Tiri padhuze pekubatana ne “dutu,” rinoparadza rakareketwa na Djesu kuti “kutambudzika kukuru.” (Mateu 24:21) Azviiti kundotiza basi kutambudzika ikona. Asi tinodikana kupsvaka mbuto yakacengeteka. Tingaigumira kupi?

Mu mharidzo yake ye pa dunhu, Djesu akati: “Rumbwai mecitanga kupsvaka Umambo wa Mwari no unatsi wake.” (Mateu 6:33) Tingazviita kudini?

Tangai kupsvaka Umambo wa Mwari. Izvi zvinoreya kuti tinodikana kuona Umambo wa Mwari hinga ciro cinodikanwa maningi kudarika ciro cipi haco. (Mateu 6:25, 32, 33) Ngei tecidikana kuzviona nge mushobo uu? Ngekuti anhu aazi kukwanisa kugadzirisa matambudziko e anhu. Umambo wa Mwari basi ndiwo wega unokwanisa kugadzirisa matambudziko ese e anhu.

Psvakai unatsi wa Mwari: Tinodikana kuedza patinokwanisa napo kurarama maererano ne mitemo ya Mwari ino unatsi. Ngei? Ngokuti kana isusu tikadzisanangurira cakanaka ne cakashata, mugumo wakhona ucange wakashata. (Zvierengo 16:25) Asi, kana tikararama maererano ne zvinodiwa na Mwari, ticamupfadza uye ticagara no upenyu uri nani.—Isaya 48:17, 18.

Rumbwai mecitanga kupsvaka Umambo wa Mwari no unatsi wake. Djesu akangwadza amweni kuti asazopauswe no murangariro wokuti munhu  angakwanisa kugadzirira ramangwana rake kana akagara no mare yakawanda. Amweni pamweni anganeseka maningi no zvekurarama nazvo zvokuti aacatogari no nguwa yo kupsvaka Umambo wa Mwari.—Mateu 6:19-21, 25-32.

Asi Djesu akagondesa kuti aya anotsigira Umambo wa Mwari anoona zvaanoda zvino uno, uye acazoona makomborero asikaperi mu ramangwana.—Mateu 6:33.

Kunyazi afundi a Djesu aikanda pekutanga Umambo wa Mwari uye unatsi wake, awona aazi kuona mugumo we kurhwadziwa ne kushuphika kese mu upenyu wawo. Asi awona aidziirirhwa. Ngei?

Awona airarama maererano ne mitemo ya Mwari uye izvi zvakaadziirira pa matambudziko e nguwa iyona. Kugonda Umambo kaiita kaiyanyaradza, kunyazi paaisongana ne matambudziko. Uye Mwari akaapasa “simba rakakura rinodarika ratagara tiinaro” kuti akwanisane ne dambudziko ripi haro.—2 Akorinti 4:7-9.

MaKristu e kutanga akabata no nyara mbiri masoko a Djesu uye akaparidza masoko e Umambo wa Mwari kese kainga kune anhu. (Akorosi 1:23) Nyamasi aripo ari kuzviitawo here?

Honde! Apupuri a Djehovha ari kuita pese paanokwanisa napo mukuzwira masoko a Djesu anoti: “Uye masoko aya akanaka e Umambo acaparidzwa mu nyika yese inogarwa, kuitira kupasa upupuri ku madzinza ese uye zvadaro mugumo ucauya.”—Mateu 24:14.

Imwimwi mucaitei ne masoko aya? Tinomukohomedzesai kuti muteedzere muezaniso we agari e guta re kare re Bhereya ku Makedhoniya. Mupostori Pauro paakaparidzira nge zve masoko e Umambo, awona akaatambira “ne cido.” Kubvira ipona awona ‘akakwarakwatisa Matarhwa’ kuti aone kuti zvirokwazvodi kamare.—Zviito 17:11, 12.

Munokwanisa kuitawo hingana awona. Kana mukapsvaka Umambo pokutanga ne unatsi wa Mwari, imwimwi mucaona mbuto yekutizira yakacengeteka kubvira zvino dakara nokusikaperi.