MUSORO WE KUFUNDA 4
Ngei Tecipinda Cirangaridzo
“Rumbwai meciita izvi mecindirangarira.”—RU. 22:19.
NGOMA 20 Makatipasa Mwana wenyu we pa Mwoyo
ZVATICAFUNDA *
1-2. (a) Izuwa ripi ramunoyanya kurangarira nge zve munhu wamunoda wakafa? (b) Pa usiku asati afa, Djesu akareketa kuti afundi ake aidikana kuite?
KANA makafirhwa ne munhu wamunoda pasinei nokuti padarika nguwa yakareba kudini, imwimwi munorumbwa mecirangarira munhuwo. Asi imwimwi munonyanya kumurangarira pa zuwa raakafa.
2 Pa gore rimwe na rimwe mamirionji e anhu mu nyika yese anoungana pamwepo kuti aedzurire zuwa rakafa Djesu. (1Pe. 1:8) Isusu tinoedzurira kariro yatinayo nge zviya zvakaizwa na Djesu. Ayena akapasa upenyu wake nge ndaa yedu kuti atisudzunure pa rufu uye pa citema. (Mt. 20:28) Uye Djesu anoda kuti ateeri ake aedzurire rufu rake. Pa usiku asati afa, Djesu akazvibudisa pamhene paakareketa eciti: “Rumbwai meciita izvi mecindirangarira.”—Ru. 22:19.
3. Ticaonei mu fundo ino?
3 Pa mamirionji e anhu anopinda Cirangaridzo makore ese ashomanani awo ano kariro yekurarama kudenga. Asi akawanda awo ano kariro yekurarama pasi pano kamare. Mu fundo ino, ticaona zvikonzero zvatinazvo zvinotiitisa kuti tipinde Cirangaridzo pasinei ne kariro yatinayo. Ticaonawo kuti ngei kupinda Cirangaridzo zvakanaka maningi katiri. Hino ngatitange ngekuona kuti ngei akadzodzwa ecidikana kuoneka aripo pa Cirangaridzo.
NGEI AKADZODWA ECIPIDA CIRANGARIDZO
4. Ngei akadzodzwa ecirhya pau ne kumwa vhinyu pa Cirangaridzo?
4 Akadzodzwa anopinda Cirangaridzo makore ese uye awona anorhya pau ne kumwa vhinyu. Ngei awona eciita izvona? Kuti tinyase kuzvizwisisa tinodikana kuziya zvakaitika mu usiku wekupedzesera we upenyu wa Djesu pasi pano. Djesu ne afundi ake akaita paskwa pedzepo Djesu akatangisa kurarira ka Tenzi cataakudainza nyamasi uno kuti Cirangaridzo ce rufu ra Kristu. Pa ciitiko icona Djesu akahambisa pau ne vhinyu ku afundi ake akagondeka 11 uye akaabvunza kuti arhye pau ne kumwa vhinyu. Kupinda izvona, Djesu akareketa nawo nge zve zvitenderano zviiri—citenderano cipsva uye ne citenderano ce Umambo. * (Ru. 22:19, 20, 28-30) Nge ndaa ye zvitenderano izvona, aapostori uye ne cikwata cidoko ce ateeri a Djesu kana kuti akadzodzwa anokwanisa kugara madzimambo uye ne apristi kudenga. (Zva. 5:10; 14:1) Ashomanani asara akadzodzwa, * ndiwona basi anorhya pau nekumwa vhinyu pa Cirangaridzo, ngekuti awona anobatanidzwa pa zvitenderano zviiri izvi.
5. Akadzodzwa anokariro ipi, uye anodikana kuitei kuti aigumire?
5 Pano cikonzero cimwenizve cinoita kuti akadzodzwa akoshese maningi Cirangaridzo. Pa Cirangaridzo akadzodzwa anonyasa kurangarira nge zve kariro yawo. Djehovha akaapasa kariro inoshamisa maningi—awona acagara ne upenyu usikafi kudenga eciseenza pamwepo na Djesu uye ne akadzodzwa amweni, uyezve awona acagara ne cikomborero cakakura cekugara pamberi pa Djehovha Mwari kamare! (1Ako. 15:51-53; 1Ju. 3:2) Akadzodzwa anoziya kuti kana ecida kugumira kariro yawo anodikana kurumbwa akagondeka kuna Djehovha dakara pakufa kawo pasi pano. (2Ti. 4:7, 8) Akadzodzwa anopfara maningi nge kunyasa kurangarira kariro yaanayo. (Tit. 2:13) Asi zvakadini ne “mabira amweni?” (Ju. 10:16) Ngei awona ecipindawo Cirangaridzo?
