MUSORO WE KUFUNDA 42
NGOMA 103 Aushi—Zvipo zve Anarume
Pangidzai Kutenda nge “Zvipo zve Anarume”
“Paakakwira kudenga . . . , opasa anarume hinga zvipo.” —AEF. 4:8.
CINANGWA
Ticaona kuti abati anoseenzera, akuru e ungano, uye aonereri e nharaunda anotibetsera kudini, uye kuti tingapangidza kudini kutenda nge zvese zvaanotiitira.
1. Djesu akatipasa zvipo zvipi?
DJESU ndiye munhu ano rupo rakakura akamborarama pa nyika. Paainga ari pasi pano, iyena akaita zvishamiso zvakawanda kuti abetsere aya aida kubetserhwa. (Ruka 9:12-17) Uye iyena akatipasa cipo cakanakisisa caizopaswa no munhu, upenyu wake kamare. (Juau 15:13) Mumasure me kumutswa, Djesu akarumbwa ecipangidza rupo. Iyena akabhuya kuti aizokumbira kuti Djehovha atumire mwiya mucena kuti utifundise uye utinyaradze. Uye iyena akaitadi izvona. (Juau 14:16, 17, masoko e pasi.; 16:13) Uye eciseenzesa misangano ye ungano, Djesu aciri kutifundisa kuti tiite afundi mu nyika yese.—Mat. 28:18-20.
2. Ndiani ‘zvipo zve anarume’ zvinorekethwa pana Aefeso 4:7, 8?
2 Onai cipo cimweni catakapaswa na Djesu. Muphostori Pauro wakatara kuti Djesu paakaenda kudenga, iyena akapa “anarume hinga zvipo.” (Erengai Aefeso 4:7, 8.) Muphostori Pauro wakapanganidza kuti Djesu akapasa anarume aya hinga zvipo kuti abetsere ungano nge mishobo yakasiyana-siyana. (Aef. 1:22, 23; 4:11-13) Mazuwa ano, ‘zvipo izvi zve anarume’ zvinobatanidza abati anoseenzera, akuru e mu ungano uye aonereri e nharaunda. a Izvirokwazvo kuti anarume awona aazi kukwana uye anoshaishawo. (Tig. 3:2) Asi Tenzi wedu Djesu Kristu anoseenzesa hama idzona kuti dzitibetsere; idzona i zvipo zvake katiri.
3. Umwe na umwe wedu angatsigira kudini ‘anarume aya hinga zvipo’?
3 Djesu akagadza “anarume hinga zvipo” kuti abambise uye anyaradze ungano. (Aef. 4:12) Asi umwe na umwe wedu ungaita dii rake pa kubetsera hama idzi pa kuita basa iri raakapaswa. Kuti tizwisise, cimborangaridzai zvinoteera: Anganani edu takambobetsera pa kuwakwa ke Nyumba ye Umambo, nge mushobo wakananga kamare. Amweni anobetsera nge kuita mabasawo amweni akadai hingana e kubika, kuunzisa zviro zvicaseenzeswa pa kuwaka, uye kutounzisa anhu acaseenza pa basa irona. Nge mushobo umwewo, nge masoko edu uye zviito zvedu, tese isusu tingakwanisa kubetsera pa basa rinoizwa no abati anoseenzera, akuru e mu ungano, uye aonereri e nharaunda. Ngatione kuti basa rawo rinotibetsera kudini uye tingapangidza kudini kutenda awona uye Djesu Kristu, akatipasa ‘anarume aya hinga zvipo.’
ABATI ANOSEENZERA ANOITA “MABASA E KUBETSERA”
4. Ndi mabasa api aiizwa no abati anoseenzera mu nguwa ye aphostori?
4 Mu nguwa ye aphostori, hama dzinganani dzaigadzwa hinga abati anoseenzera. (1 Ti. 3:8) Zvinoita hingana kuti muphostori Pauro waireketa ngezve abati anoseenzera pana 1 Akorinti 12:28, paakatara ngezve “mabasa e kubetsera.” Zvese zvinopangidza kuti abati anoseenzera aiita mabasa anokosha kuitira kuti akuru e ungano akwanise kukanda ndangariro dzawo pa kubambisa hama uye kuita basa re kuparidzira. Ngo muezaniso, pamweni abati anoseenzera aiseenzeswa hinga atari pakuita makopiya e Matarhwa e Bhaibheri uye pamweni awona aienda kootenga zviro zvaiseenzeswa pakuita makopiya awona.
