1-2. Mukristu ungaezaniswa no predhiyo yakareba nge gwanza ripi? (1 Akorinti 15:58)

 MUKUPERA ke makore 1970, predhiyo imweni ino maandari 60 yakatanga kuwakwa kuthaundi re Tóquio, Japão. Anhu airingira ciwakwa ici aishamisika, aidzibvunzisa kuti predhiyo ii yakakwanisa kurumbwa yakaima paiitika zvigidhigidhi zvinonyanya kuitika muthaundi iri. Zvakakwanisika kudini? Mainjinyero akagadzira predhiyo ii kuti igare yakabamba uye pa nguwa imweyo yaikwanisa kuthurudza kutekenyeka kaikonzerhwa no cigidhigidhi. Akristu e mazuwa ano akaita hinga predhiyo ii yakareba maningi. Nge mushobo upi?

² Mukristu unodikana kugara pakati no pakati pa nyaya yekugara akabamba uye kukasika kucinja. Iyena unodikana kugara akabamba uye asikazununguki pakutsigira no kutondoedza mutemo unodiwa na Djehovha. (Erengai 1 Akorinti 15:58.) Iyena unodikana kugara “akagadzirira kuteerera” uye aasii kuti ciro cipi haco cimucinje marangariro ake. Nge dii rimweni, iyena unodikana “kuzwisisa” kana kuti kukasika kucinja nguwa dzese pazvinotodiwa kuti adaro. (Tig. 3:17) Mukristu unofundira kugara pakati no pakati kakadaro aazonyanyi kubambidzira, kana kuti aazosii kuti zviro zviitike nge mushobo usiriwopi. Mu fundo ino, ticaona kuti tingagara kudini anhu asikazungunuki. Ticaonawo zviro zvishanu zvinoizwa na Sathani kuti aedze kurembesa cido cedu cekurumbwa tisikazununguki, uye ticaonawo kuti tingaitei kuti tisabathwe no mirau yake.

3. Ngaipi mitemo ya Djehovha yatinogumira pana Zviito 15:28, 29?

³ Djehovha ndiye basi ano citenderhwa cekugadza mutemo ku aseenzi ake, uye mutemo ii yakadjeka. (Isa. 33:22) Ngo muezaniso, dare rinotungamirira re muzana re makore rekutanga rakapanganidza  mishobo mitatu yaizobetsera Akristu kuti arumbwe akabamba: (1) nge kuramba kunamata zvidhori, onamata Djehovha basi, (2) nge kureremedza ruceno re ngazi, uye (3) nge kutondoedza mitemo ye mu Bhaibheri ye kutama kuita uhure. (Erengai Zviito 15:28, 29.) Akristu angazwira kudini Djehovha pa mafundo matatu aya?

4. Tingapasa kudini Djehovha kudzipira kakadzara? (Zvakapangidzwa 4:11)

⁴ Tinoramba kunamata zvidhori nge kunamata basi Djehovha. Iyena akabvunza Aisraeri kuti adzipire kakadzara kaari. (Dhe. 5:6-10) Paaiedzwa na Dhiyabhorosi, Djesu akabhuya pamhene kuti tinodikana kunamata Djehovha basi. (Mat. 4:8-10) Ndiyo ndaa atinamati zvidhori. Isusuwo atinamati anhu. Ngo muezaniso ationi mutungamiriri we gereja, mutungamiriri we zvematongerhwe e nyika, mugogomi uno mbiri kana kuti aembi hingana anamwari. Isusu tinonamata Djehovha basi uya “akasika zviro zvese.”—Erengai Zvakapangidzwa 4:11.

