MUSORO WE KUFUNDA 3
NGOMA 124 Rumbwa Wakatendeka
Djehovha Acamubetsera pa Munosongana no Matambudziko
“[Djehovha] ndiye anoita kuti udzimikidze pa nguwa yako.”—ISA. 33:6.
CINANGWA
Kuziya zvatinodikana kuita kuti tigare no rubetso ra Djehovha paya patinosongana no matambudziko.
1-2. Aseenzi akagondeka a Djehovha pamweni angabatana no zvitsinzwa zvipi?
KANA pakaitika ciro cakashata, upenyu wedu ungatocinja ciriporipoco. Ngo muezaniso, hama imweni inozwi Luis a yakaoneka no kanseri isikanyanyi kuoneka. Medhiko akabhuya kuti iyena uno mwedzi padoko basi dzekurarama. Monika no mwamuna wake aiita mabasa akasiyana-siyana ekumwiya. Asi zuwa rimweni, wakazoziya kuti mwamuna wake wekuti wainga ari mukuru we ungano, wairarama upenyu uwiri ke nguwa yakareba. Olivia, hanzvadzi isati yawakwa yakabambidzirhwa kubuda pa nyumba payo nge ndaa ye dutu rakakura. Paakazohwirirazve kumba, wakagumira yumba yake yapera kutsakatika. Upenyu we anhu aya wakacinja ciriporipoco. Makambobatanawo no zviro zvakaita hingana izvi here? Imwimwi makambobatana no mugariro wekuti upenyu wenyu wakacinja ciriporipoco here?
2 Kunyazi tiri aseenzi akagondeka a Djehovha, isusu tinosonganawo no matambudziko, cinetso co uthongo hingana zvinosoitikawo no anhu ese. Asi kusiya izvona, pamweni tinodikanawo kushingirira kuteererhwa no kuphikiswa no aya anozonda anhu a Mwari. Djehovha aaiti kuti tisabatane no matambudziko aya, asi anotigondesa kuti acatibetsera nguwa dzese. (Isa. 41:10) No rubetso rake, isusu tingakwanisa kurumbwa tino mupfaro, kuita zvisananguro zvakanaka uye kurumbwa takagondeka kaari kunyazi mu nguwa dzinoshupha maningi. Mu fundo ino, ticaona mishobo mirongomuna inoseenzeswa na Djehovha kuti atibetsere paya patinonga tecibatana no migariro inoshupha uyewo ticaona kuti tingaitei kuti titambire rubetso raanotipasa.
DJEHOVHA ACAMUDZIIRIRAI
3. Cinyi cingashupha kuita patinobatana no matambudziko mu upenyu?
3 Citsinzwa. Patinobatana no matambudziko, zvingatishuphira kurangarira ngo mwazvo, uye kuita zvisanaguro. Pamweni imwimwi mungarhwadziwa mu mwoyo nge ndaa ye kunetseka. Kana kuti mundangariro medu makadzara nge ndaa ye kudzirhya mwoyo. Pamweni imwimwi mungazwa hingana muri kuhamba pakati pe mhute, musikazii kokwenda. Onai kuti hanzvadzi mbiri dzabhuiwa pakutanga dzakazwa kudini. Olivia unopanganidza kuti: “Mumasure mekuti dutu rakakura ratsakatisa nyumba yangu, inini ndakazwa hingana kuti andicabetseri uye ndapererhwa.” Ecireketa nge kusama kugondeka ke mwamuna wake, Monika unoti: “Inini ndakarhwadziwa maningi zvekuti ndakaora mwoyo. Inini ndairhwadziwa maningi ce mukati uye zvaitoshupha kuita zviro zvidoko zve zuwa no zuwa. Ciro caiita hingana kuti aciitiki, cakaitika kandiri.” Djehovha anotigondesa kudini kuti anotibetsera paya patinozwa kuti tapsveteka?
4. Afiripi 4:6, 7, inotigondesei?
4 Djehovha anoitei. Iyena anogondesa kutipasa zvinodainzwa no Bhaibheri kuti “runyararo ra Mwari.” (Erengai Afiripi 4:6, 7.) Runyararo iri i kuterama uye aya basi anonga ari shamwari dza Djehovha ndiwo anozwa runyararo irona. Runyararo irona “rinodarika kuzwisisa kwese”; uye rinosimba rakakura kupinda zviya zvatingarangarira. Imwimwi makambozwa runyararo re zvirokwazvo mumasure me kuita munamato no mwoyo wese kuna Djehovha here? Hino imwimwi munoziya kuti cinyi cinozwi “runyararo ra Mwari.”
