Djesu akati: “Dzinza raizomukira dzinza uye utongi ne utongi. Kucazooneka zvigidhigidhi pa mbuto imwe na imwe, kushomeka ke zvekurhya uye matenda.” (Ruka 21:10, 11) Kuita hingana zvipangidzo zvinopangidza kuti nguwa ye marimo yakwana, zviitiko zvakareketa Djesu pazvaizoitika pa nguwa imweyo, zvaizobudisa pamhene kuti “Umambo wa Mwari waapadhuze.” Kodi zviitiko izvi zviri kuitikadi kamare pa nguwa imweyo mu nyika yese here? Ngatimboona basi

1. HONDO MU NYIKA YESE

Anhu anopanganidza zvakaitika anobhuya kuti mu gore ra 1914, zviro zvakatanga kucinja zvekuti uyai muzoone ngokuti ndipo pakatangira hondo ye nyika yekutanga. Kubvira kare-kare akuzi kumboseenzeswa mathanki e hondo, mabhomba aikhandirhwa mu denga, magaji anouraya uye pfuti dzimweni dzinouraiya. Pakazoitikazve hondo ye nyika yecipiri, pakazoseenzeswawo mabhomba atomika. Mukwarakwatisi umweni wakabhuya kuti kubvira muna 1914 anhu anokwana mamirionji anodarika 160 akafa nge hondo. Dakara nyamasi nyika airipi mu runyararo.

2. ZVIGIDHIGIDHI

Mu makore ese, kunosoitika zvigidhigidhi zvinodarika 100 zvinokwanisa “kuparadza zviro zvakakura,” rinodaro bhuhu rakazwi Britannica Academic. Uye Mabasa Anoonerera nge zve Magarire e Nyika e ku Amerika (Serviço Geológico dos Estados Unidos) anoti: “mu gore rimwe na rimwe kunoitika zvigidhigidhi zvinokwana 16 pa gore kubvira muna 1900.” Akwarakwatisi amweni anobhuya kuti numero ye kuitika ke zvigidhigidhi iri kuwanda ngokuti numero ye kaano micini yekubheka nayo yakabudirira inoona kuti zvigidhigidhi zviri kuitika, asi zvirokwazvo nge zvekuti, zvigidhigidhi zviri kubara kuneseka uye kufa ke anhu zvisati zvakamboitika.

 3. KUSHOMEKA KE ZVEKURHYA

Kushomeka ke zvekurhya kakawanda kakhona kuri kubarhwa nge ndaa ye hondo, kudyekerana, kukonerhwa mare, kukonerhwa pekurima uye kukonerhwa kuronga kuitira kuzodziirira tsawana dzinoitika dzega. “Ciziiso ce 2018” ce Urongwa we Zvekurhya we Nyika Yese (Programa Mundial de Alimentos) cinoti: “Mu nyika yese mamirionji anokwana 821 e anhu ari kubatana ne nzara uye mamirionji—anokwana 124 aana uthongo wakanaka nge kutama zvekurhya.” Kutama zvekurhya kakauraya mamirionji e ana anokwana 3.1 mu gore ra 2011 basi. Izvi zvinoreya 45% ye kufa ke ana adoko mu nyika yese.

4. MATENDA UYE NHENDA DZINO PASWANA

Bhuku re Organização Mundial da Saúde rinoti: “Mu makore atiri ano, kuri kuoneka matenda akakura. Nhenda dzekare, dzakaita hingana khorera, peste uye febre amarela—dzaakuonekazve, uye nhenda dzipsva dzaakuonekawo dzakaita hingana—SARS, Ebola, Zika no nhenda dzo muditi.” Kunyazi ruziyo re zvekurapa rabudirira maningi mu nguwa yataakurarama ino, akusati kaoneka mitombo ye kurapa nhenda dzese.

5. BASA RE KUPARIDZIRA MU NYIKA YESE

Djesu akareketawo nge zve cipangidziro cimweni. Ayena akati: “Uye masoko aya akanaka e Umambo acaparidzwa mu nyika yese inogarhwa, kuitira kupasa upupuri ku madzinza ese uye zvadaro mugumo ucauya.” (Mateu 24:14) Kunyazi hazvo nyika iri kubatana no matambudziko, anhu anodarika mamirionji 8 ari kuparidza masoko anopfadza e Umambo wa Mwari mu nyika dzinodarika 240 uye mu mareketero anodarika 1000. Izvi azvisati zvakamboitika kubvira kare.

Zviro zvakareketa Djesu kuti zvaizoitika zviri kutoitikadi kamare nyamasi. Ngei zvakanaka kuziya izvi? Ngekuti Djesu akati: “Pamunoona zviro izvi zveciitika, ziyai kuti Umambo wa Mwari waapadhuze.”—Ruka 21:31.

Kana tikanyasa kufunda nge pamusoro pe zvipangidzo zvakapa Djesu uye topima nguwa maererano no zvinobhuya Bhaibheri, tinokwanisa kuona kuti Mwari akagadza Umambo wake ku denga mu gore ra 1914. * Mu gore irona, Mwari akagadza Mwana wake kuti agare Mambo we Umambo wake. (Pisarema 2:2, 4, 6-9) Nokukasika, Umambo wa Mwari ucatonga pasi pano, uye ucaparadza utongi yese ye anhu uye woita kuda ka Mwari pa nyika pano nokusikaperi.

Mbai-mbai pano, masoko akarekethwa na Djesu pa munamato waakafundisa ekuti: “Umambo wenyu ngauuye. Kuda kenyu ngakuizwe pa nyika hingana zvakunoizwa ku denga,” acadzadzika (Mateu 6:10) Asi kubvira muna 1914 Umambo iwona uri kuitei? Uye tingakarirei kana Umambo iwona waakutonga pasi pano?