1. Ngacipi cido cedu “cekumwiya catinaco,” uye cido icona cakabatana kudini no mupfaro we zvirokwazvo?

 MUPFARO we zvirokwazvo amazwirepi ekudakadzwa atinobatana nawo basi pa nguwa dzinganani dze upenyu. Ecibhuya ngezve mupfaro, Djesu akati pa Mharidzo yake ye Padunhu: “Anopfara aya anoziya kuti anoda kutungamirirhwa na Mwari.” (Mat. 5:3) Zvecireya kuti tingakwanisa kupfara mu upenyu wedu wese. Djesu aizviziya kuti anhu akasikwa no cido cekuda “kutungamirirhwa na Mwari,” kana kuti, cido cakakura cekuda kuziya uye kunamata Musiki wedu Djehovha Mwari. Ngekuti Djehovha ndi “Mwari anopfara,” ese aya anomunamata angapfarawo.—1 Ti. 1:11.

2-3. (a) Maererano no masoko a Djesu anhu api angakwanisawo kupfara? (b) Ticaonei mu fundo ino, uye ngei izvona zvecikosha?

² Kodi tingakwanisa kupfara basi kana upenyu wedu wecihamba zvakanaka? Haiwa. Djesu akabhuya ciro cinoshamisa. Ayena akabhuya kuti “aya anocema”—zvingaita kuti ari kucema nge ndaa yekudzipasa ndaa kana ngekugara no zvinetso zvakakura mu upenyu—angakwanisa kupfara. Djesu akabuya zvimwezvo, ngezve “aya arikuteererhwa nge ndaa ye unatsi” uye ngezve aya “anotukwa” nge daa yekuzwira Kristu. (Mat. 5:4, 10, 11) Asi zvingabvira kudini kupfara pa migariro yakaita kudai?

³ Djesu aitifundisa kuti tingakwanisa kupfara haiwa ngekuti upenyu wedu uri kuhamba zvakanaka, asi ngekudzadzisa cido cedu cekutungamirirhwa na Mwari uye kukhwedera dhuze naye. (Tig. 4:8) Tingazviita kudini? Mu fundo ino, ticaona matanho matatu angatibetsera kuti tigumire mupfaro.

4. Ngaripi danho rekutanga rinoita kuti tigumire mupfaro we zvirokwazvo? (Pisarema 1:1-3)

⁴ DANHO 1: Kuti tipfare zvezvirokwazvo, tinodikana kurhya zvekurhya zve kumwiya. Anhu kutobatanidzawo zvinyama, anodikana kurhya zvekurhya zve kunyama kuti akwanise kurarama. Asi anhu basi ndiwo anokwanisa kurhya zvekurhya zve kumwiya. Isusu tinoda zvekurhya zve kumwiya, zvekuti Djesu akabhuya kuti: “Munhu aadikani kurarama no pau basi, asi anodikana kurarama nge masoko ese anobuda pa muromo wa Djehovha.” (Mat. 4:4) Zvecidaro, atidikani kugara kana zuwa rimwe haro, tisikazi kurhya zvinobuda mu Soko ra Mwari Bhaibheri. Mutari we pisarema wakati: ‘Anopfara munhu anopfarira mutemo wa Djehovha, uye anouerenga usiku no masikati.’—Erengai Pisarema 1:1-3.

5-6. a) Tingafundei kubva mu Bhaibheri? (b) Kuerenga Bhaibheri kungatibetsera kudini?

⁵ Mu Bhaibheri, ecisenzesa rudo Djehovha akatipasa nhungamiriro dzinocokuita no zviro zvatinodikana kuita kuti tipfare. Ngo muezaniso tinofunda kuti ngei ayena akatisika, tingaita kudini kuti tikhwedere dhuze naye, tingarekererhwa kudini zvitema zvedu uye tinofundawo ngezve kariro yakanaka ye ramangwana. (Djer. 29:11) Patinofunda Bhaibheri uye patinofunda ngezve zvokwadi izvi, mwoyo wedu uno dzara no mupfaro!

⁶ Bhaibheri rakadzarawo no mazano e zuwa no zuwa anobetsera. Patinosenzesa mazano awona tingakwanisa kugumira mupfaro we zvirokwazvo. Pese pamunoora mwoyo nge nda ye zvinetso zve upenyu, torai nguwa mecierenga Bhaibheri uye kunyasa kurangarira zvamuri kuerenga. Djesu akati: “Anopfara aya  anozwa Soko ra Mwari uye oriseenzesa!”—Ruka 11:28.

