erengai Mateu 18:15-17.) Djesu akapasa matanho matatu atinodikana kuteedzera:
-
Edzai kugadzirisa muri airi basi.—Onai vhersikuro 15.
-
Kana izvona zvikatama kuseenza, edzai kuenda no hama imwe kana mbiri dzakakura pane zvekunamata mu ungano kuti dzimuperekedzei pamunonga mecienda kooreketa no hama iyona.—Onai vhersikuro 16.
-
Kunyazi zvakadaro ndaa iyona ikatama kutongwa, ciro cekupedzesera nge ce kupsvaga akuru.—Onai vhersikuro 17.
Kududzira hama dzedu ku tribhunari zvingakwanisa kuita kuti anhu awone Djehovha uye sangano rake nge mushobo wakashata. (1 Akorinti 6:1-8) Asi pamweni paya, pane nyaya dzingaita kuti izvona zviitike. Ngo muezaniso, pa nyaya ye kurambana, pa nyaya yekuda kuziya kuti ndiyani ucagara ne ana mumasure me kurambana, pa nyaya ye kuriritira mhuri, pa nyaya ye kuripa phenjeni, panyaya ye kubhoroka uye panyaya ye nhaka. MuKristu unoenda ku tribhunari kuti atongese nyaya hingana idzi eciita zviri zvese kuti pagare no runyararo, anonga asikaposhi mitemo iri mu Bhaibheri.
Kana paitika ndaa dzakakura dzakadai hingana, kudziphwa, kupondwa, kubiwa ke zviro zvakakura uye kudziphwa ke ana adoko, kana muKristu akaenda ku tribhunari kana kuti kumapurisiya nge ndaa dzakaita hingana idzi, anonga asikaposhi mitemo iri mu Bhaibheri.
a Kubva mu gore ra 455 K.A.A. dakara mu gore ra 1 K.A.A. i makore 454. Kubva mu gore ra 1 K.A.A. dakara mu gore ra 1 K.A. i gore rimwe basi (akuna gore ra 0). Uye kubva mu gore ra 1 K.A. dakara mu gore ra 29 K.A. i makore 28. Ese, i makore anokwana 483.
