1-2. (a) Anyautongi amweni anoitirei Apupuri a Djehovha, uye awona anoitei? (b) Zvingabvira kudini kugara takapfara kunyazi teciteererhwa? (Panganidzaiwo ngezve foto iri pa kapa.)

 BASA re Apupuri a Djehovha, riri kurambidzwa mu nyika dzinodarika 30 mu nyika yese. Mu nyika dzimweni dzakhona hama no hanzvadzi dzakawanda dziri mu karaboso. Awona akashaishei? Mu madziso a Djehovha, awona aazi kushaisha ciro. Zvese zvaakaita, hinga kuerenga Bhaibheri, kuparidzira amweni, kwenda ku misangano no hama dzawo uye kurumbwa asina dii. Kunyazi eciteererhwa kudai aseenzi aya akagondeka a Mwari anorumbwa akagondeka *—ecipangidza kuti azvinei no zvinoitika kaari, awona anorumbwa akatendeka kuna Djehovha. Ngekuita izvona awona anozwa mupfaro wakakura!

² Pamweni imwimwi makaona mafoto e hama dzimweni dzakhona dzino ushingi dziri kubatana nokuteererhwa uye makaona kuti awona akatopfara. Awona ari kupfara ngekuti anoziya kuti Djehovha wakapfara nge kugondeka kawo. (1 Mak. 29:17a) Djesu akati: “Anopfara aya anoteererhwa nge ndaa ye unatsi . . . Pfarai uye nyasai kugara nomupfaro ngekuti mubairo wenyu wakakura.”—Mat. 5:10-12.

3. Maererano na Zviito 4:19, 20, aphostori akaitei paaiteererhwa, uye ngei akaita kudaro?

³ Zviri kubatana no hama no hanzvadzi dzedu nyamasi uno, zvakatodzana no zvakabatana no aphostori paaiteererhwa nge ndaa yekuparidzira ngezva Djesu. Atongi e Dare repamusoro-soro re ciDjuda “akabvunza aphostori kuti asarekete ciro kana kutofundisa eciseenzesa zina ra Djesu.” (Zvii. 4:18; 5:27, 28, 40) Asi aphostori akaitei? (Erengai Zviito 4:19, 20.) Awona aiziya kuti munhu wainga ano masimba kupinda awona wainga ‘akaabvunza kuti aparidzire anhu uye apupurire zvakadzara’ nge zva Kristu. (Zvii. 10:42) Ndiyo ndaa eciimirira aphostori ese, Pedru na Juau akareketa no ushingi kuti aizotanga kuteerera Mwari pane kutanga ateerera atongi aya, uye akasiya pamhene kuti ainga asikazosii kureketa ngezva Djesu. Zvaiita hingana kuti aibvunza atongi aya kuti: ‘Mitemo dzenyu dzakakwirira kupinda dza Mwari here?’

4. Maererano na Zviito 5:27-29, muezaniso upi wakasiiwa nge aphostori kuti tiuteedzere?

⁴ Aphostori akasiya muezaniso wakanaka kuti Akristu ese auteedzere, “kuteerera Mwari hinga mutongi pane kuteerera anhu.” (Erengai Zviito 5:27-29.) Izvirokwazvo kuti nge ndaa ye kugondeka ke aphostori awona akapondwa asi paakabuda pa dare re ciDjuda awona ainga “akapfara ngokuzwi ainga akasisira kutambudzwa nge ndaa ye zina” ra Djesu uye mumasure mazvo awona akarumbwa eciparidzira!—Zvii. 5:40-42.

5. Mibvunzo dzipi dzaticadaira?

⁵ Mushobo wakaita aphostori pamweni ungatisiya tinomubvunzo. Nge muezaniso aphostori aida kuteerera kudini Mwari pane kuteerera anhu, “ino odzikanda pasi pe anhu ano masimba makuru”? (Aro. 13:1) Tingazwira kudini “atongi uye no ano masimba” hinga zvakabuiwa no muphostori Pauro uye togara takagondeka ku mutongi mukuru Djehovha?—Tito 3:1.

6. (a) Anhu api ano “masimba makuru” anobhuiwa pana Aroma 13:1, uye tingaapasei? (b) Atongi ese e anhu ano masimba api?

