1. Ngei zvecikosha kugara takagadzirira munguwa icazoitika tsawana dzinoitika dzoga?

 KUGADZIRIRA kunoponesa upenyu. Kana pakaitika tsawana dzinoitika dzoga, anhu akagadzirira ndiwo ano mukana wekupona uye wekubetsera amweni. Sangano re ajuda humanitária re ku Europa rakati: “Kunyasa kugadzirira kunoita kuti pagare no musiyano we kutama kugadzirira.”

2. Ngei tinodikana kugara takagadzirira kuitira dambudziko guru? (Mateu 24:44)

² “Dambudziko guru” ricatanga pa nguwa yatisikakariri. (Mat. 24:21) Mukusiyana no tsawana dzimweni, isusu taakuetsera ngezve dambudziko iri. Makore 2000 a adarika Djesu akabvunza ateeri ake kuti awona aidikana kugara akagadzirira pa zuwa iri. (Erengai Mateu 24:44.) Kana tikagara takagadzirira, zvinonga zviri nyore kuti isusu tikwanise kukurira nguwa ii inoshupha uye tibetsere amweni kuti aite zvimwezvo.—Ruka 21:36.

3. Mawara e kushingirira, usisi uye rudo acatibetsera kudini kuti tigare takagadzirira kuitira dambudziko guru?

³ Ticaona mawara matatu acatibetsera kuti tigare takagadzirira kuitira dambudziko guru. Tinodikana kuitei kana zvecizodikana kuti tiparidzire masoko anorhwadza ekutonga uye tikateererhwa? (Zvak. 16:21) Tinozoda kushingirira kuti tizwire Djehovha, tecigonda kuti iyena anotidziirira. Ticazoitei kana hama dzedu dzikaruza zviro zvese zvekunyama? (Abha. 3:17, 18) Tinozodikana kupangidza usisi kuti tipase rubetso raanoda. Tinozoitei kana kurhwiswa ke mubatanidzwa we madzinza ukaita kuti isusu tigare pamwepo no hama dzedu pa cimbuto cidoko ke nguwa yakareba? (Ezek. 38:10-12) Tinozodikana kugara no rudo rakabamba ku hama dzedu kuti tikwanise kukurira nguwa ii inoshupha.

4. Bhaibheri rinopangidza kudini kuti tinodikana kurumbwa tecipangidza kushingirira, usisi uye rudo?

⁴ Soko ra Mwari rinotikohomedzesa kuti tirumbwe tecipangidza kushingirira, usisi uye rudo. Ruka 21:19 inoti: “Nge kushingirira  kenyu, imwimwi mucaponesa upenyu wenyu.” Akorosi 3:12 inoti: “Pangidziranai . . . usisi.” Uye 1 Atesaronika 4:9, 10 inoti: “Imwimwi munofundiswa na Mwari kuti mudanane. . . . Asi isusu tinomukohomedzesai hama, kuti murumbwe mecitunhudzira kuita kudaro.” Masoko aya akatarirhwa ku afundi ainga aakupangidza usisi kushingirira uye rudo. Asi kunyazi zvakadaro, awona aidikana kurumbwa ecipangidza mawara aya. Isusu tinodikana kuitawo zvimwezvo. Kuti tibetsereke ngatione kuti Akristu ekutanga akapangidza kudini mawara aya. Uyewo, ticaona kuti tingateedzera kudini afundi aya, uye topangidza kuti takagadzirira pacazoitika dambudziko guru.

