1. Zviro zvipi zvingatisiya tecithya?

 PAMWENI paya, tese isusu tinombozwa kuthya. Zviri pamhene kuti kufunda ketakaita Bhaibheri kakatisudzunura pakuthya rufu, kuthya zviro zvakatitenderedza, uye kuthya ra mangwana. Isusu tiri kurarama mu nguwa iri kuitika “zviro zvinothyisa,” zvakaita hingana hondo, ubhinya no matenda. (Ruka 21:11) Isusu tingakwanisawo kuthya munhu, ngo muezaniso, kuthya anyautongi kana nhengo dze mhuri yedu dzinophikisa kunamata kedu Djehovha. Amweni anonetseka maningi ecirangarira kuti aakwanisi kushingirira dambudziko raari kusongana naro zvino uye raacazosongana naro mune ramangwana.

2. Zvinyi zvakaitika na Dhavhidhi paainga ari ku Gati?

² Dhavhidhi waizwawo kuthya. Mambo Sauri paaiteerera Dhavhidhi kuti amuuraye, iyena wakasanangura kutizira ku thaundi re Firistiya ku Gate. Mambo we Gate, Akiji, wakaziya kuti Dhavhidhi wainga ari murhwi uya uno simba waiemberhwa no anhu ecibhuya kuti iyena ainga auraya “makumi e zviuru” e Afiristiya. Dhavhidhi paakazviziya, “wakathya maningi.” (1 Sam. 21:10-12) Dhavhidhi wakanetseka ecirangarira kuti Mambo Akiji waizomuitei. Iyena wakaitei kuti akunde kuthya uku?

3. Maererano na Pisarema 56:1-3, 11, Dhavhidhi wakaitei kuti akunde kuthya?

³ Pana Pisarema 56, Dhavhidhi unopanganidza kuti waizwa kudini paainga ari ku Gate. Pana Pisarema ii, Dhavhidhi unopanganidza zviro zvaiita kuti athye, asi iyena unopanganidzawo zvaakaita kuti akunde kuthya. Iyena wakagonda Djehovha. (Erengai Pisarema 56:1-3, 11.) Uye Dhavhidhi aazi kuora mwoyo. Ecikomborerhwa na Djehovha, Dhavhidhi wakaita zviro zvaainga asikakariri, kudziita hingana benzi. Zvino, pane kuti Akiji ade kuuraya Dhavhidhi, Akiji wainga asikadi kugara dhuze naye. Ngo kudaro, Dhavhidhi wakapukunyuka.—1 Sam. 21:13–22:1.

4. Tingabambisa kudini rugondo redu kuna Djehovha? Pasai muezaniso.

 ⁴ Isusu tingakwanisawo kukunda kuthya kedu kana tikagondawo Djehovha. Asi tingaitei kuti tibambise kutenda kedu kuna Djehovha maka-maka paya patinonga tecizwa kuthya? Rangarirai muezaniso unoteera. Cimborangarirai kuti imwimwi muno nhenda yamunayo. Imwimwi munothya, asi imwimwi mungakwanisa kuteredza kuthya kenyu kana mukareketa na medhiko wamunogonda. Pamweni medhiko iyena wakarapa anhu akawanda ano nhenda iyona. Iyena ucanyasa kumupurutanai, uye imwimwi mucaona kuti iyena uri kunyasa kuzwisisa zvamuri kusongana nazvo. Pamweni iyena ucasanangura kumupasai mitombo yakatomboseenzawo no amweni. Nge mushobo umwewo, isusu tingabambisawo rugondo redu kuna Djehovha kana tikaima tonyasa kurangarira zvese zvaakaita, zvaari kuita, uye zvaacatiitira mune ramangwana. Ndizvona zvakaizwa ndi Dhavhidhi. Patinoerenga masoko a Dhavhidhi ari pana Pisarema 56, rangarirai kuti imwimwi mungabambisa kudini rugondo renyu kuna Djehovha uye mokunda kuthya kenyu.

DJEHOVHA AKAITEI?

