MUSORO WE KUFUNDA 1
“Ese Anopsvaka Djehovha Aana Cakanaka Cicaashotera”
TSAMBA YE GORE RA 2022:“Ese anopsvaka Djehovha aana cakanaka caacashoterhwa.” —PIS. 34:10.
NGOMA 4 “Djehovha Ndiye Muushi Wangu”
ZVATICAFUNDA *
Kunyazi paibatana no matambudziko, Dhavhidhi waiona kuti ‘apana cakanaka caaishoterhwa naco’ (Onai mandima 1-3) *
1. Dhavhidhi wainga ari pa mugariro upi unoshupha?
DHAVHIDHI waitiza kuti aponese upenyu wake. Sauro mambo wainga ano simba ku Israeri, wainga wakashinga kuuraya Dhavhidhi. Dhavhidhi paaitiza wakaima mu thaundi re Nobhe, ari ikona Dhavhidhi wakakumbira mupristi Aimereki pau 5 kuti arhye. (1Sa. 21:1, 3) Pedzepo Dhavhidhi ne anarume ake akaenda koofindara mu bako. (1Sa. 22:1) Cinyi cakaitika kuti Dhavhidhi azogume pa mugariro wakadaro?
2. Zviro zvipi zvakashata zvakaizwa na Sauro? (1 Samueri 23:16, 17)
2 Sauro wainga ecizonda maningi Dhavhidhi nge kunyanya kuziikanwa kake, uye anhu akawanda aimuda. Sauro waitozviziya kamare kuti Djehovha ainga amuramba hingana mambo nge ndaa yekusama kuzwa kake. Dhavhidhi waizogara mambo mumasure make. (Erengai 1 Samueri 23:16, 17.) Asi Sauro wainga aciri mambo ku Israeri, ndiyo ndaa iyena wainga anorubetso re anyahondo ake pamwepo ne rubetso re anhu akawanda. Dhavhidhi wainga asina cisananguro cimweni pane kutiza basi. Kodi Sauro wairangarira kuti iyena waikwanisa kurhwisana na Djehovha opinga Dhavhidhi kuti asagare mambo here? (Isa. 55:11) Bhaibheri aridairi mubvunzo iwona, asi tinogonda kuti Sauro waitamba ne muriro. Apana anophikisa Djehovha orumbwa akaima!
3. Dhavhidhi waiita kudini pasinei ne zvese zvaitika mu upenyu wake?
3 Dhavhidhi wainga ari munhu anodzidodosa. Iyena aazi kusanangura kugara mambo weku Israeri. Djehovha ndiye akamugadza kuti agare mambo. (1Sa. 16:1, 12, 13) Kuna Sauro, Dhavhidhi wainga ari muzondi mukuru. Asi Dhavhidhi wainga asikapasi ndaa Djehovha nge zviro zvese zvaitika naye, iyena aazi kugurunguta nge kukonerhwa cekurhya uye nge kurarama mubako. Zvingaita kuti paainga ari mubako irona ndipona paakatara tsamba ye gore rino: “Ese anopsvaka Djehovha aana cakanaka caacashoterhwa.”—Pis. 34:10.
4. Mibvunzo dzipi dzaticadaira mu fundo ino, uye ngei idzona dzecikosha?
4 Aseenzi a Djehovha akawanda nyamasi uno aana zvokurhya zvakawanda kutobatanidzawo ne zviro zvimweni zvinodikanwa. * Uye nhenda ino irikutoita kuti upenyu ubambirire kushupha. “Dambudziko guru” zvariri kukhwedera, zviro zvicabambirira kushupha. (Mt. 24:21) Tecirangarira izvi, ngatione mhinduro dze mibvunzo mirongomuna mu fundo ino. Dhavhidhi aazi “kushoterhwa ne cakanaka” nge ngwanza ripi? Ngei tecidikana kufundira kugutsikana ne zviro zvatinazvo? Ngei tecikwanisa kugonda kuti Djehovha acatiriritira? Uye tingagadzirira kudini ku zviro zvicaitika mune ramangwana?
