MUSORO WE KUFUNDA 43
NGOMA 90 Bambisanai
Mungakunda Kudini Kutama Kugara no Cokwadi
“Garai muno cokwadi pa zviro zvese.”—1 ATE. 5:21.
CINANGWA
Kukunda kutama kugara no cokwadi kaizokwanisa kuita kuti kupingaidze basa redu ratinoitira Djehovha.
1-2. (a) Aseenzi a Djehovha angadziita mibvunzo dzipi? (b) Ticaonei mu fundo ino?
NGUWA dzimweni, anhu ese angakwanisa kutama kugara no cokwadi. a Ngo muezaniso, rangaridzai ngezve mudjaha usina cokwadi cokuti Djehovha anomukoshesadi kamare. Nge ndaa ye kutama kugara no cokwadi, iyena pamweni anotanga kurangarira kuti aadikani kubhabhatidzwa. Rangariraizve ngezve hama imweni yokuti kareko yakasanangura kuita zvakawanda mu basa ra Djehovha, pane kuti ibatikane no basa raizoipasa mare yakawanda. Parizvino, iyona iri kuona zviro zvinoikwanira basi kuti iriritire mhuri yayo, uye inotama kugara no cokwadi cekuti yakaitadi cisananguro cakanaka here kana kuti haiwa payainga iri djaha. Uye rangaridzai ngezve hanzvadzi yacembera yokuti aicina simba hinga rayainga inaro kare. Zvingaita kuti iyona ingakwanisa kuora mwoyo ngokuti aicakwanisi kuitazve zviro zvayaiita kare. Pamweni imwimwi makambodzipasawo mibvunzo hingana idzi: ‘Kodi Djehovha anondirangarirawo here? Kupeta masimba kandakaita kuti ndinyase kumuseenzera zvakabetsera here? Kodi inini ndiciri kukosha kuna Djehovha here?’
2 Kana tikatama kusiya marangariro akadaro, izvona zvingakwanisa kurembesa kutenda kedu uye toguma pa kutosiya kuseenzera Djehovha. Mu fundo ino, ticaona kuti zvokwadi zve Bhaibheri zvingatibetsera kudini kana tikagara no mubvunzo dzakadai, (1) kodi Djehovha anondirangariradi here? (2) zvisananguro zvandakaita kare zvainga zviri zve ungwaru here? uye (3) kodi ndiciri kukosha here kuna Djehovha?
TINGAKUNDA KUDINI KUTAMA KUGARA NO COKWADI?
3. Mushobo upi watingakunda kutama kugara no cokwadi katinako?
3 Umwe we mushobo we kugumira mhinduro dze mibvunzo dzedu nge we kuerenga Bhaibheri kuti tigumire mhinduro. Kana tikadaro, ticanyasa kuzwa takabamba, ticakura pa kunamata, ticatunhudzira ushamwari wedu na Djehovha, uye kugara takagadzirira kuti “tirumbwe takabamba pa kutenda.”—1 Ako. 16:13.
4. Tingagara kudini no “cokwadi pa zviro zvese”? (1 Atesaronika 5:21)
4 Erengai 1 Atesaronika 5:21. Bhaibheri rinotikohomedzesa kuti ‘tigare no cokwadi pa zviro zvese.’ Izvona zvinoda kureyei? Zvinoreya kuti tinodikana kugara no cokwadi pa zviro zvatinotenda kuti ngezve zvirokwazvo. Tinoita izvona nge kuezanisa zviya zvatinotenda no zviya zvinobhuiwa no Bhaibheri. Ngo muezaniso, onai mudjaha umweni unorangarira kuti Djehovha aamurangariri. Kodi iyena unodikana kundotendera basi izvona? Haiwa, iyena unodikana “kugara no cokwadi pa zviro zvese.” Iyena unodikana kuita izvona nge kuziya zvinodiwa na Djehovha.
5. “Tingazwa” kudini mhinduro dza Djehovha dzinocokuita no mibvunzo dzedu?
5 Patinoerenga Bhaibheri, zvinoita hingana kuti tiri “kuzwa” Djehovha ecireketa na isusu. Asi kuti tinyase kuzwisisa ngezve mubvunzo watinawo, tinodikana kupeta masimba pa kuita dii redu. Cokutanga, tinodikana kuerenga dii ro Bhaibheri rinoenderana no mubvunzo watinawo. Isusu tingaseenzesa maferamenta e kufunda akawanda atinopaswa no sangano ra Djehovha, kuti tipsvakisise ngezve nyaya iyona. (Zvie. 2:3-6) Uyewo tingaita munamato tecikumbira Djehovha kuti atikomborere pa zviya zvatiri kupsvakisisa uye atibetsere kuona zviya zvaari kurangarira. Pedzepo tinodikana kupsvaka zvokwadi zve Bhaibheri zvisikacinji uye miezaniso inoenderana no mugariro wedu. Uye tinobetserekawo pa kufunda ngezve zviitiko zve anhu e mu nguwa dze Bhaibheri ainga ano marangariro uye mazwiro akaita hingana edu.
