MUSORO WE KUFUNDA 35
NGOMA 123 Ngatizwire Djehovha ne Sangano Rake
Aya Akabviswa mu Ungano Angabetserhwa Kudini; Akuru Angabetsera Kudini aya Akabviswa mu Ungano
“Kucagarawo no mupfaro mukuru kudenga nge ndaa ye mushaishi umwe basi anocinyuka zvitema zvake kupinda anatsi 99 asina zvitema zvaanodikana kucinyuka.”—RUKA 15:7.
CINANGWA
Kuona kuti ngei anhu amweni anodikana kubviswa mu ungano uye akuru angaabetsera kudini kuti acinyuke uye kuhwirirazve kutenderhwa na Dehovha.
1-2. (a) Djehovha anoona kudini ashaishi asikadi kucinja? (b) Djehovha anoetsera kuti ashaishi aitei?
DJEHOVHA aatenderi maitiro ese-ese; iyena aafungi madziso munhu paanonga eciita citema (Pis. 5:4-6) Djehovha anoetsera kuti tizwire mitemo yake yo mu Bhaibheri. Asi izvirokwazvo kuti iyena aaetseri kuti tese isusu tiite zviro nge mushobo wakakwana, ngokuti iyena anozviziya kuti tiri anhu asikazi kukwana. (Pis. 130:3, 4) Pa nguwa imweyo, Mwari aatenderi anhu “anoseenzesa nyasha dza Mwari wedu ngo mushobo wakashata, eciita zviro zvinopsverusa.” (Djud. 4) Zvezvirokwazvo, Bhaibheri rinoreketa ngezve, “kutsakatiswa ke anhu anoita zvakashata” kucaitika pa hondo ye Amagedhoni.—2 Ped. 3:7; Zvak. 16:16.
2 Djehovha apana waanoda kuti atsakatiswe. Hinga zvataona mu fundo dzadarika, Bhaibheri rinosiya pamhene kuti iyena “anoda kuti anhu ese acinyuke.” (2 Ped. 3:9) Akuru anoteedzera Djehovha nge kugara anhu anononoka kutsamwa paanoedza kubetsera ashaishi kuti acinje maitiro awo uye kuti ahwirirezve kugara no ushamwari na Djehovha. Asi zvinotsukwarisa kuti, anhu anganani aatenderi rubetso iri. (Isa. 6:9) Amweni acarumbwa eciita zvakashata kunyazi akuru eciedza kuabetsera kakawanda. Pa mugariro wakadaro, cinyi cinodikana kuizwa no akuru?
“BVISAI PAKATI PENYU MUNHU ANOITA ZVAKASHATA”
3. (a) Kana munhu akatama kucinyuka Bhaibheri rinobhuya kuti cinyi cinodikana kuizwa? (b) Pa mugariro wakadai, ngei tingabhuya kuti munhuwo ndiye wasanangura ega kubviswa mu ungano?
3 Kana munhu unoita zviro zvakashata akatama kucinyuka, akuru aacina cisananguro cimweni pane kutama kuita basi zviri pana 1 Akorinti 5:13: “Bvisai pakati penyu munhu anoita zvakashata.” No masoko amweni, munhuwo ndiye kamare wakasanangura kubviswa pakati pe ungano; iyena uri kukorora zviya zvaakasima. a (Aga. 6:7) Ngei tingabhuya kudaro? Ngokuti munhuwo wakaramba kucinja kunyazi akuru akaita zviri zvese kuti amubetsere kakawanda kese. (2 Mad. 17:12-15) Maitiro ake anosiya pamhene kuti iyena aadi kuzwira mutemo we unatsi wa Djehovha.—Dhe. 30:19, 20.
4. Ngei ciziiso cecidikana kuizwa kana munhu akatama kucinyuka uye obviswa mu ungano?
4 Munhu asikacinyuki uye obviswa pakati pe ungano, panoizwa ciziiso cokuziisa kuti munhuwo aacaripizve Mupupuri wa Djehovha. b Cinangwa ce ciziiso ici angecekudapi kupsverusa munhuwo. Zvezvirokwazvo, ciziiso ici cinopaswa ungano kuti ateerere zano rokuti ‘imai kushamwaridzana naye’ kana kuti, ‘imai kurhya naye.’ (1 Ako. 5:9-11) Djehovha akasiya ngwadzo ii no cinangwa cakanaka. Muphostori Pauro wakati: “Mbiriso padoko basi inofufumisa mukanyiwa wese.” (1 Ako. 5:6) Aya asikacinyuki pa zviya zvaanoita, anopedzesera arembesa aya akashinga kurarama maererano no mutemo we unatsi wa Djehovha.—Zvie. 13:20; 1 Ako. 15:33.
