Cinangwa aciropi cokuti mare caitika. Zvinotoda kuronga, kuseenza ne simba uye kuseenzesa makwanza akasiyana-siyana kuti mudzadzise cinangwa cakhona.

Zvinangwa zvingaita zve mazuwa kana masumana, zve mwedzi kana kuti makore. Kudzadzisa zvinangwa zve nguwa doko zvinokwanisa kumubetsera kuti mudzadzise zvinangwa zve nguwa yakareba.

Kudzadzisa zvinangwa kunoita kuti mugare ne rugondo, mubambise ushamwari wenyu ne amweni uye mutunhudzire kupfara.

Kudzigonda: Pamunodzadzisa zvinangwa zvidoko, munogara ne rugondo rokuti munokwanisa kudzadzisa zvinangwa zvakakura. Munotunhudzirawo kugara ne rugondo pamunosongana ne matambudziko akaita hinga kubambidzirhwa kuita zviro zvakashata no e mathunga enyu.

Ushamwari: Anhu anopfarira kutamba ne anhu ano zvinangwa uye anoseenza kuti azvidzadzise. Kuseenza ne munhu ano cinangwa cimweco zvinobambisa ushamwari wenyu.

Mupfaro: Pamunogara ne zvinangwa mobva mazvidzadzisa, munozwa mupfaro.

“Ndinopfarira kugara ne zvinangwa. Zvinoita kuti ndigare ndinozvokuita. Pamunodzadzisa cinangwa cakhona munozwa mecinyasa kupfara uye munoti: ‘Ndaita zvandainga ndecida.’”—Christopher.

ZVINOBHUYA BHAIBHERI: “Munhu unoimira kuzotanga basa mvura yaa yanaya, aana ciro caanosima uye aana caanokorora.” —Muparidzi 11:4, Today’s English Version.

Kuti mugare ne zvinangwa uye mozvidzadzisa, itai zvinoteera:

Ziyai zvinangwa zvakhona. Tarai zvinangwa zvenyu mecitanga ne zvamunoda kutanga kudzadzisa.

Rongai. Pa cinangwa cimwe na cimwe, itai zvinoteera:

• Tarai kuti munoda kucidzadzisa rini.

• Rongai zvinodiwa kuti mucidzadzise.

• Rangarirai zviro zvinokwanisa kumuvhiringidza uye kuti mungazvikunda kudini.

Meciitai. Musaimire kuti mutange maakuziya zvese. Dzibvunzisei kuti: ‘Cinyi candinodikana kutanga kuita kuti ndidzadzise cinangwa cangu?’ Ibvai maciita. Potai meciona kuti maa papi pakucidzadzisa.

ZVINOBHUYA BHAIBHERI: “Zvirongwa zve munhu anoseenza no simba zvinobudirira.”—Zvierengo 21:5.