NGEI MABIRA AMWENI ECIPINDA CIRANGARIDZO
6. Ngei mabira amweni ecipinda Cirangaridzo makore ese?
6 Mabira amweni anopindawo Cirangaridzo, asi awona aarhyi pau nekumwa vhinyu, kunyazi zvakadaro awona anopfara ngekucipinda. Mabira amweni anokariro yekurarama pasi pano akatanga kupikwa kuti apinde Cirangaridzo mu gore ra 1938. Murindiri wa 1 ya Marso wa 1938, wakati: “Zvinokosha maningi kuti [mabira amweni] aoneke aripo pa musangano uu eciona zvinonga zveciitika . . . Ii inodikana kugara nguwa ye mupfaro kaari.” Mabira amweni anopfara maningi ngekupinda Cirangaridzo, kuitawo hingana munhu unopfara maningi paanopikwa ku mucato.
7. Ngei mabira amweni eciona kuti zvinokosha kuzwa mharidzo ye Cirangaridzo?
7 Mabira amweni anopfara maningi nge kunyasa kurangarira nge zve kariro yawo. Awona anoda maningi kuzwa mharidzo ye pa Cirangaridzo. Mharidzo iyona inoreketa nge zve zviro zvicaizirhwa anhu ndi Djesu pamwepo ne akadzodzwa anokwana 144 000 mukati Mekutonga ka Kristu ke Makore 1000. Djesu ecibetserhwa ne akadzodzwa acacinja nyika kuti igare paraizo uye acaita kuti anhu agare akakwana. Mamirionji e anhu anopinda Cirangaridzo anopfadzwa maningi ngekurangarira kuti ramangwana rinonga rakadini pasi pano pacadzadzika uphorofita we Bhaibheri uri pana Isaya 35:5, 6; 65:21-23; na Zvakapangidzwa 21:3, 4. Ciro cingakwanisa kutibetsera kuti tibambise kariro yedu yeramangwana uye kuti tisasiye kuseenzera Djehovha nge cekurangarira kuti upenyu unonga wakadini mu nyika ipsva patinonga tiripamwepo ne anyaukama edu uye nemadzishamwari.—Mt. 24:13; Aga. 6:9.
8. Cikonzero cipi cimwenizve cinoita kuti mabira amweni apinde Cirangaridzo?
8 Cikonzero cimwenizve cinoita kuti mabira amweni apinde Cirangaridzo ngecekuti awona anoda kupangidza rudo uye rubetso rawo ku akadzodzwa. Bhaibheri rainga rakabhuya kare kuti akadzodzwa ne mabira amweni aizoseenza pamwepo. Ngationgorore uphorofita inokwana mitatu yakabhuya izvona.
9. Uphorofita uri pana Zakariya 8:23 unopangidza kudini nge zve mazwiro e mabira amweni ku akadzodzwa?
9 Erengai Zakariya 8:23. Uphorofita uu unopangidza pamhene nge zve mazwire e mabira amweni ku hama ne hanzvadzi dzawo dzakadzodzwa. Masoko okuti “muDjudha” uye “imwimwi” arikuda kureya cikwata cimweco—akadzodzwa akasara. (Aro. 2:28, 29) “Anarume gumi e mireketero yese ye madzindza” anoimirira mabira amweni. Awona “anonyasa kubata”—kana kuti anobatana pamwepo ne akadzodzwa akagondeka ecinamata Djehovha. Ndiyo ndaa awona anopinda Cirangaridzo ecibetsera akadzodzwa ne mwoyo wese.
10. Djehovha arikudzadzisa kudini uphorofita uri pana Ezekiyeri 37:15-19, 24, 25?
10 Erengai Ezekiyeri 37:15-19, 24, 25. Djehovha arikudzadzisa uphorofita uu, eciita kuti akadzodzwa ne mabira amweni aseenze pamwepo uye agare akabatana. Uphorofita iwona unoreketa nge zve zvimupini zviiri. Aya anokariro yekuzorarama kudenga akaita hingana cimupini “ca Djudha” (dzindza rekuti madzimambo aisanangurhwa na Djehovha), uye aya anokariro yekuzorarama pasi pano akaita hingana cimupini “ca Efraimu.” * Djehovha aizobatanidza zvikwata zviiri izvi kuti zvigare “cimupini cimwe basi.” Izvi zvirikuda kureya kuti zvikwata zviiri izvi zvinoseenza pamwepo zvecizwira Mambo wawo Djesu Kristu. Tinokwanisa kuzviona akadzodzwa pamwepo ne mabira amweni paanoungana kuti apinde Cirangaridzo, haiwa hingana zvikwata zviiri zvakasiyana, asi hingana “mabira” ari pasi pe “muushi umwe.”—Ju. 10:16.
