MUSORO WE KUFUNDA 14
NGOMA 56 Cokwadi Ngacigare mu Mwoyo Yenyu
“Rumbwai Mecikura pa Kunamata”
“Ngatiseenze no simba kuti tikure.”—AHEB. 6:1.
CINANGWA
Kuona kuti Mukristu wakakura pa kunamata unorangarira uye unoita kudini zviro maererano no kuda ka Mwari uye unoita kudini zvisananguro no ungwaru.
1. Djehovha anoetsera kuti tiitei?
RIMWE re zuwa rinopfadza maningi mukati me upenyu we kazado, i zuwa re kubarhwa ke mwana wawo wekutanga. Kunyazi abereki ecida maningi mwana wawo, awona aaetseri kuti iyena andorumbwe andori mwana basi. Zvezvirokwazvo, kudai izvona zvikaitika, awona aizonetseka maningi. Nge mushobo umwewo, kunyazi Djehovha ecipfara maningi patinotanga kufunda nge zvake, Iyena aadi kuti tirumbwe tindori zviana basi panocokuita no kunamata. (1 Ako. 3:1) Pane kudaro, iyena anoda kuti tigare Akristu ‘akakura pa kunamata.’—1 Ako. 14:20.
2. Ticaonei mu fundo ino?
2 Zvinoreyei kugara Mukristu wakakura pa kunamata? Zvinyi zvatinodikana kuita kuti tigare Akristu akakura pa kunamata? Ngei zvokurhya zve ku mwiya zvinokosha maningi kuti tikure pa kunamata? Uye ngei tisikadikani kunyanya kudzigonda? Mu fundo ino ticadaira mibvunzo idzi.
ZVINOREYEI KUGARA MUKRISTU WAKAKURA PA KUNAMATA?
3. Zvinoreyei kugara Mukristu wakakura pa kunamata?
3 Mu Bhaibheri, soko rakaturikirhwa kuti “kukura” rinoreyawo “kuibva,” “kukwana,” kana kuti “cakanyasa kukura.” a (1 Ako. 2:6) Kuita hinga mwana mudoko unorumbwa ecikura dakara aa munhu mukuru, isusuwo tinodikana kurumbwa tecibambisa ushamwari wedu na Djehovha, nge mushobo uu tinogara Akristu akakura pa kunamata. Kunyazi kana taa Akristu akakura pa kunamata, atidikani kupeta masimba here? (1 Ti. 4:15) Umwe na umwe wedu, kutobatanidzawo no aya aciri madjaha, anodikana kukura pa kunamata. Asi tingaziya kudini kuti tiri Akristu akakura pa kunamata?
4. Cinyi cinozwi Mukristu wakakura pa kunamata?
4 Mukristu unozwi wakakura pa kunamata kana ecirarama maererano no kuda ka Djehovha, aagari ecindosanangura basi zviro zvaanoda uye zvaanopfarira kuita. Zviri pamhene kuti isusu tiri anhu asikazi kukwana uye tinoshaisha. Kunyazi zvakadaro, Mukristu wakakura pa kunamata unopangidza nge marangariro ake uye zvaanoita zuwa ne zuwa kuti zvinoenderana no kuda ka Djehovha. Iyena wapfeka unhu upsva uye unopeta masimba kuti arangarire nge mushobo unorangarira Djehovha. (Aef. 4:22-24) Iyena wakafundira kuita zvisananguro zvakanaka ngokuti nguwa dzese unorangarira ngezve mitemo uye zvokwadi zvisikacinji zve Bhaibheri, ndiyo ndaa iyena aadi mindandanda ye mitemo ye zviro zvaanodikana kuita. Paanoita zvisananguro, iyena anopeta masimba kuti aite maererano no zviya zvaanonga asanangura.—1 Ako. 9:26, 27.
