Mwamuna no mukadzi anoreremedzana anorumbwa ecidanana kunyazi pano ciro caasiripi kupindirana. “Awona aaiti mazvake-mazvake,” rinodaro bhuku rinozwi Dez Lições para Transfor- mar seu Casamento. “Anopurutana kana umweni ecireketa uye anoedza kucinja zvaainga ecida oita zvinodiwa ne umweni wawo.”

ZVINOBHUYA BHAIBHERI: “Rudo . . . arizvipsvakiri zvaro.”—1 Akorinti 13:4, 5.

“Mukadzi wangu ndinomukoshesa uye andidi kuita ciro cingamurhwadzisa kana cingaputsa mucato wedu.”—Micah.

Kana pasina kureremedzana, mwamuna ne mukadzi anopedzesera aakushorana uye kupsvinyirana. Aongorori anoti zviro izvi zvinoita kuti anhu arambane.

“Kupsverusa no kupsvinyira mukadzi wenyu, zvinoita kuti iyena adzionere pasi, asamugonde uye zvingaputsa mucato wenyu.”—Brian.

DZIONGOROREI

Torai sumana imwe kuti mudziongorore kureketa kamunoita, pedzepo mozodzibvunzisa kuti:

• ‘Ndakashora mudoni wangu kangani, uye ndakamusimba kangani?’

• ‘Ngezvipi zvandakaita zvinopangidza kuti ndinoreremedza mudoni wangu?’

CEDZAI NE MUDONI WENYU

• Zvinyi zvamunoda kuti umweni wenyu amuitire kana kuti arekete kupangidza kuti anomureremedza?

• Zvinyi zvaanoita kana kuti zvaanoreketa zvinoita kuti muzwe hinga kuti aamureremedzi?

MAZANO

• Tarai zviro zvitatu zvamunoda kuizirhwa zvinopangidza kuti mudoni wenyu anomureremedza. Umweni wenyu ngaatarewo zviro zvake zvaanoda kuizirhwawo. Cinjanai zvamatara uye umwe na umwe ngaaedze kuita zvatarhwa ne umweni.

• Tarai zviro zvamunosirira pa mudoni wenyu. Pedzepo, mubvunzei kuti ngei mecisirira zviro izvona.

“Ndinoita zviro zvinopangidza kuti ndinokoshesa mwamuna wangu uye ndinoda kuti agare ecipfara. Azviropi zvikuru basi zvinopangidza kuti ndinomureremedza, kunyazi kumuitirawo zviro zvidoko kunopangidza kuti ndinomureremedza.”—Megan.

Ciro cinokosha akuti muzwe kuti munomureremedza, asi kuti mudoni wenyu azwe kuti anoreremedzwa.

ZVINOBHUYA BHAIBHERI: “Pfekai rudo rukuru rwokuzwira amweni usisi, mutsa, kudzidodosa, upfawi, mwoyo unononoka kutsamwa.”—Akorosi 3:12.