1. Djehovha akatipasa kariri ipi?

 DJEHOVHA akatipasa kariro yakanakisisa ye upenyu usikaperi. Amweni acagara no upenyu usikafi hingana zvisikwa zvekumwiya kudenga. (1 Ako. 15:50, 53) Asi anhu akawanda ano kariro ye kurarama nokusikaperi pa nyika, akapfara uye no uthongo wakakwana. (Zvak. 21:3, 4) Kariro yedu inokosha katiri azvinei kuti tiri kuetsera kurarama nokusikaperi kudenga kana panyika.

2. Kariro yedu yakatsamira papi, uye ngei tecireketa kudaro?

² Mu Bhaibheri soko rokuti “kariro,” ringareyawo “kuetsera kuti zviro zvakanaka zvicaitika.” Uye isusu tingagara no rugondo rekuti zvatiri kuetsera zve ramangwana zvicaitika ngekuti zvakabhuiwa na Djehovha. (Aro. 15:13) Tinoziya zvaakatipikira uye tinoziyawo kuti anodzadzisa zvese zvaakapika. (Num. 23:19) Isusu tino cokwadi cekuti Djehovha ano cido uye simba rekuita zvese zvaakapika kuti acaita. Kariro yedu, aitsamiri pa zviro zvekunyepa kana kundodzipasa simba basi iyona ino tsamira pa zviro zve cokwadi.

3. Ticaonei mu fundo ino? (Pisarema 27:14)

³ Baba edu ekudenga anotida, uye anoda kuti tiagonde. (Erengai Pisarema 27:14.) Kana tikagonda Djehovha uye rugondo redu ro bamba tinoona ramangwana uye zvinetso zvedu no ushingi uye no mupfaro. Ngatione kuti kariro inotidziirira kudini. Cekutanga, ngatione kuti kariro yakaita hingana ankora uye kapaseti nge gwanza ripi. Pedzepo ticaona kuti tingabambisa kudini kariro yedu.

4. Kariro yakaita hingana ankora nge gwanza ripi? (Ahebheru 6:19)

⁴ Pa tsamba yake ku Ahebheru, Pauro wakaezanisa kariro no ankora. (Erengai Ahebheru 6:19.) Pauro waigara eciita rhwendo no bharko, uye waizviziya kuti ankora yaiseenzeswa kuitira kuti bharko risaende ku mbuto isikadikanwi. Zuwa rimweni iyena wainga ari mu navhiyo uye kakaitika dutu rakakura. Iyena wakaona aseenzi e mu navhiyo ecikhandira ankora mu bahari, kuitira kuti navhiyo iyona isapondeke pa buwe. (Zvii. 27:29, 39-41) Kuitawo hingana ankora inoita kuti bharko risatorhwe nge mhepo, kariro yedu inoita kuti tirumbwe takabamba, uye inotibetsera kuti tisasiye Djehovha togara tisina kokwenda patinosongana no matambudziko. Kariro yedu yakabamba inotibetsera pakurhwisana no madutu e upenyu, ngekuti tino rugundo rokuti nokukasika zviro zvicacinja. Tinodikana kuedzurira kuti Djesu akatingwadza kuti ticateererhwa. (Juau 15:20) Kunyasa kurangarira mubairo wedu we ramangwana, zvinotibetsera kurumbwa mu gwanza rakanaka teciseenzera Djehovha.

5. Kariro yakapasa kudini Djesu simba kuti arhwisane no rufu?

⁵ Onai kuti kariro yakabetsera kudini Djesu kunyazi eciziya kuti acauraiwa nge mushobo unorhwadza. Pa zuwa re pentekoste ya 33 K.A. muphostori Pedru wakareketa ngezve uphorofiti we Pisarema, unoreketa ngezve mushobo wakanaka waizorumbwa Djesu akaterama: “Uye ndicagara ndino kariro; ngekuti amuzondisii mu Guwa uye amuzorekeri munhu wenyu wakagondeka eciora. . . .  Mucandidzadza no mupfaro wakakura pamberi penyu.” (Zvii. 2:25-28; Pis. 16:8-11) Kunyazi eciziya kuti aizofa, Djesu ainga ano kariro yakabamba yekuti Baba ake aizomumutsa, uye kuti aizogarazve no mupfaro we kugara no Baba ake kudenga.—Aheb. 12:2, 3.

