MUSORO WE KUFUNDA 4
NGOMA 18 Makaita Basa Nge Kutisudzunura
Rusudzunuro Rinotifundisei?
“Mwari akapangidzira rudo rake katiri.”—1 JUAU 4:9.
CINANGWA
Kuedzurira kuti Cibairo ca Djesu Kristu cinotifundisei ngezve mawara akanaka anopangidzwa na Djehovha uye na Djesu.
1. Ngei zvecikosha katiri kuoneka tiripo pa Cirangaridzo ce kufa ka Djesu makore ese?
ZVEZVIROKWAZVO, imwimwi munotenda kuti rusudzunuro i cipo cinokosha maningi! (2 Ako. 9:15) Nge ndaa ye cibairo cakaizwa ndi Djesu, isusu tingakwanisa kugara no ushamwari we padhuze na Djehovha. Kusiya izvona, rusudzunuro rakafunungura mukana wekuti tikwanise kuona upenyu usikaperi. Isusu tino zvikonzero zvakawanda zve kutenda Djehovha nge ndaa ye rudo raakatipangidzira nge kutipasa kaakaita Mwana wake anodiwa! (Aro. 5:8) Kuti atibetsere kurumbwa tecitenda uye kuti tisambokanganwe rusudzunuro, Djesu akakumbira kuti tirumbwe teciedzurira cibairo caakaita makore ese.—Ruka 22:19, 20.
2. Ticaonei mu fundo ino?
2 Gore rino, Cirangaridzo cicaizwa mu Sabudu 12 ya Abriri ya 2025. Zvezvirokwazvo, tese isusu tiri kuita urongwa kuti tionekepo. Ticanyasa kubetsereka pa ciitiko ici ce gore kana tikanyasa kurangarira a zviya zvatirikuizirhwa na Djehovha uye no Mwana wake. Mu fundo ino, ticaona kuti rusudzunuro rinotifundisei ngezva Djehovha uye Mwana wake. Mu fundo inoteera ticazwisisa kuti ngei rusudzunuro recikosha maningi katiri uye kuti tingapangidza kudini kuti tinotenda.
RUSUDZUNURO RINOTIFUNDISEI NGEZVA DJEHOVHA?
3. Cibairo ce munhu umwe basi cingasudzunura kudini mamirionji e anhu? (Onaiwo foto.)
3 Rusudzunuro rinotifundisa zvakawanda ngezve unatsi wa Djehovha. (Dhe. 32:4) Nge mushobo upi? Rangarirai zvinoteera: Nge ndaa ye kutama kuzwira ka Adhamu, isusu takagara nhaka yo citema, pakupedzesera cinoita kuti tife. (Aro. 5:12) Kuti atisudzunure pa citema, Djehovha akatuma Mwana wake kuti atifire. Asi rusudzunuro re munhu umwe basi akakwana raizokwanisa kudini kusudzunura mamirionji e anhu? Pauro wakapanganidza eciti: “Nge kutama kuzwira ke munhu umwe basi [Adhamu] anhu ese akazwi ashaishi, ngo mushobo umwewo ngo kuzwira ke munhu umwe basi [Djesu] anhu akawanda acazozwi anatsi.” (Aro. 5:19; 1 Ti. 2:6) Nge masoko amweni, nge ndaa ye kutama kuzwira ke munhu umwe basi, isusu takagara aranda e citema uye o rufu. Nge mushobo umwewo, nge ndaa ye kuzwira ke munhu umwe basi, isusu tingaponeswa.
Nge ndaa ye mwanarume umwe basi Adhamu, tese isusu takagara nhaka ye citema uye tinofa, nge mushobo umwewo, nge ndaa ye mwanarume umwe basi Djesu, tese tingakwanisa kugara takasudzunuka pa citema uye rufu (Onai ndima 3)
4. Ngei Djehovha asikazi kundosiya basi kuti ana a Adhamu anozwira ararame nokusikaperi?
4 Kodi Djesu zvezvirokwazvo aidikana kufa kuti atiponese? Ngei Djehovha asikazi kundosiya basi kuti ana a Adhamu anozwira ararame nokusikaperi? Pamweni tingarangarira kuti uu waizonga uri mushobo wakanaka we kugadzirisa cinetso icona. Asi izvona zvainga zvisikazopangidzi unatsi wakakwana wa Djehovha. Ngokuti Djehovha ndi munatsi, iyena ainga asikazofungi madziso ku citema cakakura cakaizwa na Adhamu.