5. Tinodikana kugara no maitiro api munhu paanobviswa mu ungano uye ngei?
5 Asi tinodikana kugara no maitiro api kana munhu akabviswa pakati pe ungano? Isusu aticaiti zviya zvataiita naye kare kana kuti kupedza nguwa yakareba tiri tese. Kunyazi zvakadaro, atidikani kumuona hingana munhu asikacaseenzi, asi hingana bira rakapsveteka. Bira rakapsveteka ringakwanisa kuhwirira ku muushi. Edzurirai kuti munhuwo wakadzipira upenyu wake kuna Djehovha. Zvinotsukwarisa kuti munhuwo aaripi kurarama maererano no kudzipira kake uye aaripi kuita maererano no zvinodiwa na Djehovha. (Ezek. 18:31) Asi kana pacino mukana uye Djehovha akagadzirira kupangidza usisi, panonga pacino kariro kaari. Hino akuru angabetsera kudini mushaishi wakabviswa pakati pe ungano?
AKURU ANGABETSERA KUDINI
6. Cinyi cinodikana kuizwa no akuru kuti abetsere uya wakabviswa mu ungano?
6 Kana munhu akabviswa mu ungano, zvinoreya kuti munhuwo wasiiwa zvacose uye akuru aacadikani kumubetsera here? Haiwa! Akuru paanoenda koomubvunza kuti iyena ucabviswa pakati pe ungano, awona anomubvunzawo zviro zvaanodikana kuita kuti ahwirire. Uye akuru angaita zvinopinda ipona. Kakawanda kakhona awona anobvunzisa munhuwo kuti zvinoita here kucedza naye mumasure me mwedzi minganani no cinangwa cokuona kuti munhuwo wacinja kana kuti haiwa. Kana munhuwo akatendera, akuru mumasure me kacinguwa anoenda koocedza no munhuwo ecimukohomedzesa kuti acinyuke uye ahwirire kuna Djehovha. Uye kunyazi asikazi kucinyuka, akuru anocedzazve naye mumasure me kacinguwa uye ecimukhohomedzesazve kuti ahwirire.
7. Akuru anoteedzera kudini usisi wa Djehovha munhu paanobviswa mu ungano? (Djeremiya 3:12)
7 Akuru anopeta masimba kuti ateedzere usisi wa Djehovha paanoenda kooreketa no munhu wakabviswa pakati pe ungano. Ngo muezaniso, Djehovha aazi kuetsera kuti Aisraeri apanduki atange kuhwirira kaari. Kusiya izvona, iyena akatanga kuita ciito kuti aabetsere kunyazi awona asatoti apangidza kucinyuka. Hingana zvataona mu fundo yocipiri yo revhista ino, Djehovha akabvunza Oseya kuti arekerere mukadzi wake uye kuti atendere kuti ahwirire kunyazi iyena aciri kuita citema. Nge mushobo uu, Djehovha akapangidza anhu ake kuti iyena ainga akagadzirira kurekerera. (Oze. 3:1; Mara. 3:7) Kuitawo hingana Djehovha, akuru anodawo kamare kuti mushaishi acinyuke uye ahwirire mu ungano uye awona acaita zviri zvese kuti izvona zviitike. Awona aazodi kuti izvona zvishuphe maningi hinga kushupha kazviri kuita ku mushaishiwo.—Erengai Djeremiya 3:12.
8. Muezaniso we mwana unoshaisha kuseenzesa upfumi unotibetsera kudini kuzwisisa usisi wa Djehovha? (Ruka 15:7)
8 Pa muezaniso we mwana unoshaisha kuseenzesa upfumi, edzurirai mushobo wakatambira baba mwana wawo. Paakaona mwana ecihwirira kumba, baba “akagogoma omukhumbatira uye onyasa kumupsvoda.” (Ruka 15:20) Babawo aazi kuetsera kuti mwana adeketere kuti arekererhwe. Kusiya izvona, awona ndiyo akatanga uye izvona ndizvo zvaizoizwa na baba api hawo ano rudo. Akuru anopeta masimba kuti apangidze maitiro amwewo ku aya akasiya ungano. Awona anoda kuti bira rapsveteka ‘rihwirire ku nyumba.’ (Ruka 15:22-24, 32) Kana mushaishi akacinyuka, Djehovha, Djesu uye ngirozi anopfara maningi, uye ndizvonawo zvinodikana kuizwa no ungano yese!—Erengai Ruka 15:7.
