Mibvunzo Inobva ku Aerengi
Tsamba ya 2 Atesaronika 3:14 inobhuya ngezve kukanda cipangidzo ku anhu anganani. Ndiani anodikana kuita izvona? Akuru e ungano here kana kuti umwe na umwe we mu ungano?
Muphostori Pauro wakatarira Akristu e ku Tesaronika kuti: “Asi kana pano munhu usikazwiri masoko edu ari mu tsamba ii, rumbwai makamukanda cipangidzo.” (2 Ate. 3:14) Kare taibhuya kuti ii yainga iri nhungamiriro ku akuru. Kana munhu akasama kukoshesa nhungamiriro dze Bhaibheri kunyazi mumasure me kutambira rubetso kakawanda, pamweni akuru angaita mharidzo mu ungano ecibhuya ngezvazvo. Pedzepo, aparidzi ainga asikazopedzi nguwa yakawanda no mushaishiwo, kusiya basi ku musangano kana kuti mu basa re kuparidzira.
Ngokudaro, zvakanaka kuita cinjo. Parizvino taakuzwisisa kuti mazano a Pauro anoreya kuti Mukristu umwe na umwe unodikana kuita cisanaguro maererano no mugariro we zviro. Hino apacadikanizve kuti akuru e ungano aite mharidzo ngezve nyaya iyona. Asi ngei cinjo ii yakaizwa? Ngationei zviro zvinganani zviri mu mazano akabhuiwa na Pauro.
Pauro wakabhuya kuti anhu anganani e mu ungano iyona ‘aihamba nge mushobo usikazi kusisira.’ Pauro wainga aapasa nhungamiriro dzinganani dzinobva mu Bhaibheri, asi awona ainga asikadi kudzizwira. Pa vhakaciro yaainga abva kuita, iyena wainga aapasa nhungamiriro yekuti: “Kana munhu asikadi kuseenza, ngaasarhye.” Asi anganani airamba kuseenza kuti adziriritire, kunyazi ainga ecikwanisa kuzviita. Kusiya izvona, awona aipindira mu nyaya dze amweni. Akristu akadaro ainga asikazwiri, aidikana kubathwa nge mushobo upi?—2 Ate. 3:6, 10-12.
Pauro wakati: ‘Mukandei cipangidzo.’ Soko re Cigrego rinopasa marangariro ekuti kuona munhu iyena uye tongwarira kuti asatipfuridzire. Pauro wakapasa mazano awona ku ungano yese, haiwa basi ku akuru. (2 Ate. 1:1; 3:6) Hino kana Mukristu umwe na umwe akaona hama kana kuti hanzvadzi yecitama kuzwira mazano e mu Soko ra Mwari, waizoita cisananguro ce “kuima kushamwaridzana” no munhu iyena asikazwiri.
Kodi izvi zvingareya kuti munhu iyena waidikana kubathwa hingana umwe we anhu akabviswa mu ungano here? Haiwa, ngokuti Pauro wakatiwo: “Rumbwai mecimupangira hinga hama.” Hino Mukristu umwe na umwe waizokwanisa kuonana no munhu iyena ku musangano kana kuti mu basa re kuparidzira, asi waizosanangura kutama kupedza nguwa naye ku zviitiko zvimweni kana kuti pakudziwaraidza no amweni. Ngei? Pauro wakati: “Kuti apsveruke.” Patinotama kushamwaridzana no hama iyona, izvona zvingaita kuti pamweni iyena apsveruke nge ndaa ye zviya zvaari kuita uye acinje mushobo wake wekuita zviro.—2 Ate. 3:14, 15.
Akristu angateedzera kudini mazano aya nyamasi uno? Cokutanga, awona anodikana kugara no cokwadi cokuti maitiro e munhuwo ari kupangidza kuti iyena “aazwiri” hingana zvakabhuiwa na Pauro. Asi iyena wainga asikabhuyi ngezve anhu ekuti pamweni angasanangura zviro zvekuti isusu tainga tisikazozviiti, asi zvecipindirana no zvokwadi zve Bhaibheri zvisikacinji. Uye wainga asikabhuiwo ngezve anhu ekuti pamweni akatirhwadzisa. Pane kudaro, Pauro wainga ecibhuya ngezve anhu aya ekuti akasanangura kutama kuzwira mazano ari pamhene e Soko ra Mwari nge kuda kawo.
Nyamasi uno, kana tikakwanisa kuona kuti hama kana kuti hanzvadzi iri kupangidza mwiya we kutama kuzwira kana kuti iri kurumbwa yecitama kureremedza mazano e Soko ra Mwari, a isusu tingakwanisa kusanangura kutama kupedza nguwa no munhuwo pa zviitiko zvisikabatanidzwi pa kunamata. Ngokuti ici i cisananguro ce munhu ega, isusu atizobvunzi anhu amweni kusiya basi anhu e mu mhuri medu. Uye isusu taizoonana no munhu iyena ku musangano uye mu basa re kuparidzira. Kana iyena akacinja muhambiro wake uye zviito zvake, isusu ticahwirirazve kushamwaridzana naye hingana zvataita kare.
a Ngo muezaniso, hama yekuti pamweni inoramba kuseenza kuti idziriritire, asi iyona yecikwanisa kuzviita, hama ino namorari no munhu asikaseenzeri Djehovha, inoreketa zvakashata ngezve nhungamiriro dzinopaswa no sangano, inoreketedzana ngezve fundiso dze Bhaibheri kana kuti inoita mapsveda. (1 Ako. 7:39; 2 Ako. 6:14; 2 Ate. 3:11, 12; 1 Ti. 5:13) Anorumbwa eciita izvona ndi anhu “asikazwiri.”