7. Mungaitei kuti munyase kubetsereka no kuerenga kamunoita Bhaibheri?

⁷ Pamunoerenga Soko ra Mwari, torai nguwa kuti munyase kurangarira zvamuri kuerenga. Onai muezaniso unoteera. Rangaridzai kuti munhu wamubikirai ciro camunonyanya kuda. Uye pamweni ngekunonoka kamaita kana nge ndaa ye zviro zvamuri kurangarira, mopedzesera makasika kurhya musikazi kuzwa mushobo wazvinonaka. Asi mumasure mekupedza kurhya, imwimwi moona kuti makasika maningi pamairhya, uye mopedzesera maakutsumba kuti ngei musikazi kurhya padoko-padoko kuti muzwe mushobo wazvainaka. Makamboerenga here Bhaibheri mecikasika mopedzesera musikazi kuzwa mushobo wazvainaka zvekurhya zve kumwiya zva Djehovha? Torai nguwa kuti munyase kubetserhwa no kuerenga kamunoita Bhaibheri. Kandai ndangariro dzenyu pa zviro zvirikuitika, mushobo wariri kureketa, uye nyasai kurangarira zviro zvamuri kuerenga. Kuita izvona zvicaita kuti munyase kupfara.

8. “Muranda wakagondeka uye wakangwara” arikuita kudini basa raakapuwa na Djesu? (Onai masoko e pasi.)

⁸ Djesu akagadza “muranda wakagondeka uye wakangwara” kuti atipase zvekurhya zve kumwiya panguwa yakasisira. Uye isusu tiri kunyasa kupuwa zvekurhya zve kumwiya. * (Mat. 24:45) Ciro cinonyanya kuseezeswa pa zvese zvinobudiswa no muranda wakagondeka uye wakangwara i Bhaibheri. (1 Ate. 2:13) Ndiyo ndaa, zvekurhya izvi zve kumwiya zvinotibetsera kufunda mushobo unorangarira Djehovha. Ndiyo ndaa, tinoerenga Murindiri uye Mukai! uye fundo dzatinogumira mu saiti jw.org. Isusu tinogadzirira misangano yese. Uye tinoona urongwa we pa mwedzi we JW Broadcasting^®. Patinorhya zvakanaka zvekurhya zve kumwiya, izvona zvinotiitisa kuti titore danho recipiri rinotiendesa ku mupfaro we zvirokwazvo.

9. Ngaripi danho recipiri rinotiendesa ku mupfaro we zvirokwazvo?

⁹ DANHO 2: Kuti tipfare zvezvirokwazvo, tinodikana kurarama maererano no mitemo ya Djehovha. Mutari we pisarema wakati: “Unopfara wese uya unothya Djehovha uye unohamba mu makwanza ake.” (Pis. 128:1) Zvinoreyei kuthya Djehovha? Zvinoreya kunyasa kureremedza Djehovha uye kuita zviri zvese kuti tisamutsukwarise. (Zvie. 16:6) Nge ndaa yazvo tinopeta masimba nguwa dzese kuti titeerere mitemo ya Djehovha, yakaringana no cakanaka uye cakashata yatinogumira mu Bhaibheri. (2 Ako. 7:1) Ticanyasa kupfara kana tikaita zviya zvinodiwa na Djehovha uye toramba kuita zviya zvaanozonda.—Pis. 37:27; 97:10; Aro. 12:9.

10. Maererano na Aroma 12:2, ubaba upi watinawo?

¹⁰ Erengai Aroma 12:2. Munhu angatozviziya kuti Djehovha ano citenderhwa cekutibvunza kuti ngazvipi zvakanaka uye ngazvipi zvakashata, asi iyena anodikanawo kugadzirira kutereera mitemo ya Mwari. Ngo muezaniso, munhu angazviziya kuti anyautongi anocitenderhwa cekupasa mutemo unocokuita no magogomere aanodikana kuita kana ari mugwanza. Asi iyena, pamweni unonga asikadi kuteerera mutemo uu. Ungapedzesera waakutekenya ecigogomesa maningi kupinda zviri pa mutemo. No maitiro edu, isusu tinopangidza kuti kuteerera mitemo ya Djehovha, ndiwo mararamiro akanyasa kunaka. (Zvie. 12:28) Dhavhidhi wairangaridzawo kudaro, iyena wakati ngezva Djehovha: “Munoita kuti ndiziye gwanza  re upenyu, pamberi penyu pano mupfaro wakakura, kumoko wenyu we kwawo kuno mupfaro nokusikaperi.”—Pis. 16:11.

