MUSORO WE KUFUNDA 41
NGOMA 13 Kristu Muezaniso Wedu
Fundo dze Mazuwa 40 Okupedzesera a Djesu pa Nyika Pano
“Awona akamuona ke mazuwa 40, uye iyena akareketa ngezve Umambo wa Mwari.”—ZVII. 1:3.
CINANGWA
Kuteedzera zvakaizwa na Djesu mu mazuwa 40 e kupedzesera paainga ari pa nyika pano.
1-2. Zvinyi zvakaitika no afundi airi a Djesu paainga ari pa rhwendo kuenda ku Emausi?
I ZUWA 16 ya Nisani re gore ra 33 K.A. Djesu a afa, afundi a Djesu ari kuzwa kutsukwara kakakura uye ari kuthya maningi. Airi awo akasiya Djerusarema uye akaenda ku Emausi, thaundi raigara ke mukuwo unokwana kuita 11 kirometro kubva ku Djerusarema. Awona ainga akaora mwoyo maningi ngekuti Mesiya ainga afa. Awona ainga ano kariro yekuti Djesu aizoita zviro zvinoshamisa ku Adjudha, parizvino izvona zvainga zvisikazoitikizve. Asi ciro cainga cisikaetserhwi cakaitika.
2 Mwanarume waainga asikazii wakaakwederera uye wakahamba nawo. Afundi ecirhwadziwa mu mwoyo anomubvunza zviya zvakaitika na Djesu. Hino mwanarume iyena unotanga kuabvunza zviro zvaasikazokanganwi. “Ecitanga na Mozesi uye Aphorofita,” iyena unopanganidza kuti Mesiya waidikana kushuphika uye kufa. Afundi airi aya paakaguma ku Emausi akazwisisa kuti mwanarume uya ainga ari Djesu, ainga amutswa na Mwari. Zvinotoita kurangaridzira mupfaro waakazwa nge kuziya kuti Mesiya wainga ari mupenyu!—Ruka 24:13-35.
3-4. Zvinyi zvakaitika no afundi a Djesu uye ticaonei mu fundo ino? (Zviito 1:3)
3 Afundi airi aya paakaguma ku Emausi Djesu akadzipangidza ku afundi ake kakawanda pa mazuwa anokwana kuita 40. (Erengai Zviito 1:3.) Pa nguwa yese ii, kutsukwara kese uye kuthya kaizwa afundi aya kakacinja kogara mupfaro uye rugondo, izvona zvakaita kuti awona agare cikwata ce anyahondo ano ushingi ce aparidzi e masoko akanaka e Umambo ecifundisa cokwadi ku amweni. a
4 Kunyasa kufunda ngezve zviya zvakaitika pa nguya ii inokosha ye upenyu wa Djesu, kucatibetsera maningi. Mu fundo ino, ticaona kuti Djesu akaseenzesa kudini mazuwa awona kuti (1) abambise afundi ake, (2) aabetsere kuti anyase kuzwisisa Matarhwa uye (3) kuarowedza kuti agare no ubaba wakakura mune ramangwana. Pa fundo imwe na imwe, ticaona kuti tingateedzera kudini Djesu.
BAMBISAI AMWENI
5. Ngei afundi a Djesu aida kubambiswa?
5 Afundi a Djesu aida maningi kubambiswa. Ngei ? Ngekuti anganani akasiya nyumba dzawo, hama dzawo uye bhizi rawo kuti ateere Djesu. (Mat. 19:27) Amweni ainga atopfudzwa mazina awo ku mutanha wawo nge ndaa ye kugara afundi ake. (Juau 9:22) Awona akapeta masimba kudaro ngekuti aitendera kuti Djesu ainga ari Mesiya. (Mat. 16:16) Asi Djesu paakauraiwa, awona akaruza kariro uye akarhwadziwa maningi.
