1. Akristu anodikana kugara hingana muti nge mushobo upi? (Onaiwo foto.)

 ANHU amweni anobhuya kuti “mhepo aikwanisi kugura muti unopeteka.” Masoko aya anopangidza kuti miti imweni kuti ikwanise kurumbwa yakaima dutu parinonga reciitika inodikana kugara inopeteka. Nge mushobo umwewo, kuti tikwanise keseenzera Djehovha no mupfaro, tinodikana kugara anhu anokasika kucinjika panonga pamuka matambudziko mu upenyu wedu. Kuti tikwanisane no cinjo dzo upenyu uye tireremedze maonero e anhu amweni, zvinokosha maningi kuti tigare munhu unozwisisa.

2. Mawara api acatibetsera kuti tidjairane no cinjo uye ngazvipi zvaticaona mu fundo ino?

² Hinga aseenzi a Djehovha, tinoda kupangidza kuzwisisa. Tinodawo kugara munhu unodzidodosa uye uno unaki. Mu fundo ino ticaona kuti mawara aya akabetsera kudini Akristu amweni paaibatana no cinjo mu upenyu. Uyewo ticaona kuti mawara aya angatibetsera kudini. Asi pakutanga ngatione kuti tingafundei kubva ku anhu airi ano muezaniso wakakwana wekupangidza kuzwisisa, Djehovha na Djesu.

3. Tinozviziya kudini kuti Djehovha anozwisisa?

³ Djehovha anozwi i “Buwe” ngekuti iyena akabamba uye aazununguki. (Dhe. 32:4) Asi pa nguwa imweyo, Djehovha anozwisisa. Zviitiko zve mu nyika, zvinocinja nokukasika, asi zviro izvi azvinetsopi kuna Djehovha ngekuti iyena anokasika kucinja uye anotigondesa kuti zviro zvese zvaakapikira acazvidzadzisa. Djehovha akasika anhu no mufanikiso wake ndiyo ndaa tinokwanisa kudjairana no cinjo dzinoitika mu upenyu wedu. Mu Bhaibheri tinogumira zvokwadi zvisikacinji zvinotibetsera kuti tiite zvisananguro zvakanaka pasinei no matambudziko atingabatana nawo mu upenyu. Muezaniso wa Djehovha uye no zvokwadi zvaakatipasa  zvinotibetsera kuzwisisa kuti kunyazi iyena ari “Buwe” iyenawo anozwisisa.

4. Pasai muezaniso unopangidza kuti Djehovha anozwisisa. (Revhitiko 5:7, 11)

⁴ Zviro zvese zvinoizwa na Djehovha zvakanaka uye zvinopangidza kuti iyena anozwisisa. Djehovha aaomeseri anhu. Ngo muezaniso, onai kuzwisisa kaakapangidza ku Aisraeri. Iyena ainga asikakumbiri cibairo cimweco ku anhu ainga akapfuma no arombo. Pamigariro imweni iyena aitosiya kuti munhu apase cibairo maererano no migariro yake.—Erengai Revhitiko 5:7, 11.

5. Pasai muezaniso unopangidza mushobo wakapangidza Djehovha kudzidodosa uye usisi.

⁵ Kudzidodosa no usisi wa Djehovha zvinoita kuti iyena agare munhu anozwisisa. Ngo muezaniso, kudzidodosa ka Djehovha kakaoneka pamhene pa nguwa yaaida kuparadza anhu akashata mu Sodhoma. Eciseenzesa ngirozi dzake, Djehovha akabvunza munhu munatsi Roti kuti atize aende ku matunhu. Asi Roti wakathya uye wainga asikadi kuenda ikona. Hino, Roti wakakumbira kuti iyena no mhuri yake atize ecienda ku Zoari, thaundi ridoko rainga rakasanangurhwa na Djehovha kuti riparadzwe. Djehovha angadai akabvunza Roti kuti atondoedze nhungamiriro dzaakamupasa pakutanga. Asi pane kudaro, iyena akadaira cikumbiro ca Roti uye akasanangura kutama kuparadza thaundi iri. (Gen. 19:18-22) Zana re makore raaradarika, Djehovha akapangidza usisi ku anhu aigara ku Ninivhi. Iyena akatumira muphorofita Djona kuti abvunze agari e Ninivhi kuti aizoparadzwa. Asi anhu e ku Ninivhi paakacinyuka Djehovha akaazwira usisi uye aazi kuparadza thaundi iri.—Djon. 3:1, 10; 4:10, 11.

