Mu fundo yakapera, takafunda nge pamusoro pe zvipangidzo zvakarekethwa na Djesu. Zvipangidzo izvona zvapangidza kuti Umambo wa Mwari wakagadzwa rini ku denga uye kuti Djesu ndiye Mambo we Umambo wa Mwari.

Djesu paakandogadzwa kuita Mambo, akadzingira Sathani ne madhimoni ake ku denga. Madhimoni aya akatenderhwa basi kugara pasi pano, ndi cimwe ce zviro zvinoitisa kuti zviro zvirumbwe zvecishata kubvira mu gore ra 1914.—Zvakapangidzwa 12:7, 9.

Kunyazi hazvo zviro zvecinesa pa nyika pano, utongi wa Djesu uri kubetsera anhu akawanda mu nyika yese. Anhu akawanda ari kufunda uye ari kuseenzesa zvinobva mu Bhaibheri mu upenyu mawo peciseenzeswa urongwa wekufundisa Bhaibheri mu nyika yese. (Isaya 2:2-4) Mamirionji e anhu akafunda kugara aseenzi akanaka, kugara ne mhuri inopfara, uye kugara ne maonero ari pakati ne pakati akaringana ne upfumi. Anhu aya ari kufunda kugara anhu anopfara kubvira zvino uye kugara munhu anodiwa na Djehovha kuti azogare mu nyika ino runyararo mu ramangwana.

Djesu waakutonga ku denga. Asi Nyika iciri kutongwa nge anhu. Ndiyo ndaa Mwari akati kuna Djesu: “Tonga pakati pe azondi ako.” (Pisarema 110:2) Nokukasika, Djesu acatonga uye opaparadza azondi uye acanyaradza anhu ese anozwira Umambo wa Mwari.

Pa nguwa iyona, Umambo wa Mwari

• Ucaparadza zvitendero zvekunyepa. Zvitendero zviri kunyepera anhu ke makore akawanda zvicaparadzwa. Nge ndaa ye zvitema zvazvo, Bhaibheri rinoezanisa zvitendero zvekunyepa ne hure. Kuparadzwa karo kucashamisa anhu akawanda.—Zvakapangidzwa 17:15, 16.

• Ucaparadza utongi ye anhu. Umambo wa Mwari ucatsakatisa utongi yese ye anhu.—Zvakapangidzwa 19:15, 17, 18.

• Ucaparadza anhu ese akashata. Cinyi cicaitika ku anhu aya anosanangura kuita zviro zvakashata uye asikadi kutungamirirhwa nge Umambo wa Mwari? Bhaibheri rinodaira kuti “anhu akashata, acaparadzwa pa nyika.”—Zvierengo 2:22.

• Ucasunga Sathani ne madhimoni ake. Sathani ne madhimoni ake acasungwa uye acakhandirhwa mu rindi rakadzika maningi. Awona “aacazonyeperizve anhu.”—Zvakapangidzwa 20:3, 10.

Izvi zvicazoreyei ku anhu aya anozwira Umambo wa Mwari?

Ecitonga hinga Mambo ku denga, Djesu acaita zvakawanda kudarika mutongi we anhu upi hake. Acabetserhwa ne anhu anokwana 144 000 anobva pasi pano. (Zvakapangidzwa 5:9, 10; 14:1, 3) Ayena acaita kuti zviro zvinoda Mwari zviitike pasi pano. Cinyi cinozwi Umambo wa Mwari uye ucaitei ku agari e pasi pano?

• Ucapedza matenda, ucemberi uye rufu. “Akuna munhu acazoti: ‘Ndiri kurhwara,’” uye “akucazoonekizve rufu.”—Isaya 33:24; Zvakapangidzwa 21:4.

• Ucaunzisa runyararo re zvirokwazvo ne kucengeteka. “Runyararo re ana ako ricakura” uye “Munhu umwe na umwe acazogara pasi pe muvhinyu wake ne pasi pe muonde wake, pasina acaathyisa.”—Isaya 54:13; Mika 4:4.

• Ucapasa anhu ese basa rinopfadza. “Runyararo re ana ako ricange rakakura,” uye “Anhu andakasanangura acanyasa kupfadzwa nge basa re nyara dzawo. Aazosenzeri nyore.”—Isaya 65:22, 23.

• Ucagadzirisa nyika. “Mu mbuto isina ciro uye nyika yakaoma dzicapfara, mbuto yakaoma icatumbuka maruwa hingana zvinoizwa nge safarau.”—Isaya 35:1.

• Uri kufundisa anhu kuita kuda ka Mwari kuti azorarame nokusikaperi. “Kuti aone upenyu usikaperi, anodikana kuziya imwimwi, Mwari umwe basi we zvirokwazvo, no uya wamakatuma, Djesu Kristu.”—Juau 17:3.

Maizoda kurarama mu nyika yakadai here? Mwari ari kuda maningi kuti imwimwi mugarewo umwe we anhu aya acawina makomborero aya. (Isaya 48:18) Fundo inoteera icareketa zvakaringana nge zvamunodikana kuita zvino kuti muzoone ramangwana iri rakanaka.