1. Izvokwadi zvipi zvamakafunda pamakatanga kufunda Bhaibheri?

 IMWIMWI muciri kuedzurira pamakatanga kufunda Bhaibheri here? Pamweni makashamisika pamakaziya kuti Mwari ano zina. Kana kuti makazorodzwa pamakaziya kuti Mwari aatambudzi anhu murindi re muriro. Uye pamweni imwimwi makapfara pamakafunda kuti mucakwanisa kuonazve anhu amaida akafa uye mucararama nawo pamwepo mu paraizo pa nyika pano.

2. Pane kufunda zvokwadi zve mu Bhaibheri basi, matii api amweni amakabudirira pakunamata? (Aefeso 5:1, 2)

² Pamairumbwa mecifunda Soko ra Mwari, rudo renyu na Djehovha rairumbwa recikurawo. Rudo irona raimuita kuti museenzese zviya zvamaifunda. Imwimwi makatanga kuita zvisananguro zvakanaka zvinotsamira mu zvokwadi zvo Bhaibheri. Imwimwi makacinja maitiro enyu uye migariro yenyu ngekuti maida kupfadza Mwari. Kuita hinga mwana unoteedzera baba ake ano rudo, imwimwi maiteedzerawo Baba enyu ekudenga.—Erengai Aefeso 5:1, 2.

3. Mibvunzo dzipi dzatinodikana kudziita?

³ Tingadzibvunzisa kuti: ‘Kodi rudo rangu kuna Djehovha riri kurumbwa recibamba kupinda pa nguwa ya ndakatanga kugara Mukristu here? Kodi mushobo wangu wekurangarira uye wekuita zviro mumasure mekubhabhatidzwa, wakaezana no zvinodiwa na Djehovha here? Kodi ndiri kurumbwa ndecipangidza rudo ku hama no hanzvadzi dzangu here?’ Asi mukaona kuti “rudo ramainga munaro pakutanga” ratonhora, musanyanye kunetseka. Zviro hingana izvi zvakaitikawo no Akristu e kare. Pezvakaitika Djesu aazi kuasiya, uyewo aazotisiiwo. (Zvak. 2:4, 7) Iyena anoziya kuti tingakwanisazve kugara no rudo ratainga tinaro patakatanga kuziya cokwadi.

4. Ticaonei mu fundo ino?

 ⁴ Mu fundo ino ticaona kuti ngazvipi zvatingaita kuti tirumbwe tecikura mu rudo ra Djehovha uye no amweni. Uye ticaonawo makomborero aticatambira kana tikarumbwa tecinyasa kuda Djehovha no hama dzedu.

5-6. I ngozi dzipi dzakabatana no muphostori Pauro mubasa rake re kuparidzira, asi ngazvipi zvakamupasa simba rekuti arumbwe eciseenzera Djehovha?

⁵ Muphostori Pauro waipfara maningi nge kuseenzera Djehovha, asi zvainga zvisiripi nyore nguwa dzese. Pauro waidikana kuhamba mukuwo wakareba, asi kuhamba panguwa iyona kaishupha maningi. Nguwa dzimweni pa rhwendo rake, Pauro waibatana “no ngozi dze murambo” uye “no ngozi dze mbavha.” Uyezve nguwa dzimweni Pauro waitopondhwa. (2 Ako. 11:23-27) Nguwa dzimweni hama dzainga dzisikareremedzi kupeta masimba kaaiita kuti aabetsere.—2 Ako. 10:10; Afi. 4:15.

⁶ Ngazvipi zvakabetsera Pauro kuti arumbwe eciseenzera Djehovha? Pauro wakafunda zvakawanda ngezve mawara a Djehovha kubva mumatarhwa uye kubva pa maesperiensiya ake kamare. Iyena wakagara no cokwadi cekuti Djehovha Mwari aimuda. (Aro. 8:38, 39; Aef. 2:4, 5) Uye iyena wakatanga kuda manigi Djehovha. Pauro wakapangidza rudo rake kuna Djehovha ‘ngekuseenzera acena uye ngekurumbwa eciaseenzera.’—Aheb. 6:10.

