MADJAHA
9: Zvamuri
ZVINOREYEI?
Zvamuri azvigumiri basi pamugariro wenyu. Zvinobatanidzawo zvamunokoshesa, zvamunotenda uye unhu wenyu.
NGEI ZVECIKOSHA?
Kana meciziya zvamuri, amuzotenderi kupfuridzirhwa no amweni e thunga renyu, asi mucaita zviya zvamunotenda.
“Anhu akawanda akaita hingana mabhoneka e mu maroja. Awona ainoita zvekusanangurirhwa macira ekupfeka.”—Adrian.
“Inini andipsveruki kuita zviro zvandinoziya kuti zvakanaka. Zvinoizwa no munhu uye zvandinoita pandinonga ndiri naye ndizvo zvinondibetsera kuziya kuti i shamwari yezvirokwazvo here kana kuti haiwa.”—Courtney.
ZVINOBHUYA BHAIBHERI: “Rekerai kuumbwa maererano no nyika ino, asi marangariro enyu ngaacinjwe.”—Aroma 12:2.
ZVAMUNGAITA
Rangarirai kuti muri munhu wakaita kudini uye kuti munoda kugara munhu wakaita kudini. Mungakwanisa kuita izvi ngekuongorora zviro zvamunokwanisa kuita, zviro zvamusikakwanisi kuita uye zviro zvamunotenda. Mungatangisa ngekudaira mibvunzo dzinoteera.
Zvamunokwanisa: Ngazvipi zvipo zvandinazvo? Ngazvipi zvandinokwanisa? (Nge muezaniso: Ndinoguma pacino nguwa here? ndiri munhu anokwanisa kudzibata here? ndinoseenza no simba here? ndinopasawo amweni zvandinazvo here?) Ngazvipi zvakanaka zvandinoita?
Mazano: Zviri kumushuphira kuedzurira zviro zvakanaka zvamakamboita here? Bvunzai abereki enyu kana shamwari yenyu yamunogonda nayo kuti imubvunze zvamunokwanisa uye oreketa kuti ngei eciti munozvikwanisa.
ZVINOBHUYA BHAIBHERI: “Umwe na umwe ngaaongorore zviito zvake uye acaona zvikonzero zvokuti apfare, haiwa mukuezanisa ne munhu umweni.”—Agaratiya 6:4.
Zvinomushuphira: Unhu upi wandinodikana kugadzirisa? Ngapapi pandinozwa ndecida kuita zvakashata? Ngapapi pandinodikana kunyanya kudzibata?
ZVINOBHUYA BHAIBHERI: “Kana tikareketa kuti, ‘Atina citema,’ tirikudzinyepera uye tinonga tisina cokwadi.”—1 Juau 1:8.
Zvamunotenda: Mitemo ipi yandinoteerera uye cinyi cinondiitisa kuti ndiiteerere? Ndinotenda kuti Mwari ariyo here? Cinyi cinondiitisa kuti nditende kuti ariyo? Zvinyi zvandinorangarira kuti azvizi kunaka uye ngei ndecirangarira kudaro? Zvinyi zvandinotenda kuti zvicaitika mune ramangwana?
ZVINOBHUYA BHAIBHERI: “Uzii ucamucengetedza.”—Zvierengo 2:11.
