Inini ndakabarhwa muna 1955, uye inini ndainga ndiri mudoko paana atatu. Inini ndakakurira padhuze no thaundi rinogara ku mabvazuwa ke katemaidumba ku Finlândia, nyamasi uno ririkuzikanwa hinga thaundi ro Vantaa.

Mai angu akabhabhatidzwa inini ndisati ndabarhwa, asi baba angu aazi kupfara kuti mai angu agare Mupupuri wa Djehovha. Awona aazi kusiya kuti inini no hama dzangu tifundiswe Bhaibheri na mai angu kana kutitora kwenda nesu ku misangano. Ndiyo ndaa, awona aitifundisa Bhaibheri kana baba edu asiripi padhuze.

Kubvira ndiciri mwana mudoko ndainga ndadzipira kuzwira Djehovha. Ngo muezaniso, zuwa rimweni pandainga ndino makore 7, mufundisi wangu wakandinyangadzwira ngokuti ndainga ndisikadi kurhya verilättyjä (mapankeka e ngazi e ku Finlândia). No nyara imwe awona akapsvikinyidza matama angu kuti andibambidzire kufungura muromo, uye no nyara imweni eciseenzesa garfu, akaedza kukanda mu muromo mangu cokurhya ici. Inini ndakakwanisa kuponda nyara yawo kuti garfu rimbwere pasi.

Pandainga ndaano makore 12, baba angu akafa. Mumasure mazvo, ndainga ndaakukwanisa kupinda misangano. Hama dze mu ungano dzakandipangidzira rudo uye ndizvo zvakaita kuti inini ndikure pakunamata. Inini ndakatanga kuerenga Bhaibheri mazuwa ese uye ndecinyasa kufunda zvakanaka mabhuku e sangano. Musambo uu wakanaka  we kufunda, wakandibetsera kuti ndikwanise kubhabhatidzwa. Inini ndakakwanisa kuita izvona mu 8 ya Agosto ya 1969, pandainga ndino makore 14.

Pandakapedza kufunda cikora, inini ndakatanga kuseenza hinga mupiyonero we nguwa dzese. Uye mumasure me masumana manganani, ndakacinja kuti ndiende kaidiwa aparidzi akawanda, ku Pielavesi padhuze no thaundi guru ro Finlândia.

Ku Pielavesi, ndiko kandakaziya mukadzi wangu anodiwa, Sirkka. Inini ndakamuda maningi ngokuti iyena wainga ano maonero ari pakati no pakati, waidzidodosa uye waida zve kunamata. Wainga asikadi mbiri kana kudzionesa uye waipfara no zviro padoko basi zvaainga anazvo. Tiri airi, taida kuita zvatinokwanisa kuti tiseenzere Djehovha tisikaetseri kutambira ubaba. Isusu takacata mu 23 ya Marso ya 1974. Pane kuita rhwendo kuenda ku lua de mel, isusu takaenda kooseenzera ku Karttula, ku mbuto yaidiwa aparidzi akawanda.

Kubvira patakacata, Djehovha akatipangidza kuti kana tikakanda Umambo wake pa mbuto yekutanga mu upenyu, iyena aizotipasa zvese zvataida zve kurarama nazvo. (Mat. 6:33) Ngo muezaniso, pa kutanga isusu tainga tisina karu ku Karttula. Isusu taiita rhwendo no bhaskoro. Asi mu mbuto ii pa nguwa ye kutonhora, zvese zvinoita mapuwe ngo kutonhora uye temperatura yaiterera pasi po zero grau. Kuti tikwanise kuparidzira mu ndima yakakura ye ungano, isusu taidikana kugara no karu. Asi tainga tisina mare ye kuitenga.

Tisikakariri, imwe ye hama yangu yakauya kootivhakacira. Iyena wakatipasa karu yake hinga cipo. Iyena wainga atoripa seguro yo karu. Isusu cataidikana kuita basi, i kudzadza thanki no mafuta. Ndiyo ndaa, isusu tainga taano karu iya yataida.

Djehovha akatipangidzira kuti aizotiriritira pa zvese zvataida. Isusu taidikana basi kukanda Umambo pa mbuto yekutanga mu upenyu.

