1. Munorangarira kuti Djehovha akaita kudini?

 IMWIMWI makamboedza kurangarira kuti Djehovha akadini here? Pamunoita munamato munorangaridza kuti akadini? I zvirokwazvo kuti isusu atikwanisi kuona Djehovha, asi Bhaibheri rinopanganidza ngezvake ngo mushobo wakasiyana-siyana. Djehovha anodainzwa kuti “zuwa uye cidziiriro” uye “muriro unotsakatisa.” (Pis. 84:11; Aheb. 12:29) Mu ciono cimweni, muphorofita Ezekieri wakapanganidza ngezva Djehovha hingana kuti wakaezana no buwe re safira, oro no prata yakavhenganizwa inonyetukira uye muraraungo. (Ezek. 1:26-28) Mushobo unopanganidzwa Djehovha mu Bhaibheri ungakwanisa kuita kuti tishamisike maningi kana kutoita kuti tizwe hingana atikoshi.

2. Ngei zvingatishuphira kuti tikhwedere kuna Djehovha?

² Ngekuti isusu atikwanisi kuona Djehovha, zvingakwanisa kutishuphira kutendera kuti iyena anotida. Amweni akatambudzika maningi mu upenyu zvekuti akaguma pakurangarira kuti Djehovha aazomboadi. Pamweni awona aazi kumbogara na baba anoada. Djehovha anozwisisa mazwiro edu uye anoziya kuti ngei zvingatishuphira kuti tikhwedere kaari. Kuti atibetsere, iyena anotipangidza mu Bhaibheri kuti iyena ndi Mwari ano rudo rakakura.

3. Ngei zvakanaka maningi kuziya zvakawanda ngezve rudo ra Djehovha?

³ Soko rinonyasa kupanganidza Djehovha i rudo. (1 Juau 4:8) Bhaibheri rinobhuya kuti Mwari i rudo. Uye rudo ndirona rinopfuridzira zviro zvese zvinoizwa na Djehovha. Rudo ra Mwari rakakura maningi uye rino simba rakakura zvekuti rinotobetserawo aya asikamudi. (Mat. 5:44, 45) Mu fundo ino ticafunda ngezva Djehovha uye rudo rake. Patinonyasa kufunda ngezva Mwari wedu, tinotunhudzira kumudawo.

 DJEHOVHA ANOTIDA MANINGI

4. Rudo ra Djehovha rinoita kuti muzwe kudini? (Onaiwo foto.)

⁴ “Djehovha ano usisi wakakura.” (Tig. 5:11) Mu Bhaibheri, iyena anoezaniswa na mai ano rudo. (Isa. 66:12, 13) Rangaridzai ngezva mai anonyasa kurera zvakanaka mwana wawo. No rudo rakakura, awona anomukanda pa diti uye anoreketa naye ngo mushobo wakanaka uye no izwi rakaterama. Paanonga ecicema kana kuti ecirhwadziwa, awona anoita zviri zvese kuti amupase zvese zvaanonga ecida. Patinonga tecirhwadziwa, tinogara no cokwadi cekuti Djehovha anotida. Mutari we Pisarema wakatara kuti: “Pandakawandirhwa no zvaindiwodza mwoyo, imwimwi makandinyaradza uye makandizorodza.”—Pis. 94:19.

5. Rudo rakagondeka ra Djehovha rinoreyei kamuri?

⁵ Djehovha akagondeka. (Pis. 103:8) Iyena aambotisii kunyazi tikaita ciro cakashata. Aisraeri akashaishira Djehovha kakawanda; kunyazi zvakadaro, awona paaicinyuka, Djehovha akapangidza pamhene rudo rake rakagondeka kaari paakati: “Wakagara unokosha kandiri, wakakudzwa, uye ndinokuda.” (Isa. 43:4, 5) Uye rudo ra Djehovha arizi kucinja. Isusu tingakwanisa kumugonda nguwa dzese. Kunyazi tikaita cishaishi cakakura, Djehovha aazombotisii. Kana tikacinyuka uye tohwirira kuna Djehovha, tinoona kuti iyena anorumbwa ecitida. Iyena anogondesa “kutirekerera no mwoyo wese.” (Isa. 55:7) Bhaibheri rinobhuya kuti kurekerera uku ka Djehovha kakaita hingana “nguwa ye kuzorodzwa . . . yecibva kuna Djehovha.”—Zvii. 3:19.

