MUSORO WE KUFUNDA 5
NGOMA 108 Rudo ra Mwari Rakagondeka
Makomborero Atinawo nge ndaa ye Rudo ra Djehovha
“Kristu Djesu akauya pa nyika kuzoponesa ashaishi.”—1 TI. 1:15.
CINANGWA
Kuona makomborero atinawo nge ndaa ye rusudzunuro uye kuti tingapangidza kudini kutenda Djehovha
1. Tingasiya kudini Djehovha akapfara?
RANGARIDZAI kuti mapasa cipo cinokosha maningi ku munhu wamunomuda. Pane kurungama basi, cipoco i ciro cinokosha maningi! Pedzepo munhuwo unokanda cipoco mu kasha uye ocikanganwa. Zvezvirokwazvo izvi zvaizomusiyai makatsukwara. Nge dii rimweni, izvirokwazvo kuti kana munhu akaseenzesa cipoco uye omubvunzai kuti wacipfarira maningi izvona zvaizomusiyai makapfara maningi. Muezaniso uu, unobatana papi no rusudzunuro? Djehovha akapasa Mwana wake katiri. Zvevirokwazvo iyena unopfara maningi paanoziya kuti tinotenda no cipo ici cinokosha maningi uye nge rudo raakatipangidzira nge kutipasa rusudzunuro!—Juau 3:16; Aro. 5:7, 8.
2. Ticaonei mu fundo ino?
2 Asi, no kuhamba ke nguwa, tingakwanisa kukanganwa kuti rusudzunuro, iciro cinokosha maningi katiri. Nge masoko amweni, zvinoita hingana kuti takanda cipo ici cinokosha ca Djehovha mu kasha. Isusu tinopfara nge kuona kuti icona ciri imona, asi isusu aticiedzuriri. Kuti izvona zvisaitike, nguwa no nguwa tinodikana kutunhudzira kutenda kedu ku zviya zvatakaizirhwa na Djehovha uye Djesu. Fundo ino, icatibetsera kuti tiite izvona. Uye ticaona makomborero atinawo zvino nge ndaa ye rusudzunuro uye atinozogara nawo mune ramangwana. Ticaonawo zvatingakwanisa kuita pakupangidzira kutenda ku rudo ra Djehovha maka-maka mu masumana ekutanga uye ekupedzesera ecirangaridzo.
MAKOMBORERO ATINAWO ZVINO
3. Makomborero api atinawo zvino nge ndaa ye rusudzunuro?
3 Kubvira zvino, tino makomborero akawanda nge ndaa ye cibairo ce rusudzunuro ra Djesu. Ngo muezaniso, Djehovha anorekerera zvishaishi zvedu nge ndaa ye rusudzunuro. Izvona aazviiti nge kubambidzirhwa. Izvirokwazvo kuti Djehovha anoda kutirekerera. Mutari we Pisarema waitenda nge kurekererhwa na Djehovha. Ndiyo ndaa, iyena wakabhuya kuti: “Ngokuti imwimwi, Djehovha makanaka uye makagadzirira kurekerera.”—Pis. 86:5; 103:3, 10-13.
4. Djehovha akaita kuti rusudzunuro ribetsere ani? (Ruka 5:32; 1 Timoti 1:15)
4 Anhu amweni pamweni angarangarira kuti aasisiri rurekerero ra Djehovha. Zvezvirokwazvo, akuna munhu unosisira. Muphostori Pauro waiziya kuti iyena wainga ‘asikasisiri kudainzwa muphostori.’ Kunyazi zvakadaro, iyena wakabhuya kuti: “Nyasha dza Mwari dzakaita kuti ndigare hinga mushobo wandiri.” (1 Ako. 15:9, 10) Patinocinyuka zvitema zvedu, Djehovha anotirekerera. Ngei? Haiwa ngokuti takasisira, asi ngokuti iyena anotida maningi. Hino kana imwimwi mukatsukwara mecirangarira kuti amusisiri rurekerero ra Djehovha, edzurirai kuti Djehovha akapasa rusudzunuro haiwa ku anhu akakwana, asi ku ashaishi anocinyuka.—Erengai Ruka 5:32; 1 Timoti 1:15.
