MUSORO WE KUFUNDA 34
NGOMA 107 Djehovha Muezaniso we Rudo
Akuru e Ungano Anopangidza Kudini Rudo uye Usisi ku Ashaishi?
“Mwari ari kukupangidzira nyasha dzakakura kuti ucinyuke.” —ARO. 2:4.
CINANGWA
Kuona kuti akuru anoitei kuti abetsere aya akaita citema cakakura.
1. Zvinyi zvingaitika mumasure mekuti munhu aita citema cakakura?
MU FUNDO yadarika, takaona kuti muphostori Pauro wakapasa nhungamiriro ipi ku ungano yo ku Korinti inocokuita ngezve mwanarume wainga eciita citema cakakura. Mushaishiwo wainga asikazi kucinyuka, ndiyo ndaa wakabviswa mu ungano. Asi hinga zvinopangidzwa pa tsamba inotungamirira fundo ino, munhu unonga waita citema cakakura ungakwanisa kubetserhwa kuti acinyuke. (Aro. 2:4) Nge mushobo upi akuru e ungano angabetsera munhu kuti acinyuke?
2-3. Cinyi catinodikana kuita kana tikaziya kuti hama yaita citema cakakura, uye ngei?
2 Kana akuru e ungano akatama kuziya kuti munhu waita citema cakakura, awona aangakwanisi kumubetsera. Kana tikaziya kuti hama yaita citema cakakura cingaita kuti iyona ibviswe mu ungano, cinyi catinodikana kuita? Tinodikana kukohomedzesa munhuwo kuti apsvake akuru e ungano uye akwanise kubetserhwa.—Isa. 1:18; Zvii. 20:28; 1 Ped. 5:2.
3 Asi kana munhuwo asikadi kubhuya no akuru e ungano? Pa mugariro uwona, isusu kamare tinodikana koobvunza akuru e ungano, kuti tigare no cokwadi cekuti munhuwo abetserhwe. Ici i cipangidzo ce rudo cataizoita, ngokuti isusu atidi kuruza hama kana hanzvadzi yedu. Kana munhuwo akaramba kucinja uye orumbwa eciita zvakashata, acakuwadza ushamwari wake na Djehovha. Uye maitiro awona aizosvipisa zina rakanaka re ungano. Hino, isusu tinodikana kugara no ushingi, kunyazi zvecitishuphira kuita, tinodikana kureketa no akuru e ungano, nge ndaa ye rudo ratinaro kuna Djehovha uye ku hama kana kuti hanzvadzi yedu.—Pis. 27:14.
AKURU E UNGANO ANOBETSERA KUDINI MUNHU WAITA CITEMA CAKAKURA?
4. Ngacipi cinangwa co akuru paanocedza no munhu unonga aiita citema cakakura?
4 Kana munhu mu ungano akaita citema cakakura, dare ro akuru rinosanangura akuru atatu akakwaniriswa pakati pawo kuti aseenze hinga komisau a kuti acedze no munhuwo. Akuru awona anodikana kugara ano maonero ari pakati no pakati uye ecidzidodosa. awona anopeta masimba kuti abetsere mushaishi kuti acinyuke. Asi awona anozwisisa kuti aadikani kubambidzira munhu upi hake kuti acinje. (Dhe. 30:19) Akuru anozwisisawo kuti aa ashaishipi ese anotambira mupango hinga zvakaizwa na Mambo Dhavhidhi, wakatendera kubetserhwa uye wakacinyuka. (2 Sam. 12:13) Ashaishi anganani kakawanda kakhona anosanangura kutama kuzwira mazano a Djehovha. (Gen. 4:6-8) Kunyazi zvakadaro, cinangwa co akuru nguwa dzese ngece kuita kuti mushaishi acinyuke. Akuru e ungano anodikana kuedzurirei paanocedza no mushaishi?