5. Runyararo ra Mwari rinocengeta kudini ndangariro uye mwoyo wedu?
5 Pana Afiripi tinoerengawo kuti runyararo ra Mwari “rinocengeta” kana kuti rinodziirira “mwoyo wedu uye ndangariro dzedu.” Soko rekutanga re Cigrego raturikirhwa kuti “kucengeta” ndi soko raiseenzeswa no anyahondo kuti abhuye ngezve masurudado aidziirira thaundi uye airumbwa eciricengeta kuti azondi asapinde. Anhu aigara mu thaundi raicengethwa, aiwata mu runyararo eciziya kuti masurudado ainga akacengeta pa misuwo. Nge mushobo umwewo, runyararo ra Mwari parinocengeta mwoyo wedu uye ndangariro dzedu, isusu tinozwa kuterama teciziya kuti takacengeteka. (Pis. 4:8) Ndizvoo zvakaitika na Ana. Kunyazi mugariro wake auzi kucinja ciriporipoco, iyena waizwa runyararo. (1 Sam. 1:16-18) Uye isusu patinozwa kuterama, zvinogara nyore kunyasa kurangarira uye kuita zvisananguro zvakanaka.
Itai munamato dakara mazwa “runyararo ra Mwari” recicengeta mwoyo no ndangariro dzenyu (Onai mandima 4-6)
6. Tinodikana kuitei kuti tizwe runyararo ra Mwari? (Onaiwo foto.)
6 Tinodikana kuitei. Kana imwimwi muri kubatana no migariro inoshupha tinomuti dainzai musurudado. Kuita kudini? Namatai kuna Djehovha dakara mazwa runyararo rake. (Ruka 11:9; 1 Ate. 5:17) Luis, wamborekethwa ngezvake, unopanganidza kuti iyena no mukadzi wake Ana akazwa kudini paakabvunzwa kuti iyena wainga asarirhwa no mwedzi minganani kuti afe. Iyena unoti: “Pa nguwa hingana ii, zvakashupha kuita cisananguro ngezve kudzidziirira pa uthongo uye ngezve zviro zvimweni. Asi kuita munamato kakatibetsera kugara no runyararo pa nguwa iyona.” Luis no mukadzi wake akabhuya kuti ainamata no mwoyo wese ecikumbira Djehovha kuti aapase runyararo, mwoyo wakaterama uye uzii kuti akwanise kuita zvisananguro zvakanaka. Ndizvona kamare zvaakazwa. Kana imwimwi muri kubatana no migariro inoshupha mu upenyu, rumbwai mecinamata uye imwimwi mucazwa runyararo ra Djehovha recicengeta mwoyo wenyu uye ndangariro dzenyu.—Aro. 12:12.
DJEHOVHA ACAMUBETSERAI KUTI MURUMBWE MUNO MAONERO ARI PAKATI NO PAKATI
7. Mazwiro api atingagara nawo patinobatana no migariro inoshupha?
7 Citsinzwa. Patinobatana no matambudziko, isusu tingatanga kurangarira uye kuita zviro nge mushobo watainga tisikadi kuzviita. Hingana panoitika dutu, bharko rinokwanisa kundundwa no mafungo pamusoro pe mafungo amweni, isusu tingakwanisa kusongana no mazwiro akasiyana-siyana. Ana wambobhuiwa ngezvake unopanganidza kuti mumasure mekufa ke mwamuna wake, nguwa ne nguwa iyena waizwa mazwiro akasiyana-siyana. Iyena unopanganidza kuti: “Nguwa dzimweni inini ndaizwa ndecidzirhya mwoyo uye ndaiona kuti ndainga ndisikasisiri kubatana no zviro izvona. Nguwa dzimweni ndaitogara ndakanyangadzwa kamare ndecirangarira kuti ngei iyena wakafa.” Ana waizwawo ari ega uye akanyangadzwa nge kutama kukwanisa kuita zviro zvaaiizirhwa no mwamuna wake kare. Nguwa dzimweni iyena waizwa hingana uri pa dutu pakati pe bahari. Djehovha anotibetsera kudini patinosongana no mazwiro awona?