5. Ngei tingagara no rugondo rokuti Djehovha nguwa dzese acaita zvakanaka?
5 Asi kudai Djehovha ainga asikazi kupasa rusudzunuro, uye kudai iyena akasiya unatsi pa dii uye osiya kuti ana asikazi kukwana a Adhamu ararame nokusikaperi? Kudai izvona zvakaitika, nokuhamba ke nguwa anhu aizotanga kutama kugara no rugondo pa unatsi wa Djehovha no zviro zvimweni. Ngo muezaniso, pamweni amweni aizorangarira kuti: Kodi Djehovha acadzadzisadi kamare zvipikirhwa zvake? Zvezvirokwazvo, isusu atidikani kunetseka nazvo. Nge kupangidza kakaita Djehovha nge kugara kake munatsi, uye kupasa Mwana wake waanoda kuti atifire, i cipangidzo cekuti iyena nguwa dzese acaita zviro zvakanaka.
6. Rusudzunuro rinopangidza kudini kuti Djehovha anotida? (1 Juau 4:9, 10)
6 Pane basi kuti rusudzunuro ritibetsere kuzwisisa kuti Djehovha ndi munatsi, irona rinotibetserawo kuzwisisa madirhwe atinoizwa na Djehovha. (Juau 3:16; erengai 1 Juau 4:9, 10.) Rusudzunuro, rinotifundisa kuti Djehovha anoda kuti tirarame nokusikaperi uye tigare ku dii re mhuri yake. Rangarirai zvinoteera: Adhamu paakashaisha aazizve kugara dii re mhuri ya Djehovha. Ndiyo ndaa, paya patinobarhwa atigari dii re mhuri ya Djehovha. Asi nge ndaa ye rusudzunuro, anhu ese ano kutenda muna Mwari uye anomuzwira, angakwanisa kugara ku dii re mhuri yake. Kunyazi zvino Djehovha angatirekerera zvitema zvedu uye tingagara no ushamwari we padhuze naye uye no hama dzedu. Atina mubvunzo kuti Djehovha anotida maningi!—Aro. 5:10, 11.
7. Ngei kushuphika ka Djesu kunotibetsera kuzwisisa madirhwe atinoizwa na Djehovha?
7 Isusu tingakwanisa kunyasa kuzwisisa mushobo watinodiwa na Djehovha patinoima uye torangarira kuti Djehovha akarhwadziwa kudini kuti aripe rusudzunuro. Sathani wakabhuya kuti akuna museenzi wa Mwari angakwanisa kurumbwa akagondeka kuna Djehovha paanobatana no matambudziko akakura. Kuti apangidze kuti awona ndi manyepo, Djehovha akasiya kuti Mwana wake atange ashuphika asati afa. (Djobo 2:1-5; 1 Ped. 2:21) Djehovha akaona anhu ecituka Mwana wake uye ecimuponda. Iyena akaonawo Djesu paaikhomerhwa pa mutanda uye akaonawo nguwa yese yaishuphika Djesu dakara pa kufa. (Mat. 27:28-31, 39) Djehovha ainga ano simba rokuti aimise zvese zvakaitika. Ngo muezaniso, anhu paakabhuya kuti: “Mwari wakewo ngaamuponese kudai ecimuda,” Djehovha angadai akaita izvo kamare. (Mat. 27:42, 43) Asi kudai Djehovha akaita izvona, rusudzunuro ringadai risikazi kuriphwa uye isusu taizorumbwa tisina kariro. Ndiyo ndaa, Djehovha akasiya kuti Mwana wake ashuphike dakara pa kufa.