6. Panganidzai miezaniso inopangidza kuti Djesu akateedzera kuzwisisa ka Djehovha.

⁶ Djesu akateedzera muezaniso wa Djehovha uye akagara munhu unozwisisa. Iyena akatumwa pa nyika kuti “aparidzire basi mabira akapsveteka e nyumba ya Israeri.” Asi iyena akazwisisa uye akaparidzirawo anhu amweni. Ngo muezaniso, pa nguwa imweni, mwanakadzi umweni wainga asiripi Muisraeri wakadeketera kuti iyena arape mwana wake wainga “akabathwa no madhimoni uye aimushupha maningi.” No usisi Djesu akaita zviya zvainga zvakumbirhwa no mwanakadzi uu uye akarapa mwana wake. (Mat. 15:21-28) Onai muezaniso umweni. Paakatanga basa rake re kuparidzira, Djesu akati: “munhu wese anondiramba . . . , ininiwo ndicamuramba.” (Mat. 10:33) Asi Djesu aazi kuramba Pedru, kunyazi hazvo iyena akamuramba katatu kese. Iyena aiziya kuti Pedru wainga wacinyuka uye wainga ari mwanarume wakagondeka. Mumasure mekumutswa Djesu akadzionesa kuna Pedru uye pamweni iyena akabhuya kuti aimuda uye ainga akamurekerera.—Ruka 24:33, 34.

7. Maererano na Afiripi 4:5, tinodikana kugara no unhu upi?

⁷ Dakara zvino isusu taona kuti Djehovha Mwari na Djesu Kristu anopangidza kuzwisisa. Hino kuzotiwo isusu? Djehovha anoetsera kuti tiitewo zvimwezvo. (Erengai Afiripi 4:5.) Turikiro imweni inoti: “Ziikanwai hingana munhu anozwisisa.” Tingadzibvunzisa kuti: ‘Anhu anondiona hingana munhu unozwisisa,  usikaomeseri amweni uye unotenderawo maonero e amweni here? Kana kuti awona anondiona hingana munhu unoomesera amweni uye usikaazwisisi? Inini ndinondoita kuti amweni aite zviro nge mushobo wandinoona kuti ndiwo unodikana kuizwa here? Kana kuti ndinopurutana maonero e amweni uye ndinokasika kucinja paya pazvinodiwa?’ Azvinei no mushobo watinopangidza kuazwisisa tinonga tecipangidza kuti tinoteedzera Djehovha na Djesu dakara papi. Ngatione migariro miiri inonyanya kukosha kuti tipangidze kuzwisisa zviro pazvinocinja mu upenyu wedu uye zvisananguro zvedu no maonero e amweni paanonga akasiyana no edu.

8. Ngazvipi zvingatibetsera kuti tigare anhu anozwisisa kana zviro zvikacinja mu upenyu wedu? (Onai masoko e pasi.)

⁸ Zviro pazvinocinja mu upenyu wedu tinodikana kugara anhu anozwisisa uye anokasika kudjairana no mugariro upsva. Cinjo idzi dzingakwanisa kumutsa dambudziko ratainga tisikakariri. Ngo muezaniso, pa nguwa yatisikakariri tingakwanisa kubatana no dambudziko re uthongo kana kuti tingakwanisa kubatana no dambudziko re kutama mare kana kuti dambudziko re zve matongerhwe e nyika zvingaita kuti upenyu wedu ubambirire kushupha. (Mup. 9:11; 1 Ako. 7:31) Nguwa dzimweni, kucinjwa ke basa ratainga tapaswa kuti tiite zvingagara cinetso katiri. Azvinei kuti ngazvipi zvicaitika, zvinokwanisika kuti tidjairane no migariro ipsva kana tikaita zviro zvirongomuna: (1) kutendera mugariro uripo, (2) kuringira zviri mberi, (3) kukanda ndangariro dzedu pa zviro zvakanaka, uye (4) kuitira amweni zviro zvakanaka. b Ngatione zviro zvinganani zvakaitika zvinopangidza kuti matanho aya angatibetsera.