6. Misangano dzingatibetsera kudini pa kupedza mibvunzo dzedu?
6 Mushobo umweni we “kuzwa” Djehovha ngewe kupinda misangano. Tikapinda misangano dzese, tingazwa zviro pa mharidzo kana pa mhinduro ye hama uye hanzvadzi, zvekuti ndizvona kamare zvataida kuti tipedze mibvunzo dzatinadzo. (Zvie. 27:17) Ngatione zvino kuti tingakunda kudini kutama kugara no cokwadi katinako.
KODI DJEHOVHA ANONDIRANGARIRA HERE?
7. Mibvunzo dzipi dzekuti anhu anganani angadziita?
7 Makambodzibvunzisawo kuti: ‘Djehovha anonyasa kundirangarirawo here?’ Munhu paanozwa kuti aakoshi, pamweni iyena angatanga kurangarira kuti azviiti kugara shamwari we Musiki wedu. Zvinoita hingana kuti Mambo Dhavhidhi wakazwawo kudaro. Iyena wakashamiswa maningi nge kuona Djehovha ecipurutana anhuwo hawo, pedzepo wakabvunzisa kuti: “Djehovha, munhu i cinyi kuti mumuone, mwana we munhu i cinyi kuti mumurangarire?” (Pis. 144:3) Tingagumira kupi mhinduro we mubvunzo wa Dhavhidhi?
8. Maererano na 1 Samueri 16:6, 7, 10-12, Djehovha anoonei ku anhu?
8 Bhaibheri, rinofundisa kuti Djehovha anonyasa kupurutana aya anooneka no anhu amweni hingana aakoshi. Ngo muezaniso, Djehovha akatuma Samueri kuti aende kumba ka Djesee kuti adzodze umwe we ana ake kuti azogare mambo we Israeri. Asi Djesee wakadainza ana ake 7 basi, uye aazi kudainza mwana wake we kupedzesera, Dhavhidhi. b Asi kunyazi zvakadaro, Djehovha akasanangura Dhavhidhi. (Erengai 1 Samueri 16:6, 7, 10-12.) Djehovha aiziya Dhavhidhi uye ainyasa kuziya mushobo waainga ari nge cemukati—kuti iyena wainga ari djaha raida Djehovha.
9. Mungagara kudini no rugondo rokuti Djehovha anomurangarirai? (Onaiwo foto.)
9 Cimborangarirai kuti Djehovha akapangidza kudini kuti anomuonai. Ngo muezaniso, iyena anomupasai mazano anonyasa kuenderana no mugariro wenyu kamare. (Pis. 32:8) Izvona zvinopangidza kuti Djehovha anonyasa kumuziyai uye anorangarira maningi nge zvenyu, uye iyena anonyansa kuziya zvamunoda. (Pis. 139:1) Paya pamunoseenzesa mazano a Djehovha uye moona kuti awona ari kumubetserai kudini, imwimwi mucanyasa kugara no rugondo rekuti Djehovha anonyasa kurangarira nge zvenyu. (1 Mak. 28:9; Zvii. 17:26, 27) Djehovha anonyasa kuona zvese zvamuri kuita kuti mumuseenzere uye anziya mawara enyu. (Djer. 17:10) Uye iyena anomupikaiwo kuti mugare Shamwari yake.—1 Juau 4:19.
“Kana ukapsvaka [Djehovha], iyena acasiya kuti umuone.”—1 Mak. 28:9 (Onai ndima 9) c
KODI ZVISANANGURO ZVANDAKAITA ZVAINGA ZVE UNGWARU HERE?
10. Mibvunzo dzipi dzatingagara nadzo kana tikarangarira ngezve zvisananguro zvatakaita kare?
10 Nguwa dzimweni munhu ungagara no mubvunzo kuti zvisananguro zvaakita kare zvainga zvakanaka here. Ngo muezaniso, pamweni makaramba basa rinopagari mare yakawanda kana bhizi rinobudirira kuti mukwanise kuseenzera zvakanaka Djehovha. Pamweni padarika nguwa yakawanda, kana kuti makore manganani, uye munhuwo ungaona anhu amweni, uye pamweni zviri hingana kuti anhuwo ari kuita mare yakawanda uye ari kubudirira mu upenyu. Pakupedzesera, munhuwo ungadzibvunzisa kuti: ‘Kodi kupeta masimba kandakaita kuti ndiseenzere Djehovha kakandibetsera here? Kodi ndaidikana kumboseenzazve padoko kuti ndigare no mugariro uri nani zvino?’