5. Kodi tinodikana kurangarira kuti takasisira rurekerero ra Djehovha here? Panganidzai.
5 Akuna umwe wedu waizorangarira kuti wakasisira kutambira rurekerero ra Djehovha, kunyazi iyena waano makore akawanda eciseenzera Djehovha. Izvirokwazvo kuti Djehovha anokoshesa uye anoedzurira zvese zvatakamuitira. (Aheb. 6:10) Asi iyena akatipasa Mwana wake hinga cipo, haiwa kuripa basa ratinomuitira. Zvainga zvakashata kubhuya kuti tinosisira rurekerero ra Djehovha kana kuti kubathwa nge mushobo wakanaka. Kurangarira kudaro zvakaezana no kurangarira kuti Kristu ainga asikadikani kufira zvitema zvedu.—Ezanisai na Agaratiya 2:21.
6. Ngei Pauro wakapeta masimba mu basa ra Djehovha?
6 Pauro waiziya kuti wainga asikasisiri kutenderhwa na Djehovha. Hino ngei iyena wakapeta masimba akakura kuti aseenzere Djehovha? Iyena wakaita izvona kuti apangidzire kutenda nge usisi uye nyasha dzaakapangidzirhwa na Djehovha. (Aef. 3:7) Kuitawo hingana Pauro, isusu tinodikana kurumbwa teciseenzera Djehovha tecishingaira, haiwa ngokuti takasisira kurekererhwa naye, asi kuti tipangidze kuti tinotenda nge zvese zvaakatiitira.
7. Makomborero api amweni atinawo nge ndaa ye rusudzunuro? (Aroma 5:1; Tiyago 2:23)
7 Makomborero atinawo zvino nge ndaa ye rusudzunuro, ndi mukana we kugara no ushamwari we padhuze na Djehovha. a Hingana zvatakaona mu fundo yadarika, isusu atizi kubarhwa no ushamwari na Mwari. Asi nge ndaa ye rusudzunuro, isusu tingagara no “runyararo na Mwari” uye togara shamwari dzake.—Erengai Aroma 5:1; Tiyago 2:23.
8. Ngei tecidikana kutenda Djehovha nge ndaa yo cipo co munamato?
8 Ngatirangarire ngezve ciro cimwe pa ushamwari wedu na Djehovha—cipo ce munamato. Djehovha aazwi basi munamato dzedu dzatinoita pa musangano kuti timunamate, asiwo munamato unoizwa na umwe na umwe wedu paanonga ari ega. Munamato ungakwanisa kunyaradza mwoyo wedu uye wotipasa runyararo re mundangariro, asi uwona unodarika mushobo we kurapa kana kudurura zviri mu mwoyo. Munamato unobambisa ushamwari wedu na Mwari. (Pis. 65:2; Tig. 4:8; 1 Juau 5:14) Djesu paainga ari pa nyika, nguwa dzese aiita munamato ngokuti aiziya kuti Djehovha aimuzwa uye iyena aizviziya kuti minamato yaizoita kuti ushamwari wake na Djehovha ubambe. (Ruka 5:16) Tinotenda maningi nge kugara shamwari ya Djehovha uye kutoreketa Naye mu munamato, nge ndaa ye cibairo ca Djesu!
MAKOMBORERO ATICAGARA NAWO MU NGUWA YO MBERI
9. Makomborero api acagara no aseenzi a Djehovha mu nguwa yo mberi nge ndaa yo rusudzunuro?
9 Nge ndaa ye rusudzunuro, makomborero api acagara no aseenzi a Djehovha mu nguwa yo mberi? Awona acatambira upenyu usikaperi. Anhu akawanda anoona kuti izvona azviitiki ngokuti rufu ciro cinorumbwa ceciitika mu upenyu wedu. Asi kubvira pakutanga, cido ca Djehovha cainga cekuti anhu ararame nokusikaperi. Kudai Adhamu asikazi kuita citema, akuna munhu waizorangarira kuti kurarama nokusikaperi cainga ciri ciro cakanaka maningi kuti cigare co zvirokwazvo. Zvingaitawo kuti nyamasi uno marangariro awona angaita hingana akanaka maningi, asi mutengo wakariphwa na Djehovha kuti izvona zviitike wakanakawo maningi, Djehovha akapasa Mwana wake anodiwa.—Aro. 8:32.
