MUSORO WE KUFUNDA 2
NGOMA 19 Kurarira ka Tenzi
Muri Kugadzirira Here Zuwa Rinokosha re Gore?
“Rumbwai meciita izvi kuti mundiedzurire.”—RUKA 22:19.
CINANGWA
Ngationei kuti ngei Cirangaridzo cecikosha, tingacigadzirira kudini, uye kuti tingabetsera kudini amweni kuti azoonekepo.
1. Ngei Cirangaridzo i ciitiko cinokosha ce gore? (Ruka 22:19, 20)
KU ANHU a Djeovha, kuedzurira kufa ka Djesu, izuwa rinokosha maningi kaari pa gore. Iciitiko cakananga cakabhuiwa na Djesu kuti ateeri ake aciedzurire. (Erengai Ruka 22:19, 20.) Isusu tino cidaka-daka cakakura cekupinda Cirangaridzo ngekuti tino zvikonzero zvakawanda. Ngationei zvinganani zvakhona.
2. Zvikonzero zvipi zvinoita kuti zuwa re Cirangaridzo rigare zuwa rinokosha katiri?
2 Cirangaridzo cinotibetsera kuedzurira kuti cibairo ca Djesu cinokosha kudini uyewo cinotiedzurirawo kuti tingapangidza kudini kuti tinotenda cibairo icona. (2 Ako. 5:14, 15) Kusiya izvona, pa Cirangaridzo tinomukana “wekubambisa” hama no hanzvadzi. (Aro. 1:12) Makore ese, hama no hanzvadzi dzisikacaiti basa dzinosopinda Cirangaridzo. Uye amweni ngokutambirhwa no rudo, awona anosanangura kuhwirira kuna Djehovha. Uye amweni anosanangura kutanga kufunda Bhaibheri ngo zviya zvaanozwa no zviya zvaanoona pa Cirangaridzo. Azviropi zvinoshamisa kubhuya kuti zuwa iri rinokosha maningi katiri!
3. Isusu tinobatana kudini pa zuwa re Cirangaridzo? (Onaiwo foto.)
3 Rangariraiwo kuti isusu tinobatana kudini mu nyika yese pa zuwa re Cirangaridzo. Apupuri a Djehovha anoungana zuwa parinonga roodoka mu nyika dzese. Tese isusu tinozwa mharidzo inopanganidza kukosha ke rusudzunuro. Tinoemba ngoma mbiri, tinohambisa pau no vhinyu, uye tinobhuya “ameni” no mwoyo wese pa minamato mirongomuna inoizwa. Pa zuwa rimwe basi, ungano dzese dzinonga dzaita zvimwezvo. Munokwanisa kurangaridza mupfaro unozwa Djehovha na Djesu paanotiona takaungana mu nyika yese teciakudza nge mushobo uwona?
Cirangaridzo cinoita kuti hama dze mu nyika dzese dzibatane (Onai ndima 3) f
4. Ticaonei mu fundo ino?
4 Mu fundo ino ticaona mibvunzo dzinoteera: Tingagadzirira kudini mwoyo wedu kuti tipinde Cirangaridzo? Tingabetsera kudini amweni kuti abudise mafundo anokosha pa ciitiko ici? Uye tingabetsera kudini aya asikacaiti mabasa e Cikristu? Mhinduro dzemibvunzo idzi dzicatibetsera kuti tigare takagadzirira kuitira zuwa iri rinokosha maningi.
TINGAGADZIRIRA KUDINI MWOYO WEDU KUTI TIPINDE CIRANGARIDZO?
5. (a) Ngei tecidikana kunyasa kurangarira ngezve kukosha ke rusudzunuro? (Pisarema 49:7, 8) (b) Mafundei kubva pa vhidhiyo yakazwi Ngei Djesu Akafa?
5 Umwe mushobo unokosha maningi watingaita kuti tigadzirire mwoyo wedu, i kunyasa kurangarira kukosha ke rusudzunuro ra Djesu Kristu. Apana ciro cimweni cataikwanisa kuita kuti tidzisudzunure pa citema uye rufu. (Erengai Pisarema 49:7, 8; Onai vhidhiyo yakazwi: Ngei Djesu Akafa?) a Djehovha akatuma Djesu kuti apase upenyu wake kuti atiponese. Djehovha na Djesu akapeta masimba akakura maningi. (Aro. 6:23) Patinonyasa kurangarira zvakaizwa na Djehovha uye Djesu, kutenda kedu maari kunotunhudzira. Ngationei zviro zvinganani zvinoshupha zvakaizwa na Djehovha uye na Djesu katiri. Cokutanga, cinyi cinozwi rusudzunuro?