6. Djesu akaitei mumasure me kumutswa?
6 Djesu aizviziya kuti kurhwadziwa kakaita afundi cainga cisiripi cipangidzo ce kuremba pa kunamata, ngekuti awona ainga aruza shamwari yaaida maningi. Ndiyo ndaa pa zuwa raakamutswa iyena wakatanga kubambisa shamwari dzake. Ngo muezaniso iyena wakadzipangidza kuna Mariya Madharena paainga ari pa guwa ecicema. (Juau 20:11, 16) Iyena wakadzipangidzawo ku afundi ake airi amborekethwa pa kutanga ke fundo ino uye ku muphostori Pedru. (Ruka 24:34) Tingafundei no muezaniso wa Djesu? Ngatione kuti cinyi cakaitika iyena paakadzipangidza kuna Mariya Madharena.
7. Maererano na Juau 20:11-16, Djesu akaona Mariya eciitei uye akamuitirei? (Onaiwo mufanikiso.)
7 Erengai Juau 20:11-16. Ainga ari macibesi 16 ya Nisani, anakadzi anganani akaenda ku guwa kainga kakakotserhwa Djesu. (Ruka 24:1, 10) Umwe we anakadzi aya, wainga ari Mariya Madharena. Paakaguma pa guwa akaona kuti Djesu ainga asiripopi. Iyena wakaenda ecigogoma koobvunza Pedru uye Juau zviya zvainga zvaitika uye pedzepo wakaaperekedza dakara ku guweyo. Mumasure me kuona kuti guwa rainga risina ciro, anarumewo akahwirira kumba. Asi Mariya aazi kuita izvona. Iyena wakarumbwa ecicema, iyena ainga asikazvizii kuti Djesu waimuona. Iyena wakaona mwanakadzi uya wakatendeka ecicema uye izvona zvakamubata-bata maningi. Iyena wakadzipangidza uye wakareketa masoko padoko basi asi akamubambisa maningi. Djesu akapasa Mariya basa rinokosha maningi; iyena waidikana kubvunza hama dzake kuti Djesu ainga amutswa.—Juau 20:17, 18.
Teedzerai Djesu nge kuona zviri kubatana no hama uye kuita zvamunokwanisa kuti mudzibambise (Onai ndima 7)
8. Tingateedzera kudini Djesu?
8 Tingateedzera kudini Djesu? Kuitawo hingana Djesu, isusu tingabambisawo hama no hanzvadzi kuti dzirumbwe dzeciseenzera Djehovha. Umwe we mushobo we kuita izvona ngewe kupurutana zvinetso zvaari kubatana nazvo, kuedza kuzwisisa mazwiro awo, kuabetsera no zviya zvamunokwanisa uye kuanyaradza. Onai zvakaitika no Hanzvadzi imweni inozvi Jocelyn, hama yake yo mwanakadzi yakafa pa tsawona. Jocelyn unoti: “Ke mwedzi dzakawanda inini ndakazwa kutsukwara kakakura uye kuora mwoyo.” Asi hama imweni no mukadzi wayo akapika Jocelyn kuti aende kumba kawo, uye akamupasa rubetso rese raaida. Akamubata nge musobo wakanaka uye akamubvunza kuti iyena unokosha maningi mu maonero a Djehovha. Jocelyn unotizve: “Inini ndainga ndapererhwa, zvaitoita hingana kuti ndaindondomera mu bahari, asi Djehovha akaseenzesa kazado ii kuti andiponese. No rubetso rawo, inini ndakahwirira kuseenzera Djehovha no mupfaro.” Isusu tingabambisawo hama no hanzvadzi kana tikanyasa kuapurutana paanonga ecibhuya mazwiro awo. Tinodikana kuapasa nyaradzo yaanoda no cinangwa ce kuabetsera kuti asasiye kuseenzera Djehovha.—Aro. 12:15.
BETSERAI AMWENI KUTI AZWISISE BHAIBHERI
9. Zvitsinzwa zvipi zvakabatana no afundi a Djesu uye iyena akaabetsera kudini?
9 Afundi a Djesu aitenda mu Soko ra Mwari uye aipeta masimba akakura kuti azwire Djehovha. (Juau 17:6) Kunyazi zvakadaro, awona akanetseka Djesu paakafa ecioniwa hinga bhinya. Djesu aizviziya kuti afundi ake ainga ano kutenda uye aida Djehovha, asi iyena akazwisisa kuti awona aidikana kuzwisisa Matarhwa. (Ruka 9:44, 45; Juau 20:9) Hino iyena wakaabetsera kunyasa kuzwisisa zviya zvaainga aerenga. Onai mushobo waakazviita paakadzipangidza ku afundi ake airi aienda ku Emausi.