5. Ngei tinozwira mutemo wa Djehovha wakaringana no ruceno re upenyu uye ngazi?

⁵ Isusu tinozwira mitemo ya Djehovha yakaringana no ruceno re upenyu uye no ngazi. Ngei? Ngekuti Djehovha anoti ngazi inoimirira upenyu, cipo cinokosha catakapaswa na Djehovha. (Rev. 17:10) Djehovha paakatendera kuti anhu arhye nyama, iyena akaabvunza kuti awona ainga asikadikani kurhya ngazi. (Gen. 9:4) Iyena akaphindisazve nhungamiriro ii paakapasa Mutemo wa Mozesi ku Aisraeri. (Rev. 17:10) Uye Djehovha akapasa nhungamiriro ku dare rinotungamirira re muzana re makore e kutanga kuti abvunze Akristu kuti ‘arumbwe eciramba . . . ngazi.’ (Zvii. 15:28, 29) Uye isusu tinonyasa kuzwira Mutemo uu nge kusanangura mushobo we kuraphwa watinoda. b

6. Tinodikana kuitei kuti tikwanise kuzwira nhungamiriro dzakakhwirira dze ruceno dza Djehovha?

⁶ Isusu tinonyasa kutondowedza nhungamiriro dzakakhwirira dze ruceno dzinopaswa na Djehovha. (Aheb. 13:4) Muphostori Pauro wakatikohomedzesa kuti tiuraye “nhengo” dze mwiri wedu—zvecida kureya kuti tiite zvese zvatinokwanisa kuti tisagare no zvido zvakashata. Isusu atiiti kana kuona ciro cipi haco cinotiitisa kuti tiite uhure. (Ako. 3:5; Djobo 31:1) Patinoedzwa kuti tiite ciro cakashata, isusu tinoramba nokukasika marangariro api hawo kana kuti ciro cipi haco cingakwanisa kukuwadza ushamwari wedu na Djehovha.

7. Cinyi catinodikana kuita uye ngei?

⁷ Djehovha anoetsera kuti “timuzwire no mwoyo wese.” (Aro. 6:17) Zviro zvaanobhuya zvakatinakira, uye atikwanisi kucinja mitemo yake. (Isa. 48:17, 18; 1 Ako. 6:9, 10) Isusu tinopeta masimba kuti tipfadze Djehovha uye tipangidze maitiro amwewo ainga ano mutari we Pisarema paakati: “Inini ndakadzipira kuteerera mitemo yenyu nguwa dzese, dakara pakupedzesera.” (Pis. 119:112) Asi Sathani unoedza kurembesa cisananguro cedu. Unoseenzesa mishobo ipi?

8. Sathani unoseenzesa kudini kuteererhwa kuti arembese zvisananguro zvedu?

⁸ Kuteererhwa. Sathani unoseenzesa zvocisimba uye kubambidzirhwa mu ndangariro kuti arembese zvisananguro zvenyu. Cinangwa cake ngece “kutirhya,” kana kuti kukuwadza ushamwari wedu na Djehovha. (1 Ped. 5:8) Akristu ekutanga, akathyisidzirhwa, akapondwa uye akauraiwa nge ndaa ye cisananguro cawo cekurumbwa akabamba. (Zvii. 5:27, 28, 40; 7:54-60) Nyamasi uno, Sathani uri kurumbwa eciseenzesa kuteererhwa. Isusu tiri kuona izvi zveciitika pa mushobo wakashata uri kuseenzeswa  no atongi e ku Rússia uye no e mu nyika dzimweni pamabatire aanoita hama no hanzvadzi dzedu. Mu nyika dzese, aphikisi anoteerera hama no hanzvadzi dzedu nge mishobo yakasiyana-siyana.

9. Panganidzai kuti i esperiensiya ipi inopangidza kuti tinodikana kungwarira pakubambidzirhwa kusikazwisisiki.

⁹ Kubambidzirhwa kusikanyanyi kuzwisisika. Pane kuseenzesa kuteererhwa kunonyanaya kuoneka, Sathani unoseenzesawo “mishobo isikazwisisiki” kuti atirhwise. (Aef. 6:11) Onai muezaniso wa hama Bob, ainga akaradzikwa mu cipitari kuti aizwe operasau. Iyena wakabvunza ma medhiko kuti wainga asikatendi kukandwa ngazi nge mushobo upi hawo. Medhiko waida kuita operasau wakatendera ku operar asikaseenzesi ngazi. Asi mu usiku waida kuizwa operasau, munhu unobaya anesteziya wakaenda koocedza na hama Bob mumasure mekuti mhuri yake yainga yaenda kumba. Iyena wakabhuya kuti ma medhiko pamweni azomukande ngazi asi kana zvecizodikana ngazi iripo. Pamweni iyena wairangarira kuti Bob waizocinja ndangariro dzake ngekuti mhuri yake yainga isiripi dhuze. Asi Bob wakarumbwa akabamba uye wakabhuya kuti wainga asikazotendi kukandwa ngazi pa migariro ipi hayo.