6. Zakariya 2:8 inotifundisei ngezva Djehovha?

⁶ Erengai Ezekiyeri 2:8. Djehovha anotiezanisa no mboni ye dziso rake. Dziso iciro cisikazi kubamba, asi rinokosha maningi pa mwiri we munhu. Zvinoita hingana kuti Djehovha arikubhuya kuti: ‘Unoitira zvakashata anhu angu, unonga eciitira zvakashata ciro cinokosha.’ Nge ndaa ye rudo rake katiri, Djehovha anozwisisa mazwiro edu uye anoda maningi kuticengeta. Patinotambudzika, iyena anotambudzikawo. Ndiyo ndaa tinganamata no rugondo teciti: “Ndicengetei hinga mboni ye dziso renyu.”—Pis. 17:8.

7. Ngei tecidikana kubambisa rugondo redu mu rudo ra Djehovha katiri?

⁷ Djehovha anoda kuti mugare no rugondo rekuti iyena anomudai pacenyu mwega. Asi iyena anozviziya kuti nge ndaa ye zviro zvakaitika kare, imwimwi mungagara musina cokwadi cekuti iyena anomudai kana kuti haiwa. Pamweni  murikubatana no mugariro unoshupha nguwa ino wekuti ungaedza rugondo renyu mu rudo ra Djehovha. Hino cinyi cingabambisa rugondo renyu? Kuedzurira mushobo unopangidza Djehovha rudo rake kuna Djesu, ku akadzodzwa uye katiri tese.

DJEHOVHA ANOPANGIDZA KUDINI RUDO RAKE

8. Ngei Djesu ainga ano rugondo rekuti Baba ake aimuda?

⁸ Ke mabhirionji e makore, Djehovha no Mwana wake akararama ese kudenga uye akagara no rudo rakakura ku umwe na umwe wawo. Djehovha akanyasa kupangidza pamhene kuti aida Djesu, hinga zvatinoerenga pana Mateu 17:5. Djehovha angadai akabhuya basi kuti: ‘Uu ndiye wandapfarira.’ Asi iyena aida maningi kuti isusu tiziye kuti anoda maningi Djesu, ndiyo ndaa akabhuya kuti Djesu ndi “Mwana wake mudusiswa.” Djehovha aidada maningi na Djesu ngokuti iyena ainga akagadzirira kupasa upenyu wake. (Aef. 1:7) Djesu ainga asina mubvunzo kuti Baba ake aimuda. Iyena ainga ano rugondo rekuti Djehovha aimuda zvekuti akatobhuya kakawanda kuti Baba aimuda.—Juau 3:35; 10:17; 17:24.

9. Masoko api anopanganidza ngezve rudo ra Djehovha ku anhu ake? Panganidzai. (Aroma 5:5)

⁹ Djehovha anopangidzawo rudo rake ku akadzodzwa. (Erengai Aroma 5:5.) Onai soko rekuti “rakadururhwa.” Referensiya imweni ye Bhaibheri inopanganidza soko iri hinga “mvura irikupopoma yeciuya katiri.” Muezaniso uu unonyasa kupanganidza zvakanaka mushobo unoda Djehovha akadzodzwa! Uye awona anoziya kuti “anodiwa na Mwari.” (Djud. 1) Muphostori Juau wakapangidza mazwiro ake paakatara kuti: “Onai kuti Baba akatipangidzira rudo rakakura kudini, nge kuita kuti tidainzwe ana a Mwari!” (1 Juau 3:1) Asi Djehovha anoda akadzodzwa basi here? Haiwa, Djehovha akapangidza kuti anoda isusu tese.

