1. Amweni anozwa kudini paanoparidzira anhu amweni? (Onaiwo foto.)

 HINGA anhu a Djehovha, isusu tinoparidzira amweni ngokuti tinoda Baba edu e kudenga uye tinoda kubetsera anhu kuti amuziye. Zvezvirokwazvo, aparidzi akawanda anopfarira basa re kuparidzira. Asi amweni ano citsinzwa ce kuona mupfaro mu basa re kuparidzira. Ngei? Anhu amweni pamweni anothya kana kuti aadzigondi pacawo. Amweni angazwa asikazi kusudzunuka kuenda pa nyumba pe munhu asikazi kupikwa. Amweni angathya kuti aazotambirhwi zvakanaka. Amweni akafundiswa kuti asaitire hasha amweni. Kunyazi dzecida maningi Djehovha, hama no hanzvadzi idzi zvinoashuphira kukhwederera anhu e nyika dzimweni kuti dzirekete nawo masoko akanaka. Kunyazi zvakadaro, idzona dzinoziya kukosha ke basa re kuparidzira, uye mazuwa ese dzinobuda mu basa re kuparidzira. Mupfaro wakadini unozwa Djehovha!

2. Kana imwimwi muno cinetso ce kugumira mupfaro mu basa re kuparidzira, ngei musikadikani kuora mwoyo?

² Nguwa dzimweni, zvinomushuphirai kuzwa mupfaro mu basa re kuparidzira? Kana izvona zvakamboitika kamuri, musaore mwoyo. Kakawanda kakhona, izvi zvinopangidza kuti imwimwi munodzidodosa uye amudi kudzionesa kana kuti kunyangadzisa amweni. Kusiya izvona, munhu wese unoda kutambirhwa zvakanaka, maka-maka paya paanonga eciita zviro zvakanaka ku munhu umweni. Asi imwimwi mungagara no rugondo rekuti Baba enyu e kudenga, anoziya kuti izvona zvinoshupha kudini kamuri uye awona anoda kumubetserai paya pa  zvinodikanwa. (Isa. 41:13) Mu fundo ino, ticaona mazano mashanu angatibetsera kuona kuti tingakunda kudini mazwiro awona uye kuti tingagara kudini no mupfaro mu basa re kuparidzira.

SIYAI KUTI SOKO RA MWARI RIMUBAMBISEI

3. Cinyi cakabetsera Djeremiya kuti aparidzire amweni?

³ Kunyazi mu nguwa ye kare, Soko ra Mwari raisobambisa anhu ake paya paainga ecida kuita basa rinoshupha. Ngatione muezaniso we muphorofita Djeremiya. Djehovha paakamupasa basa re kuparidzira, iyena waithya. Djeremiya wakati: “Andikwanisi kureketa, ngokuti ndiciri mwana mudoko.” (Djer. 1:6) Hino cinyi cakabetsera Djeremiya kuti agare no ushingi we kuparidzira? Zvaakabvunzwa na Djehovha, ndizvo zvakamubambisa. Iyena wakati: “Soko rake rakaita hinga muriro unobaka mu mwoyo mangu, uye rakafungwa mu makodo angu; andizi kukwanisa kurumbwa ndakanyarara.” (Djer. 20:8, 9) Kunyazi Djeremiya wainga ano mbuto inoshupha ye kuparidzira, masoko aakatambira kuti aaziise ndiwona akamupasa ushingi waaida kuti akwanise kuita basa rake.

4. Cinyi cinoitika patinoerenga Bhaibheri uye tonyasa kurangarira? (Akorosi 1:9, 10)

⁴ Nyamasi uno peciseenzeswa Bhaibheri, Akristu anotambirawo rubetso raanoda. Muphostori Pauro paakatarira ungano ye ku Korosi, iyena wakabvunza hama kuti kana awona akatunhudzira kufunda kuda ka Djehovha, izvona zvaizoabetsera kuti ‘zvinoenderana no zina ra Djehovha’ uye ‘ecibara micero mu mabasa ese akanaka.’ (Erengai Akorosi 1:9, 10.) Mabasa aya akanaka anobatanidzawo basa re kuparidzira. Hino patinoerenga Bhaibheri uye tonyasa kurangarira zviya zvataerenga, kutenda kedu kuna Djehovha kunonyasa kubamba, uye tinonyasa kuziya kuti ngei kuparidzira ngezve Umambo ku amweni kunokosha maningi.

