1-3. Migariro ipi ingaita kuti ticeme?

NDIRINI wemakapedzesera kucema? Nguwa dzimweni, tinocema nge ndaa yekupfara. Asi kajinji kakhona, tinocema nge daa yekutsukwara. Ngo muezaniso, zvinoshupha kusama kucema munhu watinoda paanofa. Lorilei *, hanzvadzi ye ku Estados Unidos yakatara kuti: “Nguwa dzimweni ndinozwa ndakatsukwara nge kufa kakaita mwana wangu we musikana, zvekutoti zvaita hingana pasina ciro cingandinyaradza. Panguwa dzakadai, inini ndaizwa mwoyo wangu wecirhwadza zvekuti ndainga ndisikazwisisi kuti ngei ndairumbwa ndecirarama.”

² Isusu tingakwanisa kucema nge zvikonzero zvimweni. Hiromi, mupionera we kuJapão, wakati: “Nguwa dzimweni ndinozwa ndakaora mwoyo nge ndaa ye anhu asikadi kufunda zvakaringana ne Bheibheri. Pamweni paya ndinonamata kuna Djehovha ndecicema, kuti andibetsere kugumira munhu anoda kufunda cokwadi.”

³ Makambozwa hingana Hiromi kana kuti Lorilei here? Akawanda edu takambozwawo kudaro. (1Pe. 5:9) Isusu tinoda ‘kuseenzera Djehovha tecipfara,’ asi nguwa dzimweni tinopedzesera taakuseenzera Djehovha ne misodzi pamatama, nge ndaa yekufirhwa nge munhu, nge kuora mwoyo, kana kuti nge migariro imweni inoedza kugondeka kedu kuna Mwari. (Pis. 6:6; 100:2) Cinyi cingatibetsera kuti tikwanisane ne migariro yese ii?

4. Ticaonei mu fundo ino?

⁴ Muezaniso wa Djesu ungatibetsera. Djesu akasongana no migariro ye zviro inoshupha yakaita kuti ‘ayena aceme.’ (Ju. 11:35; Ru. 19:41; 22:44; Ahe. 5:7) Ngatimbofunde nge zve migariro minganani yakaita kuti Djesu aceme, uye toona kuti ngazvipi zvatingafunda nge zva Djehovha uye Djesu nge zve zviro  izvi. Ticaonawo kuti cinyi cingatibetsera kuti tikwanisane no migariro inoita kuti ticeme.

5. Pana Juau 11:32-36, tingafundei nge zva Djesu?

⁵ Mugore ra 32 K.A., Djesu akafirhwa nge shamwari yake. Razaro wakarhwara uye wakafa. (Ju. 11:3, 14) Razaro wainga ano hanzvadzi mbiri, Marta na Maria, uye Djesu waida maningi mhuri ii. Marta na Maria akatsukwara maningi nge kufirhwa ne hama yawo. Mumasure mekufa ka Razaro, Djesu akaita rhwendo kuenda ku Bhetaniya, mbuto yairaramira Marta na Maria. Marta paakaziya kuti Djesu ainga aguma apona, iyena wakagogoma ecienda kaari. Munokwanisa kurangarira izwi rekutsukwara ra Marta paakati: “Tenzi, kudai mainga muri pano, hama yangu dai isikazi kufa.” (Ju. 11:21) Mu masure mekuti Djesu aona Maria uye no amweni ecicema, ayenawo “akatanga kucema.”—Erengai Juau 11:32-36.

6. Ngei Djesu akacema?

⁶ Ngei Djesu akacema pa nguwa iyona? Bhuku rinozvi, Estudo Perspicaz das Escrituras rinopasa mhinduro inoti: “Rufu ra shamwari yake Razaro uye ne kurhwadziwa kakaita hanzwadzi dza Razaro ndizvona zvakaitisa kuti Djesu ‘arhwadziwe uye abudise misodzi’” * Zvingaita kuti Djesu akarangarira mushobo wakanetseka ndiwo shamwari yake Razaro nge ndaa ye nhenda iyona, uye mushobo waakazwa paakazviona kuti wainga ecifa. Zvezvirokwazvo, kuona Maria uye na Marta akatsukwara nge ndaa ye rufu re hama yawo, zvakaita kuti Djesu aceme. Kana imwimwi makafirhwa ne Shamwari, kana munhu umweni we mu mhuri menyu, zvezvirokwazvo munokwanisa kuzwisisa kuti ngei Djesu akazwa kudaro. Ngationei zviro zvitatu zvatingafunda pa nyaya ii.