9. Kudeketera kupi ke rudo kunoizwa na Djehovha ku ashaishi?
9 Hinga zvatafunda dakara zvino, zvadjeka kuti Djehovha aatendi kuti mushaishi asikacinyuki arumbwe ari mu ungano. Izvi azvireyei kuti iyena anofuratira uya wakashaisha. Djehovha anoda kuti iyena ahwirire. Ozeya 14:4 inodjekesa kuti Djehovha anozwa kudini no mushaishi uya ano cinyuka, apona panoti: “Ndicaabetsera kuti ahwirirezve kugara anhu akatendeka. Ndicaada no mwoyo wangu wese ngokuti kunyangadzwa kangu kapera.” Akuru e ungano, eciziya mazwire a Djehovha acagara akangwarira pa cipangidzo cipi haco co munhu uya ari kutanga kucinyuka. Kuno aya akasiya Djehovha, masoko aya anopasa rugondo rokuti Djehovha anoada maningi uye anoda kuti awona ahwirire mu ungano nokukasika.
10-11. Akuru anoedza kudini kubetsera aya akabvisa mu ungano ke makore akawanda adarika?
10 Kana munhu akabviswa mu ungano ke makore akawanda adarika, akuru e ungano angabetsera kudini munhu uu? Zvingaita kuti munhuwo watosiya kuita citema cakaita kuti iyena abviswe mu ungano. Pamweni iyena aacatoedzuriri kuti ngei akabviswa. Azvinei no cikonzero, akuru e ungano acaedza kupsvaka munhuwo uye kumuvhakacira. Paanonga ecimuvhakacira, akuru angakwanisa kunamata no munhuwo, uye kumukohomedzesa kuti ahwirire mu ungano. Kana munhu akasiya ungano ke makore akawanda, iyena unonga akaremba pa mwiya. Hino kana iyena akabhuya kuti ari kuda kuhwirira mu ungano, akuru angakwanisa kupsvaka munhu kuti afunde Bhaibheri naye kunyazi iyena asati ahwirinzwa. Pa mugariro uwona, akuru ndiwo acafunda Bhaibheri no munhuwo.
11 Akuru anoda kuteedzera usisi uye rudo ra Djehovha. Ndiyo ndaa, awona anopsvaka aya ekuti akasiya Djehovha uye anoadjekesera kuti musuwo dzakafununguka kana awona ecida kuhwirira. Kana mushaishi akapangidza kuti wacinyuka uye wocinja maitiro ake, iyena ungakwanisa kuhwirinzwa nokukasika.—2 Ako. 2:6-8.
12. (a) Pa migariro ipi yekuti akuru anodikana kunyasa kungwarira? (b) Ngei atidikani kurangarira kuti azvibviri kuti anhu aganani arekererhwe na Djehovha? (Onaiwo masoko e pasi.)
12 Pa migariro imweni, akuru anodikana kunyasa kungwarira asati ahwirinza munhu mu ungano. Akuru anodikana kugara no cokwadi cokuti munhuwo wacinyuka zvezvirokwazvo. Nge muezaniso, kana munhuwo wakaita citema co kudzipa ana adoko, kupandukira cokwadi, kana kuti wakaita urongwa we kuparadza mucato, akuru anodikana kugara no cokwadi cokuti wacinyukadi zvezvirokwazvo. (Mara. 2:14; 2 Ti. 3:6) Akuru anoita izvona ngokuti anodikana kudziirira mabira. Pa nguwa imweyo, akuru anoziyawo kuti Djehovha anotendera kuhwirira ke mushaishi upi hake wacinyuka zvezvirokwazvo uye wasiya kuita zviro zvakashata. Kunyazi hazvo akuru anodikana kungwarira anhu akaita cishaishi mu nguwa yo kare, awona aadi kuguma pa kurangarira kuti muhuwo aazorekererhwi na Djehovha. c—1 Ped. 2:10.
ZVINYI ZVINGAIZWA NO UNGANO
13. Tinobata kudini uya wasumururhwa uye tinobata kudini uya unonga abviswa mu ungano?
13 Hinga zvataona mu fundo yadarika, pamweni paya ciziiso pacinoizwa cokuti munhu wasumururhwa. Pamugariro uwona, tingarumbwa tecishamwaridzana naye ngokuti tinoziya kuti iyena wacinyuka uye aaciripizve kuita ciro cakashata. (1 Ti. 5:20) Munhuwo unorumbwa ecibatanidzwa mu ungano uye unoda rubetso ro hama uye hanzvadzi kuti arumbwe eiita zvakanaka. (Aheb. 10:24, 25) Asi zvakasiyana no munhu unobviswa mu ungano. Pa mugariro wakadaro, isusu ‘atishamwaridzani’ no munhuwo’ ‘kunyazi kurhya naye.’—1 Ako. 5:11.