5. Akuru anodikana kubata kudini mushaishi paanonga ecicedza naye? (2 Timoti 2:24-26) (Onaiwo mufanikiso.)
5 Akuru anoona mushaishi hinga bira rinokosha ra Djehovha rapsveteka. (Ruka 15:4, 6) Hino paanonga ecicedza no munhu unonga ashaisha, akuru aamuomeseri no masoko, no maitiro kunyazi paanotanga kamare kucedza naye. Awona aatombooni hingana kuti ndi musanganoo hawo paanocedza naye ecirangarira kumuita mibvunzo uye abatanidze masoko nge zvake. Pane kudaro, awona anopeta masimba kuti apangidze mawara anopanganidzwa pa tsamba ya 2 Timoti 2:24-26. (Erengai.) Akuru anorumbwa ano unaki, usisi, uye upfawi kuti akwanise kubaya mwoyo we mushaishi.
Kuita hingana aushi e mu nguwa ye kare, akuru e ungano anopeta masimba kuti agumire bira rapsveteka (Onai ndima 5)
6. Akuru anogadzirira kudini mwoyo yawo asati acedza no mushaishi? (Aroma 2:4)
6 Akuru anogadzirira mwoyo yawo. Awona anoedza kuteedzera Djehovha pa mishobo yese yaanobata mushaishi uye eciedzurira masoko a Pauro ekuti: “Mwari ari kukupangidzira nyasha dzakakura kuti ucinyuke.” (Erengai Aroma 2:4.) Akuru anodikana kuedzurira kuti asati aita ciro, awona ndi aushi anotungamirirhwa na Djesu Kristu. (Isa. 11:3, 4; Mat. 18:18-20) Isati yacedza no mushaishi, komisau inoita munamato uye inonyasa kurangarira ngezve cinangwa cayo: kuita kuti mushaishi acinyuke. Awona anopsvakisisa mu Matarhwa, mu mabhuku e sangano, uye anoita munamato ecikumbira uzii. Akuru anomboimawo kuti anyase kurangarira ngezve zviro zvaanodikana kuziya zvinocokuita no zvakasongana no munhuwo mu upenyu. Pamweni zvaakasongana nazvo mu upenyu, ndizvo zvakamuitisa kuti aite citema.—Zvie. 20:5.
7-8. Akuru angateedzera kudini mwoyo unononoka kutsamwa wa Djehovha paanocedza no mushaishi?
7 Akuru anoteedzera mwoyo unononoka kutsamwa wa Djehovha. Awona anonyasa kuziya kuti Djehovha akabata kudini ashaishi e mu nguwa yo kare. Ngo muezaniso, Djehovha akabetsera Kaini no mwoyo unononoka kutsamwa, ecimungwadza ngezve mugumisiro wakashata waaizosongana nawo nge ndaa ye citema uye ecimubvunza kuti aizomukomborera kana akazwira. (Gen. 4:6, 7) Djehovha akabetserawo Dhavhidhi nge kutuma muphorofita Natani kuti amupase zano. Natani wakaseenzesa muezaniso kuti abetsere Dhavhidhi kuti acinyuke. (2 Sam. 12:1-7) Uye panocokuita no dzinza ro Israeri rekuti kakawanda kakhona rainga risikazwiri, Djehovha airumbwa eciatumira aphorofita ake “zuwa no zuwa” uye “nguwa no nguwa.” (Djer. 7:24, 25) Djehovha aazi kuetsera kuti anhu ake acinyuke kuti iyena atange kuabetsera. Pane kudaro, iyena ndiye akatotanga kuadeketerera kuti acinyuke. Uye kunyazi anhu ainga ecirumbwa ecishaisha, Djehovha aindorumbwa eciabvunza kuti acinyuke.
8 Akuru anoteedzera muezaniso wa Djehovha paanoedza kubetsera aya akaita citema cakakura. Maererano no 2 Timoti 4:2, awona anonyasa kurangarira “no mwoyo unononoka kutsamwa” paanonga ecicedza no Mukristu waita citema. Masoko e kufunda anocokuita no vhersikuro ii, anobhuya ngezve zvinodikana kuizwa no mukuru: “Iyena nguwa dzese waizodikana kudzibata ecideketera no mwoyo unononoka kutsamwa kuti [mushaishi] agare no cido ce kuda kuita zvakanaka. Kana [mukuru] akatsamwa kana kuti kutoguma pa kushatirhwa, iyena waizoita kuti hama dzigare kure naye kana kuti atogume pa kukuhunyisa hama kana kuti hanzvadzi kamare.”
