MUSORO WE KUFUNDA 33
NGOMA 130 Ngatirekererane
Ungano Ingateedzera Kudini Djehovha Panocokuita no Mabatire Aanoita Munhu Waita Citema
“Kana munhu akaita citema, tino mubetseri.” —1 JUAU 2:1.
CINANGWA
Kufunda mafundo anokosha ekuti ungano ye Korinti yakabata kudini hama yainga yaita citema cakakura.
1. Djehovha anoda kuti anhu ese aitei?
DJEHOVHA akasika anhu no rusudzunuro re kusanangura. Imwimwi munososeenzesa cipo icona nguwa dzese. Cisananguro cinokosha maningi cekuti munhu wese angakwanisa kuita, ngece kudzipira kuna Djehovha uye Kumuseenzera pamwepo no hama dzedu. Djehovha anoda kuti anhu ese aite izvona. Ngei? Ngekuti iyena anoda anhu uye anoda zvakanakisisa kaari. Djehovha anoda kuti tigare shamwari dzake uye tirarame nokusikaperi.—Dhe. 30:19, 20; Aga. 6:7, 8.
2. Djehovha anoetserei ku aya ekuti akaita citema cakakura asi aasati acinyuka? (1 Juau 2:1)
2 Asi Djehovha aabambidziri kuti munhu amuseenzere. Iyena anosiya kuti munhu umwe na umwe asanangure zvaacaita. Hino kana Mukristu akabhabhatidzwa akatama kutondowedza mutemo wa Djehovha uye oita citema cakakura? Kana iyena akatama kucinyuka, anodikana kubviswa mu ungano. (1 Ako. 5:13) Kunyazi izvona zvikaitika, Djehovha anoetsera no mwoyo wese kuti munhu uya anonga aita citema ahwirire Kaari. Zvezvirokwazvo, ici ndi cimwe ce cikonzero cakakura cakaita kuti Djehovha atipase rusudzunuro—kuti zviite nyore kurekererhwa ke ashaishi anocinyuka. (Erengai 1 Juau 2:1.) Djehovha ndi Mwari ano rudo uye anoda maningi kuti ashaishi acinyuke.—Zak. 1:3; Aro. 2:4; Tig. 4:8.
3. Ticaonei mu fundo ino?
3 Djehovha anotifundisa kuti anozwa kudini pa nyaya inocokuita no citema uye ku anhu anoita citema. Uye iyena anoda kuti isusu titeedzere muezaniso wake. Fundo ino, icapangidza kuti tingazviita kudini. Ticaona kuti, (1) ungano ye ku Korinti yakabata kudini hama yainga yaita citema cakakura? (2) Muphostori Pauro wakapasa nhungamiriro ipi mushaishi paakacinyuka? Uye (3) Djehovha anozwa kudini no Akristu aya akaita citema cakakura?
UNGANO YE KU KORINTI YAKABATA KUDINI NYAYA INOCOKUITA NO CITEMA CAKAKURA?
4. Zvinyi zvainga zveciitika ku ungano ye Korinti? (1 Akorinti 5:1, 2)
4 Erengai 1 Akorinti 5:1, 2. Pa rhwendo rake recitatu hinga misiyonariyo, Pauro wakazwa ngezve nyaya yakakura yainga yeciitika ku ungano yainga yabva kuumbwa ye Korinti. Hama imweni ye mu ungano iyona yainga yeciita uhure no mukadzi umweni wa baba ayo. Kunyazi aya ainga asikatoseenzeri Djehovha, aitoziya kuti maitiro aya ainga “asikamboizwi ku madzinza amweni”! Asi hama dzairangarira kuti zvainga zvisikazi kushata kuti hama iyona irumbwe iri mu ungano, kunyazi yeciita zviro izvona. Pamweni anhu amweni airangarira kuti kusiya izvona zveciitika, ainga eciteedzera Djehovha pa kupangidza usisi uye kuzwisisa. Asi Djehovha aatenderi citema pakati pe anhu ake. Maitiro awona akashata maningi e mwanarume uu, zvezvirokwazvo ainga ecisvipisa zina rakanaka re ungano. Iyena waizokwanisawo kupfuridzira Akristu amweni kuti aitewo hingana zvaaiita. Hino Pauro wakapasa nhungamiriro ipi ku Akristu aya?