8. Maererano na Isaya 33:6, Djehovha anotigondesei?
8 Djehovha anoitei. Djehovha anotigondesa kuti acatibetsera kuti tirumbwe takaterama pa zviro zve mundangariro uye zve kumwiya. (Erengai Isaya 33:6.) Ngo muezaniso, Panoitika dutu mu bahari, kakawanda kakhona navhiyo inokhandirhwa ku dii rimwe yecienda ku dii rimweni. Kuti dzikwanise kukunda izvona, navhiyo dzakawanda dzinososeenzesa cidziiriro cinogara ku dii rimwe na rimwe re navhiyo cinokandwa pasi pe mvura. Cidziiriro icona cinobetsera navhiyo kuti isatorhwe no mhepo uye anhu anonga ari imona anozwa akacengeteka. Zvakanaka ngezve kuti cidziiriro icona cinoseenza zvakanaka navhiyo painonga yecihamba. Nge mushobo umwewo Djehovha acatipasa cidziiriro cemundangariro uye ce kumwiya, kana tikarumbwa tecimuseenzera takatendeka mu mazuwa aya anoshupha.
Seenzesai mafaramenta ekupsvakisisa kuti murumbwe muno maonero ari pakati no pakati e mundangariro uye e ku mwiya (Onai mandima 8-9)
9. Maferamenta edu ekupsvakisisa angatibetsera kudini kuti tigare no maonero ari pakati no pakati? (Onaiwo foto.)
9 Tinodikana kuitei. Kana imwimwi mukazwa mu ndangariro menyu hingana muri pakati pe dutu, itai zvese zvamunokwanisa kuti murumbwe meciita mabasa e kumwiya. Zviri pamhene kuti pamweni imwimwi amuzokwanisi kuita zvese zvamaiita kare. Asi edzurirai kuti Djehovha aetseri kuti imwimwi muite zviya zvamusikakwanisi kuita. (Ezanisai na Ruka 21:1-4.) Musasiye kupsvaka nguwa kuti muite fundo yo munhu ega uye kunyasa kurangarira. Ngei? Djehovha eciseenzesa sangano rake, anotipasa mafundo uye mavhidhiyo anotibetsera kuti tionerere mazwiro edu paya patinobatana no matambudziko. Kuti mugumire masoko anoseenza kamuri, imwimwi mungaseenzesa mafaramenta ekupsvakisisa anooneka mu mureketero wenyu. Hingana aprikativho JW Library®, Índice das Publicações da Torre de Vigia, uye Bhuku Rinobetsera Apupuri a Djehovha Pakukwarakwatisa. Monika, warekethwa nge zvake unopanganidza kuti nguwa dzese unoseenzesa mafaramenta ekupsvakisisa paya paanotanga kugara no mazwiro asikazi kunaka. Ngo muezaniso, iyena waipsvaka soko rekuti “shungu.” Nguwa dzimweni waisopsvakisisa soko rekuti “kusama kugondeka” kana kuti “kugondeka.” Pedzepo iyena wairumbwa ecierenga dakara azwa zvakanaka. Iyena unoti: “Inini ndaitanga kupsvakisisa ndecinetseka, ndecitara soko ripi haro raienderana no mugariro wangu uye pedzepo inini ndaierenga fundo dzaionekepo. Padoko no padoko inini ndaitanga kuzwa hingana kuti Djehovha ari kundikhumbatira. Pandainga ndecierenga, inini ndaiona kuti Djehovha aizwisisa mazwiro angu uye kuti iyena waindibetsera.” Kuzwa rubetso ra Djehovha ndikona kucamubetserai kuti mugare no maonero ari pakati no pakati pamunonga mecibatana no zvinetso zvakakura.—Pis. 119:143, 144.