10. Cinyi cinopangidza rudo ra Djehovha rakakura kamuri?

¹⁰ Ndicipi cipangidzo cikuru ce rudo ra Djehovha? Rusudzunuro—ciitiko cikuru ce rudo mu nyika yese! (Juau 3:16; Aroma. 5:8) Djehovha akapasa Mwana wake anodia ecitendera kuti iyena afire anhu ese, kuitira kuti zvitema zvedu zvirekererhwe kuti tigare shamwari Dzake. (1 Juau 4:10) Kana tikanyasa kurangarira mutengo wakariphwa na Djehovha uye na Djesu, tinonyasa kuzwisisa madire aanoita umwe na umwe wedu. (Aga. 2:20) Rusudzunuro arizi kuriphwa nge ndaa ye unatsi wa Djehovha basi. Irona rakariphwa nge ndaa ye rudo. Djehovha akapangidza rudo rake katiri nge kupira Mwana wake anokosha maningi—Djesu. Djehovha akatendera kuti Mwana wake atitambudzikire uye atifire.

11. Djeremiya 31:3 inotifundisei?

¹¹ Hinga zvataona, Djehovha anoita zviri zvese kuti apangidze rudo rake. (Erengai Djeremiya 31:3.) Iyena akatikweera kaari ngekuti anotida. (Ezanisai na Dheuteronomiyo 7:7, 8.) Apana ciro kana munhu upi hake ungatiparadzanisa no rudo rake. (Aro. 8:38, 39) Rudo iri ra Djehovha rinoita kuti imwimwi muzwe kudini? Erengai Pisarema 23, uye onai kuti Dhavhidhi wakazwa kudini ngo rudo uye kucengethwa na Djehovha, uye kuti imwimwi mungazwawo kudini zvimwezvo.

RUDO RA DJEHOVHA RINOITA KUTI MUZWE KUDINI?

12. Maizopanganidza kudini Pisarema 23?

¹² Erengai Pisarema 23:1-6. Pana Pisarema 23, Dhavhidhi wakapangidza rugondo rake rekuti Djehovha aimuda uye aimucengeta. Iyena wakapanganidza ngezve ushamwari we pa dhuze waainga anawo na Djehovha uye wakati Djehovha Muushi wake. Iyena waizwa akacengeteka ecisiya Djehovha ecimutungamirira uye iyena wainyasa kugonda Djehovha. Dhavhidhi waizviziya kuti Djehovha aizopangidza rudo rake kaari mazuwa ese. Ngei Dhavhidhi waikwanisa kugara no rugondo iri?

13. Ngei Dhavhidhi wainga ano rugondo rekuti Djehovha aizomucengeta nguwa dzese?

 ¹³ “Apana cicandishotera.” Nguwa dzese Dhavhidhi waizwa akanyasa kucengethwa na Djehovha. Iyena wainga ano zvese zvaaida. Uyezve, Dhavhidhi waiziya kuti Djehovha ainga ari shamwari yake uye aimupfarira. Ndiyo ndaa Dhavhidhi waiziya kuti azvinei no zviro zvaizoitika mu nguwa yemberi, Djehovha aizonyasa kumudziirira. Rugondo rainga rina Dhavhidhi mu rudo ra Djehovha rainga rino simba maningi kupinda cinetso cipi haco, uye ndizvona zvaiita kuti Dhavhidhi apfare uye agutsikane.—Pis. 16:11.