10. Ngei mushobo wekurangarira we nyika uno ngozi? (1 Akorinti 3:19, 20)

¹⁰ Murangariro we munhu usikazwiri Djehovha. Kana tikarangarira hinga anhu asikakoshesi mitemo ya Djehovha, isusu tingapedzesera tapfuridzirhwa nawo. (Erengai 1 Akorinti 3:19, 20.) “Ungwaru we mu nyika” kakawanda kakhona unoita kuti awona apandukire Mwari. Akristu amweni eku Pergano no Tiyatira akapfuridzirhwa no anhu ainga akaatenderedza aiita zviro zvisikazi kucena uye ainamata zvidhori. Djesu wakapasa mazano akabamba ku ungano idzi ngekuti awona aitendera uhure pakati pawo. (Zvak. 2:14, 20) Nyamasi uno, tinobambidzirhwa maningi kuti tirangarire nge mushobo unorangarirhwa no nyika. Mhuri dzedu no shamwari dzedu pamweni dzingaedza kuita kuti tirangarire kuti tinodziomesera maningi uye kuti apana cakashata pakutama kuzwira mitemo ya Djehovha. Nge muezaniso, awona angareketa kuti apana cakashata kutendera kuita zvido zvedu uye angabhuya kuti zviya zvinorekethwa no Bhaibheri zvakasaririra.

11. Ngazvipi zvatisikadikani kuita?

¹¹ Nguwa dzimweni, tingatanga kurangarira kuti nhungamiriro dzatinopaswa na Djehovha adzizi kunyasa kudjeka. Pamweni tingazwa teciedzwa kuti ‘tiite zviro kudarika zviya zvakatarhwa.’ (1 Ako. 4:6) Atungamiriri e magereja e mu nguwa ya Djesu aiita izvona. Awona aitunhudzira zvimitemo zvawo pa Mutemo wa Mozesi zveciita kuti zvishuphire anhu kutondoedza mitemo ii. (Mat. 23:4) Djehovha anotipasa nhungamiriro dzakadjeka eciseenzesa Soko rake uye no sangano rake. Ndiyo ndaa apana cikonzero cekutunhudzira nhungamiriro dziya dzaanotipasa. (Zvie. 3:5-7) Hino atiiti zviro tecidarika zviro zviya zvakatarhwa mu Bhaibheri kana kuti atigadzi mitemo pa nyaya dze cisananguro ce munhu ega.

12. Sathani unoseenzesa kudini “ucengedzi usina zvaunobetsera”?

¹² Masoko anocengedza. Sathani unoseenzesa “ucengedzi usina zvaunobetsera” uye “zviro zvekutanga zve nyika” kuti atipause uye aparadzanise anhu. (Ako. 2:8) Mu nguwa ye aphostori, izvi zvaibatanidza fundiso dzakatsamira mu marangariro e anhu, fundiso dze Adjudha dzainga dzisikapindirani no Matarhwa, uye fundiso dzekuti Akristu aidikana kuzwira Mutemo wa Mozesi. Marangariro aya aicengedza anhu ngekuti aiyaitisa kuti agare kure no Manyuku e uzii we zvirokwazvo, Djehovha. Nyamasi uno, Sathani unoseenzesa ma midhiya no ma redhi sosiyari kuti abararise masoko ekupandukira uye masoko ekunyepa anobhuiwa no atungamiriri ezvematongerhwe e nyika.  Izvi zvakaitika maningi mu nguwa ye nhenda ye COVID-19. c Apupuri a Djehovha akapurutana nhungamiriro dzaaipaswa no sangano ra Djehovha, izvi zvakaita kuti asanyanye kudzirhya mwoyo paaizwa masoko aya ekunyepa.—Mat. 24:45.

