1. Anhu akawanda ari kubatikana no zviro zvakadini nyamasi uno?

 IMWIMWI munokwanisa here kuona kuti anhu mazuwa ano anodzirangarira pacawo? Ngo muezaniso, mu maredhi sosiyari anoita zviri zvese kuti adzionese uye kupangidza zviya zvaari kuita. Ngokudaro, anhu padoko basi ndiwo anopasa rukudzo Djehovha. Mu fundo ino, ticaona kuti zvinoda kureyei kupasa rukudzo Djehovha uye cinyi cinodikana kutiitisa kuti tiite izvona. Uyewo ticaonawo kuti tingapasa kudini Mwari rukudzo raanosisira uye kuti iyena acakudza kudini zina rake mune ramangwana.

ZVINOREYEI KUPASA DJEHOVHA RUKUDZO?

 2. Djehovha akapangidza kudini rukudzo rake mu Dunhu ro Sinai? (Onai mufanikiso we pa .)

² Cinyi cinozwi rukudzo? Mu Bhaibheri, soko rekuti “rukudzo” ringada kureya munhu anoita zviro zvinoshamisa. Mumasure mekuti Djehovha asudzunura Aisraeri ku Edjipitu, iyena akaita cipagidzo cakakura ke rukudzo rake ku Aisraeri. Rangaridzai zvakaitika: Mamiriyonji e Aisraeri akaungana ku Dunhu re Sinai kuti azwe zviya zvaida kubhuiwa na Mwari. Mhute yakasvipa yakafukidza dunhu. Ciriporipoco paainga akatsika pakatanga kutekenyeka, pamweni no kuputika ke matunhu. Pa nguwa imweyo, awona anoona kucetuka ke muriro, kutinhira ke mheni uye kurira kakakura ke bhuzina. (Eki. 19:16-18; 24:17; Pis. 68:8) Zvezvirokwazvo, Aisraeri akashamiswa maningi no cipangidzo ici cinoshamisa ce rukudzo ra Djehovha.

 3. Zvinoda kureyei kupasa rukudzo Djehovha?

³ Kodi anhu angakwanisa here kupasa Djehovha rukudzo?  Honde. Umwe we mushobo we kukudza Djehovha nge we kubvunza anhu ngezve simba rake rinokosha uye mawara ake anoshamisha. Uyewo tingamukudza nge kumupasa mbiri pa zviya zvatinoita no rubetso rake. (Isa. 26:12) Mambo Dhavhidhi ndi muezaniso wakanaka we munhu wakapasa rukudzo Djehovha. Mu munamato waakaita pamberi pe ungano ye Israeri, Dhavhidhi wakati kuna Djehovha: “Imwimwi Djehovha, simba, kukudzwa, mbiri, kurungama uye kureremedzwa nge zvenyu, ngokuti zviro zvese zviri kudenga no zviri pa nyika nge zvenyu.” Mumasure mekuti Dhavhidhi wapedza kuita munamato, “ungano yese yakakudza Djehovha.”—1 Mak. 29:11, 20.

 4. Djesu akapasa kudini rukudzo Djehovha?

⁴ Djesu paainga ari pa nyika, iyena akapasa rukudzo Baba ake nge kubhuya kuti Mwari ainga ari Manyuku e simba raaiseenzesa pa kuita zvishamiso. (Mark. 5:18-20) Djesu akabetserawo anhu kuti aone kuti Djehovha ndi Mwari anoshamisa zvakadini ngo mushobo waaireketa ngezva Baba ake uye mushobo waiibata anhu. Pa nguwa imweni, Djesu paainga ecifundisa pa sinagoga, umwe we munhu waimupurutana wainga ari mwanakadzi umweni wainga ano dhimoni ke makore anokwana 18. Dhimoniro raiita kuti iyena ahambe akakotama uye wainga asikakwanisi kuhamba zvakanaka. Uu wainga uri mugariro unoshupha maningi. Djesu aikwanisa kuona kurhwadziwa kaiita mwanakadzi uu, no unaki Djesu akamubvunza kuti: “Yaya, nhenda yenyu yapera.” Djesu akakanda nyara dzake paari, uye ciriporipoco mwanakadziwo wakaima zvakanaka, “wotanga kukudza Mwari.” Mwanakadziwo wakatenda maningi Djehovha nge kuhwirirazve kugara no uthongo wakanaka! (Ruka 13:10-13) Mwanakadzi uya wainga ano cikonzero cakanaka ce kukudza Djehovha, isusuwo tinacowo cikonzero cakanaka.

ZVINYI ZVINOTIKOHOMEDZASA KUTI TIKUDZE DJEHOVHA?