11. “Mabira” anorekethwa pana Mateu 25:31-36, 40 angabetsera hama dza Kristu nge mushobo upi?
11 Erengai Mateu 25:31-36, 40. “Mabira” anorekethwa mu muezaniso uu ndi anatsi arikurarama pa nguwa ye mugumo uye anokariro yekuzorarama pasi pano—Djesu akaadainzawo kuti mabira amweni. Mabira amweni aya anoubaba wekubetsera aKristu akadzodzwa aciri pasi pano. Awona anoita izvona ngekuita basa rakakura rekuparidzira uye rokuita kuti anhu ese agare afundi.—Mt. 24:14; 28:19, 20.
12-13. Mabira amweni angabetsera hama dza Kristu nge mishobo ipizve?
12 Makore ese sumana yeCirangaridzo isati yaguma, panoitika ciro cinokosha maningi: Mabira amweni anobetsera aKristu akadzodzwa pa gwitikwiti re basa rekuparidzira rinoizwa mu nyika yese. Cinangwa ce gwitikwiti iri ngecekupika anhu anopfarira kuti apinde Cirangaridzo. (Onai bhokisi rakazwi “ Murikugadzirira kuti Mupinde Cirangaridzo Here?”) Mabira amweni anobetsera pakuronga Cirangaridzo mu ungano dzawo, kunyazi pasina wakadzodzwa mu ungano yawo. Kaari cikomborero cakakura maningi kubetsera hama dza Kristu nge mushobo iwona. Mabira amweni anoziya kuti kuna Djesu rubetso rese ratinoitira akadzodzwa rinoita hingana kuti tirikuitira ayena kamare.—Mt. 25:37-40.
13 Ngazvipi zvikonzero zvimweni zvatinazvo zvinoita kuti tese hedu tipinde Cirangaridzo pasinei ne kariro yedu?
NGEI TESE TECIPINDA CIRANGARIDZO
14. Mushobo upi watakapangidzirhwa rudo na Djehovha uye na Djesu?
14Kupinda Cirangaridzo ndi mushobo wekutenda rudo ratakapangidzirhwa na Djehovha uye na Djesu. Djehovha akapangidza kuti anotida nge mishobo yakasiyana-siyana, asi umwe wawo unokosha maningi. Nge rudo, Djehovha akatuma Mwana wake kuti ashuphike uye atifire. (Ju. 3:16) Isusu tinotendawo Djesu. Apana munhu wakabambidzira Djesu kuti ape upenyu wake, asi ayena akazviita ngekuti anotida. (Ju. 15:13) Isusu atizobokwanisi kutsiya rudo ratakapangidzirhwa na Djehovha uye na Djesu. Asi tingakwanisa kupangidza kuti tinotenda ngemararamiro edu e zuwa ne zuwa. (Ako. 3:15) Ndiyo ndaa tecipinda Cirangaridzo. Patinopinda Cirangaridzo tinokwanisa kunyasa kurangarira rudo raakapangidza katiri uye tinonga tecipangidzawo rudo redu kuna Djehovha na Djesu
15. Ngei rusudzunuro recikosha ku akadzodzwa uye ku mabira amweni?
15Tinokoshesa maningi rusudzunuro. (Mt. 20:28) Ku akadzodzwa rusudzunuro rinokosha maningi ngekuti irona rinoita kuti kariro yawo yekurarama kudenga idzadzike. Nge kutenda mucibairo ca Djesu akadzodzwa angakwanisa kuzwi anatsi na Djehovha uyewo angakwanisa kuzwi ana ake. (Aro. 5:1; 8:15-17, 23) Rusudzunuro rinokoshawo maningi ku mabira amweni. Nge ndaa yekutenda mu cibairo ca Djesu, awona angakwanisa kugara akacena pamberi pa Djehovha, nge cikomborero cekumuseenzera uye kugara ne kariro “yekuzopona pakutambudzika kukuru.” (Zva. 7:13-15) Hino kunyazi kariro yenyu iri yekurarama kudenga kana kuti pasi pano, imwimwi mungakwanisa kupangidza kuti rusudzunuro rinokosha maningi kamuri nge kupinda Cirangaridzo makore ese.
16. Ngacipi cikonzero cimwenizve cinoita kuti tipinde Cirangaridzo?
16 Cikonzero cimwenizve cinoita kuti tipinde Cirangaridzo ngecekuti tinoda kuzwira Djesu. Tese isusu tinoda kuzwira mutemo watakapaswa na Djesu pasinei ne kariro yatinayo. Pa usiku asati afa Djesu akati: “Rumbwai meciita izvi mecindirangarira.”—1Ako. 11:23, 24.
