NGOMA yaikosha ku tsika dze Aisraeri e kare. Uye Bhaibheri kakawanda kakhona, rinobhuya ngezve anhu eciridza zviridzwa zve ngoma kana kuemba. Nge muezaniso, Mapisarema, Ngoma ya Soromoni uye Mariro. Bhuku rimweni rinobhuya ngezve Upenyu we Anhu e mu Nguwa dze Bhaibheri, rinoti: Bhaibheri “rinopangidza pamhene kuti Aisraeri aiseenzesa ngoma mu mabasa akasiyana-siyana e upenyu wawo.”

Ngoma zuwa no zuwa. Aisraeri airidza ngoma kuti apangidze mazwiro awo. (Isa. 30:29) Anakadzi airidza mapandero, aiemba ngoma ecipfara, uye aitamba pa mhemberero. Ngo muezaniso, mambo paaigadzwa, masurudado paaikunda pa hondo kana pa mabiko api hawo pa kunamata (Ato. 11:34; 1 Sam. 18:6, 7; 1 Mad. 1:39, 40) Aisraeri aiembawo kuti apangidze kurhwadziwa kaaizwa paaifirhwa no munhu. (2 Mak. 35:25) Bhuku rimweni rinoti: “Zvezvirokwazvo, Ahebheru ainga ari anhu aipfarira ngoma.”

Ngoma pa nyumba ya mambo. Madzimambo e Israeri aipfarirawo maningi ngoma. Ngo muezaniso, Mambo Sauri wakaunzisa Dhavhidhi pa nyumba pake kuti aridzirhwe arpa. (1 Sam. 16:18, 23) Munguwa yakazoteera Dhavhidhi kamare paakazogara mambo, iyena wakagadzirira zviridzwa zve ngoma, wakatara ngoma dzakawanda uye wakaronga zviridzwa zvaairidza mu tempro ya Djehovha. (2 Mak. 7:6; Amo. 6:5) Uye Mambo Soromoni wainga ano aembi ake e anarume no anakadzi aiemba pa nyumba pake.—Mup. 2:8.

Ngoma pa kunamata. Zvinonyanya kukosha ngezve kuti Aisraeri aiseenzesa ngoma kuti anamate Djehovha. Kuti tinyase kuzvizwisisa, anarume 4000 airidza zviridzwa mu tempro ku Djerusarema. (1 Mak. 23:5) Awona airidza zviridzwa zve simbi zvinopondaniswa, zviridzwa zve usaru, uye maarpa. (2 Mak. 5:12) Asi awona andiwopi oga basi ainamata Djehovha eciseenzesa ngoma. Aisraeri akawanda aiemba paaiita rhwendo kuenda ku Djerusarema kuti abatanidzwe pa mitambo ikona. Ngoma dzimweni dzakhona dzakadainzwa kuti Ngoma dze Kukwidza (Pis. 120-134) Uye maererano no matarhwa e Cidjudha, Aisraeri aiemba Mapisarema e Hallel (Hareri) a kana ngoma dze kukudza Djehovha pa nguwa yaairhya Paskwa.

Ngoma dzinorumbwa dzecikosha ku anhu a Mwari. (Tig. 5:13) Kuemba i dii re kunamata kedu. (Aef. 5:19) Isusu tinonyasa kugara tiri padhuze no hama dzedu patinoembera Djehovha ngoma tiri pamwepo. (Ako. 3:16) Ngoma dzinotibetserawo patinonga tecibatana no mugariro we zviro unoshupha. (Zvii. 16:25) Zviri pamhene kuti ngoma ndi umwe we mushobo we kupangidza kutenda kedu kuna Djehovha uye rudo redu kaari.