5. Zvinyi zvingakwanisa kuitika no Mukristu usikazi kukura pa kunamata? (Aefeso 4:14, 15)
5 Nge dii rimweni, Mukristu usikazi kukura pa kunamata, uri nyore maningi kuwira pa “mazano akashata” uye pa masoko e ‘kucengedzera’ e aya anobararisa masoko e manyepo, uye angatokwanisawo kucengedzwa no aya akapauka pa kunamata. b (Erengai Aefeso 4:14, 15.) Mukristu asikazi kukura pa kunamata ungazwira bibvu amweni, kubara woyo-woyo mukati me ungano, kunyangadzwa nokukasika nge zviro zvinoizwa no amweni, kana kuwira pa musungo we kuita citema cakakura.—1 Ako. 3:3.
6. Kukura pa kunamata ke Mukristu kungaezaniswa nei? (Onaiwo mufanikiso.)
6 Hinga zvataona, Bhaibheri rinoezanisa kukura pa kunamata no kukura mwiri. Mwana unoda kudziirirhwa no kutungamirirhwa no munhu mukuru, ngokuti iyena aana esperiensiya ipi hayo mu upenyu. Nge muezaniso, rangarirai ngezve mai anokumbira mwana wawo kuti amubate nyara kuti adarike gwanza. Mumasure me cinguwa mwana paanokura, mai anomutendera kuti adarike ega gwanza, asi nguwa dzese anoedzurira mwanewo kuti aringire matii mairi e gwanza uye angwarire makaru. Pedzepo, mwana uya paanokura, iyena unoziya zvaanodikana kuita kuti adarike gwanza. Kuitawo hinga mwana unoda rubetso re munhu mukuru kuti adzidziirire pa ngozi, Mukristu asati akura pa kunamata unoda rubetso re Akristu akakura pa kunamata kuti adziirire pa ciro cipi haco cingakuwadza ushamwari wake na Djehovha uye kuita zvisananguro zvakanaka. Asi Mukristu wakakura pa kunamata, iyena unoziya kuita zvisananguro zvakanaka zvinotsamira mu zvokwadi zvisikacinji zve Bhaibheri uye mu mushobo we kurangarira wa Djehovha uye pedzepo unokwanisa kuseenzesa zvaafunda.
Akristu asikazi kukura pa kunamata anodikana kufundira kuita zvisananguro ecitsamira mu zvokwadi zvisikacinji zve Bhaibheri (Onai ndima 6)
7. Mukristu wakakura pa kunamata ungada rubetso re amweni here?
7 Kodi zvinoreya here kuti Mukristu wakakura pa kunamata aazombodi rubetso re munhu upi hake? Haiwa. Hama dzakakura pa kunamata nguwa dzimweni dzinotodawo rubetso. Asi hama isikazi kukura pa kunamata yaizoda kuti umweni amubvunze zvokuita uye cisananguro cokuita. Nge dii rimweni, hama yakakura pa kunamata inokumbira rubetso re amweni ano maesperiensiya akawanda uye ungwaru, asi inoziya kuti Djehovha anoetsera kuti iyona ‘ithware mutoro wayo kamare we ubaba.’—Aga. 6:5.
8. Akristu airi akakura pa kunamata anodikana kuita zvisananguro zvimwezvo here?
8 Tese isusu takasiyana pa mwiri, nge mushobo umwewo Akristu akakura pa kunamata ano mawara akasiyana. Nge muezaniso, amweni ano ungwaru wakawanda, amweni ano ushingi, hama dzimweni dzino rupo rakakura, uye dzimweni dzinopangidza usisi. Ndiyo ndaa, Akristu airi akakura pa kunamata paanobatana no mugariro umwewo pamweni angaita zvisananguro zvakasiyana, asi zvese zvecitsamira mu Bhaibheri. Izvi zvinoitika maka-maka nge ndaa ye hana. Ndiyo ndaa, awona aashori umweni ngokuti aita zvisananguro zvakasiyana. Pane kudaro, awona anokanda ndangariro dzawo kuti pagare no rubatano.—Aro. 14:10; 1 Ako. 1:10.
TINODIKANA KUITEI KUTI TIGARE AKRISTU AKAKURA PA KUNAMATA?
9. Kodi kukura pa kunamata kunoitika kega here? Panganidzai.
9 Mwana wese no kuhamba ke nguwa unokura, asi kukura pa kunamata akuitike kega. Ngo muezaniso, hama dze ku Korinti dzakafunda cokwadi, dzakabhabhatidzwa, dzakatambira mwiya mucena, uye dzakafunda zviro zvakawanda no muphostori Pauro. (Zvii. 18:8-11) Akawanda awo, kunyazi mumasure me kudarika makore aa abhabhatidzwa, aazi kukura pa kunamata. (1 Ako. 3:2) Hino tinodikana kuitei kuti zvisaitike zvimwezvo na isusu?