NGEI ZVAKANAKA KUPINDA CIRANGARIDZO
17. Cirangaridzo cinotibetsera kuti tigare padhuze na Djehovha nge mushobo upi?
17Tinogara padhuze na Djehovha. (Tg. 4:8) Hingana zvataona, Cirangaridzo ndi ciitiko cinotibetsera kuedzurira kariro yatakapaswa na Djehovha, uye cinotibetserawo kuti tirangarire nge zve rudo raakatipangidzira. (Dje. 29:11; 1Ju. 4:8-10) Patinopeta masimba ari ese, rudo redu kuna Djehovha rinorumbwa rakabamba uye tinogara padhuze naye.—Aro. 8:38, 39.
18. Kurangarira muezaniso wa Djesu kunotibetsa kuti tishinge kuitei?
18Tinogara takashinga kuteedzera muezaniso wa Djesu. (1Pe. 2:21) Kuti tigadzirire mwoyo wedu zuwa re Cirangaridzo risati raguma, tinoerenga nge zve mazuwa ekupedzesera e upenyu wa Djesu pasi pano uye nge zve rumuko rake. Pedzepo, mharidzo inoizwa pa usiku we Cirangaridzo inotibetsera kuedzurira kuti Djesu akapangidza kudini rudo katiri. (Aef. 5:2; 1Ju. 3:16) Patinoerenga uye tonyasa kurangarira nge zve upenyu wa Djesu, tinogara takashinga kuti “tihambe nge mushobo waakahamba.”—1Ju. 2:6.
19. Ushamwari wedu na Djehovha ucarumbwa wakabamba kana tikaitei?
19Tinoshinga kurumbwa tiri shamwari dza Djehovha. (Dju. 20, 21) Ushamwari wedu na Djehovha ucarumbwa wakabamba kana tikamuzwira, kana tikapeta masimba ari ese kuti ticenese zina rake uye kana tikapfadza mwoyo wake. (Zvie. 27:11; Mt. 6:9; 1Ju. 5:3) Kupinda Cirangaridzo kunotibetsera kuti tirumbwe takashinga kurarama nge mushobo unopfadza Djehovha, zvoita hingana tirikubhuya kuti, ‘Inini ndinoda kurumbwa ndecimuseenzera nokusikaperi!’
20. Zvikonzero zvipi zvakanaka zvatinazvo kuti tipinde Cirangaridzo?
20 Pasinei nekuti kariro yedu ngeyekurarama kudenga here kana kuti pasi pano, tese isusu tino zvikonzero zvakanaka kuti tipinde Cirangaridzo. Irona i zuwa rakanaka rekuti tiedzurire rufu re munhu watinoda maningi, Djesu Kristu. Kupinda izvona, tinonga teciedzurirawo rudo ratakapangidzirhwa na Djehovha paakatuma Mwana wake kuti atisudzunure. Ici ndico cipangidzo ce rudo rakakura kupinda cipi haco caizoizwa ne munhu. Gore rino Cirangaridzo cicaizwa pa usiku we Cishanu, 15 ya Abriri ya 2022. Isusu tinoda maningi Djehovha na Djesu, ndiyo ndaa apana ciro cinokosha kudarika kupinda Cirangaridzo ce rufu ra Kristu.
NGOMA 16 Kudzai Djehovha nge Mwana Wake, Mudzodziwa
^ par. 5 Cikomborero cakakura katiri kupinda Cirangaridzo makore ese, pasinei nekuti kariro yedu nge yekurarama nokusikaperi kudenga here kana kuti pasi pano. Mu fundo ino, ticaona zvikonzero zvinorekethwa no Bhaibheri zvinotiitisa kuti tipinde Cirangaridzo uye kuti ngei zvakanaka katiri kuita izvona.
^ par. 4 Kana mecida masoko akadzara akaringana ne citenderano cipsva uye ce Umambo, onai fundo ino musoro unoti: “Muchava ‘Umambo hweVapristi’” mu Murindiri wa 15 ya Otubro ya 2014, mapaji. 15-17, mu ciShona.
^ par. 4 NYASAI KUZWISISA: Soko rekuti anganani akadzodzwa ririkuda kureya aKristu akadzodzwa aciri kurarama pasi pano.
^ par. 10 Kana mecida masoko akadzara nge zve zvimupini zvinorekethwa mu uphorofiti uri pana Ezekiyeri kapituro 37, onai bhuku rinozwi, Jehovha Anodzorera Kunamata Kwakachena!, mapaji. 130-135, mandi. 3-17, mu ciShona.
