Baba angu ainga ari pastori ku Gereja Unida re Canadá, uye gereja irona rainga rino urongwa wekufundisa ana adoko. Ngekudaro, baba angu ainditora pamwepo no munukuna wangu kuti tiende kofundiswa muma Biningu ese cemacibesi, mumasure mazvo, muma 11 ora dze macibesi taisongana kuti tizwe mharido ku gereja. Cemasikati taienda ku Nyumba ye Umambo na Mai angu, uye taikwanisa kuona musiyano wainga uripo pakati pe magereja mairi aya.

Mai angu akabvunza shamwari dzawo Bob na Marion Hutcheson zviya zvaainga ecifunda uye awona akatendera cokwadi. Muna 1958 kazado Hutchesons pamwepo no ana awo atatu akanditora kuti tione Gungano re Nyika Dzakawanda re mazuwa 8 rainga rino musoro unoti Vontade Divina ku Thaundi re Nova Iorque. Nyamasi uno ndaakukwanisa kuona kuti ibasa rakakura maningi rakaizwa no aya akanditora kuti tiite rhwendo iri, asi kupinda gungano iri iciro cakanaka maningi cakaitika mu upenyu wangu.

Pandainga ndiciri murumbwana, inini ndaigara mu farma yekuti ndaipfarira kucengeta zvinyama, uye ndaitorangarira kugara medhiko we zvinyama. Mai angu akareketa ngezvazvo no mukuru umweni we ungano. Uye ecizviita no rudo, iyena wakandiedzurira kuti tirikurarama mu “mazuwa e kupedzesera” uye kuti kuita univhersidhadhe ke makore akawanda kaizokuwadza ushamwari wangu na Djehovha. (2 Ti. 3:1) Ndiyo  ndaa ndakasanangura kusama kuenda koofunda ku univhersidhadhe.

Asi inini ndaindorangarira zvandaizoita mumasure mekupedza kufunda. Kunyazi ndaibuda mu basa rekuparidzira mu masumana ese, inini ndainga ndisikapfariri kuparidzira uye ndainga ndisikadzioni hinga piyonero. Nge dii rimweni, baba angu ainga asiripi Mupupuri wa Djehovha na tsekuru angu aindikohomedzesa kuti ndiseenze mazuwa ese mu empreza ye seguros ku Toronto. Tsekuru angu ainga ano cigaro cinokosha ikona, ndiyo ndaa ndakatenda basero.

Ku Toronto, inini ndaiseenza maningi uye ndaipedza nguwa yakawanda no anhu ainga asiripi Apupuri a Djehovha. Izvona zvakapedzesera zvaakupingaidza kuenda kangu ku misangano mazuwa ese uye kubuda mu basa re kuparidzira. Pakutanga inini ndaigara na mbiya angu ainga asiripi Mupupuri wa Djehovha. Mumasure mekuti awona afa, inini ndaidikana kuenda koogara ku mbuto imweni.

Kazado Hutchesons yakanditora kuti ndiende koopinda gungano muna 1958 akagara abereki kandiri. Awona akandipika kuti ndiende koogara nawo uye akandibetsera kuti ndibudirire pakunamata. Muna 1960, inini ndakabhabhatidzwa pamwepo no mwana wawo John. Uye John wakatanga kuseenza hinga piyonero. Izvona zvakandipfadza uye zvakaita kuti ndibude kakawanda mu basa re kuparidzira. Hama dze mu ungano dzakakwanisa kuona kubudirira kangu uye nekuhamba ke nguwa ndakagadzwa kuti ndigare muonereri we Cikora. a

Muna 1966, inini ndakacata na Randi Berge, piyonera waiseenza no simba uye wainga akagadzirira kuenda koseenza ku mbuto ipi hayo yaidiwa aparidzi akawanda. Muonereri wedu we nharaunda wakatibambisa uye wakatikohomedzesa kuti tifuruke kuenda ku ungano ye Orillia, ku Ontário kuti tibetsere. Hino takarongedza macira edu uye takaenda.

Patakatoguma ku Orillia, inini ndakatanga kuseenza hinga piyonero we nguwa dzese pamwepo na Randi. Mupfaro wake wakandibata-bata! Mumasure mekupeta masimba kuti ndigare piyonero wakanaka, inini ndakatanga kuzwa mupfaro wekuseenzesa Bhaibheri kuti ndibetsere anhu kufunda cokwadi. Ainga ari  makomborero akakura kubetsera kazado imweni yataida maningi ye ku Orillia kuti iite cinjo dzakakura mu upenyu kuti agare aseenzi a Djehovha.