5. Mabasa api anoizwa no abati anoseenzera mazuwa ano?
5 Rangarirai mabasa manganani anoizwa no abati anoseenzera mu ungano yenyu. (1 Ped. 4:10) Pamweni awona anoonerera ngezve kuseenzeswa ke mare ye ungano uyewo ngezve ndima dzinoparidzirhwa no ungano. Amweni anotoseenzawo pa kukumbira uye kukowanisa mabhuku, amweni anoonerera ngezve ma audhiyo no mavhidhiyo, anoseenza hingana arindiri uyewo pakuitawo kuti Nyumba ye Umambo irumbwe yakanaka uye yakacena. Mabasa ese aya anokosha kuti ungano iseenze ngo mushobo wakarongeka. (1 Ako. 14:40) Kusiya izvona, abati anoseenzera amweni anoita matii pa musangano we Basa Redu uye Kurarama Kedu ke Cikristu uye anoitawo mharidzo ku anhu ese. Pamweni paya, mubati anoseenzera unogadzwa kuti abetsere muonereri we cikwata ce kubuda mu basa re kuparidzira. Uye pamweni paya, abati anoseenzera anopikwawo no akuru kuti aiite basa re kuusha.
6. Ngei tinodikana kukoshesa zvinoizwa no abati anoseenzera?
6 Onai zvakabhuiwa no anhu anganani ngezve rubetso rinopasa abati anoseenzera ku ungano. Beberly b hanzvadzi imweni ye ku Bolívia, yakabhuya kuti: “Inini ndinonyasa kukhorovhera musangano nge ndaa ye rubetso rinopaswa no abati anoseenzera. Nge ndaa ye zvaanoita, inini ndinokwanisa kuemba, kupasa mhinduro, kuzwa mharidzo uye kufunda nge kuona mavhidhiyo, mifanikiso kana kuti mafoto anopangidzwa ku musangano. Awona anoita kuti Nyumba ye Umambo igare yakacengeteka uye anobetsera aya anopinda misangano eciseenzesa vhidhiyo koferensiya. Mumasure me musangano, awona anotanga ndiwo kucenesa Nyumba ye Umambo uye kubetsera pakuonerera mare ye ungano uye anotipasawo mabhuku atinoda. Tinotenda maningi ngo zvakawanda zvaanotiitira!” Leslie, mukadzi we mukuru umweni unogara ku Colômbia, unoti: “Mwamuna wangu unogonda maningi no abati anoseenzera. Kudai pasina awona, iyena waizogara akabatikana maningi. Ndiyo ndaa, ndinotenda maningi no kugara kawo akagadzirira kubetsera.” Pamweni imwimwi muno mazwiro amwewo ku abati anoseenzera e mu ungano yenyu.—1 Ti. 3:13.
7. Tingapagidza kudini kuti tinotenda nge abati anoseenzera? (Onaiwo foto.)
7 Azvikwani basi kugara no mazwiro e kutenda ngezve zvinoizwa no abati anoseenzera. Bhaibheri rinotikohomedzesa kuti: “Pangidzai kuti muri anhu anotenda.” (Ako. 3:15) Cristóvão, mukuru umweni unogara ku Finlândia, unopanganidza zvaanoita kuti apangidze kuti anotenda zvinoizwa no abati anoseenzera, unoti: “Inini ndinosotara tsamba kana kutumira mesaje ino tsamba yo Bhaibheri yecibhuya nge mushobo wakananga ngezve mushobo wandakabambiswa no mubati anoseenzera uye ndinobhuyawo kukoshesa kandinoita zvinoizwa no mubati anoseenzerewo.” Pascal na Jael anogara ku Nova Caledônia, anobhuwa kuti anosoita munamato ecibhuya nge mushobo wakananga ngezve abati anoseenzera. Pascal unopanganidza eciti: “Mazuwa ano, tiri kuita minamato ye kudeketera ye kukumbira uye kutenda ngezve abati anoseenzera e mu ungano medu.” Zvezvirokwazvo Djehovha anozwa uye anodaira minamato yakadaro.—2 Ako. 1:11.
