MUSORO WE KUFUNDA 3
NGOMA 35 “Zviro Zvinodiwa Kupinda Zvimweni”
Itai Zvisananguro Zvinopfadza Djehovha
“Kuthya Djehovha ndiko kutanga ke ungwaru, uye kuziya Mwari Akacenesesa ndiko kuzwisisa.”—ZVIE. 9:10.
CINANGWA
Kuona kuti tingaseenzesa kudini uzii, kuzwisisa, uye kunyasa kurangarira kuti tiite zvisananguro zvakanaka.
1. Zvitsinzwa zvipi zvatinobatana nazvo?
MAZUWA ese, tinodikana kuita zvisananguro. Zvisananguro zvimweni zviri nyore kuita, zvakadai hinga zvokurhya zvo macibesi kana kuti nguwa ye kuwata. Zvisananguro zvimweni zvinoshupha maningi kuita. Izvona zvingaba-bata uthongo wedu, mupfaro wedu, anhu atinoda, kana kuti kunamata katinoita Djehovha. Tinoda kuita zvisananguro zvakanaka uye zvakanakira mhuri yedu. Kupinda zvese, tinoda kuita zvisananguro zvinopfadza Djehovha.—Aro. 12:1, 2.
2. Imwimwi mungaitei kuti muite zvisananguro zvino ungwaru?
2 Zvingaita kuti imwimwi muite zvisananguro no ungwaru, kana mukapsvaka (1) zviya zvinobatanidzwepo, (2) kuziya kuti Djehovha anorangarirei ngezve nyaya iyona, uye (3) kuongorora zvamucaita. Fundo ino, icareketa ngezve zviro zvitatu zvatinodikana kuita uyewo icatibetsera kuona kuti tingaroedza kudini kunyasa kuzwisisa kedu.—Zvie. 2:11.
PSVAKAI KUZWISISA ZVINOBATANIDZWEPO
3. Ngei imwimwi munodikana kuziya zvinobatanidzwepo musati maita cisananguro? Pasai muezaniso.
3 Ciro cekutanga camunodikana kuita kuti muite zvisananguro zvakanaka, kuziya zvinobatanidzwepo. Ngei izvona zvinokosha? Rangaridzai munhu unoenda kuna medhiko ngokuti iyena uno cinetso ce uthongo. Kodi medhikoo ucamusanangurira mushobo we kuraphwa asati amubheka munhuwo kana kuti kumuita mibvunzo here? Haiwa. Imwimwiwo mucaita zvisananguro zvakanaka kana mukatanga maongorora zvese zvinobatanidzwa pa mugariro wenyu. Asi izvona mungazviita kudini?
4. Maererano na Zvierengo 18:13, imwimwi mungaitei kuti muziye zvese zvinobatanidzwepo? (Onaiwo foto.)
4 Kakawanda kakhona, imwimwi mungakwanisa kuziya zvinobatanidzwepo pamunoita mibvunzo. Ngo muezaniso, rangarirai kuti imwimwi mapikwa kuti muende ku mabiko. Imwimwi maizoenda here? Kana imwimwi musikanyasi kuziya zvakanaka munhu uya ari kuronga mabikoo kana kuti zvicaitikeyo, imwimwi munodikana kudziita mibvunzo idzi: “Ndi kupi kucaizwa mabikoo uye rini? Ndiani apikwa? Anhu angana acaenda ikona? Ndiani acaonerera zvicaitika ku mabikoyo? Anhu acaitei ikona? Kodi kucaoneka doro here?” Mhinduro dze mibvunzo idzi dzicamubetserai kuti imwimwi muite zvisananguro no ungwaru.—Erengai Zvierengo 18:13.