10. Zvinyi zvatinodikana kuita kuti tigare Akristu akakura pa kunamata? (Djudha 20)
10 Zvingatishuphira kuti tigare Akristu akakura pa kunamata kana tisina cido ce kuita izvona. Aya asikapfariri ‘kugara no uzii uye asikadi kuita cinjo,’ aazogari Akristu akakura pa kunamata. (Zvie. 1:22) Isusu atidi kuita hingana aya ekuti aa anhu akura, asi kunyazi zvakadaro anoda rubetso re abereki awo kuti aite zvisananguro. Pane kudaro, tino ubaba wekuti tikure pa kunamata uye kurumbwa tecibambisa ushamwari wedu na Djehovha. (Erengai Djudha 20.) Kana imwimwi muciri kupeta masimba kuti mugare Mukristu wakakura pa kunamata, namatai kuna Djehovha kuti iyena amupasei “cido ce kuita zviro no simba re kuzviita.”—Afi. 2:13.
11. Rubetso ripi ratinopaswa na Djehovha kuti tigare akakura pa kunamata? (Aefeso 4:11-13)
11 Djehovha aaetseri kuti isusu tigare Akristu akakura pa kunamata pasina rubeto. Aya anoseenza hinga aushi uye afundisi mu ungano ye Cikristu, akagadzirira kubetsera hama no hanzvadzi kuti dzigare ‘dzakakura’ pa kunamata uye dzigare “no mugariro wakakwana we munhu wakura, hinga zvaari Kristu.” (Erengai Aefeso 4:11-13.) Djehovha anotipasawo mwiya wake mucena kuti utibetsere kuti tigare no ‘marangariro a Kristu.’ (1 Ako. 2:14-16) Kusiya izvona, Djehovha akafemerawo Maevhangeri marongomuna anotipangidza mushobo wairangarira Djesu, mushobo waaireketa uye waaita zviro paainga eciita basa rake rekuparidzira. Nge kuteedzera mushobo wa Djesu we kurangarira uye we kuita zviro, zvingatibetsera kuti tigare Akristu akakura pa kunamata.
KUKOSHA KE ZVEKURHYA ZVE KUMWIYA ZVAKAKORA
12. Cinyi cinozwi “fundiso yokutanga pamusoro pa Kristu”?
12 Kuti tigare Akristu akakura pa kunamata, atidikani kuziya basi “fundiso yokutanga pamusoro pa Kristu,” kana kuti, zviro zvokutanga zvatinofunda ngezva Djesu. Miezaniso imweni no fundiso ii yokutanga i kucinyuka, kutenda, rubhabhatidzo, uye rumuko. (Aheb. 6:1, 2) Idzi ndidzo miezaniso dzinganani dze fundiso yokutanga dzekuti Mukristu wese unodikana kudziziya uye kudzitenda. Ndiyo ndaa, muphostori Pedru wakareketa nge zvadzo paakaparidzira anhu akawanda pa zuwa re Pentekosti. (Zvii. 2:32-35, 38) Kuti tigare afundi a Kristu, tinodikana kutenda fundiso idzi. Hinga muezaniso, muphostori Pauro wakasiya pamhene kuti munhu agare mufundi wa Kristu, iyena waidikana kutenda mu kariro ye rumuko. (1 Ako. 15:12-14) Kuti tigare Akristu akakura pa kunamata, atidikani basi kufunda ngezve zvokwadi zvekutanga, asi tinodikana kuita zvinodarika izvona.
13. Tinodikana kuitei kuti tibetsereke no zvokurhya zve kumwiya zvakakora zvinobhuiwa pana Ahebheru 5:14? (Onaiwo mufanikiso.)