AKURU E UNGANO “ANOSEENZA NO SIMBA”
8. Ngei muphostori Pauro wakatara kuti akuru “aiseenza no simba”? (1 Atesaronika 5:12, 13)
8 Mu nguwa ye aphostori, akuru aiseenza no simba kuti abetsere ungano. (Erengai 1 Atesaronika 5:12, 13; 1 Ti. 5:17) Awona “aitungamirira” ungano kana kuti aironga misangano uye pamwepo no akuru amweni aiita zvisananguro. Awona aipasawo “mazano” ku hama no hanzvadzi—nge mushobo wakananga, asi ecizviita no rudo, no cinangwa cekucengetedza ungano. (1 Ate. 2:11, 12; 2 Ti. 4:2) Kusiya izvona, anarume aya aidikana kuseenza kuti ariritire mhuri dzawo uye kuti arumbwe ano kutenda kakabamba uye ushamwari wakabamba na Djehovha.—1 Ti. 3:2, 4; Tito 1:6-9.
9. Ngaapi mabasa manganani anoizwa no akuru?
9 Mazuwa ano, akuru e ungano, i anarume akabatikanawo maningi. Awona i aziisi e Umambo. (2 Ti. 4:5) Akuru e ungano anotipasa muezaniso wakanaka nge kuseenza ecishingaira mu basa re kuparidzira, anorongawo basa re kuparidzira mu ndima ye ungano uye anotirowedza kuti tigare afundisi akanaka uye aparidzi. Akuru anoseenzawo hingana atongi ano unatsi uye usisi. Munhu paanoita cishaishi cakakura, akuru e ungano anopeta masimba kuti amubetsere kuti agarezve no ushamwari na Djehovha. Pa nguwa imweyo, anoitawo zviri zvese kuti ungano igare yakacena. (1 Ako. 5:12, 13; Aga. 6:1) Kupinda zvese, akuru e ungano anoziikanwa hingana aushi. (1 Ped. 5:1-3) Awona anonyasa kugadzirira mharidzo dzawo dzinotsamira mu Bhaibheri, awona anopetawo masimba kuti aziye munhu umwe na umwe ari mu ungano, awona anovhakacira hama ecidziusha. Uye akuru amweni anobetsera pa kuwakwa uye kugadziriswa ke Nyumba dze Umambo, pa kurongwa ke magungano, pa Comissões de Ligação com Hospitais uye pa Zvikwata zve Kuvhakacira Aya Akabhashari mu Cipitari uye kutosiya mabasa amweni aanotoitawo. Zvezvirokwazvo, akuru e ungano anoseenza no simba!
10. Ngei tinodikana kukoshesa mabasa anoizwa no akuru?
10 Djehovha akagondesa ku aseenzi ake aushi aizoacengetedza zvakanaka, ngokudaro, “awona aazothyi kana kupatika.” (Djer. 23:4) Hanzvadzi imweni inogara ku Finlândia inozwi Johanna, yakaona kudzadzika ke masoko aya mai akhona paakabatana no nhenda inoshupha. Iyona inopanganidza kuti: “Kandiri zvinondishuphira maningi kureketa mazwiro angu ku amweni. Asi mukuru umweni wandainga ndisikanyasi kuziya zvakanaka wakandizwa no mwoyo unononoka kutsamwa uye wakaita munamato pamwepo na inini uye wakandipangidzira kudiwa kandinoizwa na Djehovha. Inini andiedzuriri zviro zvaakareketa, asi ndinoedzuririra kuti ndakazwa runyararo rakakura. Ndino rugondo rokuti Djehovha akamutuma kuti andibetsere pa nguwa yakasisira.” Akuru e ku ungano kenyu akamubetseraiwo kudini?
11. Tingapangidza kudini kutenda nge akuru? (Onaiwo foto.)
11 Djehovha anopfara maningi patinopangidzira kutenda no mwoyo wese ku akuru “no basa rese raanoita.” (1 Ate. 5:12, 13) Henrietta unogarawo ku Finlândia, unoti: “Akuru akagadzirira kubetsera, asi izvona azvidi kureya kuti awona ano nguwa, simba rakawanda kana kuti aana zvinetso. Nguwa dzimweni, ndinoguma pano mukuru uye ndinoti: ‘Munozviziya here? Imwimwi muri mukuru wakanaka. Garai meciziya izvona.’” Hanzvadzi imweni inogara ku Turquia inozwi Sera, inoti: “Akuru anodikanawo kupaswa ‘simba’ kuti arumbwe eciita basa rawo. Tingaapasawo simba irona nge kuatarira tsamba ye kutenda, kuapika kuti tirhye tese kana kuti kutoseenzawo nawo mu basa re kuparidzira.” Pano mukuru unoseenza no simba uye wakasisira kutendwa here? Zvakadini kurangarira ngezve mushobo we kupangidzira kutenda kaari.—1 Ako. 16:18.