6. Hama imweni yakabhuiyei ngezve kariro?

⁶ Kariro yedu inosobetsera hama dzakawanda kuti dzishingirire. Onai muezaniso wa Leonard Chinn, hama yakagondeka yakararama ku Inglaterra. Panguwa ye Hondo Yekutanga ye Nyika Yese iyena wakasungwa ngekuramba kubatana no masurudado. Iyena wakagara mwedzi miiri mukaraboso inokandhwa munhu umwe basi, uye pedzepo wakaitiswa basa rekubambidzirhwa. Iyena wakati: “Zvandakabatana nazvo, zvakabudisa pamhene mushobo watinodikana kugara no kariro kuti tishingirire. Mu Bhaibheri, tino muezaniso wa Djesu, aphostori uye no zvipikirhwa zvakanaka, zvese izvi zvinotipasa kariro yakakura ye ramangwana uye simba kuti tishingirire.” Kariro yainga yakaita hingana ankora kuna Leonard, uye zvingaitikawo katiri.

7. Zvinetso zvingaitisa kudini kuti kutenda kedu kunyase kubamba? (Aroma 5:3-5; Tiyago 1:12)

⁷ Patinobatana no zvinetso, uye toona mushobo watiri kubetserhwa na Djehovha, zvinobuda pamhene kuti Djehovha anotitendera uye izvona zvinobambisa kariro yedu. (Erengai Aroma 5:3-5; Tiyago 1:12.) Nge ndaa yazvo, kariro yedu inonyasa kubamba kupinda pa nguwa yatakafunda cokwadi. Sathani unoda kuti tidzengenyeswe no zvinetso zvedu, asi no rubetso ra Djehovha tingakwanisa kuzvikunda.

8. Kariro yakaita hingana kapaseti nge gwanza ripi? (1 Atesaronika 5:8)

⁸ Bhaibheri rinoezanisawo kariro yedu no kapaseti. (Erengai 1 Atesaronika 5:8.) Kapaseti inodziirira musoro we musurudado paanonga ecirhwisana no muzondi. Pa nyaya dze kumwiya tinodikana kudziirira ndangariro dzedu pazvibhakera zva Sathani. Iyena unototirhwisa kakawanda no miyedzo uye nzero  dzakagadzirirhwa kuti ticinje mushobo wedu wekurangarira. Kuitawo hingana kapaseti inodziirira musoro we musurudado, kariro yedu inodziirira mushobo watino rangarira kuti ti rumbwe takagondeka kuna Djehovha.

9. Cinyi cinoitika no anhu asina kariro?

⁹ Kariro yedu yekurarama nokusikaperi inotibetsera kuita ciito no ungwaru. Nge dii rimweni, kana tikasiya kariro yedu yeciremba uye tosiya kuti mushobo wedu we kurangarira ucinjwe no nyika, upenyu usikaperi unoita hingana uri kure. Onai zvakaitika no Akristu anganani airarama ku thaundi re kare re Akorinti. Awona akasiya kutenda kucipikirhwa cinokosha maningi ca Mwari—kariro ye rumuko. (1 Ako. 15:12) Muphostori Pauro wakatara kuti aya asikatendi mu kariro ye rumuko anoraramira zva nyamasi basi. (1 Ako. 15:32) Nyamasi uno, anhu asikatendi mu zvipikirhwa zva Mwari anorarama hingana kuti akuzooneki mangwana ecindopsvaka zvido zvawo basi. Asi isusu takasiyana, tinogonda zvakapika Mwari zvinocokuita ne ramangwana. Kariro yedu yakaita hinga kapaseti inodziirira ndangariro dzedu uye inotibetsera kuti tisarangarire nge zvedu basi, zviro zvaizokuwadza ushamwari wedu na Djehovha.—1 Ako. 15:33, 34.