Itai mibvunzo dzinobatanidzwepo (Onai ndima 4) a
5. Mumasure mekuziya zvese zvinobatanidzwepo, imwimwi mucadikana kuitei?
5 Parizvino, imwimwi maakuziya zvese zvinobatanidzwepo. Ngo muezaniso, hino kana imwimwi mukaziya kuti anhu anganani anonga ari ku mabikoyo aareremedzi cokwadi cisikanji co Bhaibheri? Kodi kukatama kuoneka munhu angaonerera kuti anhu asamwe maningi? Imwimwi munorangarira kuti mabikoo angadarika mugano here? (1 Ped. 4:3) Imwimwi mungaongororawo kuti mabikoo angapingaidza nguwa ye musangano here kana kuti ye kuparidzira. Mumasure me kuona zvese zvinobatanidzwa, imwimwi munonga magadzirira kuita zvisananguro zvakanaka. Asi pano ciro cimweni camunodikana kuita. Maakuziya zvese zvinobatanidzwepo ngezve nyaya iyona; asi Djehovha anorangarirawo kudini?—Zvie. 2:6.
ONAI ZVINORANGARIRHWA NA DJEHOVHA
6. Maererano na Tiyago 1:5, ngei tecidikana kukumbira rubetso ra Djehovha pa munamato?
6 Kumbirai Djehovha kuti amubetserei kuzwisisa zvaanorangarira. Djehovha anogondesa kutipasa uzii kuti tiziye kuti cisanaguro ici cicamupfadza kana kuti haiwa. Djehovha anopasa uzii uu “munhu wese no mwoyo wese asikamushori.”—Erengai Tiyago 1:5.
7. Tingaziya kudini zvinorangarirhwa na Djehovha ngezve nyaya imweni uye tingazviezanisa kudini?
7 Mumasure me kunamata mecikumbira nhungamiriro ya Djehovha, nyasai kuongorora mhinduro yaacamupasai. Rangarirai pa muezaniso uu: Kana imwimwi mukapsveteka pa rhwendo, mucakumbira rubetso ku munhu anogara ku mbutoyo. Asi kodi imwimwi maizobuda mecienderera mberi munhuwo asati amudairai here? Zviri pamhene kuti haiwa. Imwimwi maizonyasa kupurutana nhungamiriro dzo munhu iyena. Nge mushobo umwewo, mumasure mekuti makumbira uzii Djehovha, edzai kuzwisisa mhinduro yaanopasa. Imwimwi mugaita izvona, ngo kupsvaka mu Bhaibheri kuti i mitemo ipi uye cokwadi cipi cisikacinji cinoseenza pa mungariro wenyu. Ngo muezaniso, imwimwi pamunosanangura kuti munoenda here ku mabiko kana kuti haiwa, mungaongorora zvinorekethwa no Bhaibheri ngezve mabiko, ngezve ushamwari wakashata uye ngezve kukanda Umambo wa Mwari pakutanga.—Mat. 6:33; Aro. 13:13; 1 Ako. 15:33.
8. Zvinyi zvamungaita kana mecida rubetso kuti mugumire masoko amurikuda? (Onaiwo foto.)
8 Pamweni imwimwi mucada rubetso kuti mugumire masoko amuri kupsvaka. Imwimwi mungakumbira maonero e hama ino maesperiyesia akawanda. Asiwo, zvaizonga zvakanaka kana imwimwi mukakwarakwatisa mwega. Mungagumira masoko akawanda mu maferamenta edu e kufunda akaita hinga: Bhuku Rinobetsera Apupuri a Djehovha Pakukwarakwatisa uye Matsamba e Bhaibheri Anobetsera pa Kurarama ke Cikristu. Musakanganwe cinangwa cenyu: Cokuita cisananguro cinopfadza Djehovha.
Onai kuti Djehovha anorangarirei (Onai ndima 8) b
9. Tingagara kudini no rugondo rokuti cisananguro cedu cicapfadza Djehovha? (Aefeso 5:17)
9 Tingagara kudini no rugondo kuti cisananguro cedu capfadza Djehovha? Cekutanga, tinodikana kuziya Djehovha zvakanaka. Uye Bhabheri rinobhuya kuti: “Kuziya Mwari Akacenesesa ndiko kuzwisisa.” (Zvie. 9:10) Kana kuti, uzii wezvirokwazvo unouya pakuziya mawara a Djehovha, cinangwa cake uye zviro zvaanoda kana kuti zvaanozonda. Hino, dzibvunzisei kuti: ‘Ndecirangarira pa zvese zvandinoziya ngezva Djehovha, kodi iyena acapfara no cisananguro cangu here?’—Erengai Aefeso 5:17.
