• Akasanangurhwa ndi Mwari. “Inini kamare ndakagadza mambo wangu ... Inini ndicamupasa madzinza kuti agare nhaka yake uye kumuceto ke nyika kuti kugare kake.”—Pisarema 2:6, 8.

• Mugari we nhaka ya Mambo Dhavhidhi. “Takabarirhwa mwana, takapaswa mwana ... Utongi wake ucazokura uye runyararo arizoperi pamusoro pe cigaro ce umambo ca Dhavhidhi, kuti aubambise.”—Isaya 9:6, 7.

• Akabarirhwa mu Bheterehema. “Iwewe Bheterehema ... , ndiwe ucandibarira mutongi ... Ukuru wake ucazoguma dakara kumuceto ke nyika.”—Mika 5:2, 4.

• Akarambwa no anhu uye akauraiwa. “Akashorhwa, uye akarambwa nge anhu. ... Iyena akabaiwa nge ndaa ye zvitema zvedu, uye akauraiwa nge ndaa ye zvishaishi zvedu.”—Isaya 53:3, 5.

• Akamutswa uye akakudzwa. “Amuzondisii mu guwa. Amuzosii munhu wenhu akagondeka kuti aone rindi. ... Ku muoko kwawo wenyu kuno mupfaro nokusikaperi.”—Pisarema 16:10, 11.

Mu ngano ye anhu ese, aripo munhu akadzadzisa zvese izvi here? Honde, aripo, ayena ndi Djesu Kristu. Zve zvirokwazvo, izvi zvinoenderana ne zvakabvunzwa Mariya nge ngirozi yeciti: “Mwari acamupasa cigaro ce umambo ca baba ake Dhavhidhi, ... Uye Umambo wake auzoperi.”—Ruka 1:31-33.

Asi Djesu aazi kugara mambo pa nyika pano. Zve zvirokwazvo ayena acatonga ari ku denga, hinga Mambo we Umambo wa Mwari. Ngei Djesu ari Mambo wakakwana? Onai zvaakaita paainga ari pa nyika pano.

•   Djesu aizwira usisi anhu. Djesu aibetsa anhu ese, anarume, anakadzi, madjaha, cembere, apfumi kunyazi arombo. Djesu ainga asikasananguri, aibata zvakanaka anhu ese. (Mateu 9:36; Marko 10:16) Zuwa rimweni munhu umweni ainga ane mapere akakumbira Djesu kuti: “Tenzi, kana mukada henyu, ndicenesei,” Djesu akasiririswa naye uye akamurapa.—Marko 1:40-42.

• Djesu akatifundisa mushobo we kupfadza Mwari. Ayena akati: “Amukwanisi kuseenzera Mwari pamwepo ne Upfumi.” Akareketawo kuti tinodikana kubata amweni hingana zvataizoda kuti amweni atibatewo. Uyezve aipangidza kuti Mwari aapfariri basi zvatinoita, asiwo zvatinorangarira uye mazwiro atinoita. Ndiyo ndaa, kuti tipfadze Mwari, tinodikana kudzibata pa mazwire edu e mu mwoyo. (Mateu 5:28; 6:24; 7:12) Djesu akakohomedzesa kuti kana isusu tecida kunyasa kupfara, tinodikana kufunda zvinoda Mwari uye tozviita.—Ruka 11:28.

• Djesu akafundisa kuti kuda amweni kunoreyei. Masoko ne zviito zva Djesu zvainga zvino simba uye zvaibaya mwoyo ye ateeri ake. “Anhu akawanda akashamisika nge mafundisire ake, ngokuti aifundisa hinga munhu ane simba.” (Mateu 7:28, 29) Ayena akati: “Rumbwai mecida anomuzonda.” Kunyazi kamare Djesu paainga aa dhuze kufa pa mutanda we kutambudzikira, iyena akanamata eciti: “Baba, arekererei, ngekuti aazii zvaarikuita.”—Mateu 5:44; Ruka 23:34.

Zviri pamhene kuti Djesu, ndiye akasisira kuti agare Mutongi we pasi rese. Asi Djesu acatanga kutonga riini?