10. Kariro inotidziirira kudini pa marangariro akashata?

¹⁰ Kariro yedu ingatibetserawo pa nzero yekuti azvibetseri kuedza kudakadza Djehovha. Nge muezaniso, amweni angarangaridza kuti: ‘Inini andibetseri ciro uye andizogari pakati pe aya acararama nokusikaperi. Andizokwanisi kuteerera zvakanaka mitemo ya Mwari.’ Asi muciri kurangarira here kuti ndiani wakaedzesa nzero dzakaita hingana idzi kuna Djobo? I shamwari yake ye kunyepa Erifaji. Iyena wakati: “Munhu asikararami nokusikaperi angagara kudini akacena?” Pedzepo, iyena wakabhuya ngezva Mwari kuti: “Ayena aatendi ku acena ake uye kutobatanidzawo denga arizi kucena pamberi pe madziso ake.” (Djobo 15:14, 15) Iyena wakanyepa maningi! Mushobo uu we kurangarira unobva kuna—Sathani. Iyena unozviziya kuti kana mukarumbwa mecirangarira kudai, kariro yenyu icaremba. Hino, rambai manyepo aya uye kandai ndangariro dzenyu pa zvipikirhwa zva Djehovha. Musazozvithyire kana kamwe hako kuti ayena anoda kuti murarame nokusikaperi uye kuti ayena acamubetserai kuti mukwanise cinangwa ici.—1 Ti. 2:3, 4.

11. Ngei tecidikana kugara no mwoyo unononoka kutsamwa patinonga tecietsera nguwa icadzadzisa Mwari zvipikirhwa zvake?

¹¹ Azviripi nyore kuita kuti kariro yenyu irumbwe yakabamba nguwa dzese. Izvona zvinoitika ngekuti tingaremba kuetsera Mwari kuti adzadzise cipikirhwa cake. Asi, tinodikana kuedzurira kuti Djehovha anorarama nokusikaperi uye mushobo unopinda nguwa kaari wakasiyana katiri. (2 Ped. 3:8, 9) Ayena acadzadzisa cinangwa nge mushobo wakanaka kupinda wese, pamweni andiwopi mushobo watinoetsera. Cinyi cingatibetsera kubambisa kariro yedu patinonga tecietsera Djehovha no mwoyo unonoka kutsamwa nguwa yaacadzadzisa zvipikirhwa zvake?—Tig. 5:7, 8.

12. Maererano na Ahebheru 11:1, 6, kariro yakabatana kudini nokutenda?

¹² Bhaibheri rinoezanisa kariro nokutenda kuti Djehovha ariyo uye kuti ayena “anopasa mubairo ese anomupsvaka no mwoyo wese.” (Erengai Ahebheru 11:1, 6.) Patinonyasa kutenda kuti Djehovha ariyo kamare, rugondo redu rekuti ayena acaita zvese zvaakapikira rinonyasa kubambawo. Zvecidaro, tinokwanisa kurumbwa tecigara no kariro yakabamba kana tikarumbwa tiri dhuze na Djehovha uya anogondesa kurarama zvatiri kuetsera. Ngatione zvino mazano anoseenza ekubambisa ushamwari  wedu na Djehovha uye toita kuti kariro yedu irumbwe yakabamba.

13. Tingakhwedera kudini kuna Mwari?

¹³ Namatai Djehovha uye erengai Bhaibheri. I zvirokwazvo kuti atikwanisi kuona Djehovha asi tingakhwedera dhuze kaari. Tingareketa naye pamunamato tecigonda kuti ayena anotipurutana. (Djer. 29:11, 12) Uye isusu tingakwanisa kupurutana Djehovha nge kuerenga Bhaibheri uye kunyasa kurangarira zvatiri kuerenga. Patinoerenga ngezve mushobo wakariritira Djehovha anhu e kare kariro yedu inonyasa kubamba. Zvese zviri mu Bhaibheri “zvakatarhwa kuti tifundiswe kuitira kuti tigare no kariro inobva pakushingirira kedu uye pakunyaradzwa kunobva mu Matarhwa.”—Aro. 15:4.

