MUSORO WE KUFUNDA 2
NGOMA 132 Zvino Tiri Nyama Imwe
Amuna, Reremedzai Akadzi Enyu
“Imwimwi amuna, . . . abatei no rureremedzo.”—1 PED. 3:7.
CINANGWA
Kupangidza kuti amuna angareremedza kudini akadzi awo nge masoko awo uye zviito.
1. Ngacipi cinangwa cakaita kuti Djehovha asike mucato?
DJEHOVHA ndi “Mwari anopfara” uye anoda kuti isusu tipfarewo. (1 Ti. 1:11) Djehovha anotipasa zvipo zvakawanda zvinotibetsera kuti tipfare mu upenyu. (Tig. 1:17) Cimwe ce zvipo izvona ndi mucato. Mwanarume no mwanakadzi paanocata, awona anogondesana kudanana, kukoshesana uye kureremedzana. Kazado inorumbwa yecibambisa rudo rayo ku umwe na umwe wawo, iyona inozwa mupfaro we zvirokwazvo.—Zvie. 5:18.
2. Zvinyi zviri kuitika mu micato dzakawanda mazuwa ano?
2 Zvinotsukwarisa kuti makazado akawanda mazuwa ano, akanganwa zviya zvaakagondesa pa zuwa raakacata. Izvona zvinopangidza kuti ngei mucato dzakawanda dzisina mupfaro. Reratoriyo yakabva kubudiswa no Cikwata Cinoonerera nge zve Uthongo mu Nyika Yese, cinopangidza kuti anarume akawanda anokuwadza akadzi awo nge kuponda uye no masoko. Amuna amweni anobata zvakanaka akadzi awo pamberi pe anhu amweni, asi paanonga ari oga anoabata nge mushobo wakashata. Kusiya izvona, rudo runotonhora mu mucato dzakawanda mwamuna paanoona pornografiya.
3. Zvinyi zvingaita kuti amuna anganani abate akadzi awo ngo mushobo wakashata?
3 Ngei amuna amweni anobata zvakashata akadzi awo? Amweni pamweni anoita izvona ngekuti akarerhwa na baba ano bvinga, ngokudaro awona pamweni angarangarira kuti muitiro wawo wakashata we bvinga uri nani. Amweni anopfuridzirhwa no mugariro we mbuto yaanogara. Ngo muezaniso, ku tsika dzimweni anorangarira kuti “mwanarume we zvirokwazvo” unodikana kuseenzesa simba kuti apangidze kuti ndiani unotonga. Anarume amweni aazi kufundiswa kuonerera zvido zvawo, kutobatanidzawo shungu. Kusiya izvona, anarume akawanda anosakurira maonero akashata ngezve anakadzi uye ngezve bonde, ngekuti anoona kakawanda pornografiya. Uye pakutunhudzira, mareratoriyo amweni anopangidza kuti pa nguwa ye nhenda ye COVID-19 amuna akawanda akatanga kubata nge mushobo wakashata akadzi awo. Asi apana cikonzero cinoita kuti mwamuna agare no maitiro akashata.
4. Cinyi cinodikana kungwarirhwa no amuna e Cikristu uye ngei?
4 Mwamuna we Cikristu unodikana kungwarira kuti asagare no maonero akashata ngezve anakadzi. a Ngei? Cimwe ce cikonzero nge cekuti kakawanda kakhona marangariro edu anotitora kuti tiite ciito. Muphostori Pauro wakabhuya kuti, Akristu akadzodzwa e ku Roma ainga ‘asikadikani kuteedzera zviro zvinoizwa nge anhu e nyika.’ (Aro. 12:1, 2) Pauro paakatarira masoko aya ku Akristu e ku Roma ungano yainga yaapo ke makore. Kunyazi zvakadaro, masoko a Pauro anoita kuti tizwisise kuti anganani e ungano iya ainga aciri kupfuridzirhwa ne tsika dzawo, nge mushobo we kurangarira we nyika. Ndiyo ndaa, Pauro wakaapasa mazano kuti acinje mushobo wawo we kurangarira uye muitiro wawo. Uye mazano iwona anoseenza ku amuna e Cikristu mazuwa ano. Zvinotsukwarisa kuti amuna akawanda ari kupfuridzirhwa nge mushobo we kurangarira we nyika ino, uye zvinoaitisa kuti abate akadzi awo nge mushobo wakashata. b Asi Djehovha anoetsera kuti amuna abate nge mushobo upi akadzi awo? Mhinduro yakhona iri pa tsamba iri kutungamirira fundo ino.