10. Djesu akabetsera kudini afundi ake kuti azwisise kuti iyena ainga ari Mesiya? (Ruka 24:18-27)
10 Erengai Ruka 24:18-27. Djesu aazi kubhuya pakutanga kuti iyena ainga ari ani. Pane kudaro, iyena akaita mibvunzo ku afundi. Ngei? Pamweni iyena waida kuapasa mukana wekupanganidza zviya zvaaizwa. Uye ndizvona kamare zvakaizwa no afundi. Awona akati airangarira kuti Djesu aizogara mambo ku Israeri uye aizosudzunura anhu pa utongi we Roma. Djesu akasiya kuti arekete mazwiro awo ese, pedzepo iyena akaseenzesa Matarhwa kuti abetsere anarume aya kuzwisisa kuti uphorofita wakawanda wainga wadzadzika. b Pa nguwa imweni pa usiku uwona, iyena wakaona afundi amweni uye wakaapanganidzira zvaida kureya uphorofita uwona. (Ruka 24:33-48) Izvi zvinotifundisei?
11-12. (a) Tinofundei no mushobo wakafundisa Djesu zvokwadi zve Bhaibheri? (Onaiwo foto.) (b) Mufundisi wa Nortey wakamubetsera kudini?
11 Tingateedzera kudini Djesu? Pamunoitisa fundo yo Bhaibheri itai mibvunzo inoita kuti mufundi abhuye mazwiro ake. (Zvie. 20:5) Pedzepo, mumasure mekuzwisisa mazwiro ake, mupangidzei magumire aangaita mavhersikuro e Bhaibheri angamubetsera pa mugariro wake. Uye pane kumubvunza zvaanodikana kuita, mupangidzei kuti ungaseenzesa kudini Bhaibheri kuti aziye zvaanodikana kuita. Onai muezaniso we hama imweni ye ku Gana inozwi Nortey.
12 Nortey paainga ano makore 16, iyena wakatanga kufunda Bhaibheri. Asi mhuri yake aizi kupfara nazvo. Zvinyi zvaakaita kuti arumbwe ecifunda? Hama yaifunda Bhaibheri naye, yakamuerengera Mateu kapituro 10 uye yakati: “Mukristu we zvirokwazvo ucateererhwa.” Nortey unoti: “Pandakateererhwa ndakagara no rugondo rokuti ndagumira cokwadi.” Hama yaifunda na Nortey yakamubetsera kuti anyase kurangarira zvinobhuiwa pana Mateu 10:16. Iyena waidikana kugara munhu ano rureremedzo asi kungwarira paya paanoreketa ngezve Bhaibheri ku anhu amweni. Mumasure mekubhabhatidzwa, Nortey wakada kugara mupionero asi baba ake aida kuti aende ku fakurdhadhe. Mufundisi wake we Bhaibheri aazizve kumubvunza zvaaidikana kuita pa mugariro uu, kusiya izvona, iyena wakaita mibvunzo dzakabetsera Nortey kurangarira zvokwadi zve Bhaibheri zvisikacinji uye kuita cisananguro cake. Mugumisiro wakhona ngewe kuti Nortey wakasanangura kupinda mu nguwa yakadzara. Baba ake aazi kupfara ndizvo uye akamudzingira pa nyumba. Nortey unotii nge zvese izvi zvakaitika? Iyena unoti: “Inini ndino rugondo rokuti ndakaita cisananguro cakanaka.” Kana tikakohomedzesa amweni kuti anyase kuita zvinobhuiwa no Bhaibheri, isusu tinoabetsera kuti abambise kutenda kawo uye arumbwe aciseenzera Djehovha.—Aef. 3:16-19.