9-10. Akuru angabetsera kudini mushaishi kuti anyase kurangarira ngezve cishaishi cake?
9 Akuru anopsvaka kuziya kuti zvinyi zvakaitisa kuti munhu aite citema. Ngo muezaniso, kodi ushamwari we munhuwo na Djehovha wakaremba here? Kodi iyena wakasiya padoko no padoko kufunda Bhaibheri uye kubuda mu basa re kuparidzira here? Minamato yake kuna Djehovha yakagarawo hayo hingana zviro zvaaidikana kuita basi, uye ainga asikacanamati kakawanda? Iyena wakasiya kurhwisana no zvido zvakashata here? Iyena unososhamwaridzana na ani uye unosodziwaraidza no zviro zvakadini? Zvisananguro zvake nge zve shamwari uye waraidzo, pamweni zvakabata-bata kudini ndangariro dzake uye zvido zvake? Kodi iyena unozwisisa here kuti zvisananguro zvake zvinganani uye zviito zvake zvinobata-bata Baba ake Djehovha?
10 Akuru angaita mibvunzo ku munhuwo kuti amubetsere kurangarira zviro zvakarembesa ushamwari wake na Djehovha uye zvakamuita kuti aite citema. Asi zviri pamhene kuti awona anoita izvona nge mushobo we unaki uye aaedzi kumubvunzisa zviro zvekuti akuru aadikani kuzviziya. (Zvie. 20:5) Kusiya izvona, akuru angaseenzesa muezaniso kuti abetsere munhuwo kunyasa kurangarira uye kuti awone kuti zvaaita zvakashata kamare, kuita hingana zvakaizwa na Natani kuna Dhavhidhi. Nge kuita izvona, pamweni paanocedza no munhuwo ke kutanga, iyena ungakwanisa kuona kukura ke cishaishi caakaita uye onyasa kurangarira ngezve maitiro ake. Iyena ungatoguma pa kucinyuka no mwoyo wese.
11. Djesu akabata kudini ashaishi?
11 Akuru e ungano anopeta masimba kuti ateedzere Djesu. Paaicedza na Sauro we ku Tarso, Djesu akamuita mubvunzo wakasisira waizomubetsera kuona zviri mu mwoyo make. Iyena akamubvunzisa kuti: “Sauro, Sauro, ngei iwewe uri kunditeerera?” Nge kuita kudaro, Djesu akabestera Sauro kuti anyase kurangarira kuti zvaaiita zvainga zvakashata. (Zvii. 9:3-6) Uye panocokuita “no mwanakadzi Djezabheri,” Djesu akati: “Uye inini ndakamupasa nguwa kuti acinyuke.”—Zvak. 2:20, 21.
12-13. Akuru e ungano angapasa kudini nguwa kuti mushaishi acinyuke? (Onaiwo foto.)
12 Eciteedzera Djesu, akuru aagogomeki kuita cisananguro, pamweni kubhuya kuti mushaishi aazocinyuki. Zvingaita kuti ashaishi anganani angakwanisa kucinyuka paanocedza kekutanga no akuru e ungano, asi amweni pamweni angatora nguwa kuti akwanise kucinyuka. Ndiyo ndaa, akuru angakwanisa kucedzazve no mushaishiwo kanodarika kamwe. Pamweni mumasure me kucedza kekutanga, Mukristu unonga washaisha ungatanga kunyasa kurangarira ngezve cishaishi caaiita uye zvaacedza no akuru. Iyena ungakwanisa kudzidodosa woita munamato kuna Djehovha. (Pis. 32:5; 38:18) Ngo kudaro, paanozocedzazve no akuru, mushaishiwo angakwanisa kugara no maitiro akasiyana no aakapangidza pekutanga.