Pataiita rhwendo kuenda ku Toronto, ndakasongana na hama Arnold MacNamara, ainga ari hama imweni yaitungamirira ku Bheteri. Iyona yakatibvunzisa kuti taida here kuseenza hinga mapiyonero espesiyari. Pa nguwa iyona kamare ndakadaira kuti: “Tingaenda ku mbuto ipi hayo! Kusiya ku Quebec!” Inini ndainga ndakapfurudzirhwa no rusananguro re anhu e ku Canadá aireketa Cingezi. Hino awona aisanangura anhu e ku Quebec aireketa ci Francês. Pa nguwa iyona painga pano sangano re zvematongerhwe e nyika raida kuti provhinsiya yo Quebec iparadzane no Canadá.

Hama Arnold akadaira eciti: “Ona, Quebec ndiyona mbuto imwe basi irikutumirhwa mapiyonero espensiyari ngo Bheteri.” Inini ndakatenda ciriporipoco uye ndainga ndootoziyawo kuti Randi waida maningi kuseenzereyo. Mumasure mazvo ndakaona kuti ici ndicimwe ce zvisananguro zvakanaka zvatakamboita mu upenyu wedu!

Mumasure mekufundira mureketero we ci Francês ke masumana mashanu, inini na Randi pamwepo no kazado imweni takaenda ku Rimouski uno mukuwo unokwana kuita 540 kubva ikona kuenda ku Montreal. Isusu taireketa padoko ci Francês uye izvona zvakabuda pamhene pandakaerenga zviziiso zvimweni. Pandaiziisa ngezve gungano raizoteera, inini ndakavhiringidzika pa masoko. Pane kuti ndibhuye kuti taizovhakacirhwa nge “hama dze Áustria,” inini ndakabhuya kuti taizovhakacirhwa nge “hama dze avestruzes.”

Ku Rimouski, isusu takabetserhwa nge hanzvadzi dzirongomuna dzainga dzisikazi kuwakwa dzaiseenza no simba, uye takabetserhwawo no mhuri Huberdeaus yainga ino ana airi. Kazado Huberdeaus yakarugari nyumba yakakura yekuti mapiyonero ese agaremo. Mapiyonero aibetsera pakupagari mare ye kurugari. Isusu taidainza mbuto iyona kuti Nyumba Yakacena ngekuti yainga yakapintarhwi no tinta yekucena. Kakawanda kakhona, painga pano anhu 12 kana 14 aigara ipona. Hinga mapiyonero espesiyari, inini na Randi taiparidzira cemacibesi dakara usiku, ndiyo ndaa taitenda maningi ngekuti nguwa dzese painga pano munhu waikwanisa kutiperekedza mu basa re kuparidzira, kunyazi usiku nguwa dzekuti kaitonhora maningi.

Isusu takagara shamwari de padhuze ku mapiyonero aya zvekuti awona akagara hinga mhuri katiri. Nguwa dzimweni isusu taigara tecigota muriro uye taidusa “zuwa rimwe” rekuti tibike tiri pamwepo. Hama imwe yaiemba uye muma Sabudu ese ceusiku isusu taiungana kuti tiembe uye titambe.

Anhu akawanda ku Rimouski akapangidza kupfarira Bhaibheri! Pa makore mashanu, isusu takagara no mupfaro wekuona afundi akawanda e Bhaibheri ecibudirira uye ecibhabhatidzwa. Ungano iyona yakagara no aparidzi anokwana kuita 35.

Ku Quebec, isusu takanyasa kurowedzwa kuitira basa re kuparidzira. Takaona kuti Djehovha akatibetsera kudini pa basa re kuparidzira uye pa zviro zvekunyama. Kusiya izvona, takafundira kuda anhu e mbuto iyona, tsika dzawo uye mureketero we ci Francês. Izvona zvakatibetsera kuti tidewo tsika dzimweni.—2 Ako. 6:13.