5. Maererano na 1 Pedru 3:7, mwamuna unodikana kubata kudini mukadzi wake?
5 Erengai 1 Pedru 3:7. Djehovha anokohomedzesa kuti mwamuna areremedze mukadzi wake. Kureremedza i mushobo watinobata anhu aya atinokoshesa. Mwamuna unoreremedza mukadzi wake, anomubata no rudo uye no unaki. Mu fundo ino, ticaona kuti mwamuna angapangidza kudini kuti anoreremedza mukadzi wake. Asi ticatanga kuona kuti maitiro api anopangidza kutama kupangidzira rudo uye rureremedzo ku mukadzi.
MUSAITE CIRO CINOPSVERUSA MUKADZI WENYU
6. Djehovha anoona kudini mwamuna unoponda mukadzi wake? (Akorosi 3:19)
6 Mwamuna aadikani kuponda mukadzi wake. Djehovha anozonda munhu une bvinga. (Pis. 11:5) Uye Bhaibheri rinotonga nge mushobo wakananga amuna e kuti anobata akadzi awo nge mushobo wakashata. (Mara. 2:16; erengai Akorosi 3:19.) Maererano no zviri pana 1 Pedru 3:7, kana mwamuna akabata zvakashata mukadzi wake anokuwadza ushamwari wake na Mwari. Zvingaitawo kuti Djehovha angasama kuzwa minamato dzake.
7. Maererano no Aefeso 4:31, 32, masoko api e kutuka anodikana kungwarirhwa no amuna? (Onaiwo pakazwi: “Nyasai Kuzwisisa.”)
7 Mwamuna aadikani kutuka mukadzi wake. Amuna amweni anokhuwira akadzi awo uye anoreketa zviro zvinoarhwadzisa. Asi Djehovha anozonda “kunyangadzwa, shungu, kureketedzana, uye masoko okutuka.” c (Erengai Aefeso 4:31, 32.) Djehovha anozwa zvese. Iyena anokoshesa mushobo unoreketa mwamuna no mukadzi, kunyazi paanonga ari airi basi. Mwamuna wekuti unoreketa no hasha ku mukadzi wake unokuwadza haiwa mucato wake basi, asiwo ushamwari wake na Mwari.—Tig. 1:26.
8. Djehovha anoona kudini munhu anoona pornografiya, uye ngei?
8 Mwamuna aadikani kuona pornografiya. Kodi Djehovha anoona kudini pornografiya? Iyena anozonda. Mwamuna unoona mafoto asikazi kunaka, unokanda pa ngozi ushamwari wake na Djehovha uye aareremedzi mukadzi wake. d Mwamuna wakagondeka kuna Djehovha aazomboiti zviro zvisikazi kucena no mwanakadzi umweni, uye aazomborangariri zviro zvakadaro. Djesu akabhuya kuti: mwanarume wese anorubwa akaringira mwanakadzi ecimusirira, unonga watoita upombwe naye “mu mwoyo make.” e—Mat. 5:28, 29.
9. Ngei Djehovha anozonda mwamuna unobambidzira mukadzi wake kuita zviro zvaasikadi pa nguwa ye kuita zvepamaponde?
9 Mwamuna aadikani kubambidzira mukadzi wake kuita zviro zvaasikadi paanonga eciita zvepamabonde. Amuna amweni anobambidzira akadzi awo kuita zvepamabonde nge mushobo unopsverusa, kana kuti anoita kuti mukadzi wawo azwe asikazi kucena, kana kuti kuita zviro zvingakwanisa kukuwadza hana yake. Djehovha anozonda maiitiro awona e makaro uye asikapangidzi rudo. Iyena anoetsera kuti amuna ade akadzi awo uye areremedze mazwiro awo uye hana dzawo. (Aef. 5:28, 29) Asi kana mwamuna we Cikristu ecibata zvakashata mukadzi wake uye eciona pornografiya? Iyena angacinja kudini marangariro ake uye zviito zvake?