“APANA CICANDISHOTERA”
5-6. Pisarema 23:1-6 inotibetsera kudini kuzwisisa tsamba ye gore rino?
5 Dhavhidhi wakati ‘apana cakanaka cicashotera’ ku aya anopsvaka Djehovha. Waida kureketei ne masoko aya? Dhavhidhi wakaseenzesa masoko akada kuezana paakatara Pisarema 23. (Erengai Pisarema 23:1-6.) Dhavhidhi wakatanga Pisarema iri ne masoko anoti: “Djehovha Muushi wangu. Apana cicandishotera.” Mumasure me izvi Dhavhidhi wakarumbwa ecibatikana pa zviro zvinokosha—makomborero aainga nawo pakunamata uye ngekutenda Djehovha hingana Muushi wake. Djehovha aitungamirira Dhavhidhi “mu makwanza e unatsi,” airumbwa ecimubetsera nguwa dzese. Kuna Dhavhidhi kuseenzera Djehovha kainga kakatodzana ne “kuushwa mu shango rakasvipirira” kunyazi tino matambudziko. Asi iyena waizviziya kuti kunyazi zvakadaro waizobatana ne matambudziko mu upenyu uye waizogara ne azondi. Asi pa nguwa dzimweni iyena waiora mwoyo hingana waihamba “mu mbuto inodima guru,” asi waiziya kuti “apana cakashata” caizoitika ngekuti Djehovha wainga ari Muushi wake.
6 Hino Dhavhidhi “aazi kushoterhwa ne ciro cakanaka” nge gwanza ripi? Dhavhidhi wainga ane zvese zvaaida, uye iyena waipfara ne zviro zvaaipaswa na Djehovha. Wainga asikadi zvakawanda kuti akwanise kupfara. Ciro caikosha kuna Dhavhidhi cainga ciri cekukomborerhwa uye kudziirirhwa na Djehovha.
7. Maererano na Ruka 21:20-24, aKristu airaramira ku Djudhiya akabatana ne migariro ipi inoshupha?
7 Masoko akatarhwa na Dhavhidhi anopangidza kukosha ke kugara ne maonero ari pakati ne pakati pa zviro zvokunyama. Azvizi kushata kugara ne zviro zvokunyama, asi cakashata nge cekusiya kuti zviro izvi zvinyanye kukosha mu upenyu wedu. Ici ndico cokwadi cakaonekwa ne Adjudha airaramira ku Djudhiya. (Erengai Ruka 21:20-24.) Djesu ainga aziisa kuti thaundi re Djerusarema “raizopambwa ne masurudado.” Zviro izvi pazvaizoitika, aona aidikana “kutizira ku makomo.” Kutizira ku makomo kaizoponesa upenyu wawo, asi awona aidikana kusiya zviro zvakawanda. Pa makore manganani adarika, Murindiri wakabhuya nge zve aKristu aya kuti: “Awona akasiya minda ne nyumba dzawo, aatozi kutobvisa zviro zvainga zviri mumba. Ecigonda rudziiriro ne rubetso ra Djehovha, awona akakanda pa mbuto yekutanga kunamata kawo Djehovha.”
8. Tingafundei ne zvakaitika ku aKristu airaramira ku Djudhiya?
8 Tingafundei ne zvakaitika ku aKristu airaramira ku Djudhiya? Murindiri wambobhuiwa sureno unoti: “Pangaoneka zvipangidzo zvemaonero atinoita zviro zvokurarama nazvo. Zvicaoneka kuti tinozvikoshesa here kana kuti tinokoshesa ruponeso re anhu ari ku dii ra Mwari? Zvezvirokwazvo kupukunyuka kedu kungabatanidza matambudziko ne miedzo. Tinodikana kugara takagadzirira kusiya zviro zvese zvinodikanwa hingana zvakaizwa ne hama dzedu dze mu zana remakore dzairaramira ku Djudhiya.” *