5. Pauro wakabvunza ungano kuti iitei uye zvinyi zvaibatanidzwa? (1 Akorinti 5:13) (Onaiwo mufanikiso.)
5 Erengai 1 Akorinti 5:13. Djehovha akafemera Pauro kuti atare tsamba ecipasa nhungamiriro yekuti mushaishi asikacinyuki aidikana kubviswa mu ungano. Akristu akatendeka aidikana kumubata kudini? Pauro wakabhuyazve kuti ‘aime kushamwaridzana’ naye. Izvona zvaibatanidzei? Pauro wakapanganidza kuti hama no hanzvadzi dzainga dzisikatodikani “kurhya no munhu wakadaro.” (1 Ako. 5:11) Kugara no munhu kuti tirhye naye zvingagara nyore kuti tikwanise kushamwaridzana no munhu iyena. Zviri pamhene kuti Pauro waida kureya kuti ungano yainga isikadikani kushamwaridzana no mwanarume iyena. Izvona zvaizodziirira ungano pa maitiro ake akashata. (1 Ako. 5:5-7) Kusiya izvona, kudai hama no hanzvadzi dzatondowedza mazano a Pauro, izvona zvaizokwanisa kubetsera mwanarumewo kuona kuti wainga arhwadzisa kudini Djehovha uye zvaizoita kuti atsukware no zviya zvaainga aita uye ade kucinyuka.
Ecifemerhwa, Pauro wakatara tsamba ecibhuya kuti mushaishi asikacinyuki waidikana kubviswa mu ungano (Onai ndima 5)
6. Mumasure me kutambira tsamba ya Pauro, ungano uye mushaishi akaitei?
6 Mumasure me kutumira tsamba ii ku Akristu e ku Korinti, Pauro wakatanga kudzibvunzisa kuti ungano iyona yaizotambira kudini tsambeyo. No kuhamba ke nguwa, Tito wakaunzisa masoko anopfadza kuna Pauro. Ungano yainga yatondowedza nhungamiriro ya Pauro uye yainga yabvisa mushaishi. (2 Ako. 7:6, 7) Kusiya izvona, mumasure me kudarika mwedzi minganani Pauro atumira tsamba, mushaishi uya wakacinyuka pa zvishaishi zvake! Iyena wainga acinja maitiro ake uye wakatanga kutondowedza nhungamiriro dze mitemo ye unatsi ya Djehovha. (2 Ako. 7:8-11) Mumasure mazvo, Pauro wakabvunza ungano kuti inodikanazve kuitei?
UNGANO YAIDIKANA KUBATA KUDINI MUSHAISHI WAINGA ACINYUKA?
7. Kubvisa mushaisha mu ungano kakadzadzisa cinangwa cipi? (2 Akorinti 2:5-8)
7 Erengai 2 Akorinti 2:5-8. Pauro wakabhuya kuti ‘kusumururhwa kaakaizwa no anhu akawanda kainga kakwana ku mwanarumewo.’ Nge masoko amweni, mupango wainga wadzadzisa cinangwa cawo. Ngacipi cinangwa icona? Cekuita kuti munhu acinyuke.—Aheb. 12:11.
8. Pauro wakabvunzazve ungano kuti iite?
8 Hino, Pauro wakabvunza ungano kuti: “Irekererei no mwoyo wese” uye nyaradzai hama yashaisha uye “ipangidzireizve kuti munoida.” Onai kuti Pauro waida kuti hama no hanzvadzi dziite zviro zvinodarika basi kutendera kuti mwanarumewo ahwirire mu ungano. Pauro waidawo kuti hama no hanzvadzi dzipangidze pamhene kuti dzainga dzarekerera mwanarume uu wainga wacinyuka uye dzaimuda nge masoko uye zviito. Nge kuita izvona, hama iyona yaizogara no rugondo rekuti ese ari kupfara nge kuhwirira kake mu ungano.