⁶ Erengai Aroma 13:1. Pa vhersikuro ii, masoko ekuti “ano masimba makuru” anoreya atongi e anhu ano masimba ku anhu amweni. Akristu anodikana kuteerera akuru-akuru aya e utongi. Awona anopasa mutemo munyika, uye nguwa dzimweni anotovhikhira anhu a Mwari. (Zvak. 12:16) Ndiyo ndaa, tinodikana kuripa musoho, kuareremedza uye kuakudza, zvinodikanwa nge atongi aya. (Aro. 13:7) Kunyazi zvakadaro, atongi e anhu ano masimba ngekuti Djehovha ndiye uri kuzvitendera. Djesu akazvisiya pamhene paaishuphwa nge Mutongi we Roma Ponsiyo Pirato. Iyena paakabhuya kuti wainga uno masimba e ku ponesa Djesu kana kutomuuraya, Djesu akati: “Wainga usikadi kugara no masimba kandiri kudai usikazi kuapaswa kudenga.” (Juau 19:11) Hinga Pirato, masimba e atongi ese uye anhu ezvematongerhwe e nyika ano mugano.

7. Ndipapi patisikadikani kuzwira utongi we anhu, uye utongi we anhu unodikana kuedzurirei?

⁷ Akristu anodikana kurumbwa ecizwira utongi we anhu, asi paya pekuti mitemo ye utongi aipesani no mitemo ya Mwari. Asi isusu atidikani kuzwira anhu paanotibvunza kuti tiite zviro zvinorambidzwa ndi Mwari kana kuti otirambidza kuita zviro zvinobhuiwa ndi Mwari kuti tiite. Nge muezaniso, pamweni anotibvunza kuti tiseenze pa cikwata ce anyahondo e nyika. * Pamweni anorambidza Bhaibheri redu, mabhuku edu, basa redu rekuparidzira uye misangano dzedu. Kana atongi asikareremedzi masimba aakapaswa ndi Mwari nge kuteerera Akristu, awona acazvidaira kuna Mwari. Djehovha uri kuona zvese!—Mup. 5:8.

8. Musiyano upi uripo pakati pe masoko ekuti “mukuru” na “mukurusa,” uye ngei izvona zvecikosha?

⁸ Soko rekuti “mukuru” rinoreya “zviri nani, zvakakura, no masimba akawanda.” Asi azvireyi “zviri nani, zvakakura, no masimba ese.” Asi zvezvirokwazvo, ici cireyo ce soko rimweni—“mukukurusa.” Kunyazi utongi we anhu wecidainzwa kuti “anhu ano masimba makuru,” kuno munhu ano masimba ese—ndi mukurusa. Mu Bhaibheri, Djehovha anodainzwa kuti “Mukurusa” kunokwana karongomuna.—Dha. 7:18, 22, 25, 27.

9. Zviono zvipi zvakaona muphorofita Dhanyeri?

⁹ Muphorofita Dhanyeri wakagara no zvioneso zvakawanda maningi zvakasiya pamhene kuti masimba a Djehovha akakura maningi kupinda masimba o munhu upi hake. Cokutanga, Dhanyeri wakaona zvinyama zvirongomuna zvakakura zvaimirira utongi unosimba we nyika yese wokare—Bhabhironi, Medo-Pérsia, Grécia, Roma uye we mazuwa edu ano, Grã-Bretanha no América. (Dha. 7:1-3, 17) Hino Dhanyeri wakaona Djehovha akagara pacigaro ce umambo mu tribhunari kudenga. (Dha. 7:9, 10) Mumasure mazvo muphorofita uu wakazoonei? Zvezvirokwazvo ciziiso ku atongi e nyamasi uno.

10. Maererano na Dhanyeri 7:13, 14, 27, Djehovha anopasa ani masimba e panyika, uye izvona zvinopangidzei nge Zvake?

¹⁰ Erengai Dhanyeri 7:13, 14, 27. Mwari anobvisa ku atongi e anhu masimba ese aanawo uye unoapasa ku anhu akasisira uye ano masimba akakura. Ani wakhona? Masimba aya anopaswa “munhu wakatodzana no mwana wo munhu,” Djesu Kristu, uye “wakacena wo Mukurusa,” 144 000 acazotonga “nokusikaperi.” (Dha. 7:18) Zviri pamhene kuti, Djehovha ndi “Mukurusa,” ngekuti ndiye basi ano masimba e kuita kudaro.