10. Ngei nguwa dzese cokwadi cisikacinji cinodikana kugara ciro cinokosha katiri?
10 Kuti tipfadze Djehovha, nguwa dzimweni tinodikana kuita ciro cinopedzesera canyagadzisa shamwari dzedu kana kuti anyaukama edu. Ngo muezaniso, abereki anganani ecida zvakanakira ana awo anoabambidzira kuti acate no munhu ano mare yakawanda, kuyanzi munhuwo asikazi kukura pakunamata. Izvirokwazvo kuti abareki anonga ecirangarira zvakanakira mwana wawo uye anoda kuti agare no upenyu wakanaka. Asi, kodi munhu ucagara mwamuna wake acamubetsera kuti abudirire panocokuita no kunamata uye agare no ushamwari wakabamba na Djehovha here? Djehovha anorangarirei ngezve nyaya ii? Tinogumira mhinduro yakhona pana Mateu 6:33. Ipona, Akristu anokohomedzeswa kuti ‘arumbwe ecitanga kupsvaka Umambo wa Mwari.’ Izvirokwazvo kuti tinoreremedza maonero e abereki edu uye e anhu ekuti anokosha katiri, asi ciro cinokosha maningi kusiya Djehovha akapfara.
ONAI ZVAMUNGAITA
11. I wara ripi rinopanganidzwa pana Afiripi 1:9, 10 ricatibetsera kuongorora zvataona?
11 Mumasure mekugumira zvokwadi zvo Bhaibheri zvisikacinji zvinoenderana no zvisananguro zvenyu imwimwi mucadikana kunyasa kurangarira zviya zvamagumira. (Erengai Afiripi 1:9, 10; onai masoko e kufunda “kunyasa kuzwisisa”.) Kunyasa kuzwisisa kucamubetserai kurangarira zvicakwanisa kuitika nemwi mumasure me kuita cisananguro. Nguwa dzimweni, zvinogara pamhene kuti ngacipi cisananguro camunodikana kuita. Asi kakawanda kakhona, andizvopi zvinoitika. Zvisananguro zvimweni zvinoshupha maningi kuzviita, ndiyo ndaa kunyasa kuzwisisa kucamubetserai kuita zvisananguro, kunyanzi pa migariro inoshupha.
12-13. Pamunosanangura basa, kuzwisisa kungamubetserai kudini kuti muite cisananguro cakanaka?
12 Rangarirai pa mugariro uu: Imwimwi munonga mecipsvaka basa kuti muriritire mhuri yenyu. Asi pa nguwa imweyo, imwimwi munonga muno zvisananguro zviiri zve basa uye zvisananguro zviirizvo zvoenderana no cokwadi cisikacinji co Bhaibheri. Pedzepo, imwimwi munoima morangarira zvese zvinobatanidzwepo, ngo muezaniso, basa ramucaita, urongwa wenyu, mukuwo wamunotora we kuenda ku basa no we kuhwirira kumba uye kutobatanidzawo zviro zvimweniwo. Pa mabasa awona, pamweni imwimwi mungapfarira basa rimwe rakhona ngokuti i basa ramunopfarira kana kuti mare inotambirhwepo yakanaka. Asi pano zvimweni zvinobatanidzwepo zvamunodikana kurangarira musati maita cisananguro.
13 Ngo muezaniso, kodi basa renyu ricamupingaidzai kuti mupinde musangano here? Kodi basero, ricathurudza nguwa yamupedza no mhuri yenyu uyewo nguwa yamunopedza meciabetsera pa zviro zvinocokuita no kunamata here? Kudaira mibvunzo idzi, zvicamubetserai kukanda “zviro zvinokosha pa mbuto yokutanga” kana kuti kukanda kunamata kenyu Djehovha uye zvinodikana zve mhuri yenyu pamberi pe zvido zvenyu kana kuti mare yakawanda. Ngokudaro, mucakwanisa kuita cisananguro cekuti Djehovha acacikomborera.