5. Kuti akunde kuthya kake, Dhavhidhi wairangarira ngezvei? (Pisarema 56:12, 13)

⁵ Kunyazi upenyu wake wainga uri pangozi, Dhavhidhi waikanda ndangariro dzake pa zviro zvainga zvaizwa na Djehovha. (Erengai Pisarema 56:12, 13.) Aya ndiwo maitiro ainga ano Dhavhidhi mu upenyu wake wese. Ngo muezaniso, nguwa dzimweni, Dhavhidhi waiima onyasa kurangarira ngezve zvisikwa zva Djehovha, kuita izvona kaimubetsa kuedzurira kuti Djehovha ndi Mwari we masimba ese uye kuti iyena anoda maningi anhu. (Pis. 65:6-9) Dhavhidhi wainyasa kurangarirawo ngezve zviya zvaiizwa ndi Djehovha ku anhu amweni. (Pis. 31:19; 37:25, 26) Uye iyena wainyasa kurangarira maka-maka ngezve zviya zvaakaizirhwa na Djehovha iyena pacake. Djehovha akadziirira uye akabetsera Dhavhidhi kubvira aciri mudjaha. (Pis. 22:9, 10) Apana mubvunzo kuti izvona zvakabambisa maningi rugondo ra Dhavhidhi kuna Djehovha!

6. Pamunonga mecithya, cinyi cingamubetserai kuti mugonde Djehovha?

⁶ Kana imwimwi mecizwa kuthya, dzibvunzisei kuti: ‘Zvinyi zvakaizwa na Djehovha?’ Imai uye rangarirai ngezve zviro zvakasikwa. Nge  muezaniso, “nyasai kuongorora” kuti Djehovha anocengeta kudini shiri uye maruwa—kunyazi izvona zvisikazi kusikwa no mufanikiso wa Mwari uye kunyazi izvona zvisikakwanisi kumunamata—nge kudaro Djehovha acaticengeta. Kurangarira izvona kucanyasa kubambisa rugondo renyu kaari. (Mat. 6:25-32) Rangariraiwo zviya zvakaizwa na Djehovha ku aseenzi ake. Imwimwi mungapsvaka kufunda ngezve munhu umwe unorekethwa no Bhaibheri wainga ano kutenda kakabamba, kana kuti imwimwi mungaerenga ngano ye upenyu we Apupuri a Djehovha e mazuwa ano. a Uyewo, rangariraiwo kuti Djehovha anosomucengetai kudini. Cinyi caakaita kuti imwimwi muziye cokwadi? (Juau 6:44) Iyena akadaira kudini minamato yenyu? (1 Juau 5:14) I zviro zvipi zvakanaka zvamunoona zveciitika mu upenyu wenyu zvamunozwisisa kuti zvinoitika basi nge ndaa ye rusudzunuro?—Aef. 1:7; Aheb. 4:14-16.

7. Ngano ye muphorofita Dhanyeri yakabetsera kudini Vanessa kuti akunde kuthya kake?

⁷ Hanzvadzi imweni yoku Haiti inozwi Vanessa, b yakasongana no zviro zvinoshupha maningi mu upenyu wayo. Mwanarume umweni we ku mutanha kayo wairumbwa ecimuthurufunariri uye ecimutumira matsamba mazuwa ese. Mwanarume iyena, waibambidzira Vanessa kuti anamorari naye. Hanzvadzi ii yakapangidza pamhene kuti yainga isikazoiti izvona. Asi mwanarumewo wakabambirira kumushupha uye wakatomuthyisidzira. Vanessa unobhuya kuti iyena wakathya maningi. Asi iyena wakakwanisa kudini kukunda kuthya uku? Iyena wakaita zviri zvese kuti adzidziirire. Mukuru umweni wakamubetsera kuti iyena abhuye no anyautongi. Kusiya izvona, iyenawo wakakanda ndangariro dzake pakuona kuti Djehovha akadziirira kudini aseenzi ake e kare. Vanessa unopanganidza eciti: “Munhu wekutanga wandakarangarira ndi Dhanyeri. Iyena wainga ari munhu asina ndaa, asi wakasongana no mugariro unoshupha. Iyena wakakhandirhwa mu rindi mainga muno mhondoro dzinothyisa. Kunyazi zvakadaro, Djehovha akamucengeta. Inini ndakakumbira kuti Djehovha agadzirise dambudziko randaisongana naro. Uye mumasure me kuita munamato, inini ndainga ndisikacazwi kuthya.”—Dha. 6:12-22.

