MUSORO WE KUFUNDA 51
NGOMA 3 Djehovha Ndiye Simba ne Kariro Yangu
Misodzi Yenyu Inokosha Maningi kuna Djehovha
“Ndapota, kandai misodzi yangu mu mudziyo wenyu. Izvona azvizi kutarhwa mu bhuku renyu here?”—PIS. 56:8.
CINANGWA
Kuedzurira kuti Djehovha anoziya paya patinonga takatsukwara uye kuti iyena acatipasa zvese zvatinoda kuti tizwe zvakanaka.
1-2. Migariro ipi ingatiitisa kuti ticeme?
NGUWA dzimweni mu upenyu, tese isusu tinocema. Nguwa dzimweni tinobuda misodzi ye kupfara, ngokuti tiri kupfara. Ngo muezaniso, pamweni imwimwi makabocema pakaitika ciro cakanaka maningi, cakaita hingana kubarhwa ke mwana, pamakaedzurira ciro cakanaka cakaitika kare kana kuti pamakaonana no shamwari yamainga muno mazuwa akawanda musikaonani nayo.
2 Asi kakawanda kakhona, kucema kedu cipangidzo cekurhwadziwa kakakura mu mwoyo medu. Ngo muezaniso, pamweni tinocema munhu paanotirhwadzisa maningi, pamweni ngokuti tiri kurhwadziwa maningi ngo ndaa ye nhenda yataanayo ke nguwa yakareba uye pamweni ngokuti tafirhwa no munhu watinoda maningi. Tingazwa hingana mushobo wakazwa Djeremiya pakatsakatiswa Djerusarema. Djeremiya wakati: “Madziso angu ari kuerera mvura . . . Madziso angu ari kucema asikazorori, aaripi kuima.”—Mari. 3:48, 49.
3. Djehovha anozwa kudini paanoona aseenzi ake ecishuphika? (Isaya 63:9)
3 Djehovha anonyasa kuziya kamare kuti takacema kangana ngo ndaa ye zvinetso. Bhaibheri rinotigondesa kuti Djehovha akateya nzee ku zvinetso zvese zvinoshupha zviri kubatana no aseenzi ake uye kuti iyena anotizwa paya patinodeketera tecikumbira rubetso. (Pis. 34:15) Asi Djehovha anoita zviro zvinodarika kupurutana basi no kuzwa. Hinga baba ano rudo, iyena anozwa kutsukwara paanozwa umwe we mwana wake ecicema uye ano cidaka-daka cekutibetsera.—Erengai Isaya 63:9.
4. Miezaniso ipi yo mu Bhaibheri yaticaona uye tingafundei ngezva Djehovha?
4 Mu Soko rake, Djehovha anotidjekesera kuti akazwa kudini paakaona aseenzi ake ecicema. Ngo muezaniso, tingafunda ngo zvakaitika na Ana, Dhavhidhi uye Mambo Ezekiya. Ticafunda kuti ngei awona akabudisa misodzi uye kuti Djehovha akaabetsera kudini? Uye ticaonawo kuti Djehovha anotibetsera kudini patinozwa takatsukwara, patinorhwadziswa kana kuti patinozwa hingana kuti akucinazwe kariro?
KUTSUKWARA
5. Ana wainga ari pamugariro upi uye waizwa kudini?
5 Ana wakabatana no zvinetso zvakawanda zvakamuita kuti abudise misodzi ye kutsukwara. Cimwe ce zvinetso izvi cainga cekuti mwamuna wake wainga ano mukadzi umweni, waizwi Penina uye iyena waizonda maningi Ana. Kusiya izvona, Ana wainga asikabari, asi Penina wainga ano ana akawanda. (1 Sam. 1:1, 2) Penina wakapedza nguwa yakawanda ecishora Ana ngokuti wainga asikabari. Imwimwi maizozwa kudini pa mugarire wakadai? Ana wakatsukwara maningi zvekuti “waicema uye wainga asikarhyi,” uye mwoyo wake “wakarhwadziwa maningi.”—1 Sam. 1:6, 7, 10.
6. Ana wakaitei kuti agumire runyararo?
6 Ana wakagumira kudini nyaradzo? Ciro cimwe caakaita nge ce kuenda ku mbuto inonamatirhwa ku tabhernakuro. Ikona, pamweni padhuze no pamusuwo pe ruwanze re tabhernakuro, iyena “wakatanga kuita munamato kuna Djehovha uye ecicema maningi.” Iyena wakadeketerera Djehovha kuti: ‘Aone cinetso caaibatana naco uye kuti amuedzurirewo.’ (1 Sam. 1:10b, 11) Ana wakadurura mwoyo wake kuna Djehovha eciseenzesa munamato. Djehovha paakaona misodzi dzake, iyena akatsukwara maningi uye zvezvirokwazvo akada kunyaradza Ana!
7. Ana wakazwa kudini mumasure me kufunungura mwoyo wake kuna Djehovha?
7 Mumasure me kufungura mwoyo wake kuna Djehovha eciseenzesa munamato, Mupristi Mukuru Eriu wakagondesa kuti Djehovha aizozwa munamato wake. Ana wakazwa kudini mumasure mekuita munamato uu? Ngano yakhona inoti: “Mwanakadziwo wakaenda orhya uye hope yake yainga isikacazi kutsukwara.” (1 Sam. 1:17, 18) Izvirokwazvo kuti mugariro wa Ana waitsukwarisa wainga usati wacinja, asi iyena akazwa kurerukirhwa. Ana wakagonda Djehovha uye wakasiira Djehovha zvese zvaimurhwadza. Djehovha akaona cinetso cake, misodzi dzake uye akamukomborera kuti agare no ana.—1 Sam. 1:19, 20; 2:21.