7. Tingaitei kuti titunhudzire rudo redu kuna Djehovha?

⁷ Isusu tingatunhudzirawo rudo redu kuna Djehovha nge kunyasa kufunda Soko ra Mwari. Pamunoerenga Bhaibheri, edzai kuona kuti ngano imwe na imwe inomufundisei ngezva Djehovha. Dzibvunzisei kuti: ‘Ngano ii inopangidza kudini kuti Djehovha anondida? Ngano ii inondibetsera kudini kuti ndirumbwe ndecinyasa kuda Djehovha?’

8. Mushobo upi umweni watingaita kuti titunhudzire rudo redu kuna Mwari?

⁸ Mushobo umweni watingaita kuti titunhudzire rudo redu kuna Djehovha ngewe kufunungura mwoyo wedu kaari nguwa dzese ngekuita munamato. (Pis. 25:4, 5) Ngekuita izvona, Djehovha anodaira minamato yedu. (1 Juau 3:21, 22) Hanzvadzi imweni ye ku Ásia inozwi Khanh, yakati: “Pakutanga inini ndaida Djehovha ngekuti ndakafunda ngezvake, asi nokuhamba ke nguwa pandakaona kuti Djehovha ari kudaira minamato yangu inini ndakatunhudzira kumuda. Izvi zvakandipasa simba kuti ndiite zviro kuti ndimupfadze.” b

9. Tinozviziya kudini kuti Timoti waida maningi hama dzake?

⁹ Paapadarika makore manganani mumasure mekugara Mukristu, Pauro wakaziya mudjaha umweni unozwi Timoti. Timoti waida Djehovha uye waidawo amweni. Pauro wakabvunza hama dze ku Firipi kuti: “Andina umwenizve uno mwoyo wakaita hinga wa [Timoti] wekuti ucanyasa kumubetserai.” (Afi. 2:20) Pauro wainga asikareketi ngezve zviro zvaikwanisa kuizwa ndi Timoti pakutungamirira kana kuti pakuita mharidzo zvakanaka, cokwadi ngece kuti Pauro waishamisika no rudo rainga rina Timoti ku hama no hanzvadzi dzake. Apana mubvunzo kuti ungano dzaivhakacirhwa na Timoti dzaigara no cidaka-daka cekumutambira.—1 Ako. 4:17.

10. Anna no mwamuna wake akapangidza kudini rudo ku hama dzawo?

¹⁰ Isusuwo tinopsvaka mishobo yekubetsera hama dzedu. (Aheb. 13:16) Onai esperiensiya ya Anna, yakapanganidzwa mu fundo yakadarika. Mumasure mekuitika dutu rino simba, iyena no mwamuna wake akavhakacira  nyumba ye mhuri imweni ye Apupuri a Djehovha uye akaona kuti denga re nyumba yawo rainga rahidhika. Ndiyo ndaa, mhuri iyona yainga isina macira akacena. Anna unoti: “Isusu takatora macira awo kuti tiende koophadza uye takazoahwirinza mumasure mekuaengomari nokuwapeta. Katiri, zviro izvi zvainga zviri zvidoko, asi nge ndaa yazvo dakara nyamasi uno tiri shamwari no shamwari.” Rudo rakapangidzwa na Anna no mwamuna wake ku hama dzake rakaita kuti awona akwanise kuabetsera.—1 Juau 3:17, 18.

11. (a) Amweni anozwa kudini patinoapangidzira rudo? (b) Maererano na Zvierengo 19:17, Djehovha anoitei patinopangidza rudo?