11. Mutari we Pisarema 73 wainetseka ngezvei?
11 Kana imwimwi mukagarawo no mibvunzo dzakadaro, rangariraiwo ngezve nyaya yo mutari we Pisarema 73. Iyena wakaona anhu asikaseenzeri Djehovha ainga ari apfumi, ainga ano uthongo wakanaka, uye ainga asikanetseki no ciro cipi haco mu upenyu. (Pis. 73:3-5, 12) Zvaiita hingana kuti zvese zvaiahambira zvakanaka mu upenyu wawo, izvona zvakamuita kuti azwe hingana kuti azvibetseri kupeta masimba pa kuseenzera Djehovha. Marangariro awona akamuitisa kuti iyena aore mwoyo. Iyena wakagara no “cinetso icona pa zuwa rese.” (Pis. 73:13, 14) Zvinyi zvaakaita kuti akunde mazwiro aya akashata?
12. Maererano na Pisarema 73:16-18, zvinyi zvakabetsera mutari we Pisarema kuti azwe runyararo mu ndangariro?
12 Erengai Pisarema 73:16-18. Mutari we Pisarema wakaenda mu mbuto cena ya Djehovha uye mu mbuto yakaterama, iyena wakakwanisa kukanda ndangariro dzake pa mbuto. Iyena wakazwisisa kuti kunyazi anhu aya ainga ecibudirira mu upenyu, awona ainga asina kariro ye ramangwana. Mutari we Pisarema paakazwisisa izvi, iyena wakazwa runyararo mu ndangariro uye wakazwisisa kuti kukanda Djehovha pa mbuto yekutanga cainga ciri cisananguro cakanaka maningi caaidikana kuita. Ngokudaro, cido cake ce kuseenzera Djehovha cakanyasa kubamba.—Pis. 73:23-28.
13. Kana imwimwi mukadzibvunzisa ngezve zvisananguro zvamakaita, zvinyi zvicamubetserai kuti muzwe runyararo mu ndangariro? (Onaiwo foto.)
13 Bhaibheri ringakwanisawo kumubetserai kuti muzwe runyararo. Kuita kudini? Cimborangaridzai zviro zvakanaka zvamunazvo, kutobatanidzawo ushamwari wenyu na Djehovha. Kusiya izvona, edzuriraiwo kuti mubairo ungapaswa anhu asikaseenzeri Djehovha ndi zviro zvaangapaswa no nyika ino basi. Pamweni anhu awona anotokoshesa maningi ubaba waanawo no upfumi wawo, asi awona anoita izvona basi ngokuti aana kariro ye remangwana. Asi kamuri imwimwi muri kutambira makomborero a Djehovha zvino uye munotonyasa kuziyawo kuti mune ramangwana mucatambira makomborero akanakisisa maningi ekuti amusati makatomboarangarira. (Pis. 145:16) Imwimwiwo, mungarangarira zvinoteera: Atingabhuyiwo kuti kudai makaita cisananguro cimweni, upenyu wenyu waida kucinja maningi. Asi mungagara no rugondo rekuti: Uya anoita cisananguro maererano no rudo rake kuna Djehovha uye kuno amweni, iyena nguwa dzese anogara no zvese zvaanoda kuti apfare.
Rangarirai ngezve makomborero amucapaswa na Djehovha mune ramangwana (Onai ndima 13) d
KODI NDICIRI KUKOSHA KUNA DJEHOVHA HERE?
14. Mibvunzo dzipi dzekuti anganani anadzo uye ngei?
14 Nge ndaa ye kucembera, kurhwara uye kuremara, aseenzi a Djehovha angazwa hingana kuti aacakwanisi kuita zvakawanda hinga zvaaita kare. Anganani angatodzibvunzisa kuti Djehvoha ari kukoshesa here zvaari kuita. Pamweni angatodzibvunzisa kuti: ‘Kodi inini ndiciri kukosha here kuna Djehovha?’
15. Mutari we Pisarema 71 wainga ano rugondo ripi?
15 Mutari we Pisarema 71 wainga ano mazwiro akadaro, zvekuti iyena wakatoguma pa kubhuya kuti: “Musandisiye kana ndikapera simba.” (Pis. 71:9, 18) Kunyazi no mazwiro ese aya, mutari we Pisarema wainga ano rugondo rokuti Djehovha nguwa dzese aizomutsigira kana iyena akarumbwa akagondeka. Mupisarema uu wainga afunda kuti Djehovha anopfarira maningi anhu anopeta masimba pa kumuseenzera, kunyazi awona ecikonerhwa kuita zvese zvaaidikana kuita.—Pis. 37:23-25.