5. Tinganyasa kubetsereka kudini nge kuerenga uye kufunda Bhaibheri?

⁵ Kuti muone mafundo anokosha pamunonga mecierenga Soko ra Mwari, musagogomeke pa nguwa ye kuerenga, ye kufunga uye ye kunyasa kurangarira. Musagogomeke pa nguwa ye kufunda. Kana imwimwi mukaerenga soko ramusikanyasi kuzwisisa zvakanaka, musazvisiye zvakadaro. Kusiya izvona, seenzesai Índice das Publicações da Torre de Vigia kana kuti Bhuku Rinobetsera Apupuri a Djehovha Pakukwarakwatisa kuti muone kupanganidzwa ke vhersikuro iyona. Kana mukaita kudaro, imwimwi mucabambisa rugondo ramunaro rokuti Bhaibheri ngere zvirokwazvo. (1 Ate. 5:21) Pamunonga maano rugondo rakakura,  mucagara no mupfaro mukuru we kubvunzawo amweni zviya zvamunonga mafunda.

NYASAI KUGADZIRIRA

6. Ngei tinodikana kunyasa kugadzirira kuitira basa re kuparidzira?

⁶ Kana mukanyasa kugadzirira musati maenda mu basa re kuparidzira, zvicamuitirai nyore kucedza no anhu. Djesu akabetsera afundi ake kugadzirira asati aatuma kooparidzira. (Ruka 10:1-11) Awona akaseenzesa zvese zvaakafundiswa na Djesu, ndiyo ndaa awona akapfara maningi no zvese zvaakakwanisa kuita.—Ruka 10:17.

7. Tingagadzirira kudini basa re kuparidzira? (Onaiwo foto.)

⁷ Tingagadzirira kudini kuti tikwanise kuparidzira? Isusu tinodikana kutanga tarangarira zvaticareketa uye toreketa nge mushobo unonyasa kuzwika, asi no masoko edu kamare. Uye zvinobetserawo maningi kutanga tarangarira zviro zviiri kana zvitatu zvisikatenderhwi no e mu ndima medu uye torangarira mushobo waticadaira pa mugariro umwe na umwe. Pedzepo, kana tikaguma kuti tirekete no munhu, tingagara takasudzunuka, tonyemwerera, uye topangidza ushamwari.

8. Akristu akaita hingana midziyo ye dongo inorekethwa no muphostori Pauro nge gwanza ripi?

⁸ Muphostori Pauro wakabvunza hama no hanzvadzi kuti: “Tino upfumi uu mu midziyo ye dongo.” (2 Ako. 4:7) Asi upfumi uu i cinyi? I basa re kuparidzira rinoponesa upenyu uye rinobhuya ngezve Umambo wa Mwari. (2 Ako. 4:1) Uye midziyo ye dongo i cinyi? Iyona inoimirira aseenzi a Mwari anoparidzira masoko akanaka ku amweni. Mu nguwa ya Pauro, atengesi aiseenzesa majaro e dongo kuti athware kana kuti acengete zviro zve mutengo wakakura, zvakaita hinga zvokurhya, vhinyu, uye mare. Nge mushobo umwewo, isusu tiri midziyo ye dongo uye Djehovha anotiseenzesa kuti titore ciro cinokosha, masoko akanaka. No rubetso ra Djehovha, isusu tino simba rinodiikanwa kuti tirumbwe teciparidzira takatendeka.

NAMATAI MECIKUMBIRA USHINGI

9. Tingakurira kudini kuthya munhu kana kuthya kuti anhu aatambiri masoko edu? (Onaiwo foto.)

⁹ Nguwa dzimweni, tingathya anhu kana kuti tingathya kuti anhu aazotenderi masoko atiri kuparidzira. Tingakwanisana kudini no cinetso ici? Onai munamato wakaizwa no aphostori paakabvunzwa kuti ainga asikadikani kurumbwa eciparidzira. Pane kuthya, awona  akakumbira rubetso ra Djehovha kuti “arumbwe ecireketa ngezve soko [rake] no ushingi.” Uye Djehovha akadaira munamto uwona nokukasika. (Zvii. 4:18, 29, 31) Kana kuthya munhu kecimuitai kuti munetseke mu basa re kuparidzira, munodikana kunamata mecikumbira rubetso ra Djehovha. Kumbirai kuna Djehovha kuti rudo ramunozwa ku anhu rikure kudarika kuthya kamunoita munhu.