7. Kucema kakaita Djesu nge ndaa ye shamwari dzake, kunotifundisei nge zva Djehovha?

⁷Djehovha anozwisisa mazwiro enyu. Bhaibheri rinoti Djesu “ndiye mufanikiso” wa Baba ake. (Ahe. 1:3) Hino ngekucema kakaita  Djesu, tingakwanisa kugara nerugondo rekuti baba ake aizwawo kutsukwara. (Ju. 14:9) kana imwimwi muri kusongana no marhwadzo ekufirhwa nge munhu, ziyai kuti Djehovha aagumi basi pakuzwisisa mazwiro enyu, asi anotsukwarawo pamwepo nemwi. Uye ayena ari kuda maningi kumucengeta, uye kumuzorodza pamarhwadzo ese amuri kuzwa.—Pis. 34:18; 147:3.

8. Ngei tingagara no rugondo rekuti Djesu acahwirinzazve ku upenyu anhu aya akafa?

⁸Djesu anoda maningi kumutsa emakafirhwa nawo. Djesu asati acema, ayena akagondesa Marta kuti Razaro: “Hama yako icamuka.” Uye Marta waiziya kuti Djesu wainga ecireketa cokwadi. (Ju. 11:23-27) Marta wainga ari museenzi wakagondeka wa Djehovha, nge ndaa yazvo iyena waiziya kuti aphorofita Eriya na Erizeu ainga akamutsa anhu mu nguya yakapera. (1Mad. 17:17-24; 2Mad. 4:32-37) Uye iyena, wainga akazwawo nge zve rumuko rainga raizwa ndi Djesu Kristu. (Ru. 7:11-15; 8:41, 42, 49-56) Imwimwi mungakwanisawo kugara no rugondo rimwero rainga rina Marta. Imwimwi mucakwanisa kuonazwe shamwari ne anyaukama enyu akafa. Kucema kakaita Djesu paainyaradza shamwari dzake, cipangidzo cekuti ayena anodazve maningi kumutsa anhu akafa!

9. Kuita hingana Djesu, tingabetsera kudini aya akafirhwa no mudoni wawo? Pasai muezaniso.

⁹Imwimwi mungabetsera munhu wakafirhwa. Djesu akacema na Marta uye na Maria, asi ayena akazwawo zviro zvaaida kubhuya uye ayena akareketa masoko anonyaradza. Isusu tingakwanisawo kuteedzera muezaniso wa Djesu. Dan, mukuru unoraramira ku Austrália, unoti: “Inini ndakada rubetso rakakura maningi mumasure mekufirhwa ne mukadzi wangu. Kazado dzakawanda dzakadzipira kuti dzindizwe panguya yandainga ndecida rubetso. Awona akandisiya kuti ndirekete zvese zvandainga ndecizwa, uye aazi kutsukwara pandainga ndecitanga kucema. Kusiyana nazvo, awona akandibetsera panguwa yandainga ndecida. Pamazuwa andainga ndisikakwanisi kuita ciro, awona aisuka karu yangu, ainditengera zviro zvandaida uye aitondibikira. Awona ainamata neni panguwa dzese. Awona akapangidza kuti ainga ari shamwari dzezvirokwazvo, uye kuti ainga ari hama dzakagadzirira kubetsa ‘mu nguwa ye matambudziko.’”—Zvie. 17:17.

10. Mu zuwa reci 9 ra Nisani, cinyi cakaitika Djesu paakaguma mu Djerusarema?

¹⁰ Mu zuwa reci 9 ra Nisani mu gore ra 33 K.A., Djesu akaenda ku Djerusarema. Ayena paaipinda mu thaundi, anhu ajinji akabatana kuti amutambire. Awona aikanda macira awo pasi mu gwanza rainga ecizodarika. Anhu aya, akabata Djesu hingana kuti ndi Mambo wawo. Zvezvirokwazvo rainga riri zuwa rinoshamisa. (Erengai Ruka 19:36-40.) Ndiyo ndaa, ateeri a Djesu akatsukwara paakaona muitiro wa Djesu paaipinda muthaundi. “[Djesu] paakaguma padhuze ne thaundi, akarinangira uye akacema.” Nemisodzi mumadziso, Djesu akareketa zvaizoitika ne anhu ku Djerusarema.—Ru. 19:41-44.