DJEHOVHA ARI KUITEI ZVINO?

8. Dhavhidhi wainga ano rugondo ripi? (Pisarema 56:8)

⁸ Kunyazi upenyu wa Dhavhidhi wainga uri pangozi ku Gati, iyena aazi kukanda ndangariro dzake pa zviro zvaimuita kuti athye. Pane kudaro, iyena wakasanangura kuima orangarira zviro zvaaiizirhwa na Djehovha pa nguwa iyona. Dhavhidhi waikwanisa kuona nhungamiriro uye kuzwa kudziirirhwa na Djehovha uye iyena waikwanisa kuona kuti Djehovha aikwanisa kuzwisisa mazwiro ake. (Erengai Pisarema 56:8.) Dhavhidhi waikwanisawo kukarira rubetso re shamwari dzake Djonatani no Mupristi Mukuru Erimereki. (1 Sam. 20:41, 42; 21:6, 8, 9) Uye kunyazi eciteerehwa na Mambo Sauri, Dhavhidhi wakakwanisa kupukunyuka. Dhavhidhi wainga ano rugondo rokuti Djehovha ainyasa kuziya kuti iyena waisongana no migariro inoshupha uye kuti izvona zvaimubata-bata kudini mu ndangariro.

9. Djehovha anoziyei ngezve umwe na umwe wedu?

⁹ Kana mecisongana no migariro inomuitisai kuti muthye, edzurirai kuti Djehovha ari kuona cinetso camuri kusongana naco uye iyena anonyasa kuziya mazwiro enyu. Ngo muezaniso, panyaya ye Aisraeri ku Edjipitu, pane kuona migariro inoshupha yaaisongana nayo, Djehovha akaabvunza kuti “ainyasa kuziya [kushuphika] kaaiita.” (Eki. 3:7) Pa ngoma imweni,  Dhavhidhi wakabhuya kuti Djehovha aiona “kutambudzika” kake uye aiziya “zvinetso” zvake. (Pis. 31:7) Uye anhu a Mwari paaishuphika—nguwa dzimweni nge ndaa ye zvisananguro zvawo zvakashata—Djehovha “ainetsekawo maningi.” (Isa. 63:9) Pamunonga mecithya, ziyai kuti Djehovha anozwisisa mazwiro enyu uye iyena ano cido cakakura cekumubetserai kuti mukunde kuthya.

10. Ngei imwimwi mungagara no rugondo rekuti Djehovha anoziya zvinetso zvamuri kubatana nazvo uye kuti acamubetserai kuti muzvikunde?

¹⁰ Nguwa dzimweni, imwimwi munosodzibvunzisa kuti Djehovha anomubetserai kudini kuti mukunde zvinetso? Zvakadini kuita munamto kaari mecikumbira kuti amubetserei kuona rubetso raari kumupasai? (2 Mad. 6:15-17) Cimborangarirai kuti: Makambobambiswa here ngo mharidzo kana kuti mhinduro yakapaswa no munhu pa musangano? Pano bhuku, vhidhiyo kana kuti ngoma yakamubambisai here? Pano munhu akambocedza na imwimwi ngezve ciro kana kuti tsamba yakamubambisai? Nguwa dzimweni, tinokanganwa kudiwa katinoizwa no hama dzedu uye kubetserhwa katinoizwa peciseenzeswa Bhaibheri. Asi izvi i zvipo zvinoshamisa zvatinopaswa na Djehovha. (Isa. 65:13; Mark. 10:29, 30) Izvona i zvipangidzo zvekuti Djehovha anotikoshesa. (Isa. 49:14-16) Uyewo i zvipangidzo zvekuti Djehovha anosisira rugondo redu.