MWAMUNA UNGATANGA KUDINI KUREREMEDZA MUKADZI WAKE?
10. Muezaniso wa Djesu ungabetsera kudini amuna?
10 Cinyi cingabetsera mwamuna kuti asiye kubata mukadzi wake nge mushobo unopsverusa uye wakashata? Mushobo wakanaka nge we kupeta masimba kuti ateedzere Djesu. Izvirokwazvo kuti Djesu aazi kumbogara no mukadzi, asi mushobo waaibata afundi ake ndi muezaniso wekuti mwamuna ungabata kudini mukadzi wake. (Aef. 5:25) Ngo muezaniso, ngatione kuti mwamuna ungafundei no mushobo waibata Djesu afundi ake uye waaireketa nawo.
11. Djesu aibata kudini afundi ake?
11 Djesu nguwa dzese aibata aphostori ake no unaki uye no rureremedzo. Iyena ainga asiripi munhu akashata mwoyo kana kuti aida kutonga amweni. Kunyazi iyena ainga ari Tenzi uye Mufundisi wawo, iyena aazi kuseenzesa simba rake kuti aite kuti afundi ake azwe akadodoka kana kuti amuthye. Pane kudaro, Djesu aiita mabasa akadodoka kuitira afundi ake. (Juau 13:12-17) Pa nguwa imweni, iyena akati: “Fundai na inini, ngokuti inini ndiri munhu wakapfawa uye ndino mwoyo unodzidodosa. Mukadaro, imwimwi mucazorodzwa.” (Mat. 11:28-30) Onai kuti Djesu ainga ari munhu akapfawa. Munhu ano upfawi aazi kuremba. Pane kudaro, iyena wakanyasa kubamba kuti akwanise kudzibata. Kunyazi paanonga akanyangadzwa munhu wakapfawa anokwanisa kudzibata uye kuonerera mazwiro ake.
12. Djesu aireketa kudini no anhu?
12 Djesu aiseenzesa masoko ake kuti anyaradze uye kuti abambise anhu. Iyena ainga asikareketi no ateeri ake nge mushobo we hasha. (Ruka 8:47, 48) Nguwa dzimweni, azondi ake aimushora, uye aiedza kuita kuti anyangadzwe asi “iyena ainga asikatukiwo.” (1 Ped. 2:21-23) Mu migariro imweni, Djesu akatosanangura kurumbwa akanyarara, pane kudaira nge mushobo usikapangidzi rureremedzo. (Mat. 27:12-14) Uu ndi muezaniso wakanaka ku amuna e Cikristu!
13. Hingana zvinopangidzwa pana Mateu 19:4-6, mwamuna “ungabatana kudini no mukadzi wake”? (Onaiwo foto.)
13 Djesu akabhuya kuti mwamuna unodikana kurumbwa akagondeka ku mukadzi wawo. Iyena wakaseenzesa masoko a baba ake kuti abhuye kuti mwamuna anodikana “kubatana no mukadzi wake.” (Erengai Mateu 19:4-6.) Soko ro Cigrego rakaturikirhwa pa soko iri rekuti “kubatana” rinoreya, “kunamirira kana kuti kukakatira.” Izvi zvinopangidza kuti rudo riri pakati pe mwamuna no mukadzi rinodikana kunyasa kubamba zvekuti anoita hingana akanamirana ku umwe na umwe wawo. Kubatana uku kaizoshupha kuparadzanisa airi aya asikazi kukuwadzana. Mwamuna uno ushamwari we padhuze no mukadzi wake iyena waizosiya mukhaindi upi hawo we pornografiya. Asikarangariri kairi katatu, iyena ‘waizoita kuti madziso ake asaone zviro zvisina basa.’ (Pis. 119:37) Kuitawo hingana Djobo, munhu iyena unoita citenderano no madziso ake uye unosanangura kutama kuona nge mushobo wakashata mwanakadzi asiripi mukadzi wake.—Djobo 31:1.