 5. Zvikonzero zvipi zvinoita kuti tireremedze Djehovha?

⁵ Tinokudza Djehovha ngokuti tino rureremedzo rakakura kaari. Tino zvikonzero zvakawanda zvinoita kuti tikudze Djehovha. Iyena nge we Masimba ese uye ano simba risikagumi. (Pis. 96:4-7) Tingakwanisa kunyasa kuona uzii wake kubva pa zviro zvaakasika. Ndiye Akatisika uye Anotipasa zvese zvatinoda kuti tirumbwe tecirarama. (Zvak. 4:11) Iyena akagondeka. (Zvak. 15:4) Zvese zvaanoita zvinobudirira uye zvese zvaanogondesa zvinoitika. (Djs. 23:14) Ndiyo ndaa, Djeremiya wakabhuya ngezva Djehovha kuti: “Pakati pe anhu ese ano uzii uye pakati pe umambo wawo wese, apana akaezana na imwimwi”! (Djer. 10:6, 7) Zvezvirokwazvo, isusu tino zvikonzero zvakawanda zvekureremedza Baba edu e kudenga. Asi Djehovha aawini basi rureremedzo redu, asiwo rudo redu.

 6. Ngei tinoda Djehovha?

⁶ Tinokudza Djehovha ngokuti tinomuda. Rangarirai mawara akawanda a Djehovha anotiitisa kuti timude. Iyena ano usisi uye ano nyasha. (Pis. 103:13; Isa. 49:15) Iyena anotsukwara paya patinotsukwara uye anorhwadziwa paya patinorhwadziwa. (Zak. 2:8) Iyena anotibetsera kuti timuziye uye kuti tigare Shamwari dzake. (Pis. 25:14; Zvii. 17:27) Uye iyena anodzidodosa; “anokotama kuti aone denga no nyika, anosimudza munhu anodzidodosa kubva mumataka.” (Pis. 113:6, 7) Tingatama kudini kukudza Mwari anoshamisa akaita hingana uu?—Pis. 86:12.

 7. Mukana upi unokosha watinawo?

⁷ Tinokudza Djehovha ngokuti tinoda kuti  anhu amweni amuziye. Anhu akawanda aazii cokwadi ngezva Djehovha. Ngei? Ngokuti Sathani unopofumadza ndangariro dze anhu ngo kubhuya manyepo ngezva Djehovha uye ngezve aseenzi ake. (2 Ako. 4:4) Sathani unoita kuti anhu atendere kuti Djehovha ndi Mwari akashata, aarangariri anhu uye kuti matambudziko akawanda atinobatana nawo ndiye anoakonzera. Asi isusu tinoziya cokwadi ngezva Mwari wedu! Isusu tino mukana we kudjekesa zviro izvi uye kubetsera amweni kuona kuti Djehovha ndi Mwari anoshamisa. (Isa. 43:10) Pisarema 96 inoreketa maningi ngezve kukudza Djehovha. Ticaongorora mavhersikuro manganani e Pisarema ii uye kufunda kuti tingapasa kudini Djehovha rukudzo raanosisira.

TINGAPASA KUDINI DJEHOVHA RUKUDZO RAANOSISIRA?

 8. Ndi upi umwe we mushobo watinawo wekukudza Djehovha? (Pisarema 96:1-3)

⁸ Erengai Pisarema 96:1-3. Tingakudza Djehovha nge zviya zvatinobhuya. Mavhersikuro aya anobhuya kuti tinodikana ku “embera Djehovha,” kana kuti “zina rake,” “kubhuya ngezve masoko akanaka e ruponeso anobva kaari,” uye “kubhuya ku anhu ngezve rukudzo rake.” Izvi ndizvo zvatingaita kuti tikudze Baba edu e kudenga. Mu nguwa yo kare, aseenzi a Djehovha ainga asikathyi kubhuya ku anhu zviro zvaainga aizirhwa na Djehovha uye kudziirira zina ra Mwari. (Dha. 3:16-18; Zvii. 4:29) Isusu tingaitawo kudini zvimwezvo?

9-10. Mafundei no esperiensiya ya Angelena? (Onaiwo foto.)