14. Kuzwisisa uye rudo, zvingamubetserai kudini kuti musaite kuti amweni akuhunyike?
14 Kuzwisisa kunotiitisawo kuti tirangarire ngezve kuti zvisananguro zvedu zvingabata-batawo kudini anhu amweni. Ngokudaro, isusu atizoiti kuti “amweni akuhunyike.” (Afi. 1:10) Izvona zvinokosha patinoita zvisananguro zvinocokuita no mushobo watinopfeka uye mushobo watinogadzira tsitsi redu. Ngo muezaniso, pamweni isusu tikasanangura mushobo we macira kana mushobo we kusimira. Asi kana anhu amweni arimukati me ungano kana kuti kunza akatama kupfarira cisananguro cedu? Kuzwisisa kucatibetsera kureremedza mazwiro hawo. Rudo rinotikohomedzesa kupsvaka “zvakanakira amweni” uyezwe kugara no maonero ari pakati no pakati. (1 Ako. 10:23, 24, 32; 1 Ti. 2:9, 10) Ngokudaro, isusu ticaita cisananguro cinopangidza rudo uye rureremedzo ku amweni.
15. Musati maita cisananguro cinokosha, imwimwi mucadikana kurangarirei?
15 Kana mecida kuita cisananguro cakakura, rangarirai nge zve zvinobatanidzwepo kuti muzviseenzese. Djesu akatifundisa kuti titange ‘kumboongorora zvatinazvo.’ (Ruka 14:28) Rangarirai ngezve nguwa, zviro uye kupeta masimba kamucaita kuti cisananguroco cibudirire. Panyaya dzimweni, imwimwi mucadikana kucedza no mhuri yenyu, asi umwe we mhuri yenyu ucadikana kuita kuti cisananguroco cibudirire. Ngei urongwa uwona unokosha? Ngokuti zvingaita kuti imwimwi mucadikana kuita cinjo dzimweni pacisananguro cenyu kana kuti munhu umweni angapasa maonero akasiyana no enyu angakwanisa kubudirira. Uye kana mukabatanidza nhengo dze mhuri yenyu pakuita cisananguro uye kuzwa maonero awo zvicamuitirai nyore kuti mwese mubatane pakuita kuti cisananguroco cibudirire.—Zvie. 15:22.
ITAI CISANANGURO CINOBUDIRIRA
16. Matanho api acamubetserai kuti muite cisananguro cakanaka? (Onai bhokisi rakazwi: “ Mungaita Kudini Zvisananguro Zvino Ungwaru.”)
16 Kana imwimwi mukatodowedza mafundo abva kupanganidzwa, imwimwi munonga makagadzirira kuita cisananguro cino ungwaru. Kana imwimwi maona zvese zvinobatanidzwa uye maongorora zvokwadi zvisikacinji zvo Bhaibheri, zvicabetsera imwimwi kuti muite cisananguro cekuti cicapfadza Djehovha. Parizvino zvaakuita kukumbira rubetso ra Djehovha kuti muite cisananguro cinobudirira.
17. Ndizvipi zvinodikanwa kuti muite zvisananguro zvakanaka?
17 Kunyanzi imwimwi mainga makaita cisananguro cakanaka kare, edzurirai kuti zvinodikanwa kuti muite zvisananguro zvakanaka i kugonda uzii wa Djehovha, haiwa kugonda pa uzii wenyu kana kuti pa maesperiensiya emupenyu wenyu. Iyena basi ndiye angamupasai uzii wezvirokwazvo uye kuzwisisa. Zviro zvinodikanwa kuti tigare no ungwaru. (Zvie. 2:1-5) Kana imwimwi mukaita izvona, mucabetserhwa na Djehovha kuti muite zvisananguro zvingamupfadza.—Pis. 23:2, 3.
NGOMA 28 Ndiani angagara Shamwari ya Djehovha?