6. Cinyi caibatanidzwa pa rusudzunuro?
6 Rusudzunuro, i mutengo unoriphwa kuti ugare no ciro cawainga waanaco. Munhu wekutanga Adhamu paakasikwa, iyena wainga ari munhu wakakwana. Asi paakaita citema, iyena pamwepo no ana ake akaruza mukana wekurarama nokusikaperi. Hino, kuti paonekezve zvakaruzwa na Adhamu, Djesu akapasa upenyu wake hingana rusudzunuro. Djesu paainga ari pa nyika pano, iyena “aazi kuita citema kana kureketa masoko e kunyepa.” (1 Ped. 2:22) Djesu paakafa, ainga akakwana hingana zvainga zvakaita Adhamu asati ashaisha. Hino Djesu ngekupasa upenyu wake, iyena akaripa upenyu wakakwana wainga waruzwa na Adhamu.—1 Ako. 15:45; 1 Ti. 2:6.
7. Zvinetso zvipi zvakasongana na Djesu paainga ari pa nyika?
7 Paainga ari pa nyika, Djesu akazwira Djehovha mu zviro zvese, kunyazi izvona pazvaishupha. Djesu ainga ari mwana wakakwana uye abereki ake ainga ari anhu asikazi kukwana. Asi kunyazi zvakadaro, iyena aizwira abereki ake. (Ruka 2:51) Paainga ari mudjaha, Djesu akasongana no miedzo yakakura yekuti atame kuzwira abereki uyewo kutama kuzwira Djehovha. Paainga akura, iyena wakakunda miedzo ya Sathani Dhiyabhurosi ngokuti Sathani waida kuti Djesu atame kuzwira Djehovha. (Mat. 4:1-11) Sathani wainga akashinga kuti Djesu aite citema kuitira kuti Djesu asakwanise kuripa rusudzunuro.
8. Zvinetso zvipi zvimweni zvakasongana na Djesu?
8 Djesu paaiita basa rake re kuparidzira pa nyika pano, iyena akasonganazve no zvitsinzwa zvimweni. Azondi ake akamuteerera uye akatoedza kumuuraya. (Ruka 4:28, 29; 13:31) Uyewo, iyena aidikana kushingirira kutama kukwana ke ateeri ake. (Mark. 9:33, 34) Djesu paainga ecitongwa, iyena akatambudzwa uye akapsveruswa. Pakupedzesera, iyena akafa nge mushobo wakashata uye unorhwadza. (Aheb. 12:1-3) Iyena aidikana kushingirira dii rekupedzesera re upenyu wake ari ega, asikadziirirhwi na Djehovha. b—Mat. 27:46.
9. Munozwa kudini pamunonyasa kurangarira ngezve cibairo ca Djesu? (1 Pedru 1:8)
9 Zvezvirokwazvo, Djesu akashuphika maningi kuti apase upenyu wake katiri. Patinorangarira kushinga kainga kakaita Djesu pakudzipira katiri, isusu tinozwa rudo rakakura kaari.—Erengai 1 Pedru 1:8.
10. Rusudzunuro rakaita kuti Djehovha azwe kudini?
10 Zvakadini na Djehovha? Cinyi cakamuitisa kuti iyena apase mwana wake Djesu kuti aripe rusudzunuro? Djehovha na Djesu ano ukama wakabamba hingana baba no mwana kudarika anhu ese. (Zvie. 8:30) Hino, edzai kurangaridza kuti zvakarhwadza kudini Djehovha kuona mwana wake ecisongana no miedzo pa nyika pano. Zvezvirokwazvo iyena akarhwadziwa maningi paaiona mwana wake asikabathwi zvakanaka, ecirambwa uye ecishuphika maningi.
11. Cinyi cingatibetsera kuzwisisa kuti Djehovha akazwa kudini Djesu paakafa?
11 Baba kana kuti mai akambofirhwa no mwana, anonyasa kuziya marhwadzo uye dambudziko rekufirhwa. Isusu tinokutenda kakakura mu rumuko. Asi kunyazi zvakadaro, kana tikafirhwa tinorhwadziwa maningi mu mwoyo medu. Izvona zvinotibetsera kuona kuti Djehovha akarhwadziwa zvakadini paakaona mwana wake waanoda ecirhwadziwa uye ecifa muna 33 K.A. c—Mat. 3:17.
