MUSORO WE KUFUNDA 31
NGOMA 12 Djehovha Mwari Mukuru
Djehovha Anosoitei kuti Asudzunure Anhu Ano Citema
“Mwari akada maningi nyika, zvekuti akapasa Mwana wake akabarhwa ari umwe ega.”—JUAU 3:16.
CINANGWA
Kupangidza mushobo unotanga Djehovha kutibetsera pakurhwisana no citema uye kuti iyena akaitei kuti tigare no kariro ye upenyu usikaperi tisina citema.
1-2. (a) Citema i cinyi uye tingacikunda kudini? (Onaiwo pakazwi: “Nyasai Kuzwisisa.”) (b) Ticaonei mu fundo ino uye mu fundo dzinoteera dze Murindiri uno? (Onaiwo “masoko ku aerengi” mu fundo ino.)
IMWIMWI maida kuziya kukura kakaita rudo ra Djehovha kamuri here? Mushobo umweni wekuziya izvona, ngewe kufunda zvakaizwa na Djehovha uye zvaari kurumbwa eciita kuti amuponesei pa citema uye rufu. Citema a ndi muzondi wakashata maningi, muzondi watisikakwanisi kukunda tiri tega. Isusu tinoita citema mazuwa ese uye rufu rinouya nge ndaa ye citema. (Aro. 5:12) Asi pacino kariro. No rubetso ra Djehovha isusu tingakwanisa kukunda muzondi uu wakashata maningi. Zvezvirokwazvo Djehovha anotigondesa kuti acatisudzura zvacose pa citema uye rufu.
2 Ke makore anoda kukwana 6000, Djehovha ari kubetsera anhu kuti arhwisane no citema. Ngei iyena ari kuita izvona? Ngekuti iyena anotida. Kubvira paakatisika, Djehovha ari kutipangidzira rudo uye iyena akaita zviro zvakawanda kuti atibetsere kukunda pa kurhwisana no citema uye kugara shamwari dzake. Djehovha anozviziya kuti citema cinokonzera rufu uye iyena aadi kuti isusu tife. Iyena anoda kuti isusu tirarame nokusikaperi. (Aro. 6:23) Iyena anoda kuti imwimwi muraramewo nokusikaperi. Mu fundo ino, isusu ticaona mhinduro dze mibvunzo mitatu: (1) Djehovha akapasa kariro ipi ku anhu ano citema? (2) Zvinyi zvakaizwa no anhu anganani e mu nguwa ye Bhaibheri kuti apfadze Djehovha? (3) Djesu akaitei kuti aponese anhu pa citema uye rufu?
DJEHOVHA AKAPASA KARIRO IPI KU ANHU ANO CITEMA?
3. Cinyi cakaitika kuti kazado yekutanga igare no citema?
3 Djehovha paakasika mwanarume no mwanakadzi wekutanga, iyena waida kuti awona apfare. Djehovha akaapasa mbuto yakarungama kuti agare, cipo ce mucato uye basa rinopfadza. Awona aizogara no makomborero e kudzadza nyika no ana awo uye kucinja nyika yese kuti igare paraizo hinga zvainga zvakaita munda we Edheni. Djehovha akarambidza Adhamu na Evha ciro cimwe basi uye ciro icona cainga cisikashuphi. Djehovha akaangwadzawo kuti cinyi caizoitika kana awona akatama kureremedza zvaainga abvunzwa uye osama kuzwira, icona caizogara citema uye zvaizokonzera kuti awona afe. Isusu tinozviziya zvakazoitika. Ngirozi yakashata yainga isikadi Mwari uye yainga isikadiwo anhu, yakaedza kuvhiringidza cinangwa ca Djehovha, iyona yakacengedza Adhamu na Evha kuti asazwire Mwari. Kazado yekutanga yakagonda ngirozi iya yakashata pane kugonda Baba awo ano rudo uye kazado ii yakaita citema. Uye isusu tinoziya mugumisiro wakhona, kubvira pa zuwa irona kuenda mberi, Adhamu na Evha akazoshuphika ke upenyu wawo wese; awona akacembera, akarhwara uye akafa.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Ngei Djehovha ecizonda citema uye ecitibetsera kucirhwisa? (Aroma 8:20, 21)
4 Ii i ngano inotsukwarisa maningi, asi Djehovha akaita kuti itarhwe mu Bhaibheri kuitira kuti tizwisise cokwadi cinokosha maningi. Ngano ii, inotibetsera kuzwisisa kuti ngei Djehovha ecizonda maningi citema. Citema cinotiparadzanisa na Baba edu uye cinokonzera rufu. (Isa. 59:2) Ndiyo ndaa, ngirozi iya yakashata yakacengedza Adhamu na Evha kuti aite citema, iyona inoda citema uye inorumbwa yeciedza anhu mazuwa ano. Adhamu na Evha paakaita citema, Sathani pamweni wakarangarira kuti wainga akwanisa kutsakatisa cinangwa ca Djehovha ku anhu. Asi iyena wainga asikarangariri kuti Djehovha ano rudo rakakura kudini. Djehovha ainga asikazocinji cinangwa cake ku ana a Adhamu na Evha. Iyena unoda anhu, ndiyo ndaa, Adhamu na Evha paakashaisha, Djehovha akapasa kariro ku ana awo. (Erengai Aroma 8:20, 21.) Djehovha aizviziya kuti ana anganani a Adhamu na Evha aizosanangura kumuda uye kumuzwira. Ndiyo ndaa, Djehovha akaita urongwa kuti aaponese pa citema uye aapase mukana we kugara no ushamwari we padhuze naye. Djehovha akaitei kamare kuti izvona zvikwanisike?