13 Kuti abetsere mushaishi kuti agume pa kucinyuka, akuru anopangidza usisi uye anopangidza kuti anokoshesa munhuwo. Awona anoita munamato kuti Djehovha akomborere kupeta masimba kaari kuita uye awona anogara no kariro yekuti hama yawo ingakwanisa kucinyuka.—2 Ti. 2:25, 26.
Akuru e ungano angakwanisa kucedza no mushaishi kanodarika kamwe kuti amubetsere kuti acinyuke (Onai ndima 12)
14. Rukudzo rinoenda kuna ani kana mushaishi akacinyuka, uye ngei?
14 Kana mushaishi akacinyuka, tese isusu tinopfara maningi! (Ruka 15:7, 10) Kunyazi akuru akaita dii rawo re kupeta masimba kuti abetsere munhu, ndiani kamare anobetsera mushaishi kuti acinyuke? Edzurirai zvakatarhwa na Pauro ngezve ashaishi. Iyena wakati: “Pamweni Mwari acaita kuti acinyuke.” (2 Ti. 2:25) Masoko e kufunda anocokuita ngezve vhersikuro ii, anopanganidza eciti: “Unosisira rukudzo ngezve cinjo ii inokosha amunhupi, asi ndi Djehovha. Ndiye anobetsera Akristu akasiya Djehovha kuti acinje mushobo wawo we kurangarira uye zviito. Pauro unoenderera mberi ecibhuya ngezve migumisiro minganani yakanaka ye kucinyuka—mushaishi unogara no ruziyo re cokwadi ricamubetsera kuti iyena ahwirire kuna Djehovha uye agare no maitiro akanaka zveciita kuti asabathwe pa mirau ya Sathani.—2 Ti. 2:26.”
15. Akuru e ungano angarumbwa kudini ecibetsera mushaishi anonga acinyuka?
15 Mushaishi paanocinyuka, komisau ye akuru inoronga vhakaciro kuitira kuti munhuwo arumbwe ecitambira rubetso rakasisira kuti arhwisane no miedzo ya Sathani uye aite zvakanaka. (Aheb. 12:12, 13) Zviri pamhene kuti akuru aabvunzi munhu upi hake ngezve zviro zvakaizwa no mushaishi. Asi ungano pamweni inodikana kuziiswa nge zvei?
“ASUMURURE PAMBERI PE ANHU ESE”
16. Maererano na 1 Timoti 5:20, Pauro waida kureyei paakabhuya kuti “anhu ese”?
16 Erengai 1 Timoti 5:20. Pauro wakatara masoko aya ku mudoni wake Timoti wainga ari mukuru we ungano, ecipanganidza ngezve kuti angabata kudini “aya anoita citema.” Izvona zvinoreyei? Iyena wainga asikadi kureya kuti hama dzese dze mu ungano dzinobatanidza “anhu ese.” Kusiya izvona, iyena waireya aya basi ekuti pamweni aiziya ngezve citemeco. Awona pamweni angakwanisa kugara apupuri anoziya cishaishico kana kuti aya akabvunzwa no mushaishiwo. Akuru aiyabvunza pasikazi kudzara anhu kuti nyayeyo yainga yagadziriswa uyezve mushaishiwo wainga abetserhwa.
17. Kana cishaishi cakakura cikaziikanwa no ungano kana kuti cikaziikanwa no anhu ese, ciziiso cipi caizoizwa uye ngei?
17 Pa migariro minganani, zvingaita kuti citema cingakwanisa kuziikanwa no ungano yese kana kuti cicazoziikanwa. Pa mugariro wakadaro, zvingaita kuti “anhu ese” anobatanidza ungano yese. Ndiyo ndaa, mukuru ucaita ciziiso ku ungano kuti hama kana kuti hanzvadzi yasumururhwa. Asi ngei? Pauro unodaira eciti: “Kuti amweni asazviitewo.” Kuitira kuti asaite citema.