14. Djehovha anotiriritira kudini?

¹⁴ Djehovha anoticengeta ngo mushobo wakanaka, maka-maka paya patinobatana no zviro zvakashata mu upenyu. Claire, a urikuseenza ku Bheteri ke makore anodarika 20, wakatsukwara maningi mhuri yake payakabatana no zvinetso zvakawanda. Baba ake akabatana no nhenda yakakura maningi yakaasiya asina simba kana kuti (derrame), umwe we munukuna wake wakadzingwa mu ungano, uye mhuri yake yakagara no cinetso ce mare uye yakaruza nyumba yawo. Djehovha akapangidza kudini kuti aiacengeta? Claire unoti: “Djehovha akaita zviri zvese kuti mhuri yangu igare ino zvese zvayaida zuwa rimwe na rimwe. Kakawanda kakhona, zviro zvataipaswa na Djehovha zvainga zvakawanda kudarika zviya zvatairangarira! Nguwa dzimweni ndinorangarira nguwa yandaicengethwa na Djehovha uye paaicengetawo mhuri yangu. Uye inini andizombokanganwi ngezve zviitiko izvi uye izvona zvinondibetsera kuti ndirumbwe ndeciseenzera Djehovha no mupfaro panomuka zvinetso zvimweni mu upenyu wangu.”

15. Ngei Dhavhidhi wakazwa kunyaradzwa? (Onaiwo mufanikiso.)

¹⁵ “Iyena anondinyaradza.”  Nguwa dzimweni,  Dhavhidhi waitsukwara nge ndaa ye matambudziko uye zvinetso zvaaisongana nazvo. (Pis. 18:4-6) Kunyazi zvakadaro, rudo uye kucengethwa kaaizwa na Djehovha ndizvona zvaimunyaradza. Zvaiita hingana kuti Djehovha aitora Dhavhidhi ecimuendesa “mushango rakasvipirira” uye ku “mbuto yekuzororera yakanyasa kudirirhwa.” Ngo mushobo uwona, Dhavhidhi waionazve simba uye waikwanisa kurumbwa eciseenzera Djehovha no mupfaro.—Pis. 18:28-32.

16. Rudo ra Djehovha rinomunyaradzai kudini?

¹⁶ Nyamasi uno, tinokwanisawo kurhwisana no zvinetso zvatinosongana nazvo no rubetso ra Djehovha basi. Hinga zvinorekethwa no Bhaibheri, “rudo rakagondeka ra Djehovha ndirona rakaita kuti tisatsakatiswe.” (Mari. 3:22; Ako. 1:11) Onai muezaniso wa Rachel. Iyena wakarhwadziwa maningi mwamuna wake paakasiya Djehovha pa nguwa ye nhenda ye COVID-19. Djehovha akamuitirei? Iyena unoti: “Djehovha akaita zviri zvese kuti ndizwe kuti ndinodiwa. Iyena akaita kuti shamwari dzakawanda dzipedze nguwa neni, dzecindiunzisira zviro zvekurhya, dzecinditumira mamesaji no tsamba dzinobambisa, dzaindinyemwerera uye dzaindiedzurira kuti Djehovha aindicengeta. Ndinotenda maningi Djehovha ngekundipasa mhuri yakakura ino rudo.”

17. Ngei Dhavhidhi wainga “asikathyi ciro cipi haco”?

¹⁷ “Apana candinothya ngekuti imwimwi muneni.” Dhavhidhi wainga ano azondi akawanda ano simba, uye kakawanda kakhona, upenyu wake wainga uri pa ngozi. Kunyazi zvakadaro, iyena waizwa akacengeteka uye akadziirirhwa nge ndaa ye rudo ra Djehovha. Iyena waizwa kuti Djehovha ainga anaye nguwa dzese uye ndizvona zvaimunyaradza. Ndiyo ndaa, iyena wakaemba kuti: “[Djehovha] akandinunura pa zviro zvese zvandaithya.” (Pis. 34:4) Nguwa dzimweni, Dhavhidhi waithya maningi; asi wakakwanisa kuzvikunda ngekuti wainga ano rugondo rekuti Djehovha aimuda.