¹¹ Patinobata amweni zvakanaka uye no rudo, awona angaona kuti tiri kuedza kuteedzera Djehovha. Pamweni isusu atizii kureremedza kaanoita kuabata kedu zvakanaka. Khanh, hanzvadzi yamborekethwa pandima dzadarika, inoedzurira no rudo hama dziya dzakaabetsera. Iyona inoti: “Inini ndinotenda maningi nge ndaa ye hanzvadzi dzainditora kuti ndiende mubasa re kuparidzira. Awona aiuya kuzonditora pa nyumba, aindipika kuti tiende koorhya, pedzepo aiuya kuzondisiya pa nyumba ndakacengeteka. Zvino ndaakuona kuti aipeta masimba akawanda. Asi awona, aiita zvese no rudo.” Icokwadi kuti aanhupi ese acatenda zviro zvatinonga taaitira. Khanh unoreketa ngezve anhu akamubetsera eciti: “Inini ndaidawo kuahwirinzira nge ndaa ye unaki waakandipangidzira. Inini, andizii kaanogara, asi Djehovha anoziya uye ndinoita munamato kuti iyena aaitire zviya zvandisikakwanisi kuita.” Zvezvirokwazvo Khanh uri mugwanza. Djehovha anoona zvese zvatinoita kuti tipangidze unaki kunyazi pa zviro zvidoko. Iyena anokoshesa kupeta masimba katinoita uye anozviona hingana magaa aacadikana kuripa.—Erengai Zvierengo 19:17.

12. Hama dzingapangidza kudini rudo mu ungano? (Onaiwo mafoto.)

 ¹² Kana imwimwi muri hama, mungapangidza kudini rudo ku amweni uye kuita zviro kuti muabetsere? Mudjaha umweni unozwi Jordan wakabvunzisa mukuru umweni kuti zvinyi zvaaidikana kuita kuti arumbwe ecibetsera mu ungano. Mukuru wakamutenda ngekubudirira kaainga aita uye wakamupasa mazano e zviro zvaaidikana kutunhudzira kuita mu ungano. Ngo muezaniso, iyena wakabvunza Jordan kuti akasike kuguma pa Nyumba ye Umambo uye acungamidze amweni. Kusiya izvona, iyena waidikana kutunhudzira pakupasa mhinduro pa misangano, kuparidzira nguwa dzese no cikwata ce basa re kuparidzira uye kupsvaka mikana yekubetsera amweni. Jordan wakatondowedza zano iri. Nge ndaa yazvo, pane kufundira zviro zvipsva basi, iyena wakatunhudzirawo rudo rake ku hama no hanzvadzi. Kana hama ikagara mubati anoseenzera, iyona inotanga kubetsera amweni uye inorumbwa yeciabetsera.—1 Ti. 3:8-10, 13.

13. Cinyi cakaitisa kuti hama inozwi Christian ihwirirezve pakuseenza hinga mukuru?

¹³ Hino ngatiti kareko makambogara mubati anoseenzera kana kuti mukuru? Djehovha anoedzurira basa rese ramakambomuitira uye anoedzurira rudo raimuitisai kuti muite izvona. (1 Ako. 15:58) Iyena anoonawo rudo ramuri kurumbwa mecipangidza. Hama inozwi Christian yakatsukwara maningi payakasiya kugara mukuru. Kunyazi zvakadaro, iyona inopanganidza kuti: “Inini ndakaita cisananguro cekuti ndaizoita zvese zvandaikwanisa kuti ndirumbwe ndeciseenzera Djehovha uye ndecipangidza rudo rangu kaari—azvinei kuti ndino ubaba here kana kuti haiwa.” Nokuhamba ke nguwa, Christian wakahwirirazve kuti aseenze hinga mukuru. Iyena unoti: “Inini  ndaithya padoko kuhwirirazve kuseenza  hinga mukuru. Asi ndakasanangura kuti Djehovha no nyasha dzake, aida kuti ndihwirire kuti ndiseenze hinga mukuru. Izvi ndizvo zvandaidikana kuita nge ndaa ye rudo rangu kaari uye ku hama no hanzvadzi dzangu.”

14. Tingafundei kubva pa muezaniso wa Elena?

¹⁴ Aseenzi a Djehovha anopangidzawo rudo ku adoni awo. (Mat. 22:37-39) Ngo muezaniso, hanzvadzi imweni ye ku Geórgia inozwi Elena, inoti: “Pakutanga, ciro cimwe basi caindiita kuti ndiparidze rainga riri rudo rangu kuna Djehovha. Asi rudo rangu kuna Djehovha parairumbwa recitunhudzira, rudo rangu kuno anhu raitunhudzirikawo. Inini ndaiedza kurangarira ndambudziko riri kubatana no munhu umwe na umwe uye nyaya yaizobaya mwoyo wake. Pandairumbwa ndecinyanya kurangarira ngezve anhu nge mushobo uu, cido cangu candainga ndinaco ce kuabetsera caitunhudzira.”—Aro. 10:13-15.