11-12. (a) Tinodikana kungwarirei patinobatana no zvinetso kana kuora mwoyo? (b) Afiripi 4:8 inotibetsera kudini pakusanangura zviro zvekuwaraidzwa nazvo?

¹¹ Tese isusu tinobatana no zvinetso kana kutoora mwoyo panguwa dzimweni. Izvona pazvinoitika, pamweni tinoona kuti tinodikana kuita ciro kuti timbotonhodze musoro. Izvona zvinozwisisika asi tinodikana kungwarira kuti tisapedzesere taita ciro cinozondwa na Djehovha.—Aef. 5:10-12, 15-17.

¹² Pa tsamba yake ku Afiripi muphostori Pauro wakakohomedzesa Akristu kuti arumbwe ecirangarira zviro zvese zvino “unatsi, . . . zvakacena, . . . zvinodiwa, [uye] zvinorekethwa zvakanaka.” (Erengai Afiripi 4:8.) Izvirokwazvo kuti Pauro apa wainga asiripi kutara ngezve kuwaraidzwa kamare, asi zviro izvi zvaakatara zvinodikana kutibetsera patinoita zvisananguro pa nyaya dze kuwaraidzwa. Edzai kuita zvinoteera: Pamunonga mecida kusanangura “zviro” zvakaita hinga “ngoma,” “mafirme,” “mabhuku” kana kuti “jogo” edzai kuona kuti izvona zvinoenderana here no mawara ari pana Afiripi 4:8. Kuita izvona zvicamubetserai kuona kuti zvamasanangura kuti muwaraidzwe nazvo, zvinopfadza Mwari here kana kuti haiwa. Tinoda kuti mararamire edu aenderane no mitemo yakanakisisa ya Djehovha. (Pis. 119:1-3) Kana tikaita izvona tinonga tino hana yakacena kuti titore danho rinoteera rinotiendesa ku mupfaro we zvirokwazvo.—Zvii. 23:1.

13. Ngaripi danho recitatu rinoendesa ku mupfaro we zvirokwazvo? (Juau 4:23, 24)

¹³ DANHO 3: Garai no cokwadi cekuti kunamata Djehovha kuri pa mbuto ye kutanga mu upenyu wenyu. Djehovha ndi musiki wedu uye wakasisira kunamathwa nesu. (Zvak. 4:11; 14:6, 7) Ndiyo ndaa, ciro cinodikana kunyanya kukosha katiri i kunamata Djehovha, “no mwiya uye cokwadi.” (Erengai Juau 4:23, 24.) Izvona zvinoreya kuti kunamata kedu kunodikana kutungamirirhwa no mwiya mucena wa Mwari, uye zvoenderana no zvokwadi zvatinogumira mu Bhaibheri. Kunamata Djehovha kunodikana kugara ciro cekutanga mu upenyu wedu kunyazi tecigara mu nyika yekuti basa redu ririkurambidzwa. Zvinouno, hama no hanzvadzi dzinodarika 100 dzakasungwa ngekugara Mupupuri wa Djehovha. * Kunyazi zvakadaro, awona anopfara nge kuita zvaanokwanisa kuti anamate, kufunda uye ngekureketa ngezva Mwari uye Umambo wake! Patinoshorhwa kana kuteererhwa, tinopfara nge kuziya kuti Djehovha ari ku dii redu uye acatikomborera.—Tig. 1:12; 1 Ped. 4:14.