Patainga tiri pa Cikora ce Basa re Upiyonero muna 1978, hama Raimo Kuokkanen, a umwe we mufundisi, wakandikohomedzesa kuti ndikursari Cikora ce Giriadhi. Hino takatanga kufundira Cingezi tino marangariro e kuzokwaniriswa kuti tipinde pa Cikora. Asi, muna 1980, tisati tadzadzisa maphepha e petisau, takapikwa kuti tiseenze ku Bheteri ro Finlândia. Pa nguwa iyona, hama dzaiseenza pa Bheteri dzainga dzisikatenderhwi kudzadzisa formurariyo ye petisau ye kukursari Giriadhi.  Asi isusu taida kuseenza kainga kakanakira Djehovha, haiwa kataida isusu. Ndiyo ndaa, takatenda mupiko uu. Kunyazi zvakadaro, isusu takarumbwa tecifundira Cingezi kuitira paya paizogara no mukana we kudzadzisa petisau ye Giriadhi.

Makore manganani akazoteera, Dare Rinotungamirira rakazotendera kuti hama dzinoseenza pa Bheteri dzipindewo pa Cikora ce Giriadhi. Ciriporipoco, isusu takatodzadzisa petisau kuti tiende ku Cikora, asi haiwa ngokuti isusu tainga tisikacadi basa re pa Bheteri. Kusiya izvona, isusu taitodzipira kuseenza ku mbuto yaitodiwa anhu, paya pataizopikwa! Isusu takapikwa kuti tikursari turma 79 ye Giriadhi mu Setembro ya 1985. Isusu takapikwa kuti tiende ku Colômbia.

Patakaguma ku Colômbia, takagadzwa kuti tiseenze ku Bheteri. Inini ndakaita zviri zvese kuti ndikwanise kudjairana no basa re ku Bheteri, asi mumasure me gore rimwe inini ndakakumbira kuti ndicinjwe basa iri. Rakagara zuwa rekutanga uye rekupedzesera randakaita izvona. Isusu takapaswa basa re umisionariyo ku thaundi re Neiva, ku dhepartamento ye Huila.

Inini ndakagara ndecipfarira basa re kuparidzira. Pandaiseenza hinga mupiyonero ku Finlândia ndisati ndawaka, ndaitangisa comacibesi-besi uye ndaizohwirira cousiku. Mumasure mekuti inini na Sirkka tacata, taipedza zuwa rese teciparidzira. Pataiita rhwendo kuenda ku ndima iri kure no kumba, isusu taiwatira mu karu medu. Nge mushobo uu isusu taikhorovhera zvakanaka rhwendo redu uye taikwanisa kuparidzira comacibesi-besi pa zuwa rinoteera.

Kuseenza hinga mamisiyonariyo, kakaita kuti tihwirire kugara no cido ciya catainga tinaco pakutanga. Ungano yedu yakatanga kukura maningi, uye isusu takakwanisa kuona kuti hama dze ku Colômbia dzainga dzino rureremedzo, rudo, uye cido.

Ku dhuze no kataiseenzera ku Neiva kainga kusina Mupupuri wa Djehovha kunyazi umwe hake. Inini ndaida maningi kuti tikwanise kuparidzira masoko akanaka ku mbuto iyona, asi nge ndaa ye anhu aiita zve hondo, mbuto ii yainga isikazi kucengeteka kuno aya ainga asikararamiri ikona. Ndiyo ndaa, inini ndaiita munamato kuti munhu umwe unogara ikona agare Mupupuri wa Djehovha. Inini ndairangarira kuti zvainga zvakanaka kuti munhu unogara kweneyo afunde Bhaibheri ku mbuto yataigara ku Neiva, obhabhatidzwa, okura pa kunamata, pedzepo ohwirira kumutanha uwona kuti aparidzire masoko akanaka. Inini ndainga ndisikarangariri kuti Djehovha aizoita zviro nge mushobo wakanaka kupinda uu.

Mumasure mazvo, inini ndakatanga kufunda Bhaibheri no mudjaha umweni unozwi Fernando González. Iyena wairarama ku Algeciras, ku rimwe re mathaundi rainga risina Mupupuri wa Djehovha. Fernando waihamba rhwendo re mukuwo ungadarika makirometru 50 kuti aende kooseenza ku Neiva. Iyena waigadzirira zvakanaka fundo yake ye Bhaibheri uye pakupedzesera iyena waitopinda misangano yese. Kubvira pa sumana yaakatanga kufunda, iyena wakatanga kufundisa anhu zvese zvaaifunda mu Bhaibheri ku thaundi raaigara.