11. Ngei Djesu akacema nge anhu e mu Djerusarema?

¹¹ Djesu akatsukwara ngekuti ayena aiziya kuti, kunyazi anhu akamutambira zvakanaka, Adjudha ajinji ainga asikazopurutani masoko aaizoparidzira. Nge ndaa ye miitiro yawo, Djerusarema raizoparadzwa, uye Adjudha aizopukunyuka aizotorhwa kuizwa nhapwa. Masoko a Djesu akadzadzika. (Ru. 21:20-24) Zvinotsukwarisa kuti, anhu ajinji akaramba masoko ake. Anhu emundima yamunoparidzira, anotendera zvakanaka here masoko amunoparidzira?  Kana anhu ajinji asikamupurutani, mungafundei kubva pa muezaniso wa Djesu? Ngatione zviro zvitatu zvatingafunda.

12. Kucema kakaita Djesu nge ndaa ye anhu e mu Djerusarema, zvinotifundisei nge zva Djehovha?

¹²Djehovha anoda anhu. Misodzi ya Djesu, inotiedzurira kuti Djehovha anoda anhu. Bhaibheri rinoti: “Ngekuti ayena apana waanoda kuti aparadzwe, asi anoda kuti anhu ese agume pakucinyuka.” (2Pe. 3:9) Isusu tingakwanisawo kupangidza kuti tinoda adoni edu, nge kupeta masimba kuti tibaye mwoyo yawo ne masoko akanaka.—Mt. 22:39. *

13-14. Djesu akapangidza kudini kuti ainga ano usisi no anhu, uye tingamuteedzerawo kudini?

¹³Djesu aipeta masimba kuti aparidzire. Djesu aida anhu, ndiyo ndaa aye aiparidzira pese paaiona mukana. (Ru. 19:47, 48) Ngei ayena aiita izvi? Ngekuti aizwira usisi anhu. Nguwa dzimweni, anhu aida rubetso uye kuzwa Djesu ainga akawanda zvekutoti ayena no afundi ake ainga asina nguwa kunyazi ‘yekutorhya’. (Mk. 3:20) Mwanarume umweni paaida kuzwa masoko ake—Djesu akamuparidzira ce usiku. (Ju. 3:1, 2) Izvirokwazvo kuti anhu akawanda aazi kupurutana Djesu kunyazi kutogara ateeri ake. Asi zvezvirokwazvo, anhu ese akaparidzirhwa. Isusu tinodawo kuti anhu ese aone mukana we kuzwa masoko akanaka. (Zvi. 10:42) Kuti tizvikwanise, tinodikana kuita cinjo mu basa redu re kuparidzira.

¹⁴Garai makagadzirira. Kana isusu teciparidzira pa nguwa imwe-imweyo, zvingashupha kuti tigumire anhu anoda kufundira cokwadi. Mupionera umweni unozwi Matilda wakati: “Inini no mwamuna wangu, tinoedza kuparidzira anhu pa nguwa dzakasiyana-siyana. Cemacibesi, isusu tinoparidzira mu ndima ye zvekutengeserana. Cemasikati, anhu ajinji paanonga ari mugwanza, isusu tinoseenzesa cingoro ce mabhuku. Uye cemadekoni, isusu tinokwanisa kugumira anhu pa nyumba dzawo.” Pane kuti tirumbwe teciparidzira mu nguwa yakatinakira, tinodikana kucinja kuti tikwanise kuparidzira mu nguwa yatinogumira anhu akawanda. Kana tikadaro, tingagara no rugondo rekuti Djehovha acapfara maningi.

15. Maererano na Ruka 22:39-44, Cinyi cakaitika mu usiku wekupedzesera Djesu aciri pa nyika pano?

¹⁵ Mumapeto e usiku wa 14 ya Nisani wa 33 K.A., Djesu akaenda mu munda we Getsemani. Ari imona, ayena akafungura mwoyo wake kuna Djehovha. (Erengai Ruka 22:39-44.) Panguwa ii Djesu “ainamata ecideketera . . . ecicema uye ecibvisa misodzi.” (Ahe. 5:7) Djesu akanamata ecikumbirei mu usiku uu asati afa? Ayena akanamata ecikumbira simba kuti arumbwe akagondeka dakara kumugumo uye kuita kuda kake. Djehovha akapurutana munamato wa Djesu uye akatuma ngirozi kuti imubambise.