5. Djehovha akapasa rini ruvheneko re kariro ku anhu ano citema? Panganidzai. (Genesi 3:15)
5 Erengai Genesi 3:15. Ruvheneko rekutanga re kariro rakaoneka Djehovha paakatonga Sathani omubvunza zvaizoitika naye. Mwari akabhuya kuti paizooneka “mwana” uye mwanewo waizoseenzeswa kuti aponese anhu. Mwana uu waizodzengenyesa Sathani uye waizogadzirisa matambudziko ese akatanga mu munda we Edheni. (1 Juau 3:8) Asi kuti izvona zviitike, mwana uu waizoshuphika. Sathani waizokuwadza mwana iyena kana kuti waizoita kuti afe. Zvezvirokwazvo izvi zvaizoita kuti Djehovha arhwadziwe. Asi iyena wainga akagadzirira kushuphika, nge kuita izvona mamiriyonji e anhu aizoponeswa pa citema uye pa rufu.
ANHU ANO CITEMA E NGUWA YO BHAIBHERI AKAPFADZA KUDINI DJEHOVHA UYE KUGARA SHAMWARI DZAKE?
6. Anarume anganani ano kutenda akaita hingana Abheri uye Nowa, akaitei kuti agare shamwari dza Djehovha?
6 Zviuru zve makore zvakazoteera, Djehovha akapangidza padoko no padoko kuti zvinyi zvingaizwa no anhu ano citema kuti agare shamwari dzake. Ngo muezaniso, Abheri mwana wecipiri wa Adhamu na Evha wakagara munhu wekutanga kupangidza kutenda muna Djehovha mumasure me zvakaitika mu Edheni. Abheri waida Djehovha uye waida kumupfadza uye kugara shamwari Yake, nge ndaa yazvo iyena wakada kumupasa ciro. Abheri wainga ari muushi we mabira, hino iyena wakatora mabira ake manganani uye wakapasa Djehovha hingana cibairo. Djehovha akazviona kudini? Iyena “akapfarira Abheri no zvipo zvake.” (Gen. 4:4) Djehovha akapangidzawo kuti aitendera mipiro yakaizwa no anhu amweni aimuda uye aimugonda, hingana Nowa. (Gen. 8:20, 21) Nge kutendera zvibairo izvi, Djehovha akapangidza kuti anhu ano citema angakwanisa kumupfadza uye kugara shamwari dzake. b
7. Tinofundei kubva pa cikumbiro cakaizwa na Djehovha kuna Abrahamu?
7 Mumasure me kudarika nguwa, Djehovha akakumbira Abrahamu, mwanarume wainga ano kutenda kakabamba maningi kuti aite ciro cinoshupha—kupira mwana wake Izaki hinga cibairo. Zvezvirokwazvo ici cainga ciri cikumbiro cinoshupha maningi cakakumbirhwa Abrahamu kuti aite mu upenyu wake wese. Zvingaita kuti akuna cikumbiro cimweni cakakumbirhwa Abrahamu ndi Djehovha caizoshupha kudaro. Asi kunyazi zvakadaro, Abrahamu wakazwira Djehovha. Abrahamu paainga aa dhuze kuti apire mwana wake hinga cibairo, Djehovha akamurambidza. Muezaniso uu unofundisa cokwadi cinokosha maningi ku anhu ese ano kutenda, Djehovha aizonga akagadzirira kupasa cibairo cakakura, kupira Mwana wake waaida maningi. Izvi zvinopangidza rudo ra Djehovha ku anhu.—Gen. 22:1-18.