Mwamuna wakagondeka ku mukadzi wake, unoramba kuona pornografiya (Onai ndima 13) g
14. Mwamuna unobata mukadzi wake nge mushobo wakashata, unodikana kuitei kuti agadzirise ushamwari wake na Djehovha uye no mukadzi wake?
14 Mwamuna unoita cishaishi ce kuponda kana kutuka mukadzi wake, unodikana kuita zviro zvinganani kuti agadzirise matambudziko aya aakonzera pa ushamwari wake na Djehovha uye no mukadzi wake. Zvinyi zvaanodikana kuita? Cokutanga, iyena unodikana kuzwisisa kuti iri idambudziko rakakura maningi. Zvese zvaanobhuya no zvaanoita azvizi kufisika mu madziso a Djehovha. (Pis. 44:21; Mup. 12:14; Aheb. 4:13) Cocipiri, iyena unodikana kusiya maitiro ake, uye otama kubata mukadzi wake nge mushobo wakashata. (Zvie. 28:13) Cocitatu, iyena unodikana kukumbira rurekerero ku mukadzi wake uye kuna Djehovha uye woita zvese zvaanokwanisa kuti arekererhwe nawo. (Zvii. 3:19) Iyena unodikanawo kudeketerera Djehovha kuti agare no cido ce kucinja uye kuti agare no simba rinodikanwa, kuti akwanise kuonerera mazwiro ake, masoko ake uye zviito zvake. (Pis. 51:10-12; 2 Ako. 10:5; Afi. 2:13) Cocirongomuna, iyena unodikana kuita zviro zvinoenderana no minamato yake, uye ofundira kuzonda mushobo upi hawo we cisimba uye masoko okutuka. (Pis. 97:10) Cocishanu, iyena unodikana kupsvaka rubetso re akuru e ungano nokukasika. (Tig. 5:14-16) Cocitanhatu, iyena unodikana kuronga zvaacaita kuitira kuti mune ramangwana asabatezve mukadzi wake nge mushobo wakashata. Kana mwamuna eciona pornografiya, iyena unodikanawo kuteerera matanho aya anokwana kuita matanhatu. Kana akaita kudaro, Djehovha acakomborera kupeta masimba kake uye acamubetsera kuti acinje maitiro ake. (Pis. 37:5) Asi, mwamuna aadikani basi kusiya kuita zviro zvinopsverudza mukadzi wake, iyena unodikanawo kufundira kumureremedza. Iyena ungazviita kudini?
MUNGAREREMEDZA KUDINI MUKADZI WENYU?
15. Mwamuna ungapangidza kudini kuti unoda mukadzi wake?
15 Pangidzai kuti imwimwi munoda mukadzi wenyu. Amuna anganani ano mucato unopfadza, anorumbwa eciita zviro mazuwa ese kuti apangidze mushobo waanoda akadzi awo. (1 Juau 3:18) Mwamuna ungapangidza kuti unoda mukadzi wake kunyazi nge kuita zviro zvidoko, zvakadai hinga kubata nyara dzake, kumukhumbatira. Pa zuwa, pamweni iyena ungatumira mensaji eciti: “Ndino cisuwo newe” kana kuti ecimubvunzisa kuti: “Zuwa rako riri kuhamba kudini?” Nguwa dzimweni iyena ungasanangura kutara katsamba kano masoko akarungama uye kanopangidza mushobo waanoda mukadzi wake. Mwamuna paanoita zviro izvi, iyena unopangidza kuti unoda mukadzi wake uye unobambisa mucato wake.
16. Ngei mwamuna unodikana kusimba mukadzi wake?
16 Bvunzai mukadzi wenyu mushobo waanokosha kamuri. Mwamuna unoreremedza mukadzi wake, unomubvunza zviro zvinoita kuti iyena azwe zvakanaka. Ngo muezaniso, iyena unotenda mukadzi wake nge zvese zvaanomuitira kuti amubetsere. (Ako. 3:15) Mwamuna paanosimba mukadzi wake, uye omubvunza mushobo waanomuda. Mukadzi unozwa akacengeteka, ecidiwa uye kureremedzwa.—Zvie. 31:28.