Fernando wakabhabhatidzwa muna Janero ya 1990, mumasure me kudarika mwedzi 6 kubvira paakatanga kufunda Bhaibheri. Pedzepo, iyena wakagara mupiyonero we nguwa dzese, uye ngekuti ku Algeciras kainga kaano Mupupuri wa Djehovha, Bheteri rakakwanisa kugadza mapiyonero espesiayari  ku mbuto iyona. Muna Fevrero ya 1992, ikona kakaumbwa ungano.

Asi Fernando aazi kuparidzira basi mu thaundi rake. Mumasure me kucata, iyena no mukadzi wake akacinja kuenda ku São Vicente del Caguán, ku thaundi rimweni kainga kusina Apupuri a Djehovha. Kweneyo, awona akabetsera kuumba ungano. Muna 2002, Fernando wakagadzwa kuti agaremuonereri we nharaunda, uye iyena no mukadzi wake, Olga, ari kurumbwa ari mu basa irona dakara nyamasi.

No esperiensiya ii, ndakafunda kuti zvinokosha maningi kuita munamato wakananga panocokuita no basa redu. Djehovha anokwanisa kuita zviro zvekuti isusu atikwanisi kuzviita, ngokuti kukorora nge kake, haiwa kedu.—Mat. 9:38.

Muna 1990, isusu takagadzwa kuti tiseenze hinga aonereri e nharauda. Pa basa redu rokutanga isusu takaenda kooseenza ku thaundi guru re Bogotá. Izvona zvakatisiya tecinetseka, ngokuti isusu tainga tisati tadjaira kurarama mu thaundi rakakura uye rino anhu akawanda. Inini no mukadzi wangu takaezanawo no anhu amweni, apana kamare basa ratinonyasa kuziya. Asi, isusu takaona kuti Djehovha akadzadzisa zvaakabhuya pana Afiripi 2:13. Panoti: “Mwari maererano no zvinomupfadza ndiye ari kumubambisai, ecimupasai cido ce kuita zviro no simba re kuzviita.”

Mumasure me cinguwa, isusu takagadzwa kuti tiende kooseenza ku nharaunda ye Medellín, thaundi randambobhuya pakutanga. Anhu e ikona ainga adjaira kuita zve cisimba mu makwanza, awona aitopfarira kuita izvona. Ngo muezaniso, zuwa rimweni pandainga ndeciitisa fundo ye Bhaibheri, ndakazwa pfuti yakarira ku dii rimweni re nyumba kandainga ndiri. Inini ndainga ndaadhuze kutowata pasi, asi mufundi wangu we Bhaibheri wakarumbwa ecierenga ndima akaterama, kuita hingana apana caiitika. Paakapedza kuerenga, iyena wakakumbira kutarauka padoko uye wakabuda. Mumasure mazvo, iyena wakahwirira no ana ake aiiri uye wakabhuya hinga mushobo waanosoita, iyena wakati: “Ndirekerereiwo, inini ndainga ndaenda kootora ana.”

Isusu takasonganawo no mugariro waikanda upenyu wedu pa ngozi. Zuwa rimweni, patainga teciparidzira nyumba no nyumba, mukadzi wangu wakauya ecigogoma, ecinetseka uye asina simba. Iyena wakabhuya kuti uripo munhu wainga aedza kumufura no pfuti. Inini ndakathya. Asi mumasure mazvo, takazoziya kuti munhu waida kumufurewo zvezvirokwazvo wainga ecida kufura anarume amweni ainga ecidarika padhuze na Sirkka; mwanarumewo wainga asikadi kufura mukadzi wangu.

Simba rainga rino hama dze mbuto iyona, rakatikohomedzesa kuti tikwanisane no migariro yakaita hingana ii uyewo no migariro imweni inoshupha maningi. Isusu takazorangarira kuti kana Djehovha aibetsera hama, iyena aizokwanisawo kutibetsera. Kusiya izvona, isusu nguwa dzese taitondoedza nhungamiriro dze akuru e mbuto iyona, taigara takangwarira, uye taisiya zvese mu nyara dza Djehovha.

viri pamhene kuti migariro imweni yainga isikatikandi pa ngozi hinga zvatairangaridza. Zuwa rimweni, pandainga ndicihwirira koona samuzi, ndakazwa hinga kuti anakadzi aiiri aikhuwa ecireketedzana ku dii re kunza re nyumba. Inini andipfariri kuona anhu ecireketedzana, asi samuzi  akanditora kuti tiende tese ku mbuto yaiitika izvona kuti ndione zvainga zveciitika. Pakupedzesera takazoona kuti “kureketedzana” kuya kainga kuri mapapagayo mairi eciteedzera anyacigarisano.