⁹ Onai zvakaitika no hanzvadzi imweni inogara ku Estados Unidos, inozwi Angelena. a Iyona yakapangidza ushingi uye yakadziirira zina ra Djehovha ku empreza kayaiseenza. Iyona payakatanga kuseenza ikona, yakapikwa kuti iende ku musangano no aseenzi amweni apsva. Ku musangano iwona, awona aizogara no mukana we kureketa padoko ngezve upenyu wawo. Angelena wakagadzirira masoko aipangidza kuti iyena waipfara nge kugara Mupupuri wa Djehovha. Asi asati areketa, mudoni wake we kubasa wakatanga kureketa, iyena wakabhuya kuti wainga akarerhwa no abereki ake ainga ari Apupuri a Djehovha. Iyena wakatanga kureketa zvakashata ngezve Apupuri a Djehovha uye ngezve zviro zvatinotenda. Angelena wakabhuya kuti:  “Hana yangu yakatanga kuponda. Asi ndakarangarira kuti: ‘Kodi inini ndingasiya munhu ecinyepa ngezva Djehovha here? Andidikani kunyarara, ndinodikana kuapanganidzira kuti Djehovha ndiani.’”

¹⁰ Mwanarume uu paakapedza kureketa, Angelena wakaita munamato mucinyararire. Pedzepo, no unaki iyena wakamuringira uye wakati: “Ngano yako yakatodzana no yangu. Inini ndakarerhwawo hinga Mupupuri wa Djehovha, dakara zvino ndiciri Mupupuri wa Djehovha.” Kunyazi zvakadaro, Angelena wakarumbwa akaterama uye wakamupangidzira mafoto aakabuda ecipfara no shamwari dzake pa zviitiko zvakasiyana-siyana zvekumwiya uye wakadziirira zviya zvaanotenda no rureremedzo. (1 Ped. 3:15) Ngaupi wakagara mugumisiro wakhona? Angelena paakapedza kureketa, mwanarumewo wakacinja marangariro ake. Mwanarumewo wakabhuya kuti wainga aciri kuedzurira zviro zvakanaka abereki ake paaimutora kuti aende koopinda misangano ye Apupuri a Djehovha. Angelena wakazobhuya kuti: “Ndi makomborero kudziirira zina ra Djehovha. Iyena akasisira izvona” Kunyazi anhu amweni aareremedzi zina ra Djehovha, isusu tino makomborero ekukudza zina rake.

11. Aseenzi a Djehovha anoseenzesa kudini cokwadi cisikacinji ciri pana Pisarema 96:8?

¹¹ Erengai Pisarema 96:8. Tingakudza Djehovha no zviro zvedu zvinokosha. Anhu a Djehovha nguwa dzese anomukudza nge mushobo uu. (Zvie. 3:9) Ngo muezaniso, Aisraeri aipasa mipiro kuti atsigire kuwakwa ke tempro uye kuti aicengetedze. (2 Mad. 12:4, 5; 1 Mak. 29:3-9) Anhu anganani aibetsera basa re kuparidzira ra Djesu no afundi ake “no zviro zvawo.” (Ruka 8:1-3) Akristu anganani e muzana re makore rekutanga aibvisawo zviro zvawo kuti abetsere hama no hanzvadzi dzawo. (Zvii. 11:27-29) Nyamasi uno, isusu tinokudzawo Djehovha patinopasa mipiro yedu no mwoyo wese.

12. Mipiro dzedu dzingapasa kudini rukudzo Djehovha? (Onaiwo foto.)

¹² Onai esperiensiya inopangidza kuti mipiro dzedu dzinokudza kudini Djehovha. Reratoriyo ya 2020 inopangidza ngezve kutama kunaya kakaitika ku Zimbabwe. Mamiriyonji e anhu akagara pa ngozi yekufa ngo ndaa ye nzara, kutobatanidza hanzvadzi imweni inozwi Prisca. Kunyazi zvakadaro, Prisca aazi kucinja urongwa wake we kubuda mu basa re kuparidzira mu Cishanu no Citatu, kunyazi mu nguwa yekurima. Anyacigarisano  ayo aitomushora ngo kubuda mu basa re kuparidzira pane kuseenza, awona aibhuya kuti: “Iwewe ucafa no nzara.” Asi Prisca wainga ano rugondo rekuti Djehovha aizomucengeta. Ndiyo ndaa, iyena wairumbwa ecidaira kuti: “Djehovha aambosii aseenzi ake.” Pa nguwa doko yakazoteera, Prisca wakatambira zvekurhya no zvese zvaaida ngo ndaa ye mipiro dzatinoita. Anyacigarisano a Prisca akashamisika maningi, zvekuti akatobhuya kuti: “Mwari aazi kumbokusiya uye isusu tinoda kufunda zvakawanda nge zvake.” Anyacigarisano ayo anokwana kuita 7 akatanga kupinda misangano.

