MU NYIKA dzakawanda, zviri nyore maningi kuona aparidzi akapfara mumakwanza anohamba anhu ecipasa mabhuku. Imwimwi makamboparidzirawo kudaro here? Pamugariro uwona pamweni imwimwi makaedzurira ciro ciri mu bhuku ra Zvierengo—ungwaru wecidainzira mumakwanza kuti anhu azwe. (Erengai Zvierengo 1:20, 21.) Mu Bhaibheri uye mumabhuku edu tinogumira “ungwaru wezvirokwazvo”—ungwaru wa Djehovha. Ndizvona zvinodikana no anhu kuti agare no upenyu usikaperi. Tinopfara maningi anhu paanotenda mabhuku edu. Asi andiesepi anoatenda. Amweni akhona anosanangura kutama kuzwa zvinorekethwa no Bhaibheri. Amweni anotiseka. Ngekuti anorangarira kuti Bhaibheri ngere kare maningi. Uye amweni anoshora fundiso dze Bhaibheri ngezve nyaya yekudzibata, ecipangidza kuti aya anoteerera fundisodzo akashata mwoyo uye anopangidza kuti arinane kupinda amweni. Kunyazi zvakadaro, ungwaru wa Djehovha unorumbwa uripo ku anhu ese uye ayena anoita izvona nge rudo.

2. Ndikupi katingagumira ungwaru we zvirokwazvo nyamasi uno, asi anhu akawanda anosanangura kuitei?

² Umwe we mushobo unoita Djehovha kuti ungwaru we zvirokwazvo urumbwe uripo nyamasi uno ngewe kuseenzesa Soko rake Bhaibheri. Zvezvirokwazvo Bhaibheri rinooneka mu nyika yese. Kuzotiwo mabhuku edu anotsamira mu Bhaibheri here? Nge ndaa ye makomborero a Djehovha, awona anooneka mu mireketero inodarika 1000. Aya anoerenga masoko akhona uye oaseenzesa anobetsereka. Ngekudaro, anhu akawanda anosanangura kutama kupurutana izwi re ungwaru we zvirokwazvo, paanoita zvisananguro awona anoona kuti  zviri nane kudzigonda kana kuti kugonda anhu amweni. Anhu akawanda anorangarira kuti atizii ciro nge kusanangura kuteerera zviya zvinorekethwa no Bhaibheri. Mu fundo ino ticaona kuti ngei anhu akawanda ecirangarira kudaro. Asi ticatanga ngekuona kuti tingaita kudini kuti tigare no ungwaru wa Djehovha.

3. Tingapangidza kudini ungwaru we zvirokwazvo?

³ Bhaibheri rinoti: “Kuthya Djehovha ndiko kutanga ke ungwaru uye kuziya Mucena-Cena ndiko kuzwisisa.” (Zvie. 9:10) Ungwaru unobatanidza kuseenzesa zvatinoziya kuti tiite zvisananguro zvakanaka, asi tinopangidza kuti tino ungwaru we zvirokwazvo kana “tikaziya Mucena-Cena” kana kuti tikapsvaka maonero a Djehovha tisati taita cisananguro cinokosha. Tingaita izvona nge kupsvaka zvinorekethwa ne Bhaibheri uye no mabhuku edu. Kana tikaita izvona tinopangidza ungwaru we zvirokwazvo.—Zvie. 2:5-7.

4. Ngei Djehovha ari ayena basi angatipasa ungwaru we zvirokwazvo?

⁴ Djehovha ndiye basi angatipasa ungwaru we zvirokwazvo. (Aro. 16:27) Ngei? Cekutanga, ngekuti Djehovha ndiye Musiki, uye ayena anoziya. zvakawanda ngezve zviro zvaakasika. (Pis. 104:24) Cecipiri, zvese zvinoizwa na Djehovha zvinopangidza kuti ayena ano ungwaru. (Aro. 11:33) Cecitatu, wese unoseenzesa mazano e ungwaru a Djehovha unobetsereka. (Zvie. 2:10-12) Kana tecida kugara ne ungwaru we zvirokwazvo tinodikana kutenda zvokwadi izvi zvinokosha uye kutendera kuti izvona zvitungamirire zvisananguro zvedu uye zviito.