Imwimwi mungakwanisa kupasa “simba” hama dzakaora mwoyo kuti dzienderere mberi (Onai mandima 7, 11, 15)
AONERERI E NHARAUNDA ANOBAMBISA UNGANO
12. Djesu aiseenzesa ani kuti abambise ungano mu nguwa dze aphostori? (1 Atesaronika 2:7, 8)
12 Anganani e “anarume hinga zvipo” atakapaswa na Djesu, anoseenza mu ungano nge mushobo umweni. Ecitungamirirhwa na Djesu, akuru e mu Djerusarema akagadza Pauro, Bharnabhee uye amweni hinga aonereri e nharaunda. (Zvii. 11:22) No cinangwa cipi? Kuita hingana abati anoseenzera uye akuru, aonereri e nharaunda anobambisa uye anotsigira ungano. (Zvii. 15:40, 41) Anarume aya anodzipira kutora upenyu usiripi nyore uye kutokanda upenyu wawo pa ngozi kuti afundise uye abambise amweni.—Erengai 1 Atesaronika 2:7, 8.
13. Ngaapi mabasa manganani anoizwa no aonereri e nharaunda?
13 Aonereri e nharaunda nguwa dzese ari kuita rhwendo. Akawanda awo anoita rhwendo rino makirometro akawanda kuti aende ku ungano imweni. Masumana ari ese, aonereri e nharaunda anoita mharidzo dzakawanda, anovhakacira hama kuti adziushe, anoita misangano ye mapiyonero, misangano ye akuru uye misangano ye kubuda mu basa re kuparidzira. Muonereri we nharaunda anogadzirira mharidzo uye anoronga magungano. Makore ese, iyena ndi mufundisi we cikora ce mapiyonero uye anoronga musangano unokosha no mapiyonero e mu nharaunda. Kusiya zvese izvi, iyena unodikana kuitawo mabasa amweni anokosha uye amweni akhona anodikana kuizwa nokukasika.
14. Ngei tingabhuya kuti aonereri e nharaunda i makomborero ku ungano?
14 Ngei tingabhuya kuti aonereri e nharaunda i zvipo ku ungano? Hama imweni ye ku Turquia, yakabhuya izvi ngezve vhakaciro ye aonereri e nharaunda: “Pa vhakaciro imwe na imwe, inini ndinozwa ndino cido cekubetsera hama no hanzvadzi dze mu ungano yangu. Inini ndakaziya aonereri e nharaunda akawanda uye pa ese aya, apana kana umwe hake wakapangidza kuti wainga akabatikana maningi uye kuti wainga asikadi kucedza.” Johanna wamborekethwa, wakaseenza mu basa re kuparidzira no munereri we nharaunda, asi iyena aazi kukwanisa kureketa no munhu. Iyena unoti: “Kunyazi zvakadaro, inini ndinondoedzurira zuwa riya. Hanzvadzi dzangu mbiri dzainga dzacinja kuenda koogara kure uye inini ndaizwa cisuwo cakakura. Muonereri we nharaunda wakandibambisa uye wakandibetsera kuona kuti kugara kure no kure uku kainga kuri ke nguwa doko. Zvino, pamweni atingakwanisi kugara dhuze no anyaukama edu kana shamwari dzedu, asi mu nyika ipsva ticagara tese nawo, kuenda no kuenda.” Ii i miezaniso minganani inopangidza kuti aonereri e nharaunda, i makomborero ku aya aanovhacira.—Zvii. 20:37–21:1.
15. (a) Maererano na 3 Juau 5-8, tingapangidza kudini kuti tinotenda nge aonereri e nharaunda? (Onaiwo foto.) (b) Ngei tinodikana kukoshesa akadzi e anarume aya anoseenza mu ungano uye tingazviita kudini? (Onaiwo bhokisi rakazwi: “ Pangidzai kuti Munotenda Akadzi Awo.”)