16. Ngei Djesu ainetseka maningi paakaita minamato mu munda we Getsemani?

¹⁶ Mu munamato wakaizwa na Djesu mu munda we Getsemani, ayena akacema ngekuti aishuphika kuti anhu aizorangarira kuti ayena ainga asikareremedzi zina ra Mwari. Ayena aiziya kuti ainga ano ubaba wakakura we kurumbwa akagondeka, uye kutsigira ucangamire wa Djehovha. Kana imwimwi muri kusongana no mugarire unoshupha maningi uri kuedza kugondeka kenyu kuna Djehovha, mungaitei kuti mufundire ne misodzi dza Djesu? Onai zviro zvitatu zvingatibetsera.

17. Tingafundei nge zva Djehovha nge mushobo waakadaira minamato ya Djesu?

¹⁷Djehovha anopurutana minamato. Djehovha akapurutana zvikumbiro zvakaizwa na Djesu. Ngei? Ngekuti zvinetso zvijinji zva Djesu zvainga zvekurumbwa akagondeka kuna Baba ake uye kudziirira zina Rake. Kana isusu tino zvinetso zvimwezvo, Djehovha acadaira minamato yedu yekukumbira rubetso.—Pis. 145:18, 19.

18. Djesu akaita hingana shamwari inotizwisisa nge gwanza ripi?

¹⁸Djesu anozwisisa mazwiro edu. Patinonga tecisongana no migarire inoshupha, zvakanaka maningi kucedza no shamwari inotizwisisa, kajinji iya yakasonganawo no zvinetso zvimwezvo zvatinazwo. Djesu akaita hingana shamwari iyona. Ayena anoziya kuti cinyi cinozwi kuzwa munhu akaremba uye kusongana no zvinetso. Ayena anozwisisa kusama kukwana kedu, uye acaita zviri zvese kuti atibetsere  “pa nguwa yakasisira.” (Ahe. 4:15, 16) Djesu akatendera rubetso re ngirozi paainga ari mu munda we Getsemani, isusu tinodikanawo kutendera rubetso ratinopaswa na Djehovha, eciseenzesa mabhuku, mavhidhiyo, mharidzo, shamwari yakakura pakunamata, kana akuru.

19. Cinyi cingatibetsera kuti tikwanisane ne migariro inotishuphira kurumbwa takagondeka kuna Mwari? Pasai muezaniso.

¹⁹Imwimwi mucatambira “runyararo ra Mwari.” Djehovha anotibambisa kudini? Patinonamata kuna Djehovha, ayena acatipasa simba ratinoda, uye ticazwa “runyararo ra Mwari rinodarika kuzwisisa kwese.” (Afi. 4:6, 7) Runyararo irona, ricateramisa mwoyo yedu uye ricatibetsera kukanda ndangariro dzedu pa mbuto padzo. Ndizvona zvakaitikawo kuna hanzvadzi inozwi Luz. Iyona inoti: “Inini ndinozwa ndiri ndega uye ndinonetseka maningi nge ndaa yazvo. Nguwa dzimweni, inini ndinotsukwara zvekutoti ndinoona kuti Djehovha aandidi. Asi pandinozwa kudaro, inini ndinoima uye pa nguwa imweyo ndinobvunza Djehovha zvandiri kuzwa. Munamato unondibetsera kuti ndidzibate pa mazwiro angu.” Masoko e hanzvadzi Luz, anotipangidza kuti munamato ungatipasa runyararo.

20. Misodzi dza Djesu dzinotifundisei?

²⁰ Kufunda nge zve misodzi dza Djesu, zvinotinyaradza maningi uye tafunda zviro zvakanaka mu fundo ino! Taona kuti tinodikana kubetsa aya anofirhwa no mudoni wawo, uye tinodikana kugonda kuti Djehovha na Djesu, acatibetsera paticasonganawo ne migarire yakadaro. Tafundawo kuti tinodikana kuparidzira anhu uye kugara no rudo ngokuti Djehovha na Djesu anotifundisa kuti tidaro. Kuziya kuti Djehovha na Djesu anozwisisa migarire yedu, kusama kukwana kedu, zvinotinyaradza uye zvicatibetsera kushingirira. Hino, ngatirumbwe teciseenzesa zvatafunda mu fundo ino, dakara zuwa rokuti Djehovha acadzadzisa zvipikirhwa zvese zvakanaka zvekuti, “acapukuta misodzi yese mu madziso [edu]”!—Zva. 21:4.