DJEHOVHA ACAMUBETSERAI
10. Pamweni tingagara no mazwiro api mumasure mekubatana no migariro inoshupha maningi?
10 Citsinzwa. Kana imwimwi makambosongana no mugariro unoshupha maningi mu upenyu wenyu, zvingaita kuti mazuwa amweni mungazwa makaremba maningi mu mwiri uye mu ndangariro. Pamweni imwimwi mungazwa hingana mugogomi wakuwadzika. Pakutanga maikwanisa kugogoma nokukasika, asi zvino maakudikana kuhamba padoko no padoko. Pamweni zvingamushuphirai kuita zviro zvekuti kare maizviita nokukasika. Uye zvingaita kuti pamweni imwimwi amucina cido cokuita ciro camaipfarira kuita kareko. Kuita hingana Eriya, zvingamushuphirai kuti mu muke uye ciro camunoda i kuwata basi. (1 Mad. 19:5-7) Asi Djehovha anotigondesei kana isusu tikazwa kudaro?
11. Djehovha anotibetserazve ngo mushobo upi? (Pisarema 94:18)
11 Djehovha anoitei. Iyena anotigondesa kuti acatibetsera. (Erengai Pisarema 94:18.) Kuita hingana mugogomi wakuwadzika uye unoda rubetso kuti ahwirirezve kuhamba zvakanaka, isusu tinoda rubetso kuti tirumbwe tecibudirira pa basa ra Djehovha. I nguwa iyona kamare yekuti Djehovha anotigondesa kuti: “Inini Djehovha Mwari wako, ndakabata moko kwawo wako, uye Ndiri kuti kauri: ‘Usathye. Ndicakubetsera.’” (Isa. 41:13) Mambo Dhavhidhi wakakwanisa kuona rubetso irona ra Djehovha. Paaiteererhwa no azondi ake, iyena wakati kuna Djehovha: “Nyara yenyu kwayo inondibetsa.” (Pis. 18:35) Asi Djehovha anotipasa kudini rubetso rake?
Tenderai rubetso re mhuri, shamwari uye akuru e ungano (Onai mandima 11-13)
12. Djehovha pamweni angaseenzesa ani kuti atibetsere patinonga takaora mwoyo?
12 Kakawanda kakhona Djehovha anoseenzesa anhu amweni kuti atipase rubetso ratinoda. Ngo muezaniso, Mambo Dhavhidhi paakazwa akaremba maningi, shamwari yake Djonatani ndiyona yakamuvhakacira kuti imubambise uye yakamubetsera pane cokuita no mundangariro. (1 Sam. 23:16, 17) Nge mushobo umwewo, Djehovha akaseenzesa Erizeu kuti abetsere Eriya. (1 Mad. 19:16, 21; 2 Mad. 2:2) Nyamasi uno, Djehovha anokwanisa kuseenzesa mhuri, shamwari kana kuti akuru e ungano kuti atibetsere. Asi, patinonga tecisongana no mugariro unoshupha, cido cedu ngecekuda kugara pedu tega. Tinoda kugara pa mbuto yedu tega uye takanyarara. Izvona zvinoitika. Asi tingatambira kudini rubetso ra Djehovha?
13. Tinodikana kuitei kuti titambire rubetso ra Djehovha? (Onaiwo foto.)
13 Tinodikana kuitei. Rhwisai cido cokuda kugara muri mwega. Paya patinogara tiri tega, cinangwa cedu ngece kutanga kurangarira ngezve matambudziko uye zviya zvatiri kusongana nazvo. Kugara tecirangarira izvona zvingakwanisa kutiitisa kuti tiite zvisananguro zvakashata. (Zvie. 18:1) Zviri pamhene kuti tese isusu nguwa dzimweni tinomboda kugara tiri tega, maka-maka paya patinonga tecisongana no mugariro unoshupha. Asi kana tikatanga kupedza nguwa yakawanda takagara tiri tega tinogara kure no anhu aya angakwanisa kuseenzeswa na Djehovha kuti atibetsere. Hino kunyazi nguwa dzimweni zvecishupha kuita izvona, tenderai rubetso re mhuri, shamwari dzenyu, uye akuru e ungano. Edzai kuona zviya zvaari kamare—kuti i mushobo waseenzeswa na Djehovha kuti atibetsere.—Zvie. 17:17; Isa. 32:1, 2.