11. Cinyi cakabetsera Aida kuti akunde kuthya kake?

¹¹ Hanzvadzi imweni inogara ku Senegal inozwi Aida, yakakwanisa kuona kubetserhwa kayakaizwa ndi Djehovha payaisongana no zvinetso. Ngokuti yainga iri dangwe, abereki ayo aietsera kuti itambire mare yakawanda kuti idzicengete uye icengetewo abereki ayo. Asi mumasure me kuita kuti agare no upenyu usina zvakwanda kuti agare mupiyonera, Aida wakatanga kugara no mare padoko. Mhuri yake yakanyangadzwa maningi uye yakatanga kumushora. Iyena unoti: “Inini ndakatanga kuthya kuti ndainga ndisikazokwanisi kubetsera abereki angu uye kuti ndaizooniwa ngo mushobo wakashata no anhu ese. Inini ndakatotanga kupasa ndaa Djehovha ngo zviro zvese zvakashata zvainga zveciitika.” Asi pedzepo Aida wakazwa mharidzo ku musangano. Iyena unopanganidza eciti: “Muiti we mharidzo wakatiedzurira kuti azvinei no maronda atinawo mu mwoyo medu, Djehovha  anoaziya ese. Nge ndaa ye mazano e akuru no hama dzimweni, padoko no padoko ndakatanga kuzwazve rudo ra Djehovha. Uye ndakatanga kunamata kuna Djehovha no rugondo, uye pandaiona kuti Djehovha aidaira minamato yangu, zvaiita kuti ndigare no runyararo.” No kuhamba ke nguwa, Aida wakaona basa raimubetsera kuti arumbwe ari mupiyonera uye kuti abetserewo abereki ake no anhuwo amweni. Iyena unopedzesa eciti: “Ndakafundira kugonda Djehovha no mwoyo wese. Zvino pandinoita munamato, kuthya kangu kunopera.”

DJEHOVHA ACAITEIZVE?

12. Maererano na Pisarema 56:9, Dhavhidhi wainga ano rugondo rei?

¹² Erengai Pisarema 56:9. Vhersikuro ii, inopangidza ciro cimwenizve cakabetsera Dhavhidhi paainga ecithya: Kunyazi upenyu pawainga uri pa ngozi, iyena wairangarira zviya zvaaizoizirhwa na Djehovha. Dhavhidhi waizviziya kuti Djehovha aizomuponesa pa nguwa yakasisira. Kusiya izvona, Djehovha ainga akabvunza Dhavhidhi kuti waizogara mambo unoteera we Aisraeri. (1 Sam. 16:1, 13) Kuna Dhavhidhi, zvese zvaigondeswa na Djehovha zvaitoita hingana kuti zvatoitika.

13. Tingagara no rugondo ripi kuna Djehovha?

¹³ Djehovha akagondesa kumuitirei? Isusu atietseri kuti Djehovha atidziirire pa matambudziko ese. c Kunyazi zvakadaro, zvinetso zvipi hazvo zvatingasongana nazvo mu nyika ino, tingagonda hedu kuti Djehovha acazvipedza zvese mu nyika ipsva. (Isa. 25:7-9) Zvezvirokwazvo, Musiki wedu ano simba re kumutsa akafa, re kuporesa matenda, uye kutsakatisa azondi edu ese.—1 Juau 4:4.

14. Tinganyasa kurangarira ngezvei?

¹⁴ Kana mukazwa kuthya, nyasai kurangarira zvicaizwa na Djehovha mune ramangwana. Rangarirai kuti mucazwa kudini Sathani paacatsakatiswa, anhu anoita zvakashata kusisinazve, paano anhu anoita zvakanaka basi, uye patinonga tecigara anhu akakwana zuwa no zuwa. Gungano ro nyika dzese rakaizwa mu 2014, rakapangidza muezaniso wekuti tinganyasa kurangarira kudini ngezve kariro yedu. Mhuri imweni yainga yecirangaridza kuti upenyu mu paraizo waizonga wakadini uye iyona yakarangarira kuti 2 Timoti 3:1-5 ingagara kudini no masoko akasiyana ecida kureya ngezve nyika ipsva: “Asi ziyai kuti mu nyika ipsva mucaoneka nguwa dzinopfadza kudarika dzipi hadzo. Ngokuti anhu acagara anodanana, anoda maningi zviro zve kunamata, asikadadi, anodzidodosa, anonamata Mwari, anozwira abereki, anotenda, akagondeka, ano rudo re kubarhwa naro, anoda kupindirana no amweni, anoreketa zvakanaka ngezve amweni, anodzibata, asikathyisi, anoda zvakanaka, anozwa zvinobhuiwa no amweni, akadzara ngo kudzidodosa, anonyanya kuda Mwari pa mbuto pe mapfaro, anonamata Mwari uye anoita zvinoenderana no kumunamateko; iwewe gara dhuze nawo.” Imwimwi munosocedza no mhuri yenyu kana no hama ngezve upenyu waticazogara nawo mu nyika ipsva here?