Teedzerai Djesu nge kubetsera amweni kuti anyase kuzwisisa Bhaibheri (Onai ndima 11) e
ROWEDZAI HAMA KUTI DZIGARE “ANARUME HINGA ZVIPO”
13. Djesu akaitei kuti basa re kuparidzira rirumbwe recienderera mberi? (Aefeso 4:8)
13 Djesu paainga ari pa nyika, iyena akaita kamare zviya zvaakakumbirhwa na Djehovha. (Juau 17:4) Asi Djesu ainga asiripi munhu airangarira kuti: ‘Kana iwewe ukada zviro zvakanaka, zviite wega.’ Pane kudaro, pakati pe makore matatu no hafu e basa rake re kuparidzira, iyena akarowedza anhu amweni. Iyena aigonda no afundi ake. Uye iyena akaapasa basa re kuparidzira uye rekufundisa masoko akanaka uyewo basa rinokosha re kucengeta mabira a Djehovha. Uye afundi amweni akatanga kuita mabasa akakura zvekutoti amweni ainga asati aguma pa makore 30. (Erengai Aefeso 4:8.) Asi Djesu akaseenzesa kudini mazuwa ake 40 okupedzesara ari pa nyika pano kuti abetsere anarume ainga akadzipira, akagondeka uye aipeta masimba kuti agare ‘zvipo zve anarume’?—Onai masoko ekufunda ari pana Aefeso 4:8.
14. Djesu akaitei kuti afundise afundi ake mu mazuwa 40 ekupedzesera ari pa nyika? (Onaiwo mufanikiso.)
14 Djesu akapasa afundi ake mazano manganani aaidikana kuzwa, asi iyena akazviita nge mushobo we unaki. Iyena akaona kuti anganani akhona aigara asina rugondo nokukasika, ndiyo daa akaapasa mazano nge zvazvo. (Ruka 24:25-27; Juau 20:27) Djesu akaabvunzawo kuti aidikana kukanda ndangariro dzawo pakucengeta anhu a Djehovha pane kupsvaka mare. (Juau 21:15) Uye Djesu akaaedzurirawo ngezve kukosha ke kutama kuezanisa zviro zvinoizwa no anhu amweni mu basa ra Djehovha. (Juau 21:20-22) Kusiya izvona, Djesu akagadzirisa marangariro awo akashata ngezve Umambo wa Mwari uye akaabetsera kukanda ndangariro dzawo pa basa re kuparidzira. (Zvii. 1:6-8) Akuru angafundei no muezaniso wa Djesu?
Teedzerai Djesu nge kurowedza anarume kuti azoite mabasa akakura (Onai ndima 14)
15-16. (a) Akuru angateedzera Djesu nge mishobo ipi? Panganidzai. (b) Patrick wakabetserhwa kudini?
15 Akuru angateedzera kudini Djesu? Akuru anodikana kurowedza hama kuti dziite mabasa amweni mu ungano kunyazi awona aciri madjaha. c Asi akuru aaetseri kuti hamedzo dziri kurowedzwa dzigare dzakakwana. Awona anodikana kurowedza madjaha no unaki. Nge kuita kudaro hama idzona dzicafundira kudzidodosa, kugondeka uye kugadzirira kubetsera amweni.—1 Ti. 3:1; 2 Ti. 2:2; 1 Ped. 5:5.
16 Onai kuti hama imweni inozwi Patrick yakabetserhwa kudini pakutambira mazano. Paainga ari djaha, awona aireketa no amweni no hasha uye aitoita izvona kunyazi ku hanzvadzi kamare. Pedzepo mukuru umweni wakazwisisa kuti Patrick waidikana kuita cinjo dzinganani uye akamupasa zano rakananga asi akaita izvona no unaki. Patrick unoti. “Ndinopfara maningi no rubetso raakandipasa. Kakawanda inini ndaiora mwoyo ngokuti ndaiona hama dzimweni dzecitambira mabasa amweni andaida. Asi zano ro mukuru uu, rakandibetsera kuona kuti inini ndaidikana kudzidodosa pakuseenzera hama no hanzvadzi pane kukanda ndangariro dzangu pakuda mabasa mu ungano.” Mugumisiro wakhona ngewe kuti Patrick wakagara mukuru no makore 23.—Zvie. 27:9.