9. Tinogara no rugondo ripi patinoerenga masoko a Pauro pana Ahebheru 13:5, 6?
9 Munorangarira kuti zvakashuphira kudini aKristu aya kuti asiye zvese zvainga anazvo uye otangisazve upenyu wawo papsva? Awona aidikana kugonda Djehovha uye kugara nokutenda kakakura kuti ayena aizoariritira. Ciro cimweni cakabetsera aKristu aya, i zano rakapaswa Ahebheru no muphostori Pauro makore mashanu Aroma asati atenderedza Djerusarema iyena wakati: “Musadisise maningi mare mu upenyu wenyu, asi pfarai ne zviro zvamunazvo. Ngekuti ayena akati: ‘Ngekuti andizomusii, uye inini andizomupsveti.’ Kuti tigare takanyasa kushinga teciti: ‘Djehovha ndiye mubetseri wangu; andizothyi. Munhu ungandiitei?’” (Ahe. 13:5, 6) Zvezvirokwazvo zvakaita nyore ku aKristu akaterera zano ra pauro kuti adjaire uye agare ne upenyu usina zvakawanda kunza ke Djudha. Awona aikwanisa kugara ne rugondo rekuti Djehovha aizoapasa zvese zve kunyama zvaaida. Masoko a Pauro anotibetsera kugara no rugondo rimwero rekuti Djehovha aazosii kutipasa zvese zve kunyama zvatinoda.
“TINODIKANA KUPFARA NE ZVATINAZVO”
10. Cinyi “caiita” kuti Pauro apfare?
10 Muphostori Pauro wakapasa zano rimwero kuna Timoti, zano irona rinoseenzawo katiri nyamasi uno. Iyena wakati: “Hino kana tino zvekurhya ne zvekupfeka, ticapfara ne zviro izvi.” (1Ti. 6:8) Kodi izvi zviri kuda kureya kuti isusu atidikani kuseenzesa mare yedu pakutenga zvekurhya zvakanaka, kugara ne nyumba yakanaka, kana kuti kutenga macira pa nguwa dzimweni? Andizvopi zvaida kubhuya Pauro. Pauro waida kubhuya kuti isusu tinodikana kupfara ne zvatinazvo kunyazi zvakawanda kana zviri padoko. (Afi. 4:12) “Izvi” ndizvo zvaiita kuti Pauro apfare. Ciro catinaco cinonyanya kukosha mu upenyu wedu ndi ushamwari wedu na Djehovha, haiwa zviro zvekunyama zvatinazvo.—Abha. 3:17, 18.
Aisraeri ‘aazi kushoterhwa nge ciro cipi haco’ pa makore 40 paainga ari murenje. Kodi isusu tirikupfara no zviya zvatinazvo here? (Onai ndima 11) *
11. Tingafundei pa masoko a Mozesi akaringana ne kupfara ne zviya zvatinazvo?
11 Pamweni isusu tingaona kuti tinoda zviro zvakawanda asi ndizvona zvino rangarirhwa na Djehovha here. Rangarirai masoko akapaswa Aisraeri na Mozesi mumasure me kugara makore 40 murenje iyena wakati: “Ngekuti Djehovha Mwari wenyu akamukomborerai pa zvese zvamakaita. Anonyasa kuziya kuhamba kamakaita ne murenje rino guru. Kemakore 40 aya, Djehovha Mwari wenyu ainga nemwi uye apana camakashoterhwa.” (Dhe. 2:7) Djehovha akariritira Aisraeri nguwa dzese, pamakore 40 ese aya awona akagara no mana kuti arhye. Kusia izvona, macira amwewo aakabuda nawo ku Edjipitu ndiwo aakapfeka pamakore 40 ese aya. (Dhe. 8:3, 4) Zvingaita kuti Aisraeri amweni aiona izvona hingana padoko, asi Mozesi wakaedzurira kuti awona ainga ano zvese zvaaida. Isusu tinodikanawo kugara hinga Mozesi topfara no zvatinazvo. kana tikakoshesa zviya zvatinopaswa na Djehovha kunyazi zviri padoko uye tozviona hingana makomborero atinopaswa naye, tingakwanisa kupfadza Mwari wedu.
