SOKO rekuti “ngoro” rakaseenzeswa mu Shanduro yeNyika Itsva mu mureketero wekutanga, ringareya mishobo yakawanda ye zvihambo. (Zvii. 8:28, 29, 38) Asi, zvinoita hingana kuti ngoro yaiseenzeswa no mwanarume we ku Etiyopiya yainga yakakura kudarika ngoro dzaiseenzeswa pa hondo uye pa makwikwi ekugogoma. Onai zvikonzero zvinganani zvatinazvo kuti tigume pakubhuya kudaro.

Mwanarume uu we ku Etiyopiya wainga uno cigaro cakakhwirira mu utongi uye waiita rhwendo rakakura. Iyena wainga “ari museenzi we pa nyumba ya Kandasi mambokadzi, we Etiyopiya, waionerera pfuma yake yese.” (Zvii. 8:27) Kareko ndima ye ku Etiyopiya yaibatanidza nyika yoku Sudão yokuti nyamasi ndi Edjipitu. Pamweni iyena wakaseenzesa ngoro dzakasiyana-siyana, paaiita rhwendo. Asi iyena waidikana kugara no ngoro yakakura, yaizokwana midziyo yakawanda yokuti pamweni yaaizothwarhwa pa rhwendo iri rakakura. Mu nguwa dze aphostori zvainga zvakadjairika kuhamba no ngoro ino marodha marongomuna uye ino ciro caifukidza padenga kuitira anhu aizokhwira. Referensiya imweni ye Bhaibheri inobhuya kuti “ngoro yakadai yainga ino mbuto yakakura kuti ithware midziyo yaizoita kuti rhwendo ridakadze uye pamweni yaizoseenza pa rhwendo rakakura” maererano no bhuku ra Zviito.

Mwanarume we ku Etiyopiya wainga ecierenga pa nguwa yekuti Firipi wakamukhwederera. Ngano iri mu bhuku ra Zviito inobhuya kuti “Firipi wakaenda kuno ngoro uye wakazwa mukuru-mukuru we ku Etiyopiya ecierenga bhuku re muphorofita Isaya no izwi rinozwika.” (Zvii. 8:30) Ngoro dzaiseenzeswa pakuita rhwendo, dzainga dzisikaizwi kuti dzihambe nokukasika. Mushobo uwona uu wekuhamba padoko-padoko zvakaita kuti mukuru-mukuru we ku Etiyopiya aerenge matarhwa uye zvakaitawo kuti Firipi akhwedere kaari kunyazi ecihamba no tsoka.

Mwanarume we ku Etiyopiya “wakakumbira kuti Firipi akhwire uye agare naye.” (Zvii. 8:31) Ngoro dzaiseenzeswa pa makwikwi e kugogoma, mutekenyi waitekenya wakaima. Asi mu ngoro dzaiseenzeswa pakuita rhwendo, mainga muno mbuto yakakura kuti mwanarume we ku Etiyopiya na Firipi agare.

Maererano no zvatinoerenga mu kapituro 8 ya Zviito uye no ngano dzimweni, mabhuku edu e mazuwa ano anopangidza pa mufanikiso kuti Muetiyopi uri kuhamba mu ngoro yakakura yakasiyana no dziya dzaiseenzeswa pa hondo uye pa makwikwi e kugogoma.