18. Kuziya kuti Djehovha anotida kungatibambisa kudini patinonga tecithya?

¹⁸ Kuziya kuti Djehovha anotida, kunotipasa kudini simba patinobatana no migariro inoshupha? Mupionera umweni unozwi Susi unopanganidza kuti iyena no mwamuna wake akazwa kudini mwana wawo paakadziuraya: “Zviro zvakashata maningi uye zvinotsukwarisa pazvinoitika mu upenyu wako, izvona zvinobata-bata uye zvinoita kuti uthye kuti zviro zvimweni zvakashata zvicaitikazve. Asi rudo ra Djehovha rakaita kuti tizwe takacengeteka uye takadziirirhwa.” Rachel wamborekethwa ngezvake mu ndima yadarika unoedzurira kuti: “Pa usiku umweni, inini ndainga ndakatsukwara maningi uye ndainetseka, ndecithya. Inini ndakacema uye ndakaita munamato kuna Djehovha no izwi guru. Pa nguwa imweyo, ndakazwa kuti iyena akatonhodza mwoyo wangu uye akandinyaradza hinga mai  anonyaradza mwana wawo, uye ciriporipoco ndakawata. Andizombokanganwi ngezve nguwa ii.” Mukuru umweni unozwi Tasos wakapedza makore marongomuna ari mu kadheya ngekuramba kuenda ku hondo. Iyena wakazwa kudini rudo uye kucengethwa na Djehvoha? Iyena unoti: “Djehovha akandipasa zvese zvandaida uye no zvimweni zvakatowanda. Izvi zvakaita kuti nditunhudzire rugondo rangu muna Djehovha. Kunyazi kadheya iri mbuto inoita kuti munhu agare akatsukwara, Djehovha akandipasa mupfaro eciseenzesa mwiya mucena wake. Izvona zvakandibetsera kuona kuti pandinotunhudzira rugondo rangu muna Djehovha, ndinotunhudzirawo kuzwa rudo rake kandiri. Hino inini ndakatanga kuseenza hinga mupionero we nguwa dzese pandainga ndiri mukadheya.”

NYASAI KUGARA DHUZE NA MWARI WENYU ANO RUDO

19. (a) Kuziya kuti Djehovha anotida kunoita kuti tireketei pa minamato yedu? (b) I vhersikuro ipi inoreketa ngezve rudo ra Djehovha inonyanya kubaya mwoyo wenyu? (Onai bhokisi rakazwi: “ Masoko Anotibetsera Kuzwa Rudo ra Djehovha.”)

¹⁹ Maeshiperiesiya ese ataona mu fundo ino, anopangidza kuti Djehovha, “Mwari we rudo,” anesu! (2 Ako. 13:11) Iyena anorangarira ngezve munhu umwe na umwe pacake. Isusu tingagara no rugondo rekuti “takatenderedzwa no rudo Rake rakagondeka.” (Pis. 32:10) Patinorumbwa tecinyasa kurangarira ngezve rudo ra Djehovha raanotipangidzira, tinotunhudzirawo kuzwa tiri padhuze naye uye Djehovha anotunhudzirawo kugara we zvirokwazvo katiri. Isusu tingaita munamato kuna Djehovha nguwa ipi hayo uye tomubvunza mushobo watinoda rudo rake. Uyewo tingabvunza Djehovha zvese zvirikutinetsa, tecigara no rugondo rekuti iyena anotizwa uye anoda maningi kutibetsera.—Pis. 145:18, 19.

20. Rudo ra Djehovha rinoita kudini kuti tikhwedere kaari?

²⁰ Kuitawo hingana kupfarira katinoita kukhwederera muriro kuti tiugote pakunonga kecitonhora, isusu tinodawo kukhwedera dhuze no rudo ra Djehovha. Kunyazi rudo ra Djehovha rino simba, irona rinotidziirirawo. Hino funungurai mwoyo wenyu kuti muzwe rudo ra Djehovha mu upenyu wenyu. Patinozwa rudo iri, tese isusu tingabhuya no rugondo rese kuti: “Inini ndinoda Djehovha”!—Pis. 116:1.