11. Dhanyeri wakatarei zvinopangidza kuti Djehovha ndi mukurusa?

¹¹ Zviono izvi zvakaona Dhanyeri, zvinopangidza kamare zvaainga akareketa. Iyena  wakati: “Mwari we kudenga anobvisa madzimambo uye okanda madzimambo.” Iyena wakabhuyazve kuti: “We Kumusoro-Soro Mutongi we panyika, uye anoupasa uya waanoda.” (Dha. 2:19-21; 4:17) Asi zvakamboitika here Djehovha obvisa mutongi uye opasa masimba umweni? Honde zvakamboitika!

12. Kare Djehovha akabvisa madzimambo pa ciitiko cipi? (Onai foto.)

¹² Djehovha akapangidza pamhene kuti ayena ndi mukurusa “kupinda anhu ano masimba makuru.” Ngationei miezaniso mitatu. Farao wakatambudza anhu a Djehovha ku Edjipitu uye wakaramba kuabudisa kakawanda kese. Asi Djehovha akabudisa anhu uye akaita kuti Farao afe mu Bahari re Kupsvuka. (Eki. 14:26-28; Pis. 136:15) Mambo e ku Bhabhironi Bhersazari wakaita mabiko “wakadzikudza [iyena kamare] ecirhwisa Tenzi we kudenga” uye “wakakudza madzimwari e prata ne oro” pane kukudza Djehovha. (Dha. 5:22, 23) Asi Mwari akapsverudza mwanarume uya waizvikudza. Pa “usiku uwona,” Bhersazari wakauraiwa uye umambo wake wakapaswa ma Medo-Pérsia. (Dha. 5:28, 30, 31) Mambo Herodhi Agripa I oku Palestina wakauraya muphostori Tiyago uye wakakwanisa kusunga muphostori Pedru, iyenazve wainga uno cido cekuda kuuraya Pedru. Asi Djehovha aazi kutendera kuti Herodhi azviite. “Ngirozi ya Djehovha yakakuadza Herodhi,” uye iyena wakatofa.—Zvii. 12:1-5, 21-23.

13. Pasai muezaniso wekuti Djehovha akanyisa kudini magrupu ese e madzinza.

¹³ Djehovha akapangidza kuti mukurusa kutobatanidzawo magrupu kana kuti mubatanidzwa we atongi. Akarhwisira Aisraeri, uye akaita kuti anhu ake akwanise kutsakatisa madzimambo anokwana kuita 31 oku Kanani uye kuima ku dii rakanaka ku nyika yakapikirhwa. (Djs. 11:4-6, 20; 12:1, 7, 24) Djehovha akaitawo kuti Mambo Bheni-hadhadhi anyiswe zvinopsverusa uye no atongi amweni anokwana kuita 32 oku Siriya akarhwiswa no Aisraeri.—1 Mad. 20:1, 26-29.

14-15. (a) Mambo Nabhukodhonozori uye na Mambo Dhariyo akareketei ngezve ucangamire wa Djehovha? (b) Mutari we pisarema wakareketei ngezva Djehovha uye ngezve anhu Ake?

¹⁴ Djehovha akapangidza kakawanda kese kuti ndi Mukurusa! Mambo Nabhukodhonozori  we ku Bhabhironi paakadzikudza ngekubhuya ‘ngezve simba rake, kubamba kake uye ukuru wake’ pane kuziya kuti Djehovha basi Ndiye anodikana kunamathwa, Djehovha akamuitisa kuti apenge. Paakazoita nani, Nabhukodhonozori “wakakudza we Kumusoro-Soro” uye wakaziya kuti “kutonga ka [Djehovha] kunogara nokusikaperi.” Iyena wakati: “Apana unokwanisa kumuimisa.” (Dha. 4:30, 33-35) Mumasure mekuti kugondeka ka Dhanyeri kuna Mwari kaedzwa uye Djehovha omuponesa murindi re mhondoro, Mambo Dhariyo wakapasa mutemo wokuti: “Anhu ngaathye Mwari wa Dhanyeri. Ngekuti ayena ndi Mwari mupenyu uye unogara nokusikaperi. Umambo wake auzoparadzwi, uye ucangamire wake unogara nokusikaperi.”—Dha. 6:7-10, 19-22, 26, 27, masoko e pasi.