9. Ngei pamweni zvakashuphira anhu anganani kuti arekerere hama yainga yacinyuka?
9 Kodi pakutanga zvakashuphira hama no hanzvadzi dzinganani dze ungano iyona kuti dzitambirezve mwanarume uya wainga acinyuka pakati pawo here? Bhaibheri aribhuyi, asi pamweni zvingabvira. Ngokuti pamweni zviito zvake zvakaunzisa matambudziko mu ungano yese uye pamweni zvakatorhwadzisa anhu anganani e mu ungano. Mumasure mekuti awona apeta masimba kuti arumbwe akacena pamberi pa Djehovha, amweni pamweni akaona hingana kuti zvainga zvisina unatsi kuti atambire mwanarume iyena no mwoyo wese hinga hama. (Ezanisai na Ruka 15:28-30.) Asi, ngei zvainga zvecikosha maningi kuti ungano ipangidze rudo re zvirokwazvo ku hama yainga yahwirinzwa mu ungano?
10-11. Cinyi caizokwanisa kuitika kudai akuru e ungano asikazi kurekerera mushaishi wainga acinyuka?
10 Rangaridzai kuti cinyi caizokwanisa kuitika kudai akuru e ungano aramba kutendera kuti mwanarume uu wainga acinyuka zvezvirokwazvo ahwirire mu ungano. Uye rangaridzaizve kuti cinyi caizoitika kudai mwanarumewo ahwirira mu ungano, asi hama no hanzvadzi dzotama kumupangidzira rudo. Iyena waizokwanisa kunyiswa no “kutsukwara kakakura.” Iyena waizokwanisa kuona hingana kuti mugariro wake wainga usisinazve kariro uye waizotokwanisa kusiya kupeta masimba kuti agarezve no ushamwari na Mwari.
11 Kutopinda izvona, kudai hama no hanzvadzi dzimweni dze mu ungano dzikatama kurekerera mushaishi wainga acinyuka, dzaizokanda ushamwari wadzo na Djehovha pa ngozi. Ngei? Ngekuti dzainga dzisikazopangidzi maitiro a Djehovha e kurekerera mushaishi anonga acinyuka, asi dzaizopangidza maitiro akashata asikapangidzi unaki a Sathani. Idzona dzaizogara maferamenta anoseenzeswa na Dhiyabhurosi kuti atsakatise kunamata ke mwanarume uu.—2 Ako. 2:10, 11; Aef. 4:27.
12. Ungano ye ku Korinti yaizoteedzera kudini Djehovha?
12 Hino, ungano ye ku Korinti yaizoteedzera kudini Djehovha, haiwa Sathani pa kurekerera ashaishi anonga acinyuka? Nge kubata ashaishi anonga acinyuka hinga mabatire anoita Djehovha. Onai zvakabhuiwa no atari anganani e Bhaibheri ngezva Djehovha. Dhavhidhi wakabhuya kuti Djehovha ndi Mwari “akanaka uye akagadzirira kurekerera.” (Pis. 86:5) Mika wakatara kuti: “Ndiani Mwari akaita hingana imwimwi, anokanganwira zvishaishi uye anorekerera zvitema?” (Mik. 7:18) Uye Isaya wakapanganidza kuti: “Munhu wakashata ngaasiye gwanza rake, munhu anoita zvakashata ngaasiye marangariro ake; ngaahwirire kuna Djehovha, iyena anozoapangidzira usisi, ngaahwirire kuna Mwari wedu, ngokuti iyena anorekerera no mwoyo wese.”—Isa. 55:7.