8. Zvibairo zvaikumbirhwa no Mutemo zvaipangidzei? (Revhitiko 4:27-29; 17:11)
8 Mumasure me kudarika makore akawanda, Djehovha akapasa Mutemo dzinza re Israeri uye Mutemo uwona waibhuya kuti awona aidikana kuita zvibairo zve zvinyama kuti arekererhwe zvitema zvawo. (Erengai Revhitiko 4:27-29; 17:11.) Zvibairo izvona zvainga zviri cipangidzo ce cibairo cinokosha maningi. Cibairo ici caizosudzunura anhu ese pa citema. Djehovha akafemera aphorofita akawanda kuti arekete ngezve mwana iyena wakapikirhwa. Awona akapanganidza kuti mwana uu waizogara Mwana unokosha wa Mwari, iyena aidikana kushuphika uye kufa. Mwana uu waizopirhwa hingana bira. (Isa. 53:1-12) Cimborangaridzai basi: Djehovha aizopasa Mwana wake waanoda hinga cibairo kuti asudzunure anhu pa citema no rufu uye izvona zvinobatanidzawo imwimwi!
DJESU AKAITEI KUTI ATIPONESE?
9. Juau Mubhabhatidzi wakabhuyei ngezva Djesu? (Ahebheru 9:22; 10:1-4, 12)
9 Mu gore ra 29 K.A., Juau Mubhabhatidzi wakaona Djesu we ku Nazareta uye wakati: “Onai, Bira ra Mwari rinobvisa zvitema zve nyika!” (Juau 1:29) Masoko aya akapangidza pamhene kuti Djesu ainga ari mwana akapikirhwa na Djehovha. Djesu aizopira upenyu wake hinga cibairo ku anhu. Parizvino, kariro yatakapaswa ndi Djehovha yekuti acaponesa anhu zvacose pa citema yakabambirira kudjeka.—Erengai Ahebheru 9:22; 10:1-4, 12.
10. Djesu akapangidza kudini kuti iyena “akauya koodainza” ashaishi?
10 Djesu ainyasa kukoshesha anhu aya aizwa akaremerhwa nge ndaa ye zvitema uye aiapika kuti agare ateeri ake. Djesu ainyasa kuziya kuti cikonzero cinoita kuti anhu ashuphike i citema. Ndiyo ndaa, iyena akaedza zvese zvaaikwanisa kuti abetsere anarume no anakadzi aishuphika nge ndaa ye zvitema zvaainga aita. Zuwa rimweni, iyena akapanganidza izvona eciseenzesa muezaniso, iyena akati: “Anhu akatamba aadi murapi, asi aya ari kurhwara.” Pedzepo iyena wakapedzesa eciti: “Andizi kuuya koodainza anatsi, asi ashaishi.” (Mat. 9:12, 13) Ndizvona kamare zvakaizwa na Djesu. Iyena akapangidza unaki uye akarekerera mwanakadzi wakasuka murenje dzake no misodzi yake. (Ruka 7:37-50) Iyena akafundisa cokwadi cinokosha maningi ku mwanakadzi Musamariya, kunyazi ainga ecizviziya kuti mwanakadziwo waigara no mwanarume waainga asikazi kucata naye. (Juau 4:7, 17-19, 25, 26) Uye Mwari akatopasawo Djesu simba re kutsakatisa rufu, mugumisiro we citema. Akazviita kudini? Djesu akaita izvona nge kumutsa anarume, anakadzi uye ana adoko.—Mat. 11:5.
11. Ngei anhu ano citema aigara akasudzunuka dhuze na Djesu?
11 Zvinotoita kuzwisisa kuti ngei anhu aiita zvishashi zvakakura maningi aizwa akasudzunuka kugara padhuze na Djesu. Djesu aipangidzira unaki ku anhu awona uye aizwisisa mazwiro awo. Ndiyo ndaa, apana waithya kucedza naye. (Ruka 15:1, 2) Djesu aiasimba uye aikomborera aya aipangidza kutenda kaari. (Ruka 19:1-10) Ngokudaro, Djesu akapangidza nge mushobo wakakwana kuti Djehovha ndi Mwari ano usisi. (Juau 14:9) Zviro zvakabhuiwa uye zvakaizwa na Djesu, zvakapangidza kuti Baba ake ano usisi anoda anhu uye anoda kubetsera umwe na umwe wedu kuti akunde citema. Kusiya izvona, Djesu akabetsera anhu ano citema kuti agare no cido cekuita cinjo uye kumuteera.—Ruka 5:27, 28.