15-16. Hinga zviri kupangidzwa pa mafoto, zviro zvipi zvakanaka zvingakwanisa kuitika kana tikapangidza rudo ku amweni?

¹⁵ Patinopangidza rudo ku hama dzedu, anhu amweni anobetserekawo nazvo. Mumasure me kutanga ke nhenda ye COVID-19, hama inozwi Paolo no mukadzi wayo akabetsera hanzvadzi dzakawanda dzacembera kuti dzifundire kuseenzesa micini ye magetsi kuti dziparidzire. Hanzvadzi imweni yaishuphika maningi pa kuseenzesa mucini we magetsi, asi nokuhamba ke nguwa iyona yakakwanisa kuseenzesa kuti iparidzire. Iyona yakanyasa  kuuseezesa zvakanaka kuti ipike hama dzayo ku cirangaridzo. Hama dzinokwana 60 dze hanzvadzi ii dzakapurutana cirangaridzo nge vhidhiyo-konferensiya! Nge ndaa ye kupeta masimba ka Paolo no mukadzi wake, hanzvadzi ii kutobatanidzawo hama dzayo dzakabetsereka. Pedzepo, hanzvadzi ii yakatarira Paolo yeciti: “Maita basa nge kubetsera hanzvadzi dzacembera dze mu ungano. Inini andizokanganwi mushobo watinorangarirhwa na Djehovha uye nge kupeta masimba kamakaita.”

¹⁶ Maesperiensiya akadai akafundisa fundo dzinokosha kuna Paolo. Iyena wakafunda kuti rudo ndico ciro cinonyanya kukosha kupinda zviro zvatinokwanisa kuita. Iyena unoedzurira kuti: “Inini ndaiseenza hinga muonereri we nharaunda. Nyamasi uno, ndinoona kuti, kunyazi aparidzi asikacaedzuriri mharidzo dzandakaita, asi awona anoedzurira zviro zvandakaita kuti ndiabetsere.”

17. Ndiani unonyanya kubetsereka patinopangidzira rudo?

¹⁷ Patinopangidza rudo ku amweni, isusu kamare tinobetserekawo nge mishobo yatisikarangariri. Jonathan, unogara ku Nova Zelândia unonyasa kuzviziya izvi. Zuwa rimweni nge mu Sabudu cemasikati, kaipisa maningi uye iyena wakaona mupiyonero eciparidzira ari ega. Jonathan wakasanangura kuenda koosenza no mupionero uu muma Sabudu aizoteera cemasikati. Iyena wainga asikarangariri kuti kuita kudaro kaizomubetsera kudini. Jonathan unopanganidza kuti: “Pa nguwa iyona, inini ndainga ndisikapfariri maningi kuparidzira. Asi mumasure mekuona mushobo we kufundisa we mupiyonero uu uye migumisiro yakanaka yekuseenza naye, inini ndakatanga kuda basa rekuparidzira. Kusiya izvona, inini ndakaona shamwari yakandibetsera kuti ndikure pakunamata, ndipfarire basa re kuparidzira uye ndinyase kukhwedera dhuze na Djehovha.”

18. Djehovha anoda kuti tiitei?

¹⁸ Djehovha anoda kuti tese isusu titunhudzire rudo redu kaari uye no amweni. Hinga zvataona mu fundo ino, tingatunhudzira rudo redu kuna Djehovha nge kuerenga Bhaibheri Soko rake, kurangarira nge zviya zvatinofunda uye kuita munamato kaari nguwa dzese. Tingatunhudzirawo rudo redu ku hama no hanzvadzi ngekuita zviro kuti tiabetsere. Rudo redu parinotunhudzira, tinonyasa kukhwedera dhuze na Djehovha uye no mhuri yedu ye kumwiya. Uyewo ushamwari wedu na Djehovha uye no hama dzedu ucagara nokusikaperi!