¹⁵ Mutari we pisarema wakatara kuti: “Djehovha akavhiringidza mazano e madzinza; uye akaita kuti urongwa we anhu usabudirire. Iyena wakatunhudzira eciti: “Anopfara madzinza anonamata Djehovha hingana Mwari wawo, anhu aakasanangura kuti agare nhaka yake.” (Pis. 33:10, 12) Zvezvirokwazvo, ici ndico cikonzero cakanaka cekuti tirumbwe takagondeka kuna Djehovha!

16. Tingagara no rugondo ripi nge zve “kutambudzika kukuru,” uye ngei? (Onai foto.)

¹⁶ Isusu taona zvese zvakaizwa ndi Djehovha kare. Asi zvinyi zvatingaetsera zvicaizwa ndi Djehovha mune ramangwana? Isusu tingagara no rugondo rekuti Djehovha acaponesa aseenzi ake akagondeka “pakutambudzika kukuru” kaapadhuze. (Mat. 24:21; Dha. 12:1) Ayena acaita izvona panguwa yekuti grupu re anhu, rinodainzwa mu Bhaibheri kuti Gogi we Magogi, pa rinorhwisa anhu a Mwari mu nyika yese reciseenzesa zvecisimba. Kunyazi grupu iri re anhu recibatanidza nhengo dzese dzinokwana kuita 193 dze Sangano re Mubatanidzwa we  Nyika dze Pasi Rese (Nações Unidas) awona anonga asiripi ciro pakuezanisa no Mukurusa no masimba ake kudenga! Djehovha anogondesa kuti: frhgjNdicapangidza ukuru wangu uye ndicadzicenesa pamberi pe madzinza akawanda ndoita kuti andiziye; acandiziya kuti inini ndini Djehovha.”—Ezek. 38:14-16, 23; Pis. 46:10.

17. Bhaibheri rinoreketa kuti zvinyi zvicaitika no madzimambo e nyika uye no aya akagondeka kuna Djehovha?

¹⁷ Kurhwisa ka Goge kucatora pa kurhwisana kekupedzesera pa Amagedhoni Djehovha paacatsakatisa “madzimambo e nyika ese.” (Zvak. 16:14, 16; 19:19-21) Nge dii rimweni, “anatsi basi ndiwo acararama pa nyika uye akagondeka acarumbwa ari imona.”—Zvie. 2:21, masoko e pasi.

18. Akristu ezvirokwazvo akawanda akagara akadzipira kuitei uye ngei? (Dhanyeri 3:28)

¹⁸ Pa ngano yese, Akristu e zvirokwazvo akakanda pangozi rusununguko rawo kutobatanidzawo no upenyu wawo nge ndaa ye rudo rawo kuna Djehovha Mutongi wawo Mukurusa. Awona akagondeka, hingana Ahebheru atatu akakhandirhwa pa muriro uye akaponeswa nge kutendeka ku Mukurusa.—Erengai Dhanyeri 3:28.

19. Djehovha acatonga kudini anhu ake uye cinyi catinodikana kuita zvino?

¹⁹ Dhavhidhi wakatara kukosha kunoita pa kugondeka kuna Mwari: “Djehovha acatonga anhu. Nditongeiwo Djehovha, maererano no unatsi wangu uye maererano no kugondeka kangu.” (Pis. 7:8) Iyena wakatarazve kuti: “Kugondeka kangu uye unatsi wangu ngazvindidziirire.” (Pis. 25:21) Mushobo wakanyasa kunaka we kurarama ndi we kugondeka kuna Djehovha. Kana tisikazi kusiya kugondeka kedu kaari, azvinei no zvingaitika, kana tikaita kudaro, ticazwa zvakazwa mutari we pisarema wakati: “Anopfara aya akagondeka . . . anohamba mu mutemo wa Djehovha.”—Pis. 119:1, masoko e pasi.