5. Akristu e kare akashingirira kudini paaibatana no zvinetso?

⁵ Akristu ekutanga aidikana kushingirira. (Aheb. 10:36) Awona ainga ano zvinetso zvimwezvo hinga zvaibatana no anhu e munguwa iyona, asi awona ainga ano zvinetso zvakawanda ngekuti ainga ari Akristu. Akawanda awo akateererhwa haiwa basi no atungamiriri e magereja e Cidjudha kana kuti no atongi e Ciroma asi aitoteererhwawo no anhu e mumhuri mawo. (Mat. 10:21) Uye mukati me ungano nguwa dzimweni, awona aidikana kuti apete masimba kuti arhwise fundiso dze manyepo dze anhu akapanduka dzaikwanisa kuita kuti ungano iparadzane. (Zvii. 20:29, 30) Kunyazi zvakadaro, Akristu aya akashingirira. (Zvak. 2:3) Akazviita kudini? Awona aitora nguwa kuti arangarire ngezve miezaniso ye anhu akashingirira, yaaigumira mu matarhwa akadai hingana ya Djobo. (Tig. 5:10, 11) Awona aiita munamato ecikumbira simba. (Zvii. 4:29-31) Uye aikanda ndangariro dzawo pamigumisiro yakanaka kuti arumbwe ecishingirira.—Zvii. 5:41.

6. Mafundei kubva pa zviro zvakaitika na Merita kuti ashingirire?

⁶ Isusu tingakwanisawo kushingirira kana tikafunda uye kunyasa kurangarira ngezve miezaniso yekushingirira yatinogumira mu Soko ra Mwari uye mu mabhuku edu. Hanzvadzi imweni, yeku Albânia inodainzwa Merita, yakaita izvona uye yakakwanisa kukurira kurhwisa kakakura kayaiizwa no mhuri yayo. Iyona inoti: “Ngano ya Djobo ye mu Bhaibheri yakabaya mwoyo wangu. Iyena wakatambudzika maningi uye wainga asikazii zviro zvaikonzeresa matambudziko, kunyazi zvakadaro iyena wakati: ‘Dakara ndafa, andizosii kugondeka kangu!’ (Djobo 27:5) Inini ndairangarira ngezve matambudziko angu uye ndaiona kuti ainga asiripi ciro eciezaniswa no matambudziko a Djobo. Mukusiyana na iyena, inini ndaiziya zviro zvaiitika kusure ke matambudziko aya.”

7. Kunyazi imwimwi musiripi kubatana no matambudziko akakura zvino, munodikana kufundira kuitei?

⁷ Isusu tingabambisawo kushingirira kedu nge kuita munamato kuna Djehovha nguwa dzese uye kumupanganidzira zviya zviri kutinetsa. (Afi. 4:6; 1 Ate. 5:17) Pamweni imwimwi amuripi kubatana no dambudziko guru pa nguwa ino. Asi, munoita here munamato kuna Djehovha mecikumbira rubetso rake pamunonga makanyangadzwa, pamunonga mecinetseka mu ndangariro kana kuti pamunonga musikazii zvekuita here? Kana imwimwi muno musambo wekukumbira rubetso kuna Djehovha pamunobatana no matambudziko madoko e zuwa no zuwa, imwimwi mungagara no rugondo rekuti mucaitawo izvona pamunonga mecibatana no matambudziko akakura mune ramangwana. Imwimwi mucagara no rugondo rekuti Djehovha anonyasa kuziya nguwa uye mushobo wakanaka wekutipasa rubetso ratinoda.—Pis. 27:1, 3.

8. Muezaniso wa Mira unotipangidza kudini kuti kushingirira nyamasi uno kungakwanisa kutibetsera pa zvinetso zvicauya mune ramangwana? (Tiyago 1:2-4) (Onaiwo foto.)

⁸ Kana tikashingirira patinobatana no zvinetso zvino zvicagara nyore kuita izvona pa nguwa ye dambudziko guru. (Aro. 5:3) Tinozviziya  kudini izvona? Hama dzakawanda dzakaona kuti nguwa dzese dzaanokurira muedzo wekutenda awona anozwa akabamba kuti akurire pa dambudziko rinoteera. Paanobatana no dambudziko uye oshingirira kutenda kaanoita kekuti Djehovha akagadzirira kuabetsera kunorumbwa kecitunhudzira. Kutenda ikona, kunoabetsera kuti awona akurire dambudziko rinoteera. (Erengai Tiyago 1:2-4.) Ndizvo zvakaitika na piyonera umweni we ku Albânia unodainzwa Mira. Nge ndaa ye zvinetso zvaakabatana nazvo kare, iyena unozwa wakabamba kuti arumbwe ecishingirira nyamasi uno. Iyena unotendera kuti nguwa dzimweni wairangarira kuti wainga ano matambudziko akawanda. Pedzepo iyena waiedzurira zviro zvese zvaakaizirhwa na Djehovha mu makore 20 adarika uye wairangarira kuti: ‘Rumbwa wakagondeka. Usasiye kuti makore ese no zvinetso zvese zvawakunda no rubetso ra Djehovha zviruzike.’ Imwimwi mungarangarirawo ngezve mushobo wamakabetserhwa na Djehovha kuti mushingirire. Garai no rugondo rekuti Djehovha anonga akaringisa pa nguwa dzese dzamunoshingirira uye iyena acamukomborera. (Mat. 5:10-12) Uye dambudziko guru parinozotanga, imwimwi munonga makafunda kushingirira uye mucagara makashinga kuti murumbwe meciita izvona.