9. Kazado imweni ye mamisionariyo yakakwanisana kudini no cinjo dzakaitika mu upenyu wawo asikakariri?

⁹ Kutendera mugariro uripo. Emanuele na Francesca akagadzwa hinga mamisionariyo ku nyika ye kunza. Paakatanga kufundira mureketero upsva uye kunyasa kuziya hama no hanzvadzi, nhenda ye COVID-19 yakatanga uye awona aidikana kugara pa mbuto yawo ega. Asikakariri mai a Francesca akafa. Iyena waida maningi kugara no mhuri yake, asi ngendaa ye nhenda ii iyena wainga asikadikani kuita rhwendo. Ngazvipi zvakabetsera Francesca kuti akwanisane no mugariro uu? Cakamubetsera i minamato yaiizwa na Emanuele ecikumbira ungwaru kuti ararame zuwa rimwe na rimwe. Djehovha akadaira minamato ii eciseenzesa zvekurhya zvekunamata pa nguwa yakasisira. Ngo muezaniso, awona akabambiswa maningi no masoko akarekethwa no hama imweni pa intrevhista anoti: “Patinokasika kutendera migariro iripo, tinokasikawo kugara no mupfaro watainga nawo uye tinokwanisa kukhorovhera mugariro uu zvakanaka.” c Awona akasanangurawo kugadzirisa mushobo we kuparidzira eciseenzesa thurufunu dakara akwanisa kutangisa fundo yo Bhaibheri. Kusiya izvona awona akatenda rubetso uye kubambiswa no hama dze mbuto yaaigara uye akapfara maningi no zviro zvaaiizirhwa. Ngo muezaniso, mazuwa ese hanzvadzi imweni ino rudo yaiyatumira mensagem no tsamba imwe ye Bhaibheri. Iyona yakaita izvona ke gore rese. Kana isusu tikatendawo cinjo dzinonga dzaitika mu upenyu wedu, ticazwawo mupfaro wakakura pakuita zviro zvatinokwanisa maererano no migariro yedu.

10. Hanzvadzi imweni yakadjairana kudini no cinjo dzakaitika mu upenyu wayo?

¹⁰ Ringirai zviro zviri mberi uye kandai ndangariro dzenyu pa zviro zvakanaka. Christina hanzvadzi imweni ye ciromena inogara ku Japão,  yakatsukwara maningi ungano ye mureketero we Cingezi yaaipinda peyakafungwa. Asi iyona, aizi kundogara yecirangarira pa zviro zvainga zvaitika. Pane kudaro, iyona yakacinja kuti iyende ku ungano yairekethwa mureketero we ci Japonês uye yakaita zvese zvayaikwanisa kuti iparidzire mu mureketero we ci Japonês. Iyona yakakumbira ku shamwari yayo ye kare yaaiseenza nayo kuti imubetsere kufunda Japonês uye inyase kureketa zvakanaka mureketero uu. Iyena wakakumbira kuti shamwari yake yeku basa imufundise yeciseenzesa Bhaibheri uye yeciseenzesa bhurushura ra Pfadzwai ne Upenyu Nokusikaperi! kuti amufundise Japonês uye shamwari ii yakatenderana nazvo. Mugumisiro wakhona ngewe kuti Christina andiyepi ega wakakwanisa kureketa zvakanaka Japonês asi, shamwari yake yekubasa yakatanga kupfarira cokwadi. Patinosiya kunyanya kurangarira zviro zvakaitika kare uye tokanda ndangariro dzedu pa zviro zvakanaka zviri kuitika tinokwanisa kuona kuti cinjo dziri kuitika mu upenyu wedu dzingakwanisa kuunza makomborero atainga tisikakariri.