Patainga tisikatoetseri, Bheteri rakatikumbira kuti tifuruke tiende ku thaundi re Tracadie inogara kumabvazuwa ke Nova Brunswick. Kuita izvona zvakatishuphira ngekuti tainga tapedza kurugari nyumba uye tainga tapedza kuasinari kontrato yekuseenza mazuwa manganani pa sumana hingana mufundisi ku cikora cimweni. Kusiya izvona, afundi amweni ainga abva kugara aparidzi asikazi kubhabhatidzwa uye isusu tainga tiri pakati pe kuwaka Nyumba yedu ye Umambo.

 Isusu takanamata mu mapeto ese e sumana uye takavhakacira thaundi re Tracadie rainga rakasiyana maningi no thaundi re Rimouski. Asi ngekuti Djehovha aida kuti tiendeyo, isusu takasangura kuendeyo. Isusu takaedza Djehovha uye takaona kuti iyena akadusa zvitsinzwa zvese zvainga mu gwanza redu. (Mara. 3:10) Uye kuita cinjo ii zvakaita nyore ngekuti hinga mazuwa ese Randi uno ushamwari wakabamba na Djehovha, wakagadzirira kuseenza uye unogara ecipfara.

Mukuru umwe basi wainga ari ku ungano yedu ipsva wainga ari Robert Ross. Iyena wainga aseenzereyo hinga piyonero pamwepo no mukadzi wake Linda, uye akasanangura kurumbwa ariyo mumasure mekubara mwana wawo wekutanga. Kunyazi ecicengeta mwana, awona akarumbwa eciseenza no simba mu basa re kuparidzira uye ecitambira arendo zvakanaka, uye izvona zvakatibambisa maningi.

Mumasure mekuseenza hinga mapiyonero ku Tracadie ke makore mairi, takashamiswazve. Takatambira mupiko wekuseenza hinga muonereri we nharaunda. Ke makore manomwe, isusu takaseenza ku nharaunda dzakawanda dzaireketa mureketero we Cingezi uye mumasure mazvo takagadzwa kuti tiseenze mu nharaunda inoreketa mureketero we ci Francês ku Quebec. Muonereri wedu we dhistrito ku Quebec, Léonce Crépeault, waigara ecisimba mharidzo dzangu. Asi mumasure mazvo iyena waigara ecindibvunzisa kuti: “Mumaonero ako, ungaita kudini kuti mharidzo dzako dzinyase kubetsera?” b Kupfarira kaaiita kundibetsera kakaita kuti pagare no musiyano pakuita kuti mharidzo dzangu dzigare no cinangwa uye dziite nyore kuzwisisa.

Rimwe re mabasa andinogara ndeciedzurira, ibasa randakapaswa kuti ndiite ku Gungano re Nyika Dzakawanda rainga rino musoro unoti: “Fé Vitoriosa” ku Montreal muna 1978. Inini ndaiseenza mu Dhepartamento re Zvekurhya. Isusu taidikana kupasa zvekurhya anhu anokwana kuita 80 000, uye taibva kutambira nhungamiriro dzipsva dzekuti taidikana kuita kudini basa iri. Zvese zvainga zviri zvipsva: maekipamento, mundandanda we zviro zvekurhya uye mushobo wekugadzirira zvekurha. Isusu tainga tino majirera anokwana kuita 20 uye ainga asikanyasi kuseenza zvakanaka. Nge ndaa ye mutambo we bhora, isusu taikwanisa kupinda mu kampu kuti tigadzirire zvese pakati pe usiku gungano risati ratanga. Uye taidikana kudzisa maforno zuwa risati rabuda kuti tigadzirire matabico! Isusu takaremba maningi asi inini ndakafunda zvakawanda kubva ku adzipiri akakura pakunamata aiseenza no simba uye aigara ecipfara. Ushamwari watakaumba ku  gungano irona ucakabamba dakara na nyamasi uno. Katiri mupfaro wakakura kuoneka ku gungano irona rinokosha ku Quebec, ku mbuto imweyo yekuti muna 1940 uye 1950 hama dzaiteererhwa!

Inini ndakafunda zvakawanda kubva ku hama dzakawanda dzaionerera mabasa akakura e magungano ku Montreal. Gore rimweni, hama David Splane arikuseenza zvino mu Dare Rinotungamirira ainga ari muonereri we gungano. Pa Gungano rimweni, inini ndakagadzwa kuti ndiite basa irona uye hama David akanditsigira.