9. Ungano ye Antiyokiya ye ku Siriya yakapangidza kudini usisi?

⁹ Onai zvakaitika ku Akristu e Cidjudha paakabatana no cinetso ce nzara. Ungano ye ku Antiyokiya ye ku Siriya payakaziya ngezve dambudziko iri re nzara, apana mubvunzo kuti awona akazwira usisi ku hama dzawo dzeku Djudha. Awona aazi kugumira pakuzwira usisi basi, asi akaita ciito. Awona “akasanangura kuti umwe na umwe, maererano no zvaanokwanisa atumire rubetso ku hama dzaigara ku Djudhiya.” (Zvii. 11:27-30) Kunyazi hama dzaibatana no nzara dzaigara kure maningi, Akristu e ku Antiyokiya ainga akashinga kuabetsera.—1 Juau 3:17, 18.

10. Mishobo ipi yatingapangidza nawo usisi hama dzedu padzinobatana no tsawana dzinoitika dzoga? (Onaiwo foto.)

¹⁰ Nyamasi uno isusu tingapangidzawo usisi patinoziya kuti hama dzedu dzirikubatana no tsawana dzinoitika dzoga. Isusu tinoita ciito nokukasika, tingareketa no akuru kuti tidzipire kuti tibetsere pa basa, tingaita mipiro kuitira basa re mu nyika yese kana kuti tingatoita munamato tecireketa ngezve hama dziri kubatana no tsawana dzinoitika dzoga. b (Zvie. 17:17) Ngo muezaniso, muna 2020, Zvikwata zvinodarika 950 zve Ajuda Humanitária zvakaumbwa mu nyika yese kuti zvibetsere anhu akabatana no nhenda ye COVID-19. Isusu tinotenda no mwoyo wese ku hama ne hanzvadzi dzakapinda mu zvikwata izvi zve ajuda humanitária. Usisi ndiwo wakaita kuti hama ne hanzvadzi dziite kudaro, awona anokuwanisa zviro zvekurarama nazvo, anopasa rubetso re kumwiya uye nguwa dzimweni anogadzirisa uye anotowaka nyumba no mbuto dzekunamatira.—Ezanisai na 2 Akorinti 8:1-4.

11. Patinopangidza usisi tinokudza kudini Baba edu Djehovha?

¹¹ Patinopangidza usisi mumasure me tsawana dzinoitika dzoga, anhu amweni anoona zviya zvatinoita. Ngo muezaniso, muna 2019, furakau Dorian yakaphwanya Nyumba ye Umambo ku Bahamas. Pa nguwa yaigadziriswa Nyumba ye Umambo ii hama dzakakumbira ku emprezariyo umweni wainga asiripi Mupupuri wa Djehovha kuti acadje mare nge ndaa ye basa raaidikana kuita. Iyena wakabvunza hama kuti: “Imwimwi amudikani kuripa ciro . . . inini ndicamupasai ekipamento, anhu ekuwaka uye no zviro zvekuseenzesa pakuwaka. . . . Inini ndiri kuita izvona  nge ndaa ye sangano renyu. Inini ndiri kushamisika nge ndaa ye zviro zvamunoitira shamwari dzenyu.” Anhu akawanda mu nyika yese aazii Apupuri a Djehovha. Asi akawanda awo anoona zvinoizwa nge Apupuri a Djehovha kuti abetsere amweni. Isusu tinopfara kuziya kuti patinopangidza usisi ku amweni izvi zvingaita kuti anhu ade kufunda zvakawanda ngezva Djehovha Mwari ano “usisi wakakura”!—Aef. 2:4.