8. Tinozviziya kudini kuti Djehovha akarhwadziwa maningi paakaona Mwana wake ecitambudzika? Panganidzai. (Onaiwo mufanikiso.)
8 Atidikani kurangarira kuti Djehovha aarhwadziwi ngokuti iyena ndi Mwari we Masimba Ese! Djehovha akatisika tecikwanisa kupfara kana kurhwadziwa. Sezvo Bhaibheri rinobhuya kuti isusu takasikwa no muezaniso wake, izvona zvinopangidza kuti iyena ano mazwiro. Bhaibheri rinobhuya ngezve migariro imweni yekuti Djehovha ‘akarhwadziwa’ uye ‘akatsukwara.’ (Pis. 78:40, 41) Edzuriraiwo ngano ya Abrahamu na Izaki. Djehovha akakumbira Abrahamu kuti apase mwana wake umwe ega hinga cibairo. (Gen. 22:9-12; Aheb. 11:17-19) Rangarirai ngezve mazwiro ese akagara na Abrahamu kuti auraye mwana wake kamare nokukasika kuti iyena asarhwadziwe. Djehovha akarhwadziwa maningi paakaona Mwana wake ecifa padoko no padoko!—Onai vhidhiyo yakazwi: Tevedzera Kutenda Kwavo—Abrahamu, Chikamu 2, mu jw.org, mu ciShona.
Djehovha akarhwadziwa maningi paakaona Mwana wake ecitambudzika (Onai ndima 8)
9. Tinofundei pana Aroma 8:32, 38, 39 ngezve rudo ra Djehovha?
9 Rusudzunuro rinotifundisa kuti akuna munhu umweni anotida maningi kupinda Djehohva, kunyazi shamwari yedu ye padhuze kana kuti nhengo ye mu mhuri medu. (Erengai Aroma 8:32, 38, 39.) Tino rugondo rokuti rudo ra Djehovha katiri, rakakura maningi kupinda mushobo watinodzida. Imwimwi munoda kurarama nokusikaperi here? Djehovha anoda izvona kupinda imwimwi. Munoda kuti zvitema zvenyu zvirekererhwe here? Djehovha anoda maningi kutopinda imwimwi. Ciro cimwe caanotikumbira ngece kuti tipangidze kutenda pa rusudzunuro, kugara nokutenda uye kumuzwira. Zvezvirokwazvo, rusudzunuro i cipo cinoshamisa ngokuti cinopangidza kudiwa katinoizwa na Djehovha. Uye mu nyika ipsva ticafunda zvakawanda ngezve rudo ra Djehovha katiri.—Mup. 3:11.
RUSUDZUNURO RINOTIFUNDISEI NGEZVA DJESU?
10. (a) Cinyi cakanyanya kuita kuti Djesu anetseke? (b) Djesu akapangidza kudini kuti Sathani ndi munyepi? (Onai bhokisi rakazwi “Kugondeka ka Djesu Kakapangidza kuti Sathani ndi Munyepi.”)
10 Djesu anonetseka maningi ngezve kuti anhu anorangarirei ngezva Baba ake. (Juau 14:31) Djesu asati afa, iyena akapumhwa kuti ainga asikareremedzi Mwari uye kuti ainga ano ndaa. Iyena ainetseka maningi nge kurangarira kuti kupumhwa ikona, kaizoita kuti anhu arangarire zvakashata ngezva Baba ake. Ndiyo ndaa, iyena akanamata eciti: “Baba, kana zveciita, bvisai kopo ii kandiri.” (Mat. 26:39) Djesu akarumbwa akatendeka dakara pa kufa, ndiyo ndaa iyena akasiya pamhene kuti Sathani wainga ari munyepi.