Muna 2011, mumasure mekuti isusu taseenza mu basa re muonereri we nharaunda ke makore 36, inini ndakapikwa kuti ndiseenze hinga mufundisi we Cikora ce Akuru e mu Ungano. Ke makore mairi pa basa iri, inini na Randi takawata pa kama dzinokwana kuita 75 dzakasiyana, asi kudzipira uku kakabetsera. Pa mapeto e sumana imwe na imwe e cikora, akuru aipfara uye aitenda maningi ngekuona Dare Rinotungamirira recinetseka nge ndaa ye kutenda kawo.

Pedzepo, inini ndakagadzwa kuti ndigare mufundisi we Cikora ce Aziisi e Umambo. Kakawanda kakhona afundi aigara akaremba uye ecinetseka nge ndaa ye urongwa wainga wakabatikana: kugara nguwa dzinokwana kuita 7 mazuwa ese ecifunda, kuita ma tpc kumba ke nguwa dzinokwana kuita 3 uye ce usiku, uye kugadzirira matii anokwana kuita 4 kana 5 e sumana yese. Inini no mufundisi umweni takapanganidzira afundi kuti awona aizokwanisa kuita zvese izvi no rubetso ra Djehovha. Ndicagara ndecindoedzurira kushamisika kaiita afundi paaiona kuti kana akagonda na Djehovha, awona aizokwanisa kuita zvakawanda kudarika zviya zvaainga asikarangariri.

Kupangidza kupfarira amweni kaiita mai angu kakaita kuti afundi awo abudirire pakunamata uye kakaitawo kuti baba angu acinje maitiro awo kuti ade cokwadi. Mumasure me mazuwa matatu mekuti mai angu afa, takashamisika maningi baba angu paakapurutana mharidzo ye Bhaibheri ku Nyumba ye Umambo, uye awona akarumbwa ecipinda misangano ke makore 26 akazoteera. Baba angu aasati abhabhatidzwa, asi akuru akandibvunza kuti ndiwona anotanga kuguma pa misangano masumana ese.

Mai angu ainga ari muezaniso wakanaka kandiri uye ku hanzvadzi dzangu dzitatu. Awona pamwepo no amuna awo arikuseenzera Djehovha akagondeka. Airi awo arikuseenzera ku Bheteri—umwe ku Portugal uye umweni ku Haiti.

Parizvino, inini na Randi tirikuseenza hinga mapiyonero espesiyari ku Hamilton, ku Ontário. Pataiseenza hinga muonereri we nharaunda isusu taipfarira kuperekedza hama dzecienda koohwiririra aya apfarira uye dzeciitisa fundo dzawo dze Bhaibheri. Asi parizvino tinopfara ngekuitisa fundo dzedu kamare dze Bhaibheri uye kuona pakubudirira kawo pakunamata. Mu ungano yedu ipsva isusu tino ushamwari we padhuze no hama no hanzvadzi uye tinobambiswa maningi ngekuona Djehovha ecicengeta umwe na umwe wawo pa nguwa dzakanaka uye dzakashata.

Pandinoringira sure, isusu tinotenda maningi ngekupangidzirhwa kupfarirhwa nge anhu amweni. Ndiyo ndaa isusu tinoedza kupangidza “kupfarira ke cokwadi” ku amweni teciabambisa ngekupeta kawo masimba pakuseenzera Djehovha. (2 Ako. 7:6, 7) Ngo muezaniso, mu mhuri imweni, mai, mwana we mwanarume uye we mwanakadzi aiseenza hinga mapiyonero. Inini ndakabvunzisa baba awo kuti makambo rangarirawo kuseenza hinga piyonero here? Awona akati inini ndaakutsigira mapiyonero matatu pa nyumba pano. Hino ndaakabvunzisa kuti: “Kodi kutsigira kenyu kunodarika kutsigira kunoita Djehovha here?” Inini ndakaabvunza kuti awona aizokwanisa kuzwa mupfaro umwewo urikuzwa nhengo dze mhuri yawo. Mumasure me mwedzi mitanhatu awona akagara piyonero.

Inini na Randi ticarumbwa tecibvunza “mubarirhwana unoteera” ngezve “mabasa anoshamisa” uye tinoetsera kuti awona acazwawo mupfaro umwewo watirikuzwa mu basa ra Djehovha.—Pis. 71:17, 18.