Muna 1997, Inini ndakagadzwa hingana mufundisi we Escola de Treinamento Ministerial. b Kandiri ainga ari makomborero kupinda cikora ici ce Bhaibheri, asi inini ndainga ndisikarangaridzi kuti zuwa rimweni ndaizogara no makomborero e kugara mufundisi.

Mumasure me kudarika cinguwa, inini ndakaseenza hinga muonereri we dhistritu. Basa iri parakapera, ndakahwirira ku basa re muonereri we nharaunda. Inini ndino mupfaro we kuseenza hinga mufundisi uye muonereri we nharaunda ke makore anodarika 30. Mabasa awona akandiunzisira makomborero akawanda. Asi azvesepi zvaihamba zvakanaka. Ndisiyei kuti ndimupanganidzirei kuti ngei.

Inini ndino unhu wakabamba, uye izvona zvakandibetsera kuti ndikwanisane no migariro yakawanda inoshupha. Asi nguwa dzimweni, inini ndaiedza kugadzirisa nyaya dze ungano nge mushobo wainyanyisa maningi. Zuwa rimweni, inini ndakacedza no hama ngezve kukosha ke kugara no rudo uye kuzwisisa amweni. Asi pandaipasa mazano awona, inini kamare ndakabhuya nge mushobo wakaoma uye wakananga, uyewo ndakatosiya kugara munhu uno rudo uye kuzwisisa.—Aro. 7:21-23.

Nguwa dzimweni inini ndinogara ndakatsukwara nge ndaa ye kutama kukwana kangu. (Aro. 7:24) Zuwa rimweni, inini ndakanamata kuna Djehovha ndecimubvunza kuti zvaizonga zviri nani kana ndikasiya basa re umisiyonariyo uye ndohwirira ku Finlândia. Pa zuwa rimwerimwero, inini ndakaenda ku musangano, uye zvandakazwa ikona zvakandiitisa kuti ndide kurumbwa ndiri pa basa rangu uye kupeta masimba kuti ndikunde kutama kukwana kangu. Pandinorangarira munamato wandakaita uye kuti Djehovha akandidaira kudini, inini ndinogara ndecipfara dakara nyamasi. Kusiya izvona, ndinotenda maningi Djehovha nge kundipangidzira mwoyo wake unononoka kutsamwa uye nge kundibetsera kukunda paya pandakarembera.

Inini na Sirkka tinotenda maningi Djehovha nge kutipasa makomborero e kupedza nguwa yakawanda teciseenza mu basa re nguwa yakadzara. Uyewo ndinotenda maningi Djehovha nge kundipasa mukadzi wakagondeka uye ano rudo pa makore ese aya.

Mbai-mbai pano ndicaguma makore 70, uye ndicadikana kusiya basa re kufundisa uye basa re muonereri we nharaunda. Asi izvona, azvindiitisi kuti ndiore mwoyo. Munoziya kuti ngei? Ngokuti inini zvezvirokwazvo ndinotenda kuti kuna Djehovha, zvinokosha i kumuseenzera tecidzidodosa, no mwoyo wakadzara no rudo uye kutenda. Izvona ndizvo zvinoita kuti Mwari akudzwe. (Mik. 6:8; Mark. 12:32-34) Kuti Djehovha akudzwe, azvibvi pa basa ratinaro.

Pandinoringira sure uye ndorangarira ngezve basa randakagara naro, inini ndinoziya kuti ndakatambira makomborero aya, haiwa ngekuti ndinokosha kudarika amweni kana kuti ndino uzii kudarika amweni. Haiwa, zvakatosiyana! Djehovha akandipasa makomborero aya nge ndaa ye nyasha dzake. Iyena akandipasa mabasa aya kunyazi ndisikaakwanisi kuaita zvakanaka. Inini ndinoziya kuti ndakwanisa kuita zvese izvi no rubetso ra Djehovha. Ndiyo ndaa ndinoti, kusama kukwanisa kangu kakapangidza simba ra Mwari.—2 Ako. 12:9.