11. Djesu akapangidza kudini rudo raainga anaro ku anhu? (Juau 13:1)
11 Rusudzunuro rinotifundisawo kuti Djesu anorangarira maningi anhu, maka-maka afundi ake. (Zvie. 8:31; erengai Juau 13:1.) Ngo muezaniso, Djesu aiziya kuti aizobatana no zviro zvinoshupha paaizonga ari pasi pano kutobatanidzawo rufu rinorhwadza. Djesu ainga asikaoni zviro zvaaida kuita pa nyika pano hinga mundandanda we basa raainga apaswa na Djehovha. Pane kudaro, Djesu akadzipira no mwoyo wese kuti aparidzire anhu, aafundise uye aabetsere. Pa zuwa rokupedzesera re upenyu wake, Djesu akapsvaka nguwa kuti asuke tsoka dze aphostori ake uye akaapasa nhungamiriro nokuabambisa. (Juau 13:12-15) Uye kunyazi paainga ari pa mutanda, Djesu aazi kusiya kupangidza usisi ku mbavha yainga iri pa dii rake uye kukumbira kuti Juau ariritire mai ake. (Ruka 23:42, 43; Juau 19:26, 27) Zviri pamhene kuti Djesu akapangidza rudo rakakura ku anhu haiwa basi paakapasa upenyu wake, asiwo pa zvese zvaakaita paainga ari pasi pano.
12. Djesu ari kurumbwa ecitiitira zviro zvakawanda nge gwanza ripi?
12 Izvirokwazvo kuti Djesu “akafa kamwe basi,” asi iyena ari kurumbwa eciita zviro zvakawanda maningi katiri. (Aro. 6:10) Izvona arikuzviita kudini? Iyena zvino ari kurumbwa ecitipasa zviro zvakawanda, zviro zvekuti zvaizokwanisika basi nge ndaa ye rusudzunuro. Iyena akabatikana nge kuseenza hinga Mambo, Mupristi Mukuru uye musoro we ungano. (1 Ako. 15:25; Aef. 5:23; Aheb. 2:17) Iyena ano ubaba we kuunganidza akadzodzwa uye cikwata cikuru ce anhu. Basa iri, i basa ricapera kuizwa kutambudzika kukuru kusati katanga. b (Mat. 25:32; Mark. 13:27) Iyenawo ari kuseenzesa muranda akatendeka uye akangwara kuti atipase zvokurhya zve kumwiya zvinodikanwa kuti tirumbwe teciseenzera Djehovha takatendeka mu mazuwa ano ekupedzesera. (Mat. 24:45) Uye paacatonga mu Makore Ciuru, iyena acarumbwa eciseenza kuti atibetsere. Zvezvirokwazvo Djesu akadzipira katiri. Iyena i cipo cinokosha catakapaswa na Djehovha!
RUMBWAI MECIFUNDA ZVIRO ZVIPSVA
13. Cinyi cicamubetserai kuti murumbwe mecifunda ngezve rudo ra Djehovha uye ra Djesu?
13 Zvinokwanisika kurumbwa tecifunda ngezve rudo ra Djehovha uye ra Djesu raanaro katiri kana tikanyasa kurangarira zvese zvaakatiitira kubvira zvino. Gore rino, mu masuma ekuti Cirangaridzo cisati caitika uye caacapera, munoonawo kudini kuerenga Vhangeri rimwe kana kuti Mavhangeri akawanda? Asi musaedze kuerenga makapituro akawanda pa nguwa imweyo. Pane kudaro, erengai musikagogomeki, asi edzai kugumira zvikonzero zvinoita kuti mutunhudzire kuda kamunoita Djehovha uye Djesu. Musakanganwe kubvunza amweni zviya zvamagumira.
14. Maererano na Pisarema 119:97 uye no masoko e pasi, kupsvakisisa kungatibetsera kudini kuti tirumbwe tecifundira ngezve rusudzunuro uye ngezve mafundo amweni? (Onaiwo foto.)
14 Kana imwimwi maano nguwa yakawanda maa mabhabhatidzwa, pamweni mungarangarira kuti, paciri no zviro zvimweni zvipsva here zvandingafunda ngezve unatsi wa Mwari, rudo rake uye rusudzunuro? Asi zvezvirokwazvo, nguwa dzese ticagara no zviro zvipsva zvekuti tifunde ngezve nyaya ii. Hino imwimwi mungaitei? Nyasai kukhorovhera mabhuku edu. Kana imwimwi mukaerenga ciro mu Bhaibheri uye motama kunyasa kuzwisisa, psvakisisai. Uye zuwa parinonga recidarika, nyasai kurangarira zviya zvamafunda, uye zviya zvamafundira ngezva Djehovha, ngezve Mwana wake uye rudo raanaro katiri.—Erengai Pisarema 119:97 uye masoko e pasi.