DJEHOVHA ACAMUNYARADZA
14. Migariro ipi ingatisiya tecithya?
14 Citsinzwa. Pamweni paya tinokwanisa kusongana no citsinzwa cingatisiya tecithya. Bhaibheri, rinobhuya ngezve aseenzi akatendeka a Djehovha akaora mwoyo uye akathya maningi nge ndaa ye azondi uye nge ndaa ye matambudziko amweni aaisongana nawo. (Pis. 18:4; 55:1, 5) Nge mushobo umwewo, tingakwanisa kuteererhwa ku cikora, ku basa, mu mhuri kana kuti nge anyautongi. Uye pamweni tingatogara tecithya kufa nge ndaa ye zvinetso zve uthongo. Pa nguwa iyona tingazwa tisikazi kudziirirhwa hinga cimwana cidoko. Hino Djehovha angatibetsera kudini pa mugariro wakadaro?
15. Pisarema 94:19 inotipasa rugondo ripi?
15 Djehovha anoitei. Iyena anotinyaradza uye anoita kuti tizwe takaterama. (Erengai Pisarema 94:19.) Pisarema ii, pamweni ingamuitisai kuti murangarire ngezve mwana mudoko urikukonerhwa kuwata ngekuthya mheni uye kucetuka-cetuka. Tingakwanisa kurangaridza ngezva baba e mwana uu eciguma mukwartu make uye omukanda pa diti dakara akwanisa kuwata. Kunyazi mwana uu ecikwanisa kuzwa mheni, baba ake anomunyaradza uye anoita kuti iyena azwe akacengeteka. Kana isusu tikasongana no zvitsinzwa zvinothyisa, tinoda kuti Baba edu e kudenga Djehovha atikande paditi dakara mazwiro edu asikazi kunaka adarika. Asi tinganyaradzwa kudini na Djehovha?
Siyai kuti Baba enyu e kudenga amunyaradze eciseenzesa Bhaibheri (Onai mandima 15-16)
16. Tinodikana kuitei kuti tinyaradzwe na Djehovha? (Onaiwo foto.)
16 Tinodikana kuitei. Amudikani kusiya kupedza nguwa na Djehovha—mecicedza naye uye mecierenga Soko rake. (Pis. 77:1, 12-14) Kana imwimwi mukagara no musambo wekuita izvona pese pamunobatana no migariro inopisisa musoro, ciro cekutanga camucaita ngecekupsvaka rubetso ra Baba enyu e kudenga. Panganidzirai Djehovha kuthya kese kamuri kuita uye zvirikumunetsai. Pedzepo purutanai zvinonga zvecirekethwa na Djehovha ngekuerenga Bhaibheri. Ngekuita izvona, mucakwanisa kunyaradzwa naye. (Pis. 119:28) Pamunonga mecithya, imwimwi mungagumira nyaradzo ngekuerenga matii manganani e Bhaibheri. Ngo muezaniso, pamweni bhuku ra Djobo, Pisarema, Zvierengo uye masoko a Djesu atinogumira pana Mateu kapituro 6 anomupfadzai. Pamunoita munamato kuna Djehovha uye kuerenga Bhaibheri, imwimwi munozwa nyaradzo inobva kuna Djehovha.
17. Rugondo ripi ratinaro?
17 Isusu tingakwanisa kugonda kuti Djehova agara akagadzirira kutibetsera pa nguwa inoshupha maningi mu upenyu wedu. Isusu atizombogari tiri tega. (Pis. 23:4; 94:14) Djehovha anogondesa kutidziirira, kutiteramisa, kutibetsera uye kutinyaradza. Isaya 26:3 inotipasa rugondo rimweni ngezva Djehovha rekuti: “Mucacengetedza aya anonyasa kugonda nemwi; mucaita kuti arumbwe ano runyararo, ngekuti awona anogonda nemwi.” Hino gondai Djehovha, uye khorovherai zvese zvaanoita kuti amubetsere. Kana mukaita kudaro, mucarumbwa makabamba kunyazi mu nguwa dzinoshupha.
MUNODAIRA KUDINI?
-
Migariro ipi yatinoda maningi rubetso ra Djehovha?
-
Mishobo ipi mirongomuna yatinobetserhwa na Djehovha pa nguwa dzinoshupha?
-
Tinodikana kuitei kuti titambire rubetso ra Djehovha?
NGOMA 12 Djehovha Mwari Mukuru
a Mazina amweni akacinjwa.