13. Maitiro edu angapasa kudini rukudzo Djehovha? (Pisarema 96:9)

¹³ Erengai Pisarema 96:9. Tingakudza Djehovha no maitiro edu. Kuti aseenze mu tempro ya Djehovha, apristi aidikana kudzisuka uye kugara akacena. (Eki. 40:30-32) Isusu tinodikana kugara takacena, asi haiwa mwiri wedu basi. Asiwo tinodikana kugara no maitiro akanaka uye kutosiyana no ciro cipi haco cinozondwa na Djehovha. (Pis. 24:3, 4; 1 Ped. 1:15, 16) Tinodikana kusiya “unhu wekare”—zvinobatanidza zviro zvisikazi kucena uye zvakashata zvinozondwa na Djehovha, pedzepo topfeka “unhu upsva” kana kuti kufunda kurangarira uye kuita mushobo wekuti unopangidza kuti tiri kuteedzera Djehovha no mawara ake akanaka. (Ako. 3:9, 10) No rubetso ra Djehovha, kunyazi anhu anoita zviro zvisikazi kucena angakwanisa kuita cinjo uye opfeka unhu upsva.

14. Mafundei no esperiensiya ya Jack? (Onaiwo foto.)

¹⁴ Onai zvakaitika no mwanarume umweni unozwi Jack waiita zvecisimba uye waithyisa, anhu aitomudainza kuti Dhimoni. Ngo ndaa ye zvishaishi zvekuti iyena wainga aiita, Jack wakatongerhwa rufu. Zuwa irona risati raguma, Jack wakatanga kufunda Bhaibheri no hama imweni mu kadheya. Kunyazi wainga eciita zviro zvakashata maningi, iyena wakacinja uye no kuhamba ke nguwa iyena wakabhabhatidzwa hinga Mupupuri wa Djehovha. Jack wainga atocinja maningi zvekuti zuwa raainga atongerhwa rufu parakaguma, arindiri anganani akaenekana naye ecicema. Umwe wainga ari mukuru-mukuru we maporisiya wakatobhuya kuti: “Jack wainga ari musungwa wakashata maningi mu mbuto ino, asi zvino waa munhu wakanaka maningi.” Mu sumana yakazoteera Jack auraiwa,  hama no hanzvadzi dzaienda masumana ese kooitisa musangano mu kadheya dzakaziya musungwa umweni waipinda musangano kekutanga. Ngei iyena wakasanangura kupinda musangano? Ngokuti iyena wakashamisika maningi no cinjo dzakaizwa na Jack uye waida kuziya kuti cinyi caaidikana kuita kuti anamate Djehovha. Izvona zvinosiya pamhene kuti maitiro edu angakudza Baba edu ekudenga!—1 Ped. 2:12.

DJEHOVHA ACAKUDZA KUDINI ZINA RAKE MBAI-MBAI PANO?

15. Mbai-mbai pano Djehovha acakudza kudini zina rake zvakakwana? (Pisarema 96:10-13)

¹⁵ Erengai Pisarema 96:10-13. Mavhersikuro ekupedzesera a Pisarema 96 anopanganidza Djehovha hinga Mutongi uye Mambo ano unatsi. Djehovha acakudza kudini zina rake mbai-mbai pano? Ngo kuunzisa unatsi. Nokukasika Djehovha acatsakatisa Bhabhironi Guru, ngokuti irona rinofundisa zvakashata uye rinofundisa manyepo ngezvake. (Zvak. 17:5, 16; 19:1, 2) Kana izvona zvikaitika, pamweni amweni angasanangura kubatana nesu kuti anamate Djehovha. Pakupedzesera, pa Amagedhoni Djehovha acatsakatisa nyika ino yakashata ya Sathani, acatsakatisa aya asikamutsigiri uye aya anobhuya manyepo ngezve zina rake. Asi iyena acaponesa ese anomuda, anomuzwira uye anokudza zina rake. (Mark. 8:38; 2 Ate. 1:6-10) Mumasure mu muedzwa kekupedzera pa kupera ke Makore Ciuru pa Kutonga ka Kristu, Djehovha acaita kuti zina rake riceneswe. (Zvak. 20:7-10) Kana izvona zvikaitika, “nyika icadzara ngo kuziya kukudzwa ka Djehovha, hinga mvura inofukidza bahari.”—Abha. 2:14.

16. Imwimwi mashinga kuitei? (Onaiwo foto.)

¹⁶ Zvicapfadza maningi kurarama mu nyika yekuti anhu ese acakudza Djehovha! Asi dakara zuwa irona raguma, ngatiite zvese zvatinokwanisa kuti tikudze Djehovha pa mikana yese. Kuti tigare nazvo mu ndangariro, Dare Rinotungamirira rakasanangura tsamba ya Pisarema 96:8 kuti igare tsamba ye gore ra 2025, iyona inoti: “Pasai Djehovha rukudzo rakasisira zina rake.”