14. Akristu angaseenzesa kudini hana yakafundiswa no Bhaibheri pa kubata kaanoita munhu anonga abviswa um ungano? (Onaiwo foto.)
14 Izvi zvinoreya kuti aticina basa no aya akabviswa mu ungano here? Andizvopi. Izvirokwazvo kuti atipedzi nguwa yakareba no munhuwo. Asi kana munhuwo akagara nyaukama wedu kana kuti wainga ari shamwari yo padhuze, isusu tingamupika kuti apinde musangano. Hino kana akatenda kei? Kareko tainga tisikatocungamidzi munhu wabviswa mu ungano. Asi Mukristu umwe na umwe, ungaseenzesa hana yake yakarowedzwa no Bhaibheri kuti asanangure zvaacaita pa mugariro uwona. Anganani pamweni angazwa akasudzunuka kucungamidza munhuwo uye kumuti mauya-mauya. Kunyazi zvakadaro, zvinokosha maningi kuedzurira kuti atidikani kupedza nguwa yakareba tecicedza no munhuwo kana kupedza nguwa yakawanda no munhuwo teciita zviro zvimweni.
Mukristu ungasanangura kuti uri kuda kupika munhu wakabviswa mu ungano kuti apinde musangano kana kuti uri kuda kumucungamidza paya paanouya ku musangano (Onai ndima 14)
15. Ndi mushaishi wakadini unorekethwa pana 2 Juau 9-11? (Onaiwo bhokisi rakazwi: “ Kodi Juau na Pauro Ainga Ecireketa Ngezve Citema Cimweco Here?”)
15 Amweni pamweni angadzibvunzisa kuti: ‘Asi Bhaibheri aribhuyi here kuti isusu atidikani kunyazi kutocungamidza mushaishi?’ (Erengai 2 Juau 9-11.) Maererano na 2 Juau 9-11, masoko aya anopangidza kuti anoseenzeswa ku uya wakapauka pakunamata kana kuti ku uya uri kuedza kupfuridzira amweni kuti agare no muhambiro wakashata. (Zvak. 2:20) Ndiyo ndaa, kana munhu unoita kana unokohomedzesa fundiso dze anhu akapauka pakunamata kana kuti uno muhambiro wakashata, akuru aendi koovhakacira munhu iyena. Kunyazi zvakadaro, pacino kariro yokuti iyena acinyuke uye acinje maitiro ake. Asi kana izvona zvikatama kuitika, isusu aticungamidzi munhuwo uye atizomupiki kuti apinde musangano.
TEEDZERAI USISI WA DJEHOVHA
16-17. (a) Djehovha anoda kuti ashaishi aitei? (Ezekiyeri 18:32) (b) Akuru angaseenza kudini pamwepo na Djehovha kuti abetsere mushaishi?
16 Zvinyi zvatafunda pa misoro ye kufunda ii mishanu? Tafunda kuti Djehovha aadi kuti munhu upi hake atsakatiswe! (Erengai Ezekiyeri 18:32.) Iyena anoda kuti ashaishi ese ahwirire kaari. (2 Ako. 5:20) Ndiyo ndaa nguwa dzese Djehovha aikumbira anhu ake ashaishi kuti acinyuke uye ahwirire kaari. Akuru ano ubaba we kuseenza pamwepo na Djehovha kuti abetsere aya akaita zvitema zvakakura kuti acinyuke.—Aro. 2:4; 1 Ako. 3:9.
17 Edzai kurangaridza mupfaro we ese aya ari kudenga kana mushaishi akacinyuka! Baba edu e kudenga Djehovha anopfara maningi pese paya paanoona bira rawo rakapsveteka recihwirira ku ungano. Uye rudo redu kuna Djehovha rinotunhudzirika paya patinorangarira ngezve usisi uye rudo ratisikasisiri ratinopangidzirhwa naye.—Ruka 1:78.
NGOMA 111 Zvinoita kuti Tipfare
a Mu fundo ino ticabhuya ngezve mushaishi we mwanarume asi masoko aya anoseenzawo ku anakadzi.
b Aticaseenzesizve soko rokuti kudzingwa. Maererano no masoko akatarhwa na Pauro pana 1 Akorinti 5:13, ticaseenzesa soko rokuti kubviswa mu ungano.
c Bhaibheri rinoreketa ngezve anhu amweni asikasisiri kurekererhwa. Anhu aya ari kubhuiwa apa ndiwo aya akasanangura kurumbwa asiripi ku dii ra Djehovha. Djehovha na Djesu basi ndiwo anokwanisa kutonga kuti munhu uu aadikanizve kurekererhwa.—Mark. 3:29; Aheb. 10:26, 27.