13 Musiyano we fundiso yekutanga no zvokurhya zve kumwiya zvakakora, zvinobatanidza haiwa basi mitemo ya Djehovha, asiwo zvokwadi zvake, zvinotibetsera kuzwisisa mushobo wake we kurangarira. Kuti tibetsereke no zvokurhya zve kumwiya, tinodikana kufunda, kunyasa kurangarira, uye kuseenzesa takangwarira Soko ra Mwari. Kana tikaita kudaro, ticafundira kuita zvisananguro zvinopfadza Djehovha. c—Erengai Ahebheru 5:14.
Zvokurhya zve kumwiya zvakakora zvinotifundisa kuti tingaita kudini zvisananguro zvinopfadza Djehovha (Onai ndima 13) d
14. Pauro wakabetsera kudini Akorinti kuti akure pa kunamata?
14 Ku Akristu asikazi kukura pa kunamata pamweni zvingaashuphira kurangarira ngezve zvokwadi zvisikacinji zve Bhaibheri uye kuzviseenzesa paanonga ecida kuita zvisananguro. Amweni anorangarira kuti sezvo panonga pasina mutemo wakananga we mu Bhaibheri, awona angaita zvaanoda. Amweni anoda kuona mutemo paunonga usikadiikani. Hinga muezaniso, zvinoita hingana kuti Akristu e ku Korinti akakumbira Pauro kuti agadze mutemo wekuti angarhya here zvokurhya zvakapirhwa ku zvidhori. Pane kuabvunza zviro zvaaidikana kuita, Pauro wakaapanganidzira ngezve kukosha ke hana uye wakaapanganidzira kuti umwe na umwe uno ‘citenderhwa ce kusanangura.’ Pauro wakarangarira no Akorinti ecisenzesa zvokwadi zvisikacinji. Ngokudaro, umwe na umwe waikwanisa kuita zvisananguro zvake ano hana yakacena uye asikakuhunyisi amweni. (1 Ako. 8:4, 7-9) Nge kuita kudaro, Pauro waibetsera Akorinti kuti akure pa kunamata; nge mushobo uu, awona aikwanisa kuseenzesa ndangariro dzawo, pane kuda rubetso re munhu umweni kana kupsvaka zvimutemo.
15. Pauro wakabetsera kudini Akristu e Cihebheru kuti abudirire pa kunamata?
15 Isusu tinofunda fundo inokosha pa zviro zvakatarira Pauro Akristu e Cihebheru. Amweni aazi kugara Akristu akakura pa kunamata; awona ‘akahwirirazve kuda mukaka, haiwa zvokurhya’ zvakakora. (Aheb. 5:12) Awona aazi kufundira kutenda zviro zvipsva zvaaifundiswa na Djehovha. (Zvie. 4:18) Nge muezaniso, mumasure me kufa ka Djesu, Mutemo wa Mozesi wakapera, asi Akristu anganani e Cidjudha akarumbwa ari nanga-nanga pa kuteera Mutemo uu. Kodi makore 30 ainga asikakwani here ku Adjudha kuti acinje mushobo wawo we kurangarira? (Aro. 10:4; Tito 1:10) Munhu upi hake waizoerenga tsamba yakafemerhwa ya Pauro yaakatarira Ahebheru, waizotenda kuti bhuku iri rino zvokurhya zve kumwiya zvakakora. Tsamba ii yakaabetsera kuona mushobo mupsva we kunamata Djehovha, wainga wakanaka maningi uye waizoapasa ushingi we kurumbwa eciparidzira kunyazi eciteererhwa nge Adjudha.—Aheb. 10:19-23.
MUSANYANYE KUDZIGONDA
16. Pane kukura basi pa kunamata, i zviro zvipi zvimweni zvatinodikana kuita?
16 Isusu tinodikana kupeta masimba haiwa basi kuti tikure pa kunamata, asi kuti tirumbwe takakura. Izvi zvinoreya kuti tinodikana kutama kunyanya kudzigonda. (1 Ako. 10:12) Uyewo tinodikana ‘kurumbwa tecidziongorora’ kuti tigare tino rugondo rokuti tiri kuita cinjo.—2 Ako. 13:5.