11. Kazado imweni yakakwanisa kukurira kudini dambudziko re mare?

¹¹ Itai zviro zvakanaka ku amweni. Kazado imweni inogara ku nyika yekuti basa redu rakarambidzwa, yakatanga kunetseka nge ndaa yekutama mare nyika yaaigara payakabatana no cinetso. Awona akadjairana kudini no cinjo idzi? Cekutanga, awona akatanga kurarama upenyu usina zvakawanda uye pane kukanda ndangariro dzawo pamatambudziko aaibatana nawo, awona akasanangura kupedza nguwa ari mubasa rekuparidzira eciparidzira amweni. (Zvii. 20:35) Hameyo yakati: “Kurumbwa takabatikana mubasa re kuparidzira kakatibetsera kuti tisapedze nguwa yakawanda tecirangarira zviro zvakashata uye kakatibetsera kuti tikande ndangariro dzedu pa zviya zvaidiwa na Djehovha.” Migariro yedu ye zviro painocinja tinodikana kuedzurira kuti zvinokosha maningi kurumbwa tecibetsera amweni maka-maka nge kuita basa re kuparidzira.

12. Muezaniso we muphostori Pauro ungatibetsera kudini kuti ticinje mushobo wedu wekuparidzira?

¹² Mu basa re kuparidzira, tinodikana kugara anhu anokasika kucinja. Patinoparidzira isusu tinosongana no anhu anobva ku mbuto uye anomigariro yakasiyana-siyana uye anotenda zviro zvakasiyana-siyana. Muphostori Pauro waikwanisa kudjairana no migariro we zviro uye isusu tingafunda zvakawanda kubva ku muezaniso wake. Djesu akagadza Pauro hinga “muphostori ku madzinza.” (Aro. 11:13) Pauro wakaparidzira ku Adjudha, ku Agrego ku anhu ainga akafunda uye no anhu ainga asikazi kufunda, ku atongi no madzimambo. Kuti abaye mwoyo ye anhu aya, Pauro wakagara “zviro zvese ku anhu ese.” (1 Ako. 9:19-23) Pauro wairangarirawo ngezve mbuto dzaibva anhu, uye zviya zvaaitenda pedzepo waicinja mushobo wake we kuparidzira. Isusu tingakwanisa kuparidzira nge mushobo wakanaka kana isusu tikarangarira ngezve zviro zvinodiwa no anhu uye tocinja mushobo wedu wekuparidzira.

13. Kana tikareremedza maonero e amweni ticakwanisa kudziirira ngozi ipi inopanganidzwa pana 1 Akorinti 8:9?

¹³ Kuzwisisa kunotibetserawo kuti tireremedze maonero e anhu amweni. Ngo muezaniso, hanzvadzi dzimweni dzinopfarira kuita makiyaji asi dzimweni adzipfariri. Hama dzimweni dzinosanangura kumwa no midida uye dzimweni dzinotosanangura kutama kumwa kamare. Isusu tese tinoda kugara no uthongo wakakwana asi tingasanangura mushobo wakasiyana we kuonerera uthongo. Asi kana nguwa dzese tikadziona hingana anhu anorazau uye tikaedza kuita kuti amweni arangarire nge mushobo watiri kurangarira, tingapedzesera taita kuti amweni akuhunyike uye paoneke kuparadzana mu ungano. Zvezvirokwazvo atidi kuti izvi zviitike! (Erengai 1 Akorinti 8:9; 10:23, 24) Ticaona matii  mairi anopangidza kuti kana tikaseenzesa mazano e mu Bhaibheri tinokwanisa kugara pakati no pakati uye torumbwa tiri murunyararo no amweni.

14. Mazano api e Bhaibheri atinodikana kurangarira patinoita cisananguro ce mushobo wekupfeka uye we kudzigadzirira?

¹⁴ Macira atinopfeka uye mushobo wekugadzirira tsitsi. Djehovha aatibvunzi mushobo watinodikana kupfeka asi iyena anotipasa mazano atinodikana kutondowedza. Isusu tinodikana kupfeka nge mushobo unokudza Djehovha tecipangidza kuzwisisa uye tecipangidza maonero ari pakati no pakati uye anopangidza “unhu wakanaka.” (1 Ti. 2:9, 10; 1 Ped. 3:3) Isusu atidi kudzionesa nge ndaa ye mushobo we macira atinopfeka. Mazano e Bhaibheri angabetserawo akuru kuti atame kukanda zvimitemo pa nyaya yekupfeka. Ngo muezaniso, akuru e ungano imweni aida kubetsera hama dzimweni dzakatanga kuseenzesa mushobo umwe wekugadzirira tsitsi wainga uri pamodha, tsitsi risikazi kunyanya kureba, asi risikazi kufeturhwa. Akuru aizobetsera kudini madjaha aya asikakandi zvimitemo? Muonereri we nharaunda wakabvunza akuru kuti arekete zvinoteera: “Kana imwimwi muri pa cikuwa uye apurutani onyanya kuringira pamugariro wenyu haiwa pa zviro zviya zvamunonga mecireketa, izvi zvinopangidza kuti pano cinetso pa mushobo wenyu wekupfeka uye we kudzigadzirira.” Kupanganidza uku kuri nyore kakagadzirisa dambudziko pasikadikani kukanda mutemo. d