Kunyazi taano makore akawanda tiri mu cokwadi tingatunhudzira kutenda mu rusudzunuro (Onai ndima 14)
15. Ngei zvecikosha kuti tirumbwe tecifunda zviro zvipsva zve mu Bhaibheri?
15 Musatsukware paya pamusikagumiri ciro cipsva kana cinoshamisa pese paya pamunoerenga Bhaibheri kana kupsvakisisa. Zvezvirokwazvo imwimwi makaita hingana munhu uri kupsvaka oro. Kakawanda kakhona, munhu unopsvaka oro unopedza nguwa kana mazuwa dakara aona ka oro kadoko. Kunyazi zvakadaro iyena aaori mwoyo ngokuti unoziya kuti ka oro kadoko kanokosha maningi. Hino katiri isusu, zvokwadi zvatinogumira mu Bhaibheri zvinokosha maningi kudarika oro! (Pis. 119:127; Zvie. 8:10) Garai no mwoyo unononoka kutsamwa uye rumbwai mecipsvaka zviro zvipsva zviri mu Bhaibheri.—Pis. 1:2.
16. Tingateedzera kudini Djehovha na Djesu?
16 Pamunonga mecifunda, rangarirai kuti mungaseenzesa kudini mu upenyu wenyu zviya zvamunonga mafunda. Ngo muezaniso, teedzerai unatsi wa Djehovha nge kutama kubata munhu upi hake no rusananguro. Imwimwi mungateedzera rudo ra Djesu kuna Baba ake uye kuno amweni. Umwe we mushobo we kuita izvona, ngewe kugara makagadzirira kuita zvinodiwa na Djehovha uye kubetsera amweni, kunyazi nguwa dzimweni izvona zvisiripi nyore. Mushobo umweni ngewe kuparidzira anhu amweni kuti agare no mukana we kutenda cipo ici cakanakisisa ca Djehovha.
17. Ticaonei mu fundo inoteera?
17 Patinorumbwa tecifunda ngezve rusudzunuro uye tecirikoshesa, rudo redu kuna Djehovha uye Djesu ricatunhudzirika uye mugumisiro wakhona nge wekuti Djehovha na Djesu acatunhudzirawo kutida. (Juau 14:21; Tig. 4:8) Hino tinoda kurumbwa tecinyasa kuseenzesa zviro zvese zvatinopaswa na Djehovha uye kurumbwa tecifunda ngezve rusudzunuro. Mu fundo inoteera, ticaona ngezve makomborero manganani aticagara nawo nge ndaa ye rusudzunuro uye kuti tingapangidza kudini kutenda nge rudo ra Djehovha.
NGOMA 107 Djehovha Muezaniso we Rudo
a NYASAI KUZWISISA: “Kunyasa kurangarira” kunoreya kukanda ndangariro dzenyu pa zviya zvamunonga mecifunda uye kufunda zvakawanda kuti munyase kuzwisisa nyayeyo.
b Pana Aefeso 1:10, Pauro unoreketa ngezve “kuunganidza zviro kudenga.” Pana Mateu 24:31 uye Marko 13:27 Djesu unoreketa ngezve kuunganidza akasanangurhwa. Pa nyaya idzi pauro uye Djesu ari kureketa ngezve nyaya dzakasiyana. Pauro uri kureketa ngezve paya pekuti Djehovha anosanangura aya acatonga na Djesu nge kuadzodza no mwiya mucena. Nge dii rimweni, Djesu ari kubhuya ngezve nguwa yekuti akadzodzwa anonga aciri pasi pano acaunganidzwa kuti aende kudenga pa nguwa ye kutambudzika kukuru.