17. Djesu akapangidza kudini kuti aigonda afundi ake?
17 Djesu akapasa afundi ake ubaba haiwa basi we kuparidza, asi we kufundisa Matarhwa. (Onai masoko okufunda e bhuku ra Mateu 28:20 anoti: “meciafundisa.”) Pamweni afundi a Djesu airangarira kuti ainga asikazokwanisi kuita basa irona. Asi, Djesu aizviziya kuti afundi ake aizokwanisa kuita basa irona. Iyena ainga ano rugondo rakakura zvekuti akati: “Kuita hinga Baba akandituma, inini ndiri kumutumaiwo.”—Juau 20:21.
18. Akuru angateedzera kudini Djesu?
18 Akuru angateedzera kudini Djesu? Akuru agara no basa anozviziya kuti zvinokosha maningi kupasa basa aya aari kurowedza. (Afi. 2:19-22) Ngo muezaniso, akuru angabatanidza madjaha pakuceneswa uye kugadziriswa ke Nyumba ye Umambo. Akuru angapasa hama basa rokuti aite, kuarowedza pa basa irona, pedzepo kuasiya kuti aite oga. Hama imweni inozwi Matthew yakagadzwa hingana mukuru yakabhuya kuti ciro cakaibetsera i rowedzo yaakapaswa no akuru uyewo kugondwa kaaizwa no akuru kuti iyona iite basa iri yoga. Iyona inoti: “Pandaishaisha, awona aindibetsera kuona kuti ndaizodikana kuitazve kudini mazuwa anoteera.” d
19. Cinyi catinoda maningi kuita?
19 Djesu akaseenzesa mazuwa ake 40 ekupedzesera pa nyika kuti abambise, afundise uye abetsere amweni. Uye isusu tinoda kuteedzera muezaniso wake. (1 Ped. 2:21) Djesu wene acatibetsera kuita izvona ngokuti iyena akatigondesa kuti: “Ndicange ndinemwi mazuwa ese dakara pa kupera ke nyika.”—Mat. 28:20.
NGOMA 15 Kudzai Dangwe ra Djehovha!
a Mu Mavhangeri uye mu mabhuku amweni e Bhaibheri, munoreketa ngezve migariro yakawanda yekuti Djesu akadzipangidza mumasure me kumutswa: Kuno amweni, akadai hingana Mariya Madharena (Juau 20:11-18); ku anakadzi amweni (Mat. 28:8-10; Ruka 24:8-11); ku afundi 2 (Ruka 24:13-15); kuna Pedru (Ruka 24:34); ku aphostori kusiya Tomaji (Juau 20:19-24); ku aphostori kubatanidzawo Tomaji (Juau 20:26); ku afundi 7 (Juau 21:1, 2); ku afundi anodarika 500 (Mat. 28:16; 1 Ako. 15:6); kuna hama yake Tiyago (1 Ako. 15:7); ku aphostori ese (Zviito 1:4); ku aphostori dhuze no Bhetanya. (Ruka 24:50-52) Migariro imweni yaakadzipangidza pamweni aizi kutarhwa mu Bhaibheri.—Juau 21:25.
b Kuti muone mundandanda we uphorofita unobhuya ngezva Mesiya, onai fundo yakazwi: “Jesu Ndiye Mesiya Anotaurwa Muuprofita Here?” mu saiti jw.org, mu ciShona.
c Akuru anganani e cidjaha angakwanisa kugadzwa hinga aonereri e nharaunda kunyazi ano makore 25 kana 30. Asi awona anodikana kutanga agara no esperiensiya hinga mukuru.
d Kuti muone mazano amweni angamubetserai pakubetsera madjaha kuti azogare no ubaba wakakura, onai Murindiri wa Agosto ya 2018 mapaji. 11-12, mandi. 15-17, uye wa 15 ya Abriri ya 2015, mapaji. 3-13, mu ciShona.
e KUPANGANIDZWA KE FOTO PA : Mufundi umweni we Bhaibheri mumasure me kunyasa kuzwisisa zvakanaka zvinofundiswa no Bhaibheri, iyena unosanangura kupsveta zviro zvinocokuita no khisimusi.