GARAI NO RUGONDO REKUTI DJEHOVHA ACAMURIRITIRAI
12. Cinyi cinopangidza kuti Dhavhidhi waigonda Djehovha, haiwa zviya zvaaikwanisa kuita?
12 Dhavhidhi waizviziya kuti Djehovha ndi Mwari akagondeka uye ayena anoriritira aya anomuda. Dhavhidhi paaibatana no migariro inoshupha, uye paakatara Pisarema 34 iyena wainga ano rugondo rekuti “ngirozi ya Djehovha” yainga “yakamutenderera.” (Pis. 34:7) Pamweni Dhavhidhi waiezanisa ngirozi ya Djehovha no musurudado wanga wakagara akangwarira kuitira muzondi paaizoguma. Dhavhidhi wainga ari musurudado wakashinga uye Djehovha ainga akamupikira kuti ndiyena waizogara mambo. Kunyazi zvakadaro, Dhavhidhi aazi kugonda mushobo wake wekukwanisa kukhandira buwe kana kuti kuseenzesa banga kuti anyise azondi. (1Sa. 16:13; 24:12) Iyena wainyasa kugonda Djehovha, uye waiziya kuti ngirozi ya Djehovha inorumbwa ‘yeciponesa aya anomuthya.’ Zviri pamhene kuti isusu atigariri kuti Djehovha aite cishamiso kuti atidziirire pa migariro inoshupha. Kunyazi zvakadaro, tino rugondo rekuti ese anoda Djehovha aazokuwadzwi nokusikaperi.
Pa kutambudzika kukuru, Gogi we Magogi acaedza kutirhwisa ku mizi dzedu. Asi tingaterama nge kuziya kuti Djesu ne ngirozi dzake arikuona zvirikuitika uye acatidziirira (Onai ndima 13)
13. Gogi we Magogi paacatirhwisa, ngei ticagara hingana kuti akuna munhu ucatidziirira? Uye ngei tisikazodikani kuthya? (Onai foto ye pakapa.)
13 Mbai-mbai pano, kugonda kedu Djehovha kucaedzwa. Panguwa icarhwiswa anhu a Mwari na Gogi we Magogi, pamweni ticazwa hingana kuti akuna ucatidziirira. Ticadikana kugara no rugondo rekuti Djehovha anokwanisa uye acatidziirira. Ku anhu, ticagara hingana mabira asina cinoadziirira, hingana kuti apana munhu ungatidziirira. (Eze. 38:10-12) Anhu acationa hingana ciro cisikashuphi kubata, ngekuti tinonga tisina pfuti uye atisati takambofunda kurhwisana. Ngekusama kutenda muna Djehovha, awona aazokwanisi kuona zviya zvatinokwanisa kuona no madziso edu e kutenda—mamirionji e ngirozi akatenderera anhu a Mwari uye akagadzirira kuti atidziirire. Rangaridzai mushobo waacazwa kana akaona kuti anyahondo e kudenga ari kudii redu!—Zva. 19:11, 14, 15.
GADZIRIRAI ZVINO KUITIRA RAMANGWANA
14. Cinyi catinodikana kuita zvino kuti tigadzirire pane zvicauya mune ramangwana?
14 Tingaitei kuti tigadzirire zvino kuitira zvicauya mune ramangwana? Cekutanga, atidikani kunyanya kukoshesa zviro zvekunyama ngekuti zuwa rimweni ticazodikana kuzvisiya. Tinodikanawo kupfara no zviya zvatinazvo uye no ciya cinonyanya kukosha, ushamwari wedu na Djehovha. Patinonyasa kuziya Mwari wedu, ticanyasa kugondawo kuti Gogi we Magogi paacatirhwisa, Djehovha acatidziirira.