14. Ngei zvakanaka kunyasa kurangarira zvipikirhwa zvakadzadziswa na Djehovha?

¹⁴ Nyasai kurangarira mushobo wakadzadzisa Djehovha zvipikirhwa zvake. Rangaridzai zvakaizirhwa Abrahamu na Sara ndi Mwari. Awona ainga akura maningi kuti agare no mwana. Kunyazi zvakadaro, awona akagara no mwana hinga mushobo wakapikira Djehovha kamare. (Gen. 18:10) Asi Djehovha ainga agondesa zviro zvimweni. Bhaibheri rinoti: “Iyena waizogara baba e madzinza akawanda.” (Aro. 4:18) Asi kunyazi mumaonero e anhu izvona zvaiita hingana zvainga zvisikazoitiki, asi Abrahamu wainga ano cokwadi cokuti Djehovha aizodzadzisa cipikirhwa cake. Mwanarume uu wakagondeka aazi kugonda Djehovha nyore. (Aro. 4:19-21) Zviro hingana izvi zvinotifundisa kuti Djehovha anodzadzisa zvipirhwa zvake nguwa dzese kunyazi isusu teciona hingana azvidzadziki.

15. Ngei tecidikana kurangarira zvatakaizirhwa na Djehovha?

¹⁵ Rangaridzai zvamakaizirhwa na Djehovha. Rangaridzai zvipikirhwa zvakadzadzika  kamuri. Nge muezaniso, Djesu wakagondesa kuti baba ake aizomupasai zvinodikanwa kuti murarame. (Mat. 6:32, 33) Djesu akagondesawo kuti kana mukakumbira mwiya mucena Djehovha aizomupasai. (Ruka 11:13) Uye Djehovha ari kudzadzisa zvipikirhwa izvi. Pamweni imwimwi murikuedzurira zvipikirhwa zvimweni zviri kudzadziswa na Djehovha kamuri. Nge muezaniso, anogondesa kumurekererai, kumunyaradzai uye kumupasa zvekuryha zvekunamata. (Mat. 6:14; 24:45; 2 Ako. 1:3) Kunyasa kurangarira zvamakaizirhwa na Djehovha zvicabambisa kariro yenyu kuzviya zvaakamupikirai kune ramangwana.

16. Ngei kariro yedu i ciro cinokosha maningi?

¹⁶ Kariro yedu ye kurarama nokusikaperi i cipo cakanakisisa ca Mwari. Tinoetsera no mwoyo wese ngezve ramangwana—zvatinorugondo kuti zvicaitikadi kamare. Kariro yedu inoita hingana ankora, yecitigarisa takabamba kuti tirhwisane no zvinetso, tishingirire kuteererhwa uye kutotama kuthya. Kariro yedu inoita hingana kapaseti, yecidziirira ndangariro dzedu kuti tirambe zvakashata uye tiite zvakanaka. Kariro yedu inotsamira mu Bhaibheri inonyasa kutikhwededza kuna Mwari uye inotipangidza mushobo wakakura rudo rake katiri. Ticagara no makomborero akawanda mu upenyu wedu kana kariro yedu ikabamba.

17. Ngei tingakwanisa kupfara no kariro yedu?

¹⁷ Muphostori Pauro ku tsamba yake ku Aroma unoreketa kuti: “Pfarai no kariro.” (Aro. 12:12) Pauro waikwanisa kupfara ngekuti wainga ano cokwadi cekuti kana akarumbwa akagondeka waizogara no upenyu usikaperi kudenga. Isusu tingapfarawo no kariro yedu ngekuti tinorugondo rekuti Djehovha acadzadzisa zvipikirhwa zvake. Hingana zvakatarhwa no mutari we pisarema: “anopfara munhu . . . anokanda kariro yake muna Djehovha Mwari wake, . . . Uya akagondeka nguwa dzese.”—Pis. 146:5, 6.