17. Mwamuna ungapangidza kudini rureremedzo ku mukadzi wake?
17 Batai mukadzi wenyu no rureremedzo uye unaki. Mwamuna unoda mukadzi wake, unomuona hinga cipo cinoshamisa ca Djehovha. (Zvie. 18:22; 31:10) Ndiyo ndaa, iyena unomubata no unaki uye rureremedzo, kutobatanidzawo pa nguwa ye kuita zvepamaponde. Iyena aamubambidziri kuti aite ciro cipi haco, cinoita kuti asazwe zvakanaka, zvinopsverusa kana kuti zvinobata-bata hana yake. f Kusiya izvona, iyena unopeta masimba kuti arumbwe ano hana yakacena pamberi pa Djehovha.—Zvii. 24:16.
18. Amuna anodikana kushinga kuitei? (Onaiwo bhokisi rakazwi: “ Mishobo Mirongomuna ye Kubata Mukadzi Wenyu no Rureremedzo.”)
18 Amuna, Djehovha anopfara maningi paanomuonai mecipeta masimba kuti mureremedze akadzi enyu no masoko uye zviito. Garai makashinga kureremedza mukadzi wenyu, musaite ciro cipi haco cinomutsukwarisa. Pane kudaro, garai no unaki, rureremedzo uye mubatei no rudo. Kana imwimwi mukaita kudaro, mukadzi wenyu ucaona mushobo wamunomuda uye wamunokoshesa. Reremedzai mukadzi wenyu uye imwimwi mucacengetedza ushamwari unokosha maningi, ushamwari wenyu na Djehovha.—Pis. 25:14.
NGOMA 131 “Zvasungwa Pamwepo pa Djoki na Mwari”
a Artigu ino musoro unoti: “Mushobo Wamunobata Anakadzi Ndiwona Waanobathwa na Djehovha Here?”mu Murindiri wa Janero ya 2024, inokosha maningi ku amuna.
b Anhu anobathwa zvisina unatsi pa nyumba, pamweni angapfarira kuerenga artigu ino musoro unoti: “Rubatsiro Kune Vaya Vari Kushungurudzwa Mudzimba” pa dii rakazwi: “Dzimwe Nyaya” mu saiti jw.org uye mu JW Library® mu ciShona.
c NYASAI KUZWISISA: Soko rokuti “Masoko e kutuka” rinobatanidza kureketa masoko akashatisisa ku munhu no cinangwa ce kumutuka kana kuita kuti iyena asazwe zvakanaka. Zvinobatanidzawo kugara mecishora munhu, uye kugara mecimubvunza zviro zvekuti imwimwi amutopfariri kuzvibvunzwa. Hino, zvese zvinorekethwa no mwamuna zvakadai hinga: Masoko anopsverusa, akashata uye anokuwadza mukadzi wake, anobatanidzwa pa masoko e kutuka
d Onai artigu yakazwi: “Pornografiya Ingakuwadza Mucato Wenyu” mu jw.org uye mu JW Library, mu ciShona.”
e Mukadzi uno mwamuna anoona pornografiya angabetsereka no artigu yakazwi: “Zvamungaita Kana Mwamuna Wenyu Ano Musambo we Kuona Pornografiya” mu Murindiri wa Agosto ya 2023.
f Panocokuita no nyaya dze pamaponde ku mwamuna no mukadzi, Bhaibheri arinyasi kudjekesa kuti ngaipi mishobo yakacena uye ngaipi mishobo isikazi kucena. Pa nyaya hinga idzona, kazado imwe na imwe inodikana kuita cisananguro cayo, asi awona anodikana kuita izvona nge mushobo unopangidza rureremedzo kuna Djehovha, unopfadza umwe na umwe wawo uye unoita kuti agare no hana yakacena. Kusiya izvona, kazado aizoreketi ngezve mushobo waino pangidzirana rudo mu mucato mayo.
g KUPANGANIDZWA KE FOTO PA: Adoni e ku basa e hama imweni anoikohomedzesa kuti ione revhista ino mafoto e pornografiya.