10. Akadzodzwa uye e mabira amweni ari kuetserei?
10 Upenyu usikaperi i makomborero mune ramangwana redu. Kubvira zvino, tingarangaridza kuti upenyu ucagara kudini uye Djehovha anoda kuti tiite izvona. Akadzodzwa anoetsera upenyu unopfadza kudenga no ubaba we kutonga pamwepo na Kristu. (Zvak. 20:6) E mabira amweni ari kuetsera no mwoyo wese nguwa ye kurarama mu nyika ipsva pasi pano asikacarhwadziwi, asina matambudziko uye kutsukwara. (Zvak. 21:3, 4) Kodi imwimwi muri umwe we mabira ano kariro ye kurarama pasi pano here? Kariro ii amubairopi we kunyaradzwa! Izvi i zviro zvainga zvina Djehovha mu ndangariro paakasika anhu. Upenyu pa nyika ucatisiya takapfara maningi.
11-12. Ngaapi makomborero amweni atiri kuetsera no mwoyo wese aticazogara nawo mu Paraizo? (Onaiwo mafoto.)
11 Rangaridzai kuti upenyu wenyu ucazogara kudini mu Paraizo. Imwimwi amucazothyi kurhwara kana kufa. (Isa. 25:8; 33:24) Djehovha acamupasai zviro zvese zvakanaka zvamunoda. Imwimwi maizopfarira kufunda ngezvei? Munoda kufunda zvakawanda ngezve zvinyama? Muno cido cekufundira kuridza zviridzwa here? Kutsurutsuta? Mu nyika ipsva mucadikana maenjinyero, anhu anowaka nyumba uye arimi. Uye ticadawo anhu anogadzira zvekurhya, anogadzira simbi uye anocengetedza majardhii atinozogara nawo. (Isa. 35:1; 65:21) No upenyu usikaperi mu nguwa yo mberi, imwimwi mucagara no nguwa ye kufundira basa ripi haro ramunozoda.
12 Rangaridzai mupfaro wamucazwa pamucatambira anhu acamutswa! (Zvii. 24:15) Rangaridzaiwo kuti zvinonga zvakanaka kudini kufunda zviro zvakawanda zvakasikwa na Djehovha uyewo kufunda zvakawanda nge zvake. (Pis. 104:24; Isa. 11:9) Cakanaka maningi kupinda zvese, zvicapfadza maningi kuseenzera Djehovha tisikadzipasi ndaa. Kodi zvino musoro here kucinja makomborero aya akanaka e mune ramangwana no “kupfadzwa no zviro zve zvitema zve nguwa doko”? (Aheb. 11:25) Zviri pamhene kuti haiwa! Kupeta masimba katinoita zvino akukoshi kupinda upenyu wakanaka waticagara nawo. Edzurirai kuti Paraizo yo pa nyika pano aizogari nguwa dzese kariro ye mune ramangwana. Ricaguma zuwa rekuti paraizo icagara ye zvirokwazvo. Izvona zvicaitika ngokuti iyena anotida maningi. Uye akaguma pakupasa upenyu we Mwana wake waanodisisa!
Pamunorangarira ngezve makomborero amucagara nawo mu nyika ipsva, cinyi cinomupfadzai maningi? (Onai mandima 11-12)
PANGIDZAI KUTENDA KENYU MU RUDO RA DJEHOVHA
13. Tingapangidza kudini kutenda muna Djehovha nge ndaa ye rusudzunuro? (2 Akorinti 6:1)
13 Tingapangidza kudini kutenda Djehovha nge kutipasa rusudzunuro? Nge kukanda basa rake re kuparidzira pa mbuto yokutanga. (Mat. 6:33) Zvezvirokwazvo Djesu, “akafira anhu ese kuti aya anorarama asadziraramire pacawo, asi araramire uya akaafira uye akamutswa.” (2 Ako. 5:15) Djehovha ano unaki wakakura uye anotirekerera. Nge kuita zvese zvatinokwanisa kuti timuseenzere, isusu tinopangidza kuti tinotenda maningi Djehovha uye kuti tinozwisisa zvese zvaanotiitira.—Erengi 2 Akorinti 6:1.