12. Cinyi catingaita tisati taguma mu nguwa ye Cirangaridzo?
12 Zvakadini kutangira zvino kufunda ngezve rusudzunuro pa fundo ye munhu ega uye pa Kunamata ke Mhuri? Seenzesai Bhuku Rinobetsera Apupuri a Djehovha Pakukwarakwatisa (kana recioneka mu mureketero wenyu) kana kuti bhuku rimweni kuti muziye zvakawanda ngezve rusudzunuro. d Uye hambiranai no urongwa we kuerengwa ke Bhaibheri ke Cirangaridzo, unooneka pa Urongwa we Musangano—Basa Redu uye Kurarama Kedu ke Cikristu. Uye pa zuwa re Cirangaridzo, musakanganwe kuona vhidhiyo ye Kunamata ke Macibesi kunokosha. Kana tikagadzirira mwoyo wedu kuitira Cirangaridzo, isusu tinokwanisawo kubetsera amweni kuti akwanise kukhorovhera ciitiko ici.—Esdra 7:10.
BETSERAI AMWENI
13. Ciro cipi cekutanga catinodikana kuita kuti tibetsere amweni kuti apinde Cirangaridzo?
13 Tingabetsera kudini amweni kuti abudise mafundo anokosha pa Cirangaridzo? Ciro cokutanga, ngece kupika amweni kuti auye ku Cirangaridzo. Pane kupika basi aya atinoparidzira, tingakwanisa kutara mazina e aya aticazoda kupika, akadai hinga anyacigarisano uye amweniwo. Kunyazi tisina mupiko dzakawanda dzakadhindwa, tingakwanisa kuseenzesa link. Ticashamisika no numero ye anhu acatenda kupikwa!—Mup. 11:6.
14. Ngei zvecibetsera kupasa mupiko munhu watinoziya kamare?
14 Zvinobetsera maningi kupasa mupiko wakadhindwa kana kuti kutumira link ku munhu uya watinoziya kamare. Hanzvadzi imweni yakashamisika maningi mwamuna wayo usikaseenzeri Djehovha paakamubvunza kuti waizouya ku Cirangaridzo. Ngei iyena wakashamisika? Ngokuti wainga akambomupika kakawanda, asi iyena wainga asati amboendeyo. Asi zvino cinyi cakaitika? Mwamuna wake wakatambira mupiko waakapaswa ngo mukuru umweni waaiziya. Iyena wakapinda cirangaridzo ce gore irona uye ce makore amweni akazoteera.
15. Tinodikana kutanga tarangarirei tisati tapika munhu kuti auye ku Cirangaridzo?
15 Edzurirai kuti aya atinopika, angakwanisa kugara no mibvunzo—maka-maka kana asati amboenda ku Nyumba ye Umambo. Zvainga zvakanaka maningi kurangarira ngezve mibvunzo dzaangaita uye kugadzirira kuti muzoadaire. (Ako. 4:6) Ngo muezaniso, amweni angadzibvunzisa kuti: ‘Musangano uu ucaizwa kudini?’ ‘Ucapedza nguwa yakareba kudini?’ ‘Zvinoita kuti ndiende ndakapfeka nge mushobo wandinonga ndada?’ ‘Ndinodikana kuripa ciro ikona here?’ ‘Acazohambisa paratu yekukumbira mare ikona?’ Tikapika munhu kuti auye ku Cirangaridzo, tingakwanisa kumubvunzisa kuti: “Imwimwi muno mubvunzo wamunawo here?” Uye pedzepo modaira mubvunzo wake. Uye mungakwanisawo kumupangidza mavhidhiyo akazwi Rangaridza rufu ra Djesu uye yakazwi Mu Nyumba yo Umambo Munoizwei? kuti mubetsere munhuwo kuziya kuti misangano yedu inoizwa kudini. Kusiya izvona, fundo 28 ye bhuku ra Pfadzwai ne Upenyu Nokusikaperi! rino mafundo anokosha atingakwanisa kuseenzesa kuti tibetsere munhuwo.
16. Mibvunzo dzipi dzekuti akawanda anonga apinda Cirangaridzo pamweni angagara nadzo?
16 Mumasure mekupinda Cirangaridzo, akawanda anonga akapikwa angagara no mibvunzo dzakawanda. Pamweni aona angadzibvunzisa kuti: Ngei pasikazi kuoneka munhu warhya pau no kumwa vhinyu? Kana kuti, ngei anhu anganani ndiwo aita izvona? Awona pamweni angadzibvunzisazve kuti: Cirangaridzo cinoizwa kangana pa gore? Uye pamweni angada kuziya kuti, misangano yese ye Apupuri a Djehovha inoizwa nge Mushobo wakaezana here. Kunyazi nyaya dzakadai dzecipanganidzwa pa Cirangaridzo, pamweni munhu ungada kuziya zvakawanda. Fundo yakazwi: “Nei Maitiro Anoita Zvapupu zvaJehovha Chirayiro chaShe Achisiyana Nezvinoitwa Nemamwe Machechi?” ingakwanisa kutibetsera kudaira mibvunzo dzimweni dzekuti iyena ungagara nadzo. Isusu tiri kuda kuita zvese zvatinokwanisa—Cirangaridzo cisati catanga uye pacinonga capera—kuti tibetsere aya ano “mwoyo unoda” kuti akhorovhere zvakanaka musangano uu.—Zvii. 13:48.