10. Djehovha anotibetsera kudini kuti tigare Apupuri ake? (Isaya 43:10-12)

¹⁰ Djehovha akatisanangura kuti tigare Apupuri ake, uye iyena akatigondesa kuti acatibetsera kuti tigare no ushingi. (Erengai Isaya 43:10-12.) Ngatione mishobo mirongomuna yaanotibetsera nayo pa nyaya ii. Wekutanga, Djesu ana isusu pese patinoparidzira masoko akanaka. (Mat. 28:18-20) Wecipiri, Djehovha akagadza ngirozi kuti dzitibetsere pa basa iri. (Zvak. 14:6) Wecitatu, Djehovha anotipasa mwiya mucena kuti utibetsere kuedzurira zvese zvatafunda. (Juau 14:25, 26) Wecirongomuna, Isusu tino rubetso re hama no hanzvadzi dzedu patinoparidzira. No rubetso ra Djehovha uye no rubetso re hama dzedu dzinodiwa, isusu tino zvese zvatinoda kuti tigare no ushingi uye tirumbwe teciparidzira.

GARAI MUNHU UNODJAIRANA NO ZVINODIWA NO ANHU AMWENI, UYE GARAI NO MAONERO AKANAKA

11. Tingagumira kudini anhu akawanda patinonga teciparidzira? (Onaiwo foto.)

¹¹ Imwimwi munozwa makaora mwoyo pamunogumira anhu padoko kana kuti pamusikagumiri anhu pa nyumba here? Dzibvunzisei kuti: ‘Pari zvino, anhu e mu ndima mangu ari kupi?’ (Zvii. 16:13) ‘Kodi awona ari kuseenza kana kuti ari kutenga zviro here?’ Kana zviri izvona, mungakwanisa kugumira anhu akawanda pamunoparidzira mu gwanza here? Hama imweni inozwi Joshua, yakati: “Ndakaona mikana ye kuparidzira pandinonga ndecitenga zviro uye pakadzara anhu.” Iyena no mukadzi wake, Bridget, anosogumira anhu akawanda pa nyumba paanoaparidzira koodoka uye mu Biningu comasikati.—Aef. 5:15, 16.

12. Tingaziya kudini zvinotendwa no munhu uye no zviya zvinomunetsa?

¹² Kana imwimwi mukaona kuti samuzi aaripi kunyanya kupfarira zvamuri kureketa, edzai kuona zvaanotenda uye zviri kumunetsa.  Joshua na Bridget anoseenzesa mubvunzo uri pamberi pe tratadho kuti atangise makani. Ngo muezaniso, eciseenzesa tratadho inoti Munorangarirei nge zve Bhaibheri?, awona anoti: “Anhu amweni anorangarira kuti Bhaibheri i bhuku ra Mwari, asi amweni anokana-kana kuti izvona i zvirokwazvo here kana kuti haiwa. Munoonawo kudini?” Kakawanda kakhona, izvona zvinounzisa mugumisiro wakanaka.

13. Ngei tingabhuya kuti basa redu re kuparidzira rabudirira kunyazi anhu asikatipurutani? (Zvierengo 27:11)

¹³ Kubudirira mu basa redu re kuparidzira, akutsamiri pakuti anhu anopurutana here kana kuti haiwa. Ngei? Ngokuti isusu tiri kuita zvinodiwa na Djehovha uye no Mwana wake Djesu uye tipase upupuri wakakwana. (Zvii. 10:42) Kunyazi patisikagumiri munhu kuti ticedze kana kuti anhu paanoramba masoko atiri kuparidzira, isusu tingakwanisa kupfara ngokuti tinoziya kuti tiri kupfadza Baba edu e kudenga.—Erengai Zvierengo 27:11.