5. Mugumisiro upi ungawepo anhu paasikapsvaki ungwaru wa Djehovha?

⁵ Akawanda atinogumira mu basa rekuparidzira anoziya kuti mu nyika muno zviro zvakawanda zvakasikwa zvinoshamisa, asi aatendi kuti kuno Musiki uye anorangarira kuti zvese zvakaita zve kuphinduka-phinduka. Uye amweni anotenda kuti kuna Mwari, asi anorangarira kuti mitemo ye mu Bhaibheri ya yokare maningi anosanangura kurarama mushobo waanoona kuti wakanaka. Asi mugumisiro wakhona ndiupi? Asi nyika imbuto yakanaka ngekuti anhu anogonda ungwaru wao kamare pane kugonda ungwaru wa Mwari here? Kodi awona akagumira ungwaru we zvirokwazvo here kana kuti kariro yakacengeteka mune ramangwana? Patinoringira zviro zvakatitenderedza tinogara no cokwadi cokuti: “Apana ungwaru, uzii kana zano zvingarhwisana na Djehovha.” (Zvie. 21:30) Izvi zvinotiitisa kuti tirumbwe tecipsvaka ungwaru wa Djehovha, zvinotsukwarisa kuti anhu akawanda aarangariri kudaro. Ngei?

6. Maererano na Zvierengo 1:22-25, ndiani asikapurutani ungwaru we zvirokwazvo?

⁶ Anhu akawanda aapurutani ungwaru we zvirokwazvo “paunodainzira mumakwanza.” Maererano no Bhaibheri, pano magrupu matatu e anhu asikatendi ungwaru: “asina uzii,” “anoseka amweni,” uye “mapenzi.” (Erengai Zvierengo 1:22-25.) Ngationgorore miitiro inoita kuti anhu aya arambe ungwaru wa Mwari uye toona kuti cinyi catinodikana kuita kuti tisagare hingana awona.

7. Ngei anhu akawanda anosanangura kugara “asina uzii”?

⁷ Grupu rekutanga ngere aya “asina uzii” aya anondotendera ciro cipi haco kana kuti aya anocengedzerhwa nokukasika. (Zvie. 14:15, masoko e pasi) Kajinji kakhona tinogumira anhu akadaro mu basa re kuparidzira. Nge muezaniso, cimborangaridzai ma  mirionji e anhu anocengedzerhwa nge atungamiriri e magereja no atungamiriri e nyika. Anozotsukwara paanoona kuti akacengedzerhwa nge atungamiriri aya. Asi anhu akatarhwa pana Zvierengo 1:22 anosanangura kugara asina uzii kana kuti asikazii cokwadi. (Djer. 5:31) Awona anopfarira kuita zvaanoda uye aatona basa rekufunda zvinorekethwa no Bhaibheri kana kuti kuteerera mitemo yake. Anhu akawanda anorangarira hinga mwanakadzi umweni unoda maningi zvekunamata we ku Quebec, Canadá, wakabvunza Mupupuri wa Djehovha umweni kuti: “Kana mupristi angaticengedzera ndaa nge yake, haiwa yedu!” Zvezvirokwazvo isusu atidikani kuteedzera aya anosanangura kugara asina cokuziya!—Zvie. 1:32; 27:12.

8. Cinyi cicatibetsera kugara anhu akakura pakunamata?

⁸ No cikonzero cakanaka, Bhaibheri rinotikohomedzesa kuti “tigare anhu akakura pamazwisisire” edu. (1 Ako. 14:20) Tinogara akakura pazvekunamata kana tikaseenzesa zvokwadi zvisikacinji zve Bhaibheri mu upenyu wedu. Padoko no padoko, tinozvionera tega kamare kuti zvokwadi izvi zvinotibetsera kudini kugara kure no matambudziko uye kuita zvisananguro zvakanaka. Tirikubudirira kudini pa nyaya iyona. Kana tiri kufunda Bhaibheri uye kupinda misangano ke nguwa yakareba, zvakanaka maningi kudzibvunzisa kuti: Ngei atisati taita matanho anodikana kuti tidzipire kuna Djehovha uye kubhabhatidzwa? Kana takabhabhatidzwa tirikubudirira here hinga aparidzi uye afundisi e masoko akanaka? Kodi zvisananguro zvedu zvinopangidza kuti tirikutungamirirhwa nge zvokwadi zvisikacinji zve Bhaibheri? Tinopangidza mawara e Cikristu? Patinobatana ne amweni, kana tikaona kuti pano patinodikana kugadzirisa tinodikana kuteya nzee pa fundiso dza Djehovha ‘dzinongwadza munhu usina uzii.’—Pis. 19:7.

9. Anhu aya “anoseka amweni” anopangidza kudini kuti anoramba ungwaru?

⁹ Grupo recipiri rinoramba ungwaru wa Mwari ndiwo aya “anoseka amweni.” Nguwa dzimeni, tinogumira anhu akadaro mu basa rekuparidzira. Awona anopfarira kuseka amweni. (Pis. 123:4) Bhaibheri rakangwadza kare kuti mazuwa ekupedzesera kaizooneka anhu anoseka amweni. (2 Ped. 3:3, 4) Kuita hinga akwambo o munatsi Roti, anhu nyamasi uno aapurutani zviziiso zva Mwari. (Gen. 19:14) Anhu akawanda anoseka aya anorarama maererano no zvokwadi zvisikacinji zve Bhaibheri. Awona anoita zviro maererano “nozvido zvawo uye nozviro zvakashata” kana kuti zviro zvisiripi zva Mwari. (Djud. 7, 17, 18) Kupanganidza kunoita Bhaibheri nge zve anhu anoseka amweni zvinonyasa kupindirana no aya akapauka pakunamata uye no aya akaramba Djehovha!

