NDIMA 5
Ndambi Huru—Ndiyani Wakapurutana Mwari? Ndiyani Asikazi Kumupurutana?
Panguwa ya Noa anhu akawanda aiita zvakashata. Genesi 6:5
Adhamu na Evha akazobara ana, anhu akazowanda panyika. Ne kuhamba kwe nguva, dzimweni ngirozi dzakabatana na Sathani mukupandukira.
Idzona dzakazocita panyika, dzikazvicinja kuita anhu enyama, dzakazoaka anakadzi. Anakadziwo akazobara ana akakura maningi, aithyisa nokushupha.
Nyika yese yakadzara ne anhu aiita zvakashata. Bhaibheri rinoti: “Kushata komunhu kainga kawanda panyika no kuti mafungiro ese emwoyo womunhu ainga akashata nguwa dzese.”
Noa wakapurutana Mwari uyezve wakagadzira areka. Genesi 6:13, 14, 18, 19, 22
Noa wainga ari munhu wakanaka. Djehovha wakabvunza Noa kuti ndicatsakatisa anhu ese akashata nge ndambi huru.
Mwari wakabvunzazve Noa kuti agadzire ngarawa huru, inozwi areka, apinzemo mhuri yake yese ne mushobo wese we zvinyama.
Noa wakaziisa anhu nge kuuya kwe Ndambi, asi awona aana kupurutana. Amweni akhona akamuseka; amweni ecimuzonda.
Noa paakapedza kugadzira areka, wakatora zvinyama zvese wakazvikanda mukati mayo.
