ABEREKI
7: Tsika Dzakanaka
ZVINOREYEI?
Hingana abereki, muno tsika dzamunosanangura kurarama meciteedzera. Ngo muezaniso, munoedza kugondeka pa zviro zvese here? Kana makagondeka, mungada kufundisa ana enyu kuti agarewo anhu akagondeka.
Mungadawo kuafundisa kuti akure ari ana anoseenza no simba, asikaiti zveutsotsi, asikabi uye anorangarira zvakanakira amweni. Mwana unodikana kufundira zviro izvi kubvira aciri mudoko.
ZVINOBHUYA BHAIBHERI: “Fundisa mwana mu gwanza rakamunakira; kunyazi paanocembera aazopauki pariri.”—Zvierengo 22:6.
NGEI ZVECIKOSHA?
Thurufunu nematerevhizori aakubudisa zviro zvisikazi kunaka. Mai amweni anozwi Karyn akati “Zviro zvakashata zvinokwanisa kuoneka pa thurufunu nguwa ipi hayo. Ana edu angaona zviro zvakashata pa thurufunu kunyazi takatogara nawo uye tisikazii kuti ndizvona zvaarikuita!”
ZVINOBHUYA BHAIBHERI: “Anhu akuru . . . Anoita kuti simba rawo rekuzwisisa rirowedzwe pakusiyanisa zvakanaka no zvakashata.”—Ahebheru 5:14.
Kugara no tsika kunokosha. Kunobatanidza kureketa masoko (akadai hingana “ndiri kukumbirawo” uye “maita basa”) uye kupangidzirawo amweni usisi. Izvi azvicanyanyi kuizwa no anhu mazuwa ano ngekuti nzero dzawo dzakabatikana pa zviro zvakadai hingana mathurufunu.
ZVINOBHUYA BHAIBHERI: “Zvamunoda kuti anhu amuitirei, aitireiwo zvimwezvo.”—Ruka 6:31.
ZVAMUNGAITA
Fundisai ana kugara no unhu. Ngo muezaniso, ongororo dzakaizwa dzinopangidza kuti ana paanoonga ecikura angatama kuita zvepamaponde asati apinda mu mucato kana akafundiswa kuti izvona zvakashata.
MAZANO: Seenzesai zviri kubudiswa no atapi e masoko kuti mufundise mwana wenyu zviro zvakanaka zvinodikanwa kuizwa uye zvisikadikani kuizwa. Ngo muezaniso, kana atapi e masoko ecireketa nge zve kuuraiwa ke anhu, munodikana kuti: “Utsinye unoizwa no anhu unothyisa. Unorangarira kuti ngei eciita zviro zvakadaro?”
“Zvinoshuphira ana kuziya kuti cakanaka no cakashata ngacipi kana asikazi kuzvifundiswa.”—Brandon.
Fundisai ana kugara no tsika dzakanaka. Kunyazi ana adoko anokwanisa kufunda kuti “ndiri kukumbirawo,” “maita basa” uye kuitirawo amweni zvakanaka. “Ana paanoona kuti zvaanoita zvinobetserawo mhuri yawo, cikora cawo uye mutanha wawo, anotunhudzirawo kuita zviro zvakanaka kuti abetsere amweni pane kundoita zvakaanakira basi,” rinodaro bhuku rinozwi Parenting Without Borders.
MAZANO: Pasai ana mabasa ekuita pa nyumba kuti aone kukosha kekubetsera amweni.
“Kana ana edu akadjaira kuita mabasa zvino, aazoshuphirhwi kana aakugara oga. Anonga atozvidjaira.”—Tara.