15. Cinyi cakabetsera Tanja kuti akunde kuthya kake?

¹⁵ Hanzvadzi imweni ye kakutsi ke Masedhoniya inozwi Tanja, yakakunda kuthya nge kurangarira makomborero atingakwanisa kugara nawo mune ramangwana. Abereki ayo ainga asikadi kuti iyona ifunde Bhaibheri. Uye akamuphikisa maningi. Iyona inoti: “Zviro zvimweni zvandaithya maningi kuti zvaizoitika, zvakazoitika. Mumasure me kupinda musangano, baba angu uye mai angu aindiponda uye aindithyisidzira kuti aizondiuraya kudai ndikagara Mupupuri wa Djehovha.” Pakupedzesera, Tanja wakadzingirhwa pa nyumba. Hino iyena wakaitei? Iyena unoenderera mberi eciti: “Inini ndakakanda ndangariro dzangu kuti ndaizorumbwa ndecipfara nokusikaperi kana ndikasanangura kurumbwa ndakagondeka. Uye inini ndakarangarira  kuti Djehovha aizondikomborera kudini mu nyika ipsva pa zvese zviya zvandigaruza nyamasi uno uye kuti zviro zvese zvakashata zvaizokanganika kudini.” Dakara zvino, Tanja wakagondeka kuna Djehovha uye no rubetso ra Djehovha wakaona mbuto kuti agare. Nyamasi uno, Tanja wakacata no hama yakatendeka uye ese ari kupfara eciseenzera Djehovha mu nguwa yakadzara.

BAMBISAI ZVINO RUGONDO RENYU KUNA DJEHOVHA

16. Cinyi cingatibetsera kuti tigare no ushingi patinoona masoko ari pana Ruka 21:26-28 ecidzadzika?

¹⁶ Pakutambudzika kukuru, anhu “acapera simba ngo kuthya” asi aseenzi a Djehovha acarumbwa akabamba uye ano ushingi. (Erengai Ruka 21:26-28.) Ngei isusu atizothyi? Ngokuti tinonga tafundira kugonda Djehovha. Tanja, wambobhuiwa kare, unobhuya kuti mugariro waakasongana nawo wakamubetsera kuti akunde zvinetso zvimweni zvinoshupha. Iyena unoenderera mberi eciti: “Ndakafundira kuti apana mugariro unoita kuti Djehovha akonerhwe kutibetsera uye kutikomborera. Asi pamweni paya zvingaita kuti aripo anhu arikuonerera migariro imweni, asi cokwadi nge cekuti ari kuionerera ngekuti Djehovha akaatendera. Kunyazi kana matambudziko akagara anoshupha, Djehovha acaapedza.”

17. Tsamba yedu ye gore ra 2024, icatibetsera kudini? (Onai foto ye pa kapa.)

¹⁷ Nyamasi uno kuno zviro zvakawanda zvinotisiya tecithya. Asi kuita hingana Dhavhidhi, isusu atidi kusiya kuti kuthya kutitungamirire. Tsamba yedu ye gore ra 2024 imunamato wakaizwa na Dhavhidhi: “Pandinonga ndecithya, ndinogonda nemwi.” (Pis. 56:3) Bhuku rimweni rinobhuya ngezve Bhaibheri rinoti ngezve tsamba ii: “Dhavhidhi wainga asikandogari ecirangarira zviro zvaimusiya ecithya kana ngezve matambudziko ake.” Pane kudaro, iyena waigonda uya waizomusudzunura. Rangarirai ngezve tsamba yedu ye gore mu mwedzi dzinoteera maka-maka kana muri kusongana no migariro inomusiyai mecithya. Psvakai nguwa kuti murangarire zvakaizwa na Djehovha kare, zviri kuizwa na Djehovha zvino uye zvaacaita mune ramangwana. Kuita hingana Dhavhidhi, imwimwi mungakwanisawo kubhuya kuti: “Ndinokanda rugondo rangu kuna Mwari; andizothyi.”—Pis. 56:4.