15. Ngei Dhavhidhi waizviziya kuti waikwanisa kugonda na Djehovha?
15 Ngationezve ciro cimweni cakabetsera Dhavhidhi paaibatana no matambudziko, uye cingatibetserawo. Dhavhidhi akati: “Rairai henyu muone kuti Djehovha akanaka; Anopfara munhu anotizira kaari.” (Pis. 34:8) Masoko aya anopangidza kuti Dhavhidhi waizviziya kuti iyena waikwanisa kugonda no rubetso ra Djehovha. Iyena waigonda na Djehovha nguwa dzese, ndiyo ndaa Djehovha aazi kumbomusiya. Dhavhidhi paainga aciri djaha, wakarhwisana no muFiristeu wakakurisisa Goriati, iyena wakati: “Nyamasi kamare Djehovha acakukanda mu nyara yangu.” (1Sa. 17:46) Pedzepo, mambo Sauro wakaedza kakawanda kuuraya Dhavhidhi. Asi “Djehovha ainga ari” na Dhavhidhi. (1Sa. 18:12) Dhavhidhi waizviziya kuti Djehovha aizorumbwa ari kudii rake uye kuti ayena aizomubetsera pakurhwisana no matambudziko.
16. Migariro ipi ye zviro yatingakwanisa kuona unaki wa Djehovha?
16 Patinonyasa kugonda Djehovha, ticanyasa kugarawo no cokwadi cekuti ayena acatibetsera mune ramangwana. Ngo muezaniso, tinodikana kugara nokutenda uye togonda Djehovha patinoenda koocedza na patrau wedu kuti timukumbire mazuwa ekuenda ku magungano. Uye tinodikanawo kugara nokutenda patinocedza na patrau wedu tecimukumbira kuti agadzirise nguwa yedu ye basa kuti tikwanise kupinda misangano ne kubuda mu basa rekuparidzira. Asi rangaridzai kana patrao wedu akasama kutenda cikumbiro cedu uye otibvisa basa. Tinozotenda here muna Djehovha tecigonda kuti ayena aazombotisii uye kuti acatipasa zviro zvese zvatinoda? (Ahe. 13:5) Anhu akawanda ari mu basa re nguwa yakadzara, anobhuya nge zve maeshiperiesiya anopangidza kuti Djehovha akaariritira pa nguwa yaainyanya kuda. Djehovha akagondeka
17. Tsamba ya 2022 ngaipi, uye ngei pakasanangurhwa tsamba iyona?
17 Na Djehovha ku dii redu atidikani kuthya zviro zvicaitika mune ramangwana. Kana tikarumbwa tecikanda Djehovha pa mbuto yekutanga mu upenyu wedu, ayena aazombotisii. Kuti atibetsere kuedzurira kukosha kakunoita kugadzirira zvino kuitira matambudziko aticazosongana nawo uye kuti tigonde Djehovha, Dare Rinotungamirira rakasanangura tsamba ya Pisarema 34:10 kuti igare tsamba ye gore ra 2022: “Ese anopsvaka Djehovha aana cakanaka caacashoterhwa.”
NGOMA 38 Djehovha Acamupasai Simba
^ par. 5 Tsamba ye gore rino ra 2022 yakawakirhwa pana Pisarema 34:10: “Ese anopsvaka Djehovha aana cakanaka caacashoterhwa.” Aseenzi akawanda a Djehovha nyamasi uno, aana zvakawanda zvekunyama, uye ano upenyu usina zvakawanda. Hino ngei tingakwanisa kubhuya kuti “aana cakanaka cicaacashotera?” Ngei kuzwisisa zvinorehwa ne masoko aya zvicatibetsera kugadzirira zvicauya pane ramangwana?
^ par. 4 Onai “Mibvunzo Inobva ku Aerengi” iri mu Murindiri wa 15 ya Setembro wa 2014, mu ciShona.
^ par. 8 Onai Murindiri wa 1 ya Maiyo ya 1999, paji. 19 mu ciShona.
^ par. 54 KUPANGANIDZWA KE MUFANIKISO: Kunyazi ecitiza Mambo Sauro uye ecifindara mu bako, Dhavhidhi wairumbwa ecitenda zviya zvaaipaswa na Djehovha.
^ par. 56 KUPANGANIDZWA KE MUFANIKISO: Mu masure mekuti Aisraeri abuda mu Edjipitu, Djehovha akaapasa mana kuti arhye uye akaita kuti macira awo asatsakare.