13. Ngei akuru e ungano ainga asikadikani kunonoka kuhwirinza mwanarume uu mu ungano? (Onai bhokisi rakazwi: “ Mwanarume we ku Korinti Paakahwirinzwa mu Ungano”)
13 Kuti iteedzere Djehovha, ungano ye ku Korinti yaidikana kutambirazve mwanarume uu wainga acinyuka uye kumupangidzira rudo. Dzecitondowedza nhungamiriro dza Pauro, hama no hanzvadzi dze ku Korinti dzaizopangidza kuti ‘dzinozwira mu zviro zvese.’ (2 Ako. 2:9) Izvirokwazvo kuti painga padarika mwedzi minganani basi mwarume uu painga abviswa mu ungano, asi mupango wadzadzisa cinangwa cawo, cokuita kuti mwanarume uu acinyuke. Hino, painga pasina cikonzero cekuti patore nguwa yakareba mwanarume uu asati ahwirinzwa mu ungano.
TINGATEEDZERA KUDINI UNATSI UYE USISI WA DJEHOVHA?
14-15. Tinofundei nge zviro zvakaitika ku Korinti? (2 Pedru 3:9) (Onai foto.)
14 Ciitiko ce mabatirhwe akaizwa nyaya ye ku Korinti yo kare, cakatarhwa uye cakacengetedzwa ‘kuti citifundise.’ (Aro. 15:4) Ciitiko ici, cinotifundisa kuti Djehovha aatenderi citema cakakura pakati pe ungano. Izvirokwazvo kuti Djehovha ano “usisi,” asi iyena aatenderi zvishaishi uye aatothurudzi mitemo yake inocokuita no zvakanaka uye zvakashata. Djehovha aatenderi kuti mushaishi asati acinyuka arumbwe ecishamwaridzana no aseenzi ake akatendeka (Djud. 4) Uku kainga kusiripi kupangidza usisi, zvezvirokwavo zvaizokanda ungano yese pa ngozi.—Zvie. 13:20; 1 Ako. 15:33.
15 Kusiya izvona, tinofunda kuti Djehovha aadi kuti munhu upi hake atsakatiswe. Cido cake ngece kuti anhu ese aponeswe. Iyena anopangidzirawo usisi ku anhu aya anocinja marangariro no zviito uye anoda kumuseenzera kana kuti kugarazve shamwari dzake. (Ezek. 33:11; erengai 2 Pedru 3:9.) Hino, mwanarume we ku Korinti paakacinyuka uye ocinja maitiro ake akashata, Djehovha akaseenzesa Pauro kuti apanganidzire ungano kuti mwanarume uu waidikana kurekererhwa uye kutambirhwazve mu ungano.
Ungano yecirangarira ngezve rudo uye usisi wa Djehovha, inotambirazve no mwoyo wese munhu unonga ahwirinzwa mu ungano (Onai mandima 14-15)
16. Mumasure me kufunda zvakaitika ku Korinti, munozwa kudini?
16 Kuongorora kataita mushobo wakabathwa nyaya ye ku Korinti, katibetsera kuona rudo, unatsi uye kutonga ke unatsi ka Djehovha. (Pis. 33:5) Izvona zvinotiitisa kuti tide kurumbwa tecinamata Djehovha. Munoziya kuti ngei? Ngekuti tese isusu tiri ashaishi, tese tinoda kurekererhwa na Djehovha uye izvona zvinoitika basi ngo ndaa ye rusudzunuro. Ndiyo ndaa, tino zvikonzero zvekutenda Djehovha ngo ndaa ye cipo ici. Zvinotinyaradza maningi kuziya kuti Djehovha anoda maningi anhu ake uye anoda kuti zviahambire zvakanaka!
17. Ticaonei mu fundo dzinoteera?
17 Zvakadini nyamasi uno, kana munhu akaita citama cakakura Akuru e ungano anoteedzera kudini rudo ra Djehovha uye anobetsera kudini mushaishi kuti acinyuke? Ungano inodikana kupangidza maitiro api akuru e ungano paanosanangura kubvisa kana kuhwirinza munhu unonga aita citema? Mibvunzo dzi dzicadairhwa mu fundo inoteera.
NGOMA 109 Pangidzai Rudo Rinobva pa Mwoyo