BETSERAI AYA ASIKACAITI MABASA E CIKRISTU
17. Akuru angabetsera kudini aya asikacaiti mabasa e Cikristu? (Ezekiyeri 34:12, 16)
17 Pa nguwa ye Cirangaridzo, akuru angabetsera kudini aya asikacaiti mabasa e Cikristu? Pangidzai kuti munoakoshesa. (Erengai Ezekiyeri 34:12, 16.) Cirangaridzo cisati caguma, petai masimba kuti mucedze no aya ese asikacaiti mabasa e Cikristu. Pangidzai pamhene kuti awona anodiwa maningi uye kuti imwimwi munoda kuabetsera pa zviya zvaanoda. Apasei mupiko we Cirangaridzo uye kana awona akauya, atambirei no rudo. Mumasure me Cirangaridzo, rumbwai mecibetsera hama no hanzvadzi idzi dzinodiwa. Itai zvese zvamunokwanisa kuti mudzibetsere kuti dzihwirire kuna Djehovha.—1 Ped. 2:25.
18. Isusu tese tingabetsera kudini aya asikacaiti mabasa e Cikristu? (Aroma 12:10)
18 Ese ari mu ungano angabetsera kudini aya asikacaiti mabasa e Cikristu paanopinda Cirangaridzo? Tingaita izvona nge kubata aya asikacaiti mabasa e Cikristu no rudo, unaki uye rureremedzo. (Erengai Aroma 12:10.) Edzurirai kuti zvakashuphira kudini hama no hanzvadzi idzi dzinodiwa kuti dzihwirirezve ku Nyumba ye Umambo. Pamweni awona akathya kuti ainga asikazotambirhwi zvakanaka. e Musarekete zviro zvingaita kuti awona apsveruke uye arhwadziwe. (1 Ate. 5:11) Hama no hanzvadzi idzi dzinodawo Djehovha hinga mushobo watinomudawo. Isusu tinopfara maningi nge kunamata Djehovha pamwepo no hama uye hanzvadzi idzi!—Pis. 119:176; Zvii. 20:35.
19. Isusu tinobetsereka kudini ngekuedzurira rufu ra Djesu?
19 Zvino musoro Djesu kutikumbira kuti makore ese tiedzurire ngezve kufa kake. Isusu pamwepo no anhu amweni, tinobetsereka maningi ngekuita izvona. (Isa. 48:17, 18) Ngo muezaniso, rudo redu kuna Djehovha na Djesu rinonyasa kubamba, tino mukana wekupangidza kuti tinotenda nge zvese zvaakatiitira uye tinogara padhuze no hama uye hanzvadzi dzedu. Kusiya izvona, tino mukana we kubetsera amweni kuziya zvakawanda ngezve rusudzunuro uye kuti agare no mukana we kutambira makomborero ari kupikirhwa na Djehovha. Hino, ngatipete masimba kuti tigadzirire zuwa iri rinokosha re gore—Cirangaridzo ce rufu ra Djesu!
TINGAGADZIRIRA KUDINI . . .
-
mwoyo yedu kuti tipinde Cirangaridzo?
-
kuti tibetsere amweni kuti anyase kukhorovhera ciitiko ici?
-
kuti tibetsere aya asikacaiti mabasa e Cikristu?
NGOMA 18 Makaita Basa Nge Kutisudzunura
a Kuti mugumire mafundo uye mavhidhiyo abhuiwa mu fundo ino, pindai mu jw.org uye endai pakazwi kupsvakisisa.
b Onai “Mibvunzo Inobva ku Aerengi” mu Murindiri wa Abriri wa 2021.
c Onai bhuku rakazwi Swedera Pedyo naJehovha, fund. 23, mandi. 8-9, mu ciShona.
d Onai bhokisi rakazwi: “ Mazano Angatibetsera Pakukwarakwatisa.”
e Onai mafoto uye bhokisi rakazwi: “ Ungano Yakanditambira Kudini?” Hama isikacaiti mabasa e Cikristu iri kuthya isati yapinda mu Nyumba ye Umambo. Asi iyona inokunda kuthya ikona. Iyona inotambirhwa no rudo uye inogara yakasudzunuka.
f KUPANGANIDZWA KE MIFANIKISO PA: Anhu a Mwari paanonga ecipinda Cirangaridzo ku matii amweni e nyika, hama no hanzvadzi dze nyika dzimweni dzinonga dzecitogadzirirawo kuti dzipinde ciitiko ici cinokosha.