13. Ngei tecidikana kungwarira zviro zvinotikangaidza?

¹³ Zviro zvinokangaidza. Atidikani kusiya kuona “zviro zvinonyanya kukosha.” (Afi. 1:9, 10) Patinonga takakangaidzika tinopedza nguwa yakawanda uye simba rataidikana kuita zviro zvinonyanya kukosha. Zviro zvatinoita zuwa no zuwa zvakadai hinga kurhya, kumwa, mitambo yekuzviaraidza, uye basa—zvingakwanisa kutikangaidza kana isusu tikatendera kuti izvona zvigare pa mbuto yekutanga mu upenyu wedu. (Ruka 21:34, 35) Kusiya izvona, mazuwa ese tinodzadzwa no manotisiya akaringana ngezve mabongozozo uye kureketedzana ke anhu ezvematongerhwe e nyika. Tinodikana kungwarira kuti tisakangaidzike no zviro izvi. Kana tikatama kudaro, tingatanga kutsigira cikwata cimwe cezvematongerhwe e nyika mu ndangariro kana kuti mu mwoyo medu. Sathani unoseenzesa mishobo ii yese yatabva kubhuya apa no cinangwa cokuda kurembesa cisananguro cedu cekuda kuita zvakanaka. Ngatione kuti ngazvipi zvatinodikana kuita kuti tirhwisane naye uye torumbwa takabamba.

14. Ngazvipi zvicatibetsera kuti tirumbwe takabamba tiri ku dii ra Djehovha?

¹⁴ Rangarirai zvikonzero zvakaita kuti mudzipire uye mubhabhatidzwe. Imwimwi makatora matanho aya ngekuti maida kugara ku dii ra Djehovha. Edzurirai zviro zvakamubetsera kuti mukwanise kuona kuti mainga magumira cokwadi. Imwimwi makaziya kuti Djehovha ndiani uye makatanga kumuda, kumureremedza hinga Baba ekudenga. Imwimwi makasakurira kutenda uye kakamuitisa kuti mucinyuke. Rudo renyu kuna Djehovha rakamuita kuti musiye kuita zviro zvakashata uye motanga kuita zviro zvinopfadza Mwari. Imwimwi makazwa runyararo pamakaziya kuti Djehovha amurekerera. (Pis. 32:1, 2) Imwimwi makatanga kupinda misangano uye makatanga kubvunza amweni ngezve zviro zvinokosha  zvamakafunda. Hinga Mukristu wakadzipira uye wakabhabhatidzwa, zvino imwimwi muri kuhamba mu gwanza ro upenyu uye makasanangura kurumbwa meciita zvese zvamunokwanisa kuti murumbwe mecihamba mu gwanza iri.—Mat. 7:13, 14.

15. Ngei zvecikosha kufunda uye kunyasa kurangarira zviri mu Soko ra Mwari?

¹⁵ Fundai uye nyasai kurangarira Soko ra Mwari. Nzinde dze muti padzinonyanya kuenda pasi, uwona unonyanya kubamba, nge mushobo umwewo patinorumbwa tecifunda Soko ra Mwari kutenda kedu kunonyasawo kubamba. Uye izvi zvinoita kuti tirumbwe takabamba. Patinofunda uye kunyasa kurangarira zviri mu Soko ra Mwari tinogara no rugondo rokuti zvatinokumbirhwa na Djehovha zvakatinakira. (Ako. 2:6, 7) Rangarirai kubetsera kakaita nhungamiriro dza Djehovha, mazano ake uye kudziirira kake ku aseenzi ake e kare. Nge muezaniso, paciono Ezekieri wakanyasa kuringira ngirozi payaipima tempro. Ciono cakabambisa Ezekieri uye cakatifundisa zviro zvinokosha pa mushobo wekudziirira uye kuzwira mitemo ya Djehovha pakunamata kakacena. d (Ezek. 40:1-4; 43:10-12) Isusu tinobetserekawo patinofunda uye patinonyasa kurangarira zviro zvese zvakaitika uye no zviro zvakadzika zviri mu Soko ra Mwari.