16. Hama dzacembera dzingaitireiwo Djehovha uye anhu amweni? (Pisarema 92:12-15)
16 Kana imwimwi macembera, rangarirai kuti Djehovha anozwa kudini paanomuringirai. Kunyazi musikacakwanisi kuita zviro zvakawanda nge ndaa ye uthongo, Djehovha angamubetserai kuti mugare makabamba pa kunamata. (Erengai Pisarema 92:12-15.) Ngokudaro, musagare mecirangarira ngezve zviro zvamusicakwanisi kuita, pane kudaro, rangarirai zviro zvamunokwanisa kuita zvino. Ngo muezaniso, imwimwi mungakwanisa kubetsera anhu amweni nge ndaa ye muezaniso wenyu uye kubetsera anhu amweni akamutenderedzai. Imwimwi mungabhuyawo mushobo wamakabetserhwa na Djehovha ke makore enyu ese uye mungabhuyawo ngezve kariro yamunayo mune ramangwana mu zvipikirhwa zva Djehovha. Kusiya izvona, musakanganwe kuti minamato yenyu ingabetserawo maningi anhu amweni. (1 Ped. 3:12) Zvirokwazvo ngezve kuti, azvinei no mugariro watinawo, tese hedu tingakwanisa kupasa zvakanakisisa zvedu kuna Djehovha uye ku anhu amweni.
17. Ngei tinodikana kusiya musambo we kudziezanisa no amweni?
17 Kana mukazwa hingana kuti amubetseri ngo kukonerhwa kuita zvakawanda mu basa ra Djehovha, garai no cokwadi cokuti Djehovha anokoshesa maningi zvese zvamunokwanisa kuita. Pamweni imwimwi mungagara no musambo we kudziezanisa zvamunokwanisa kuita uye no zvinokwanisa kuizwa no amweni. Siyai musambo uwona nokukasika! Ngei? Ngokuti Djehovha aaezanisi. (Aga. 6:4) Ngo muezaniso, Mariya wakapasa Djesu hinga cipo mafuta anonuhwirira. (Juau 12:3-5) Kusiya izvona, mufirhwakadzi asina zvokurarama nazvo zvakawanda wakapasa cipo zvimare zviiri zvakadodoka maningi. (Ruka 21:1-4) Asi kunyazi zvakadaro, Djesu aazi kuezanisa anakadzi aya aiiri. Kusiya izvona, Djesu akaona zvakaizwa no anakadzi aya aiiri hinga cipangidzo ce kutenda. Nge mushobo umwewo, Djehovha anokoshesa maningi zvese zvamunoita nge ndaa ye kutenda kenyu uye rudo, kunyazi zviro izvona mu maonero enyu mecizviona hingana kuti zvakadodoka.
18. Cinyi cicatibetsera kupedza mubvunzo dzedu? (Onaiwo bhokisi rakazwi: “ Soko ra Mwari Ringamubetserai kuti Mukunde Kutama Kugara no Cokwadi.”)
18 Nguwa dzimweni, tese isusu tingakwanisa kudzibvunzisa. Asi hinga zvataona, Soko re zvirokwazvo, Bhaibheri, ringakwanisa kutibetsera kupedza mubvunzo dzatinadzo. Parizvino, itai zvese zvamukwanisa kuita kuti mugumire mhinduro dze mibvunzo dzenyu uye nge kuita izvona, pane kuzwa makaora mwoyo, mucagara no rugondo rokuti Djehovha acamubetserai. Iyena anokoshesa kupeta masimba kamunoita pa kukanda Umambo pa mbuto yekutanga uye anozwa hinga ari kubambidzirhwa kuti amupasei mubairo. Garai no rugondo rokuti Djehovha anomuonai hinga munhu wakasisira rudo rake uye kucengethwa naye.
NGOMA 111 Zvinoita kuti Tipfare
a NYASAI KUZWISISA: Mu fundo ino, tiri kureketa ngezve kudzibvunzisa katingadziita kuti ticiri kukosha here kuna Djehovha kana kuti haiwa uye kuti zvisananguro zvatakaita kare takazviita no ungwaru here. Mibvunzo idzi andidzopi dziya dzinorekethwa no Bhaibheri dzinopangidza kuti munhu iyena aana kutenda kakabamba muna Djehovha uye mu zvipikirhwa zvake.
b Bhaibheri aribhuyi kuti Dhavhidhi wainga ano makore mangana paakasanangurhwa na Djehovha, pamweni iyena wainga atori djaha kamare.—Onai Murindiri wa 1 ya Setembro ya 2011, paji. 29, ndi. 2, mu ciShona.
c KUPANGANIDZWA KE MAFOTO PA : Mudjaha ecipurutana zvinoreketa Djehovha nge kupsvaka mazano mu Matarhwa.
d KUPANGANIDZWA KE MIFANIKISO: Hama yeciita basa re kucenesa vhidru pa roja uku yecirangaridza ngezve upenyu waacazogara nawo mu Paraizo. Iyona inorangaridza yakabata karinya yakadzara no micero, uku zvinyama zvecihamba padhuzepo.