15 Muphostori Juau wakakohomedzesa Gayo kuti atambire zvakanaka hama dzainga dziri aonereri e nharaunda ainga aenda koobambisa ungano. Iyena wakatara kuti: “Ita zvese zvaunokwanisa kuti uenekane nadzo nge mushobo unopfadza Mwari.” (Erengai 3 Juau 5-8.) Isusu tingazviitawo kudini? Umwe we mushobo we kuita izvona ngewe kupika muonereri we nharaunda kuti tirhye pamwepo. Mushobo umweni ngewe kubatikana mu basa re kuparidzira pa sumana ye kuvhakacirhwa. Leslie wambobhuiwa ngezvake, unopanganidza kuti unotenda aonereri e nharaunda nge mishobo imweni. Iyena unoti: “Inini ndinonamata kuti Djehovha aariritire pa zvese zvaanoda. Inini no mwamuna wangu takamboatarirawo tsamba teciatenda nge kutivhakacira uye teciabvunza mushobo waakatibetsera.” Edzurirai kuti aonereri e nharaunda ndi anhuwo hingana isusu. Pamweni paya, awona anobatanawo no kurhwara, kudzirhya mwoyo uye kuora mwoyo. Kana tikaabvunza masoko e unaki kana kupasa cipo cisikazi kukura, Djehovha angatiseenzesa pa kudaira minamato ye aonereri e nharunda.—Zvie. 12:25.
TICIRI KUDA ‘ZVIPO ZVAKAWANDA ZVE ANARUME’
16. Tecirangarira ngezve tsamba ya Zvierengo 3:27, hama imwe na imwe inodikana kudziita mibvunzo dzipi?
16 Mu nyika yese muciri kudiwa hama dzakawanda kuti dziseenze hinga ‘zvipo zve anarume.’ Kana imwimwi muri hama yakabhabhatidzwa, “mungakwanisa here kubetsera”? (Erengai Zvierengo 3:27.) Imwimwi muno cido ce kupeta masimba kuti mugare mubati anoseenzera here? Kana maa mubati anoseenzera, muno cido ce kugara mukuru uye kuseenza no simba kuti mucengete hama dzenyu mu ungano here? c Imwimwi mungaita cinjo dzinganani mu upenyu wenyu kuti mupinde Cikora ce Aziisi e Umambo here? Cikora ici, cinomurowedzai uye cinomubetserai kuti munyase kuseenzeswa na Djesu. Kana imwimwi meciona kuti zvinangwa izvi amukwanisi kuzvigumira, itai munamato kuna Djehovha. Kumbirai kuti mwiya mucena wake umubetserei kuita basa ripi haro ramucapaswa.—Ruka 11:13; Zvii. 20:28.
17. ‘Zvipo zve anarume’ zvinopangidzei ngezva Mambo wedu Djesu Kristu?
17 Hama dzinoseenzeswa na Djesu hinga ‘zvipo zve anarume,’ i zvipangidzo zvekuti iyena ari kurumbwa ecitiriritira mu mazuwa ano e kupedzesera. (Mat. 28:20) Tino Mambo ano rudo, ano rupo, anonyasa kuona zvakanaka uye anotipasa hama dzakanyasa kugadzirira kuti dzitipase zvatinoda. Pamunorangarira zvese izvi, imwimwi munotenda maningi, andizvopi here? Hino psvakai mikana kuti mupangidze kuti munokoshesa hama idzi dzinopeta masimba. Uye musakanganwe kutenda Djehovha, Manyuku e “cipo cese cakanaka uye cipo cese cakakwana.”—Tig. 1:17.
NGOMA 99 Zviuru zve Hama
a Akuru anoseenza mu Dare Rinotungamirira, abetseri e Dare Rinotungamirira, nhengo dze Matare e Mafiriyari uye aya anoita mabasa amweni, awonawo i ‘zvipo zve anarume.’
b Mazina amweni akacinjwa.
c Kuti muziye zvamunodikana kuita kuti mugare mubati anoseenzera kana kuti mukuru, onai mafundo akazwi: “Hama—Muri Kupeta Masimba Kuti Mugare Mubati Anoseenzera Here?” uye “Hama—Muri Kupeta Masimba Kuti Mugare Mukuru Here?” mu Murindiri wa Novembro ya 2024.