18. Akuru e ungano anotonga kudini nyaya ye hama kana kuti hanzvadzi ino makore asikagumi 18? (Onaiwo foto.)
18 Cinyi cinoitika hama kana kuti hanzvadzi ino makore asikagumi 18 ikaita citema cakakura? Dare re akuru ricaita gadziriro yekuti akuru airi aende koonana no hama kana kuti hanzvadziyo ino makore asikagumi 18 pamwepo no abereki ayo e Cikristu. b Akuru acabvunzisa aberekiwo kuti akaitei kuti aedze kubetsera mwana wawo kuti aite cinjo dzinodikanwa uye kuti acinyuke. Hama kana kuti hanzvadzi ino makore asikagumi 18 ikazwira mazano e abereki ayo uye ikaita cinjo pa maitiro ayo, akuru airi aya pamweni angasanangura kusiya kuti nyayeyo isaenderere mberi. Ngo kudaro, abereki anodikana kurumbwa ecibetsera mwana wawo uye komisau aicadikanizve kucedza no mwanewo uye abereki ake. Kunyazi zvakadaro, Djehovha akapasa abereki ubaba we kusumurura ana awo nge mushobo we rudo. (Dhe. 6:6, 7; Zvie. 6:20; 22:6; Aef. 6:2-4) Nguwa dzimweni, akuru acapsvaka kuziya kuti abereki ari kupasa here rubetso rinodikanwa ku mwana wawo. Asi zvakadini hama kana kuti hanzvadzi ino makore asikagumi 18 ikarumbwa ino muhambiro wayo wakashata? Pa nyaya iyona, komisau ye akuru icacedza nayo pamwepo no abereki ayo e Cikristu.
Hama kana kuti hanzvadzi ino makore asikagumi 18 ikaita citema cakakura, akuru airi acacedza nayo pamwepo no abereki ayo e Cikristu (Onai ndima 18)
“DJEHOVHA ANO USISI WAKAKURA UYE ANO NYASHA”
19. Akuru e ungano anopeta kudini masimba pakuteedzera Djehovha paanocedza no mushaishi?
19 Kana akuru e ungano akabatanidzwa pa komisau, awona ano ubaba pamberi pa Djehovha wekuita kuti ungano irumbwe yakacena. (1 Ako. 5:7) Asi awona anodawo kuti mushaishi acinyuke, kana zvecikwanisika. Ndiyo ndaa, awona anorumbwa ano maonero akanaka nguwa dzese uye anoetsera kuti mushaishi acinyuke. Asi ngei? Ngokuti awona anoda kuteedzera Djehovha uya “ano usisi wakakura uye ano nyasha.” (Tig. 5:11) Onai kuti muphostori Juau uya wainga acembera wakapangidza kudini rudo rakakura ku hama no hanzvadzi. Iyena wakatara kuti: “Ana angu anodiwa, ndiri kumutarirai zviro izvi kuitira kuti musaite citema. Asi kana munhu akaita citema, tino mubetseri ari kuna Baba, Djesu Kristu, munatsi.”—1 Juau 2:1.
20. Ticaonei mu fundo inoteera?
20 Zvinotsukwarisa kuti nguwa dzimweni Mukristu anonga aita citema anoramba kucinyuka. Kana izvona zvikaitika, munhu iyena anodikana kubviswa mu ungano. Akuru e ungano anoitei pa mugariro wakadaro? Ticaona zvakawanda mu fundo inoteera.
NGOMA 103 Aushi—Zvipo zve Anarume
a Kare, cikwata ici ce akuru caidainzwa kuti cikwata cekutonga. Asi sezvo kutonga i rimwe re basa rinoizwa no akuru aya, isusu aticaseenzesizve masoko aya aiseenzeswa kare. Kusiya izvona, ticadainza cikwata ici ce akuru hinga komisau ye akuru.
b Abereki e Cikristu angakwanisawo kureya Akristu anorarama no hama kana kuti hanzvadzi ii ino makore asikagumi 18.