16. Mwoyo wakabamba wa Bob wakamudziirira kudini? (Pisarema 112:7)

¹⁶ Bambisai mwoyo wenyu. Mambo Dhavhidhi wakabhuya kuti wainga asikazosii kuda Djehovha, iyena wakaemba eciti: “Mwoyo wangu wakabamba, Haiwa Mwari.” (Pis. 57:7) Isusuwo tingakwanisa kugara no mwoyo wakabamba tecigonda Djehovha zvakadjeka. (Erengai Pisarema 112:7.) Onai muezaniso wa Bob, wapanganidzwa pakutanga. Mamedhiko paakamubvunza kuti awona ainga ano ngazi yakagadzirirhwa kudai zvaizodikana kuti aizwe operasau, asikazi kurangarira zvakawanda iyena wakadaira kuti, kudai painga pano mukana wekumukanda ngazi, iyena waizobuda mu cipitari no kukasika. Mumasure mazvo, Bob wakati: “Inini ndainga ndino cokwadi cekuti ndizvona  zvandaida kuita uye ndainga ndisikathyi pa zviya zvaizoitika.”

17. Tinofundei kubva pa esperiensiya ya Bob? (Onaiwo foto.)

¹⁷ Bob wakakwanisa kurumbwa akabamba ngokuti asati aenda ku cipitari iyena wainga akasanangura kare zvaaizoita. Cekutanga, iyena waida kuti cisananguro cake cipfadze Djehovha. Cecipiri, iyena wakanyasa kufunda Bhaibheri no mabhuku edu anobhuya ngezve rucena re upenyu uye ngazi. Cecitatu, iyena wainga ano cokwadi cekuti kutondoedza nhungamiriro dza Djehovha kainga kakamunakira. Isusuwo tingakwanisa kugara no mwoyo wakabamba azvinei no zvinetso zvatinonga tecibatana nazvo.

18. Muezaniso wa Bharaki unotifundisei pa nyaya ye kugonda Djehovha? (Onai foto ye pa kapa.)

¹⁸ Gondai Djehovha. Onai kuti Bharaki wakabudirira kudini ngekugonda nhungamiriro dza Djehovha. Panguwa iyona, Aisraeri ainga asikazi kugadzirira kuti aende ku hondo, uye awona ainga asina zviro zvekurhwa nazvo. Asi Djehovha akabvunza Bharaki kuti aende uye arhwisane no mutungamiriri we cikwata ce anyahondo we Akenani waizwi Sisera Wainga ano zviro zvekurhwa nazvo. (Ato. 5:8) Muphorofitakadzi Dhebhora wakabvunza Bharaki kuti iyena aende ku mbuto yakati sandara kuti aende koonana na Sisera wainga ano karu 900 dze hondo. Zvaizogara nyore ku Akenani kuti arhwisane pa mbuto yakati sandara nge ndaa ye ngoro dzawo. Kunyazi zvakadaro, Bharaki wakapurutana. Paainga eciterera Dunhu Tabhori, Djehovha akanaisa mvura ino simba. Uye makaru e hondo a Sisera akatanga ku goorera mu matope uye Djehovha akaita kuti Bharaki awine. (Ato. 4:1-7, 10, 13-16) Nge mushobo umwewo, Djehovha acaita kuti isusu tiwine kana tikagonda maari eciseenzesa sangano rake.—Dhe. 31:6.

19. Ngei mecidikana kurumbwa makabamba uye musikazungunuki?

¹⁹ Kupeta masimba katinoita kuti tirumbwe takabamba kucarumbwa kuripo patinonga tecirarama pa migariro ino ye zviro. (1 Ti. 6:11, 12; 2 Ped. 3:17) Ngatirumbwe takashinga kuti tisazununguswe nge ndaa ye kuteererhwa, kubambidzirhwa kusikazwisisiki, mushobo wekurangarira usikapindirani no mitemo ya Djehovha, masoko ekunyepa uye zviro zvinokangaidza. (Aef. 4:14) Pane kudaro, ngatirumbwe takabamba, tisikazungunuki tecida Djehovha uye tecizwira nhungamiriro dzake. Nge dii rimweni, tinodikana kugara anhu anozwisisa. Mu fundo inoteera, ticaona kuti Djehovha na Djesu anopangidza kudini muezaniso wakanaka panyaya yekuzwisisa.