Kurekererana kunoreya kubvisa bundu kana kuti hasha mu mwoyo wenyu kana mukashaishirhwa. Kurekerera munhu akureyei kuti maakurerusa zviro zvinonga zvaitikezvo, kana kuti muri kuita hingana kuti apana caitika.

ZVINOBHUYA BHAIBHERI: “Rumbwai mecizwisisana uye mecirekererana no mwoyo wese, kunyazi kana pano munhu ano caakashaishirhwa no umweni wake.”—Akorosi 3:13.

“Kana mecida munhu umweni amuzonangiri zvishaishi zvake basi, asi mu mucanangirawo zviro zvakanaka zvaanoedza kuita.”—Aaron.

Kucengeta bundu kunoita kuti mugare no dambudziko re uthongo, musapfare uye mukanganise mucato wenyu.

“Mwamuna wangu wakandirhwadzisa maningi. Iyena wakakumbira rurekerero asi zvakambondishuphira kuti ndimurekerere. Ndakazomurekerera hangu asi ndirikutsumba ngekunonoka kandakaita. Kunonoka kumurekerera kakaita kuti timboshuphane.”—Julia.

DZIONGOROREI

Kana umweni wenyu akareketa kana kuita zviro zvinomurhwadza, dzibvunzisei kuti:

• ‘Andizi kunyangadzwa zvisina basa here?’

• ‘Iyena wandiitira cishaishi cakakura zvekuti zvinodikana kuti andikumbire rurekerero here kana kuti ndingakwanisa kusiyana nazvo?’

CEDZAI NE MUDONI WENYU

• Kajinji tinosopedza nguwa yakareba kubini kuti tirekererane?

• Tingaitei kuti tikasike kurekererana?

MAZANO

• Kana mashaishirhwa, musarangarire kuti umweni wenyu wazviita ngekuda.

• Edzai kurekerera umweni wenyu meciedzurira kuti tese “tinoshaisha kakawanda.”—Tiyago 3:2.

“Zviri nyore kurekererana kana tese tashaisha, asi azviripi nyore kana ari munhu umwe basi washaisha. Zvinotoda kudzidodosa kuti tirekerere munhu umweni.”—Kimberly.

ZVINOBHUYA BHAIBHERI: “Gadzirisai nyaya nokukasika.”—Mateu 5:25.