14. Cinyi cakaitika no mudjaha umweni weku Tadjiquistão, uye ngei?

¹⁴ Miezaniso dze mazuwa ano dzinosiya pamhene kuti matanho matatu Atafunda, zvezvirokwazvo anotibetsera kugumira mupfaro we zvirokwazvo, azvinei kuti mugariro wedu wakadini. Onai zvakaitika no Jovidon Bobojonov, uno makore 19, weku Tadjiquistão, iyena wakaramba kuita basa recisodja. Nge ndaa yazvo muzuwa 4 ya Otubro ya 2019, iyena wakabudiswa pa nyumba pake okandhwa mu karaboso ke mwedzi dzinganani obathwa hingana kriminozo. Kubathwa uku kusina unatsi kakaziikanwa no nyika dzakawanda. Iyena wakapondhwa no masurudado, akamubambidzira kuti apfeke macira ecisodja uye aite juramento yecisodja. Mumasure mekutongwa,  iyena wakaendeswa ku mbuto yaibambidzirhwa anhu kuseenza. Asi nokuhamba ke nguwa mukuru we mu nyika iyona, wakamurekerera uye wakapasa mutemo kuti asunungurhwe. Pa zvese zvaakabatana nazvo, Jovidon wakarumbwa wakagondeka uye wakarumbwa wakapfara. Iyena wakazvikwanisa kudini? Jovidon aambozi kumbokanganwa cido cake cekuda kutungamirirhwa na Mwari.

15. Jovidon wakakwanisa kudini kurhya zvekurhya zve kumwiya panguwa yaainga ari mukaraboso?

¹⁵ Panguwa yainga ari mukaraboso, Jovidon wairhya zvekurhya zve kumwiya, kunyazi paainga asina Bhaibheri kana mabhuku edu. Iyena wakazvikwanisa kudini? Hama dzo kweneyo dzaimuendesera zvekurhya uye dzaitara tsamba ye zuwa pa pasta yainga ino zvekurhya. Nge kudaro, iyena waikwanisa kuerenga Bhaibheri uye karangaridza nge zvazvo mazuwa ese. Mumasure mekubudiswa mu karaboso, iyena wakapasa mazano anoteera ku aya asati ambobatana no miedzo yakakura ye kutenda, iyena wakati: “Ino ndiyo nguwa ye kukhorovhera rusununguko renyu kuti mutunhudzira ruziyo renyu, nge kuerenga soko ra Mwari uye mabhuku edu.”

16. Jovidon wakasanangura kukanda ndangariro dzake pa zviro zvipi?

¹⁶ Hama yedu yakapeta masimba kuti irarame maererano no mitemo ya Djehovha. Pane kukanda ndangariro dzake pa zvido zvakashata, kana kuita zviro zvakashata, iyena wakakanda  ndangariro dzake pana Djehovha uye pa zviro zvaanotendera. Jovidon waishamiswa no kurungama kakaita zvisikwa zva Mwari. Macibesi ese, waimuka shiri dzeciemba, uye usiku waishamiswa no mwedzi uye nyeredzi. Iyena wakati: “Inini ndaizwa mupfaro uye ndaibambiswa no zvipo izvi zva Djehovha.” Patinotenda nge ndaa ye zvese zvatinopaswa na Djehovha, zve kunyama uye zve kumwiya, tinogara no mupfaro we zvirokwazvo uye mupfaro uu ungatipasa simba rekushingirira.

17. 1 Pedru 1:6, 7 ingabetsera kudini munhu ari pamugariro wakaita hingana wakabatana na Jovidon?

¹⁷ Jovidon wakakandawo kunamata Djehovha pa mbuto ye kutanga. Iyena waizviziya kuti zvainga zvecikosha kurumbwa wakagondeka kuna Mwari we zvirokwazvo. Djesu akati: “Djehovha Mwari wako ndiyena waunodikana kunamata, uye ndiyena basi waunodikana kuitira basa rakacena.” (Ruka 4:8) Mapurisiya no masurudado aida kuti Jovidon asiye gereja rake. Asi iyena, wainamata kuna Djehovha mazuwa ese usiku no masikati, ecikumbira Djehovha kuti amubetsere kuti asarembe uye kuiti asasiye kutenda kake. Kunyazi no kubathwa zvisina unatsi kaiizwa, Jovidon wakarumbwa wakagondeka. Izvirokwazvo kuti iyena wakabudiswa panyumba pake, wakapondhwa uye wakasungwa. Asi zvino iyena uno ciro cainga asina—kutenda kakaedzwa.—Erengai 1 Pedru 1:6, 7.

18. Tinodikana kuitei kuti tigare no mupfaro we zvirokwazvo?

¹⁸ Djehovha anoziya zvatinoda kuti tipfare zve zvirokwazvo. Kana imwimwi mukateerera matanho matatu anoendesa ku mupfaro we zvirokwazvo, mungapfarawo, kunyazi mecibatana no mugariro unoshupha. Pedzepo mucakwanisa kubhuya kuti: “Anopfara anhu ana Djehovha hinga Mwari wawo!”—Pis. 144:15.