17. Tsamba ya Pauro ku Akorosi inopangidza kudini kukosha kazvinoita kuti tirumbwe tecikura pa kunamata?
17 Mu tsamba yake ku Akorosi, Pauro unoreketazve ngezve kudiikanwa ke kukura pa kunamata. Akorosi ainga aa Akristu akakura pa kunamata, asi Pauro wakaangwadza ngezve ngozi ye kurangarira hinga anhu e nyika. (Ako. 2:6-10) Uye Epafra, wekuti pamweni wainyasa kuziya hama dzo ungano iyona, waianamatira nguwa dzese kuitira kuti awona ‘agare akanyasa kukwana,’ kana kuti akakura pa kunamata. (Ako. 4:12) Tinofundei nge zvazvo? Pauro kutobatanidzawo na Epafra aiziya kuti, Mukristu kuti arumbwe ecikura pa kunamata, anodikana kupeta masimba akakura uye ecibetserhwa na Mwari. Awona aida kuti Akorosi arumbwe ecigara Akristu akakura pa kunamata, pasinei no zvinetso zvipi hazvo zvaaizosongana nazvo.
18. Zvinyi zvingakwanisa kuitika no Mukristu wakakura pa kunamata? (Onaiwo mufanikiso.)
18 Muphostori Pauro, wakangwadza Ahebheru kuti Mukristu wakakura pa kunamata ungakwanisa kuguma pa kuruza kutenderhwa na Djehovha zvacose. Mwoyo we Mukristu ungakwanisa kubamba zvokutoguma pa kutama kukwanisa kucinyuka uye ngokudaro, otama kurekererhwa na Djehovha. Zvinopfadza ngezve kuti Akristu e ku Hebheru aazi kuzoguma pa danho iri. (Aheb. 6:4-9) Zvakadiniwo no Akristu mazuwa ano, awo ekuti anogara asikacaiti mabasa e Cikristu kana kuti kudzingwa, asi pedzepo ocinyuka uye ohwirira mukati me ungano? Awona anodzidodosa uye anocinyuka ecipangidza kuti akasiyana no aya akapanganidzwa na Pauro kuti aikwanisa kuruza kutenderhwa zvacose na Djehovha, zviri pamhene kuti zvinoitika kana awona akahwirira kuna Djehovha. (Ezek. 34:15, 16) Akuru e ungano pamweni acagadza hama yakakura pa kunamata kuti ibetsere hama iyona inonga yahwirira kuti igarezve yakabamba pa kunamata.
Djehovha anopasa rubetso rinodiikanwa no aya anoda kudzibambisa pa kunamata (Onai ndima 18)
19. Ngacipi cinodikana kugara cinangwa cedu?
19 Kana imwimwi muri kupeta masimba kuti mugare Mukristu wakakura pa kunamata, mungakwanisa kudzadzisa cinangwa cenyu! Rumbwai mecifunda zvokwadi zvakadzika zve Bhaibheri uye itai zviri zvese kuti mugare no marangariro a Djehovha. Uye kana imwimwi maa Mukristu wakakura pa kunamata, itai zvese zvamunokwanisa kuti murumbwe makadaro nokusikaperi.
MUNODAIRA KUDINI?
-
Zvinoreyei kugara Mukristu wakakura pa kunamata?
-
Tingaita kudini kuti tikure pa kunamata?
-
Ngei tisikadikani kunyanya kudzigonda?
NGOMA 65 Tihambire Mberi!
a Matarhwa e Cihebheru aaseenzesi masoko okuti “kukura” uye “kutama kukura,” asi awona anobhuya ngezve marangariro aya. Hinga muezaniso, bhuku ra Zvierengo rinobhuya ngezve musiyano uripo pakati pe djaha risina ungwaru uye djaha rino ungwaru no uzii.—Zvie. 1:4, 5.
b Onai musoro wakazwi: “Ngwarira Mashoko e Nhema” pa mu ndandanda wakazwi: “Dzimwe Nyaya” mu saiti ye jw.org uye mu aprikativho ye JW Library,® mu ciShona.
c Onai pakazwi: “Urongwa we Kufunda” mu Murindiri uno.
d KUPANGANIDZWA KE MUFANIKISO: Kuti isanangure zvainodikana kuona pa terevhisori, hama inoseenzesa zvokwadi zvisikacinji zvayakafunda mu Soko ra Mwari.