14. Ngei tingazwa mupfaro kana hama ikagumira munhu wapfarira mu basa re kuparidzira?

¹⁴ Isusu tinopfara hama kana hanzvadzi painogumira munhu uno mwoyo unoda mu basa re kuparidzira. Murindiri umweni wakaezanisa basa re kuparidzira no basa re kupsvaka mwana wapsveteka. Anhu akawanda anobatanidzwawo pa basa re kupsvaka mwanewo mu mbuto dzakawanda. Pedzepo, mwanewo paanooneka, ese anopfara maningi, haiwa basi uya wagumira mwanewo. Nge mushobo umwewo, ese ari mu ungano anobetsera pa basa re kuparidzira uye pa kuita kuti ndima yese iparidzirhwe uye ese anopfara maningi munhu paanotangisa kupinda misangano.

KANDAI NZERO DZENYU PA KUDA KAMUNOITA DJEHOVHA UYE PA KUDA KAMUNOITA ANHU

15. Mateu 22:37-39 ingatibetsera kudini pa kutunhudzira mupfaro wedu pa basa re kuparidzira? (Onaiwo foto ye pa kapa.)

¹⁵ Isusu tingatunhudzira mupfaro wedu pa basa re kuparidzira patinorangarira kuda katinoita Djehovha uye anhu. (Erengai Mateu 22:37-39.) Rangaridzai mupfaro mukuru wa Djehovha paanotiona teciita basa re kuparidzira uye kupfara kucaita anhu paacatangisa kufunda Bhaibheri. Rangariraiwo pa kuponeswa kucazwa anhu uye etserai aya anotambira zvakanaka masoko edu.—Juau 6:40; 1 Ti. 4:16.

16. Tingagumira kudini mupfaro mu basa redu re kuparidzira kunyazi tisikakwanisi kubuda pa nyumba? Pasai miezaniso.

¹⁶ Asi zvakadini kana imwimwi musikakwanisi  kubuda pa nyumba? Kana zviri izvona, kandai ndangariro dzenyu pa zviro zvamunokwanisa kuita kuti mupangidze kuda kamunoita Djehovha uye anhu. Pa nguwa ye nhenda ye COVID-19, Samuel na Dania ainga asikakwanisi kubuda pa nyumba. Pa nguwa yese ii inoshupha, awona akaparidzira eciseenzesa thurufunu, akatara tsamba, uye akaitisa fundo dze Bhaibheri eciseenzesa Zoom. Samuel wainga eciraphwa nhenda yo kankro uye iyena waikhorovhera mikana yaaienda ku cipitari kuti aparidzire anhu aaikwanisa. Iyena unoti: “Matambudziko, angatisiya takaremba mu ndangariro, pa nyama, uye pa zviro zve kunamata. Ndiyo ndaa, zvinokosha maningi kugumira mupfaro pa basa ratinoitira Djehovha.” Pakati pe nguwa iyona, Dania wakambwera uye wakagara wakaradzikwa ke mwedzi mitatu. Pedzepo, iyena waida rubetso re kadera ye marodha ke mwedzi mitanhatu. Iyena unoti: “Inini ndakaedza kuita zvandaikwanisa maererano no migariro yangu. Inini ndaiparidzira enfermeira waiuya koondiona kuti ndainga ndakadini uye ndaicedza no aiunzisa zviro kumba kangu. Inini ndakacedzawo ndeciseenzesa thurufunu no mwanakadzi umweni muimiriri we empreza ye kurapa.” Nge ndaa ye mugariro yawo, Samuel na Dania ainga asikwanisi kuita zvakawanda zvaaita kare; kunyazi zvakadaro, awona akaita zvaaikwanisa uye akapfara maningi no migumisiro yaakaona.

17. Munganyasa kubetsereka kudini no mazano e fundo ino?

¹⁷ Edzai kuseenzesa mazano mashanu ataona mu fundo ino. Zano rimwe na rimwe rakaita hingana zviro zvinoseenzeswa pa kubika. Pamunoseenzesa zviro zvese pa kubika ciro, ciro icona cinonaka. Nge kuseenzesa mazano mashanu ataona, isusu tinonga takanyasa kugadzirira kuti tikwanisane no mazwiro akashata uye ticaona mupfaro wakakura pa basa re kuparidzira.