Berere raiseenza hingana musuwo we kupinda mu mbuto Cena yo tempro. Maererano no Bhaibheri ro Nyika Ipsva re Matarhwa Macena rakabudiswa kare risati ragadziriswa mu 2023, “berere ro mberi ro nyumba rainga rakapamhama, rakaezana no nyumba rino makubhiti 20. Uye rainga rakareba makubhiti 120.” (2 Mak. 3:4) Turikiro imweni inobhuyawo kuti, berere rainga rakareba “makubhiti 120” kana kuti rainga rakareba mametro 53.

Asi, Bhaibheri ro Nyika Ipsva rakabudiswa mu 2023 rinobhuya ngezve berere re tempro ya Soromoni kuti: “Yainga yakareba makubhiti 20,” yakareba mametro anoda kukwana 9. a Onai zvikonzero zvinganani zvakaita kuti cinjo ii iizwe.

Kureba ke berere akubhuiwi pana 1 Madzimambo 6:3. Mu vhersikuro ii, Djeremiya unoreketa ngezve kukura uye kupamhama ke berere, aabhuyi ngezve kureba karo. Pedzepo pa kapituro inoteera, iyena unonyasa kupanganidza ngezve matii manganani e tempro, kutobatanidzawo Bahari re simbi yakanyunguruswa, zvingoro gumi uye mapirari maiiri e kobre yakanyunguruswa zvaigara ku dii re kunza ke berere. (1 Mad. 7:15-37) Kana berere rainga rino mametro anodarika 50 uye rainga rakakura maningi kudarika matii amweni e tempro, hino ngei Djeremiya asikazi kureketa ngezve kureba ko berere? Mumasure me kudarika makore akawanda, azii anganani e Cidjudha akatara kuti berere rainga risikazi kureba maningi kudarika matii amweni e tempro ya Soromoni.

Apsvakisisi aana cokwadi cokuti maparedhi e tempro aizokwanisa kuthwara berere rino makubhiti 120. Zviwakwa zvakareba zve mu nguwa yo kare zvaiizwa no mapuwe uye matijoro, hingana misuwo dzo ku Edjipitu, pasi zvainga zvakakura uye zvaienda mudenga zvecitetepa. Asi panocokuita no tempro ya Soromoni zvainga zvakasiyana. Akwarakwatisi anorangarira kuti paredhi ye tempro yainga isikadariki 6 makubhiti kana kuti 2.7 metro ye kupamhama. Theodor Busink unoziya ngezve kuwaka, unoti: “Nge ndaa ye kukura ke paredhi inopinda mukati me tempro, berere rainga risikazokwanisi kureba makubhiti 120.”

Tsamba ya 2 Makoronika 3:4 pamweni aizi kunyasa kukopiarhwi zvakanaka. Kunyazi matsamba amweni akakopiarhwi o kare ecibhuya kuti “120” pa tsamba ii, matsamba amweni akagondeka hingana a Codex Alexandrinus yo zana ro makore ro cishanu uye Codex Ambrosianus yo zana re makore recitanhatu, anobhuya “20 makubhiti.” Asi ngei mutari waizotara “120” pa mbuto yaida kutarhwa 20? Ngokuti masoko e kuti “100” uye “makubhiti” akatodzana maningi mu Cihebheru. Ndiyo ndaa, zvaizogara nyore kuti mutare atare “100” pa mbuto yaidikana kutarhwa “makubhiti.”

Asi kunyazi teciedza kunyasa kuzwisisa uye kunyasa kupanganidza zvainga zvakaita tempro ya Soromoni, zvatiri kuda kamare i kukanda ndangariro dzedu pa zvinoimirirhwa no tempro—tempro huru ye kumwiya. Isusu tinotenda maningi Djehovha, nge kupika aseenzi ake ese kuti amunamate mu tempro iyona.—Aheb. 9:11-14; Zvak. 3:12; 7:9-17.