10. Maererano na Pisarema 1:1, tingaitei kuti tisagare anhu anoseka amweni?

¹⁰ Tikatama kungwarira tinopedzesera taano mwiya wekushora wakatodzana no aya anoseka amweni. Tingaita kudini kuti izvi zvisaitike? Mushobo umwe wakhona nge we kutama kushamwaridzana no aya ano mwiya wekushora. (Erengai Pisarema 1:1.) Izvi zvinoreya kuti atipurutani kana kuerenga zviro zve anhu akapauka pakunamata. Makamborangarira here patinotanga kugara no mubvunzo pa fundiso uye nhungamiriro dzatinopaswa na Djehovha uye sangano rake. Kuti izvona zvisaitike, tinodikana kudzibvunzisa kuti: ‘Kodi ndinosogara no maonero akashata patinopaswa nhungamiriro no mazwisisire mapsva? Ndinomusambo we kupsvaka zvishaishi ku aya ano ubaba mu ungano?’ Kana isusu  tikagadzirisa musambo idzona ticapfadza Djehovha.—Zvie. 3:34, 35.

11. “Mapenzi” anoona kudini ngezve mitemo yakanaka ya Mwari?

¹¹ Grupo recitatu rinoramba ungwaru “mapenzi.” Awona mapenzi ngekuti anoramba kurarama maererano no mitemo yakanaka ya Mwari. Anoona kuti zviri nane kuita zviro zvakaanakira. (Zvie. 12:15) Ngekudaro, awona anoramba Djehovha wene Manyuku e ungwaru. (Pis. 53:1) Kajinji kakhona anosotishora zvinorhwadza nge kureremedza kedu mitemo yemu Bhaibheri. Asi awona aana zvakanaka zvaangatipasa. Bhaibheri rinobhuya kuti: “Ungwaru we zvirokwazvo auoneki no benzi, arina zvekureketa pamisuwo dze thaundi.” (Zvie. 24:7) Tsamba ii inopangidza kuti mapenzi aakwanisi kupasa mazano akanaka. Azvishamisi kuzwa Djehovha ecibhuya kuti “ngatingwarire kugara padhuze no mapenzi”!—Zvie. 14:7.

12. Cinyi cicatibetsera kuti tisaite hingana mapenzi?

¹² Kusiyana no aya anozonda mazano a Mwari, isusu tinosakurira rudo nge mushobo unorangarira Mwari kutobatanidzawo no mitemo yakanaka ya Mwari. Isusu tinobambisa rudo iri patinoona musiyano uripo pakati pe anhu aya anoteerera Mwari no aya asikateereri Mwari. Onai basi matambudziko anobatana no anhu nge kuramba ungwaru wa Mwari pedzepo onai kunaka kakaita upenyu wenyu nge kuteerera kenyu Mwari.—Pis. 32:8, 10.

13. Kodi Djehovha anotibambidzira kuti titende ungwaru wake here?

¹³ Ungwaru wa Djehovha uripo ku anhu ese, asi ayena aabambidziri munhu kuti autende. Asi ayena, anoreketa mugumisiro wekutama kupurutana ungwaru. (Zvie. 1:29-32) Aya anotama kuteerera Djehovha “acabatana ne matambudziko nge zviito zvawo.” Mararamiro awo acaunzisa marhwadzo, matambudziko, pakupedzesera kuparadzwa. Nge dii rimweni Zvierengo 1:33 inopasa kariro ku aya anopurutana ungwaru wa Mwari uye ouseenzesa, yekuti: “Aya anondipurutana acararama akacengeteka uye acagara asikanetseki nge kuthya matambudziko.”

14-15. Tafundei kubva pana Zvierengo 4:23?

¹⁴ Kuseenzesa ungwaru wa Mwari, kunounzisa makomborero nguwa yese. Hinga zvataona ungwaru wa Mwari uripo ku anhu ese. Nge muezaniso mu bhuku ra Zvierengo, Djehovha anopasa mazano anoseenza nguwa yese. Ngatione miezaniso mirongomuna.