12. Djesu akafundisei ngezve rufu rake?
12 Djesu aizviziya kuti aizopira upenyu wake. Zvekuti pa migariro yakawanda, iyena akabvunza ateeri ake kuti aaizotengeswa uye aizokhomerhwa pa danda. (Mat. 17:22; 20:18, 19) Iyena aizviziyawo kuti cibairo cake caizoita kuti abvise citema pa nyika yese hinga zvainga zvabhuiwa na Juau uye no aphorofita amweni. Djesu akabhuyawo kuti mumasure me kufa kake aizoita kuti “anhu akasiyana-siyana auye” kaari. (Juau 12:32) Izvi zvinoreya kuti munhu uya waizopangidza kutenda muna Djesu uye ogara muteeri wake waizopfadza Djehovha. Aya aizoita izvona ‘aizosudzunurhwa pa citema.’ (Aro. 6:14, 18, 22; Juau 8:32) Ndiyo ndaa, Djesu ainga ano ushingi uye ainga akagadzirira kubatana no rufu rinorhwadza maningi.—Juau 10:17, 18.
13. Djesu akafa kudini uye rufu rake rinotifundisei nge zva Djehovha Mwari? (Onaiwo mufanikiso.)
13 Djesu akatengeswa no umwe we shamwari dzake dze padhuze, pedzepo azondi ake akamusunga, akamutuka uye akamupumha no zviro zvaainga asikazi kumboita. Iyena akatongerhwa rufu uye akatambudzwa maningi. Pakupedzesera, masurudado akamukhomera pa mutanda. Zvese izvi zvezvirokwazvo zvakaita kuti Djesu ashuphike, asi pano Munhu akashuphika maningi kudarika Djesu, Djehoha Mwari. Djehovha akadikana kudzibata kuti asaseenzese simba rake risikaperi kuti apedze kushuphika ke Mwana wake. Ngei? Zvinyi zvakaita kuti Djehovha atendere kuti Mwana wake ashuphike uye afe? Mhinduro iri pa soko rimwe basi, rudo. Djesu akati: “Mwari akada maningi nyika, zvekuti akapasa Mwana wake akabarhwa ari umwe ega, kuti wese uya anopangidza kutenda maari asatsakatiswe, asi aone upenyu usikaperi.”—Juau 3:16.
Ecitendera kuti Mwana wake auraiwe, Djehovha akashingirira marhwadzo akakura maningi kuti atisudzunure pa citema no rufu (Onai ndima 13)
14. Cibairo ca Djesu cinopangidzei kamuri?
14 Cibairo ca Djesu i cipangidzo cakakura ce rudo ra Djehovha ku ana a Adhamu na Evha. Cibairo ici cinopangidza kuti Djehovha anomudai, anomudai maningi. Djehovha akapasa zvakanakisisa zvake uye akatoguma pa danho re kushingirira marhwadzo akakura maningi kuti amuponesei pa citema uye rufu. (1 Juau 4:9, 10) Zvezvirokwazvo, Djehovha ari kuda kubetsera umwe na umwe wedu kuti arhwisane no citema uye acikunde.
15. Tinodikana kuitei kuti tirekererhwe zvitema zvedu?
15 Cipo ici ca Mwari, cibairo ce Mwana wake anodiwa cinoita kuti tese isusu tikwanise kurekererhwa pa zvitema zvedu. Asi kuti tirekererhwe na Mwari, pano ciro catinodikana kuita. Cinyi? Juau Mubhabhatidzi uye Djesu wene kamare akabhuya zvatinodikana kuita, awona akati: “Cinyukai, ngokuti Umambo we kudenga waapadhuze.” (Mat. 3:1, 2; 4:17) Hino, ciro cikuru cingatibetsera kuti tirhwisane no citema uye kuti tigare no ushamwari na Baba edu ano rudo, kucinyuka. Asi zvinoda kureyei kucinyuka uye izvona zvingatibetsera kudini kurhwisana no citema? Mubvunzo uu, ucadairhwa mu fundo inoteera.
NGOMA 18 Makaita Basa Nge Kutisudzunura
a NYASAI KUZWISISA: Mu Bhaibheri, soko rekuti “citema” ringakwanisa kureya maitiro akashata kana kuti munhu unorarama zvisikaenderani no zvinobhuiwa na Djehovha kuti zvakanaka kana kuti zvakashata. Asi soko rekuti “citema” ringakwanisawo kureya kusama kukwana kana kuti maitiro e citema atakagara nhaka kuna Adhamu. Isusu tinofa nge ndaa ye citema catakagara nhaka.