15. Mitemo ipi uye zvokwadi zvipi zve Bhaibheri zvingatibetsera paya patinonga tecida kuita zvisananguro zvakaringana no uthongo? (Aroma 14:5)

¹⁵ Kudziirira uthongo. Mukristu umwe na umwe unodikana kusanangura mushobo we kudziirira uthongo wake. (Aga. 6:5) Mukristu paanosanangura mushobo wekurapa uthongo, mitemo yaanodikana kunyanya kurangarira yakaringana no kuramba ngazi uye kuita  zve midzimu. (Zvii. 15:20; Aga. 5:19, 20) Kusiya izvona, Mukristu umwe na umwe ungadzisanangurira mushobo yekurapa yaangatendera. Amweni anosanangura mushobo we kurapa wakatenderhwa no anhu anoonerera ngezve uthongo uye amweni anopsvaka mishobo imweni yekuraphwa. Isusu tinodikana kureremedza citenderhwa ce hama imwe na imwe cekusanangura mushobo we kuraphwa waanoda azvinei nokuti tinotenderana nazvo kana kuti haiwa. Panyaya yakadaro, tinodikana kunyasa kurangarira ngezve mafundo anoteera: (1) Umambo wa Mwari basi ndiwo ucakwanisa kurapa nhenda dzese. (Isa. 33:24) (2) Mukristu umwe na umwe unodikana “kugara no rugondo” rekuti zvaari kuita ndizvo zvakamunakira. (Erengai Aroma 14:5.) (3) Musatonge amweni nge ndaa ye zvisananguro zvaanonga aita uye musagare buwe rinoakuhunyisa. (Aro. 14:13) (4) Akristu anopangidza rudo uye anoziya kuti kubatana ke ungano ciro cinonyanya kukosha kudarika maonero awo. (Aro. 14:15, 19, 20) Kana tikaedzurira mafundo aya nguwa dzese ticakwanisa kugara no ushamwari wakabamba no hama uye toita kuti ungano irumbwe iri murunyararo.

16. Akuru angapangidza kudini kuti anozwisisa paanonga ari pakati pe akuru amweni? (Onaiwo mafoto.)

¹⁶ Akuru anodikana kupasa muezaniso wakanaka pakugara anhu anozwisisa. (1 Ti. 3:2, 3) Ngo muezaniso, mukuru aadikani kuetsera kuti maonero ake nguwa dzese atendhwe ngekuti iyena ndi munhu mukuru kudarika anhu amweni. Iyena unoziya kuti mwiya wa Djehovha ungakwanisa kuseenzesa mukuru upi hake kuti arekete zviro zvingabetsera pakuita cisananguro cakanaka. Hino kana akuru akawanda, akatenderana no cisananguro cisikaposhi zvokwadi zvo Bhaibheri, mukuru unozwisisa ucatsigira cisananguro icona kunyazi iyena ecirangarira nge mushobo wakasiyana.

17. Kugara munhu unozwisisa kunounza makomborero api?

¹⁷ Akristu anozwisisa anotambira makomborero akawanda. Ngo muezaniso, tinogara no ushamwari wakabamba no hama uye hanzvadzi dzedu. Izvi zvinoita kuti paoneke runyararo. Tinomupfaro uye tinomukana wekuziya anhu anotsika uye mugariro wakasiyana. Zvinopfadza kuziya kuti kunyazi no musiyano dzakawanda, isusu tinonamata Djehovha takabatana. Cinonyanya kukosha pa zvese izvi ngecekuti zvinotipfadza kuziya kuti tiri kuteedzera Djehovha anozwisisa nguwa dzese.