12. Ngei kupangidza usisi nyamasi uno kecitigadzirira pa nguwa icazoitika dambudziko guru? (Zvakapangidzwa 13:16, 17)

¹² Ngei tecizodikana kupangidza usisi pa nguwa inonga yeciitika dambudziko guru? Bhaibheri rinopangidza kuti aya asikatsigiri zve matongerhwe e nyika acabatana no matambudziko zvino, kutobatanidzawo mu nguwa yekutambudzika kukuru. (Erengai Zvakapangidzwa 13:16, 17.) Hama no hanzvadzi dzedu dzingazoda rubetso kuti akwanise kuona zviro zvokuzorarama nazvo. Mambo wedu Djesu Kristu paacazouya kuzotonga anhu tinoda kuti iyena aone kuti tiri kupangidza usisi uye atipike kuti ‘tigare nhaka ye Umambo.’—Mat. 25:34-40.

13. Maererano na Aroma 15:7, Akristu e kare akabambisa kudini rudo rawo ku umwe na umwe wawo?

¹³ Rudo rainga riri cipangidzo cinokosha cainyanya kupangidzwa nge Akristu ekutanga. Asi zvainga zviri nyore here kupangidza rudo? Onai kuti hama dze mu ungano ye ku Roma dzainga dzakasiyana kudini ku umwe no umwe wawo. Pakati pawo painga pano Adjudha ainga akarerhwa no Mutemo wa Mozesi, asi painga pano amweni ainga akarerhwa nge mushobo wakasiyana kamare. Akristu amweni ainga ari aranda uye amweni ainga akasudzunuka pamweni Akristu amweni aitoseenzerhwawo no aranda. Hino Akristu akakwanisana kudini no misiyano idzi uye akabambisa kudini rudo rawo ku umwe na umwe? Muphostori Pauro wakakohomedzesa Akristu kuti “tambiranai.” (Erengai Aroma 15:7.) Iyena waida kureyei? Soko re Cigrego rakaturikirhwa kuti “tambiranai” riri kuda kureya ngezve kutambira munhu no unaki kana kuti nge mushobo wakanaka. Zvakatodzana no kuti munhu unotambira munhu umweni panyumba pake uye unotenda kuti agare shamwari yake. Ngo muezaniso, Pauro wakabvunza Firimoni kuti iyena waidikana kutambira no unaki Onezimo muranda wake wainga watiza. Iyena wakati: “mutambire zvakanaka.” (Firi. 17) Akira na Prisira akatambirawo Aporo, “awona akamutora” uye akamubetsera pakutunhudzira ruziyo rake re Cikristu. (Zvii. 18:26) Pane kusiya kuti musiyano uite kuti hama dziparadzane Akristu aya akakurira misiyano yawo uye akatambirana.

14. Anna no mwamuna wake akapangidza kudini rudo?

¹⁴ Isusu tingapangidzawo rudo ku hama no hanzvadzi patinoita ushamwari uye patinopedza nguwa tiri pamwepo. Kana tikadaro, awona acazwa ecida kutipangidzirawo rudo. (2 Ako. 6:11-13) Onai zvakaitika kuna Anna no mwamuna wake. Mumasure mekutambira basa ripsva re umisiyonariyo uye kuti acinje aende ku África Ocidental, nhenda ye COVID-19 yakatanga. Awona ainga acabva kuguma asi zvainga zvisikadikani kuti aonane no hama. Ngazvipi zvaakaita kuti apangidze rudo? Awona aithurufunariri hama dzimweni eciseenzesa vhidhiyo konferensiya ecipangidza kuti aida kuwaziya zvakanaka. Hama dzakatenda maningi rudo rakapangidzwa no mamisiyonariyo aya uye awona akatanga kuathurufunariri uye kuatumirawo mamensaji. Ngei kazado ii ye misiyonariyo yakapeta masimba kuti inyase kuziya hama? Anna unopanganidza kuti: “Inini andizombokanganwi zvakaizwa no hama no hanzvadzi kuti andipangidzire rudo kandiri no ku mhuri yangu pa nguwa yakanaka no yakashata. Muezaniso wawo unotipasawo simba kuti tipangidzewo rudo.”

