Anhu akagondeka anoteerera mutemo, anoita zvaanonga agondesa uye anogara ecibhuya cokwadi, ndiyo ndaa anopedzesera aakugondhwa no abereki awo, shamwari uye no aanosenzera.

Kajinji kakhona kana anhu ecimugondai anomupasai rutsudzunuko rakakura.

“Kana mecida kuti abereki enyu amugondei, munodikana kupangidza kuti makura mundangariro uye munoziya zvamunoita kunyazi paanonga asiripopi.”—Sarahi.

ZVINOBHUYA BHAIBHERI: “Rumbwai mecidziedza kuti muone zvamuri.”—2 Akorinti 13:5.

Zviro zvinoteera, zvinokwanisa kumubetsera kuti anhu anyase kumugondai, kana kuti atangezve kumugondai.

Bhuyai cokwadi. Kana mecinyepa anhu aazomugondii. Asi kana mecireketa cokwadi pamunonga mashaisha anhu anomugondai.

“Zviri nyore kubhuya cokwadi kana zviro zvakanaka. Asi kureketa cokwadi pa zviro zvinoita kuti anhu amuone kushata, zvinotoita kuti anhu anyanye kumugondai.”—Caiman.

ZVINOBHUYA BHAIBHERI: “Rumbwai makagondeka pa zviro zvese.”—Ahebheru 13:18.

Garai makagondeka. Ongororo yakaizwa ku Estados Unidos, yakapangidza kuti 78% ye anhu anoonerera nge zve kupaswa ke mabasa, anorangarira kuti kugara munhu anogondeka ndi rimwe re mawara matatu anokosha panopinzwa basa museenzi mupsva. Kugara makagondeka pari zvino zvicamubetsera.

“Pandinoita mabasa ndisikazi kumbobvunzwa, abereki angu anozviona. Pandinorumbwa ndeciita kudaro anotunhudzirawo kugonda neni.”—Sarah.

ZVINOBHUYA BHAIBHERI: “Ndino rugondo rokuti ucapurutana . . . ndinoziya kuti ucatoita kudarika zvandiri kureketa.”—Firimoni 21.

Garai nomwoyo unonoka kutsamwa. Kukura mundangariro kwakasiana no kukura muiri, kukura mwiri kunokasika kuoneka. Asi zvinotora nguwa kuti anhu amweni awone kukura kenyu mundangariro.

“Kukwanisa kuita ciro cimwe basi akuiti kuti abereki enyu no anhu amweni abve atomugonda. Zvinotoda kuti murumbwe meciita zvakanaka kuti azomugondei.”—Brandon.

ZVINOBHUYA BHAIBHERI: “Pfekai . . . rudo.”—Akorosi 3:12.