¹⁵ Cengetedzai mwoyo wenyu. Bhaibheri rinoreketa kuti: “Cengetedza mwoyo wako kudarika zviro zvese zvaunocengetedza, ngekuti ndimona muno manyuku e upenyu.” (Zvie. 4:23) Rangaridzai zvinodikana kuti mucengetedze mwoyo kamare. Tinodikana kurhya zviro zvakanaka, kuita ezersisiyo ye muwiri uye kungwarira zviro zvinokuwadza uthongo. Hino tinodikanawo kuita zvimwezvo no mwoyo wekuezanisira. Nguwa yese  tinoerenga Soko ra Mwari. Tinopinda misangano, tinogadzirira kuti tipasewo mhinduro dzedu. Tinorumbwa takabamba nge kugara teciita basa rekuparidzira. Tinongwarira kutama kuita zviro zvinotikuwadza pane zve kumwiya uye togara kure no ciro cipi haco cingabata-bata mushobo wedu we kurangarira, kuzviaraidza no zviro zvisikazi kucena uye kushamwaridzana no anhu anoita zviro zvakashata.

16. Ngei Zvierengo 23:4, 5 yecikosha katiri nyamasi uno?

¹⁶ Gutsikanai no zviya zvamunazvo. Bhaibheri rinopasa zano rekuti: “Usadzishuphe kuti ugare no upfumi. . . . Paunokanda madziso ako pauri, uwona unonga usisiripopi, ngekuti unomera manhenga hinga cikodzi uye comburuka cecienda kudenga.” (Zvie. 23:4, 5) Apana cinogondesa kuti mare yatinonga tinayo inozogara nokusikaperi. Kunyazi zvakadaro, atinoona nyamasi uno ecishuphika kuti aone mare arombo ne apfumi. Ndiyo ndaa awona kajinji kakhona anoita zviro zvinokuwadza zina rawo rakanaka, ushamwari wawo kutobatanidzawo no uthongo. (Zvie. 28:20; 1 Ti. 6:9, 10) Hino ungwaru unotibetsera kuti tigare no maonero ari pakati no pakati ngezve mare. Izvi zvinotidziirira kuti tisagare no ukari, asi zvinotiita kuti tigare takapfara uye tigutsikane no zviya zvatinazvo.—Mup. 7:12.

17. Tingagara kudini no “rurimi re akangwara” unorekethwa pana Zvierengo 12:18?

¹⁷ Rangarirai musati mareketa. Tikatama kungwarira, tinobara matambudziko akawanda nge masoko edu. Bhaibheri rinoti: “Masoko anorekethwa asikazi kurangarirhwa anobaya hinga supada, asi rurimi re akangwara rinoporesa.” (Zvie. 12:18) Tinorumbwa tiri murunyararo kana tikatama kuita mapsveda ngezve zvishaishi zve amweni. (Zvie. 20:19) Kuti masoko edu aporese haiwa kukuwadza, mwoyo wedu unodikana kugara wakadzara no uzii we Soko ra Mwari. (Ruka 6:45) Kana tikanyasa kurangarira zvinorekethwa ne Bhaibheri, masoko edu acagara “manyuku e ungwaru” anopfadza amweni.—Zvie. 18:4.

18. Zvierengo 24:6 inotibetsera kudini kuti tibudirire mu basa re kuparidzira?

 ¹⁸ Teererai nhungamiriro. Kuti tibudirire mu upenyu Bhaibheri rinotipasa mazano ekuti: “Nhungamiriro dze ungwaru dzicaita kuti urhwe hondo yako, uye kana pakagara no anhu akawanda anopasa mazano zvicabudirira.” (Zvie. 24:6, masoko e pasi) Onai kuti cokwadi ici cinomubetsera kudini kuti mubudirire pamunonga meciparidzira uye pamunonga mecifundisa. Pane kuparidzira meciseenzesa mushobo wenyu, zvakadini kuseenzesa nhungamiriro dzatinopaswa ku misangano. Ikona tinorowedzwa no mharidzo uye no madii anoizwa ne hama dzino ma exiperiensiya. Kusiya izvona, sangano ra Djehovha rinotipasa ma faramenta anoseenza hinga—mabhuku no mavhidiyo—zvingabetsera anhu kuti azwisise Bhaibheri. Imwimwi murikufundira kuseenzesa zvakanaka mafaramenta aya here?

19. Imwimwi munozwa kudini Djehovha paanotipasa ungwaru? (Zvierengo 3:13-18)

¹⁹ Erengai Zvierengo 3:13-18. Tinotenda maningi mazano e ungwaru atinogumira mu Soko ra Mwari! Upenyu wenyu waizogara kudini pasina ungwaru? Mu fundo ino, tahwirinzira ungwaru unokosha uri mu bhuku ra Zvierengo. I zvirokwazvo kuti Djehovha wakatipasa mazano e ungwaru mu Bhaibheri rese. Tinoda kuseenzesa mazano e ungwaru mu upenyu wedu wese. Anhu akawanda aakoshesi ungwaru wa Mwari asi isusu tinorugondo rekuti “aya akabatisisa [ungwaru] acazwi akapfara.”