15. Ngazvipi zvamafunda kubva pa muezaniso wa Vanessa wakaringana nokuda hama no hanzvadzi dzese? (Onaiwo foto.)

 ¹⁵ Akawanda edu tiri mu ungano dzinoumbwa no hama no hanzvandzi dzakarerhwa nge mushobo wakasiyana-siyana uye ano mawara akasiyana-siyana. Tingabambisa rudo redu kaari kana tikakanda ndangariro dzedu pamawara akanaka. Hanzvadzi imweni yeku Nova Zelândia inozwi Vanessa, yaiona hingana zvinoshupha kugara zvakanaka no hama mu ungano. Asi pedzepo iyona yakasanangura kuti pane kuti isiye kutamba no hama idzi dzainga dzino mawara aimunyangadza, iyona yaidikana kupedza nguwa nawo. Ngekuita izvona iyona yakafundira kuona zviro zvaiita kuti Djehovha ade hama idzi. Iyona inopanganidza kuti: “Kubvira pa nguwa yekuti mwamuna wangu wakagara muonereri we nharaunda, isusu takatanga kupedza nguwa yakawanda no hama no hanzvadzi dzainga dzino mawara akasiyana-siyana, asi zvino inini ndaakuona kuti zviri nyore kugarisana nawo. Inini ndinopfarira manigi kusiyana uku. Zvezvirokwazvo Djehovha anodawo musiyano uu, ngekuti anhu aanodainza kana kuti aanopika kusangano rake ndi anhu akasiyana-siyana.” Patinofundira kuona amweni hinga mushobo waanooniwa na Djehovha, isusu tinonga tecipangidza kuti tino rudo kaari.—2 Ako. 8:24.

16. Ngei zvecikosha maningi kupangidza rudo pa nguwa yekutambudzika kukuru? (Onaiwo foto.)

¹⁶ Rudo ricagara ciro cinokosha pa nguwa yedambudziko guru. Rangaridzai zvinoteera, dambudziko guru paricatanga Djehovha acaticengetedza kudini? Onai nhungamiriro dzakapasa Djehovha ku anhu ake paakarhwiswa no Abhabhironi munguwa ye kare. Iyena akati: “Endai anhu angu, pindai mu makwartu enyu, mofunga misuwo. Findarai ke nguwa doko dakara kutsamwa kapera.” (Isa. 26:20) Pamweni nhungamiriro idzi dzingazoseenzawo pa nguwa ye dambudziko guru. “Makwartu” pamweni ari kuda kureya ungano dzedu. Mu nguwa ye dambudziko guru, isusu ticadziirirhwa na Djehovha kana tikarumbwa takabatana no hama dzedu. Ndiyo ndaa, tinodikana kupeta masimba zvino haiwa basi kuti tizwisise hama no hanzvadzi dzedu, asi kuti tifundirewo kudzida. Pamweni kupona kedu kunozotsamira pakuita izvona!

17. Kana tikagara takagadzirira zvino, ngazvipi zvatinozokwanisa kuita mu nguwa yedambudziko guru?

¹⁷ “Zuwa guru ra Djehovha” inonga iri nguwa inoshupha. (Zef. 1:14, 15) Uye anhu a Djehovha acashuphikawo. Asi kana tikagadzirira zvino, ticarumbwa takaterama uye tobetsera amweni. Ticakurira matambudziko api hawo angamuka no kushingirira. Hama dzedu padzinonga dzecitambudzika, ticaita zvese zvatinokwanisa kuti tiabetsere uye tiapase zvese zvaanoda teciapangidzira usisi. Uye ticarumbwa tiri dhuze no hama no hanzvadzi dzedu, tecipangidza rudo kaari. Djehovha acatikomborera no upenyu usikaperi mu nyika yekuti tsawana dzese uye matambudziko ese anonga apera.—Isa. 65:17.