14. Tingapangidza kudini kuti tinogonda nhungamiriro dza Djehovha?
14 Mushobo umweni we kupangidza kutenda mu rudo ra Mwari ngewe kugonda nhungamiriro dzatinopaswa naye uye kudzitondowedza. Tingaita kudini izvona? Patinoita zvisananguro zve munhu ega. Ngo muezaniso, patinoita cisananguro cekuti toita fakurdhadhe here kana kuti haiwa, kana kuti i basa ripi ratinoda kuita, tinodikana kurangarira kuti Djehovha anoda kuti tiitei. (1 Ako. 10:31; 2 Ako. 5:7) Patinoita zvisananguro zvinotsamira pazvinodiwa na Djehovha, pacaitika zviro zvinoshamisa—kutenda kedu, kariro yedu ye mune ramangwana uye ushamwari wedu na Djehovha ucagara wakabamba maningi.—Aro. 5:3-5; Tig. 2:21, 22.
15. Tingapangidza kudini kutenda pa nguwa yo Cirangaridzo?
15 Pacino mishobo mitatu yatingapangidza nayo kutenda mu rudo ra Djehovha: Kuseenzesa nguwa ye Cirangaridzo kuti tisiye pamhene kuna Djehovha kuti rusudzunuro i ciro cinokosha maningi katiri. Pane kuti tioneke tiri pa Cirangaridzo, tinodikanawo kupika amweni. (1 Ti. 2:4) Apanganidzirei kuti zvinyi zvicaitika pa Cirangaridzo, pamweni zvaizonga zvakanaka kupangidzira vhidhiyo yakazwi: Ngei Djesu Akafa? uye Rangaridza rufu ra Djesu mu jw. org. Akuru anodikana kuita urongwa we kuti apike aya asikacaiti basa mu ungano. Rangaridzai mupfaro ucaoneka kudenga uye pa nyika, kana bira ra Djehovha rakapsveteka rikahwirira mu danga rake! (Ruka 15:4-7) Ndiyo ndaa, pa Cirangaridzo atidi basi kucungamidza hama dzedu, asiwo aya ari apsva kana kuti aya asikacauyi ku musangano ke nguwa yakareba. Tinoda kuti awona azwe hingana ari pa nyumba!—Aro. 12:13.
16. Ngei zvaizonga zvakanaka kurangarira kuita zviro zvakawanda mu basa rokuparidzira pa nguwa yo Cirangaridzo?
16 Kodi imwimwi maizoita zvakawanda mu basa re kuparidzira pa nguwa ye Cirangaridzo here? Uu ndi mushobo wakanaka we kupangidza kutenda pa zvese zvatakaizirhwa na Djehovha uye na Djesu. Patinoseenza maningi na Djehovha tinozwa rubetso ra rake uye mugumisiro wakhona nge wekuti rugondo redu kuna Djehovha ricatunhudzira kubamba. (1 Ako. 3:9) Kusiya izvona, pa nguwa yo Cirangaridzo musakanganwe kuerenga matsamba e Bhaibheri anooneka pa Kuongorora Matarhwa Zuwa no Zuwa kana kuti pa bhokisi re pa urongwa we musangano we pakati pe sumana. Imwimwi mungaseenzesawo matsamba aya e Bhaibheri pa fundo yenyu ye munhu ega.
17. Cinyi cinosiya Djehovha akapfara? (Onaiwo bhokisi rakazwi: “ Tingapangidza Kudini Kutenda mu Rudo ra Djehovha.”)
17 Pamweni nge ndaa ye mugariro wenyu, imwimwi amuzokwanisi kuseenzesa mazano ataona pa fundo ino. Asi edzurirai kuti Djehovha aaoni zviya zvamunoita kuti aezanise no zviya zvinoizwa no anhu amweni. Iyena anoona zviri mu mwoyo menyu, uye anopfara paanoona kutenda kamunoita nge ndaa ye cipo cinokosha caakatipasa, rusudzunuro.—1 Sam. 16:7; Mark. 12:41-44.
18. Ngei tecitenda Djehovha uye Djesu?
18 Kurekererhwa zvitema zvedu, ushamwari wedu na Djehovha uye upenyu usikaperi zvinokwanisika basi nge ndaa ye rusudzunuro. Ndiyo ndaa, tinoda kupangidza kutenda nge rudo ra Djehovha rakamuitisa kuti atipase makomborero ese aya. (1 Juau 4:19) Tinodawo kutenda Djesu akatida zvekuti akaguma pakupasa upenyu wake katiri!—Juau 15:13.
NGOMA 154 Rudo Arimboperi