8-9. Maererano na Ahebheru 10:24, 25, ngei tinodikana kuita zviri zvese kuti tipinde misangano? (Onaiwo foto.)
8 Zvatingafunda. Imwimwi muri kubatana no cinetso cingamusiyai makatsukwara uye kucema? Pamweni makatsukwara maningi nge ndaa ye kufa ke anyaukama eyu kana kuti shamwari yenyu. Pa nguwa yakadai, pamweni munozwa mecida kugara muri mwega. Asi hingana Ana wakazwa kunyaradzwa ngo kuenda ku tabhernakuro, imwimwi mungazwawo kuyaradzwa nge kuenda ku musangano, kanyazi imwimwi makaremba, makatsukwara uye musina cido cokuenda. (Erengai Ahebheru 10:24, 25.) Ku misangano, tinoerenga mavhersikuro e mu Bhaibheri anotibetsera kuti tirangarire zviro zvakanaka uye anotiita kuti tipfare. Ngo mushobo uwona, Djehovha anoita kuti tiime kurangarira zviro zvakashata uye zvinotitsukwarisa. Ngo kudaro, tingakwanisa kuonerera mazwiro edu uye togara no mazwiro akanaka, kunyazi mugariro wedu usikacinji ciriporipoco.
9 Pa misangano yedu, tingapedza nguwa no hama uye no hanzvadzi dzedu dzinotida maningi, dzinotinyaradza uye dzinotipfadza. Isusu tinozwa zvakanaka patinonga tino hama idzi. (1 Ate. 5:11, 14) Onai zvakaitika no hama imweni mupiyonero espesiyari, yakafirhwa no mukadzi wayo. Iyona inoti: “Nguwa dzimweni ndinoda kugara ndiri ndega ngokuti andikwanisi kuima kucema. Ndiri kusuwa maningi mukadzi wangu. Asi pandinoenda ku musangano ndinozwa kupfara maningi. Masoko akanaka andinobvunzwa no hama no hanzvadzi uye mhinduro dzaanopasa ku misangano zvinodinyaradza maningi. Kunyazi ndecinetseka kana kudzirhya mwoyo, pandinoenda ku musangano dzinozwa kubambiswa.” Patinonga tiri ku musangano, Djehovha angakwanisa kuseenzesa hama uye hanzvadzi kuti atibetsere.
Tingakwanisa kuzwa zvakanaka kana tikazwa masoko e unaki e hama no hanzvadzi dzedu (Onai mandima 8-9)
10. Tingateedzera kudini muezaniso wa Ana kana tikazwa kutsukwara kakakura?
10 Ana wakazwawo kunyaradzwa paakapanganidzira Djehovha zvese zvaaizwa pa munamato. Imwimwiwo ‘khandirai kuna [Djehovha] zvese zvinomurhyai mwoyo,’ uye mogonda kuti iyena acamuzwai. (1 Ped. 5:7) Hanzvadzi imweni mufirhwakadzi, yakafirhwa no mwamuna mumasure me kuuraiwa no mambavha, inopanganidza kuti: “Inini ndaizwa kupererhwa, asi cakandinyaradza ndi kuita munamato kuna Baba angu ekudenga ano rudo rakakura maningi. Pamweni paya, ndainga ndisikakwanisi kupanganidza zviya zvandaizwa, asi Djehova aindizwisisa. Pese pandaizwa hinga ndakapererhwa mu ndangariro, ndaiita munamato kuna Djehovha ndecikumbira runyararo. Pa nguwa imweyo ndaizwa runyararo uye ndaikwanisa kurumbwa ndecienderera mberi.” Pamunofunungura mwoyo wenyu kuna Djehovha mecimubvunza zvese zvinomuitisai kuti mutsukware, Djehovha anokwanisa kuzwa kutsukwara kenyu uye anozwisisa zvese zvamuri kubatana nazvo. Kunyazi zviro zvinomuitisai kuti mugare makatsukwara zvikarumbwa zviripo, Djehovha angakwanisa kumunyaradzai mwoyo wenyu uye mozwa runyararo. (Pis. 94:19; Afi. 4:6, 7) Djehovha anoona kupeta masimba kamuri kuita kuti murumbwe makatendeka kaari uye acamukomborerai pa zvese zvamunoita.—Aheb. 11:6.
KUNYANGADZISWA
11. Dhavhidhi wakazwa kudini paakashaishirhwa no anhu amweni?
11 Dhavhidhi, paainga aciri kurarama, iyena wakabatana no zviro zvakawanda zvinoshupha uye zvakatomuitisa kuti aceme. Iyena wakabatana no zvinetso zvakawanda zvaikonzerhwa no anhu amweni uye wakatosiiwa no anhu aaigonda. (1 Sam. 19:10, 11; 2 Sam. 15:10-14, 30) Iyena wakatoguma pakubhuya kuti: “Simba rangu riri kupera nge ndaa ye matambudziko andinawo; Usiku wese ndinototesa kama yangu no misodzi; Pandinowata panopera kutota no misodzi.” Ngei Dhavhidhi wakazwa kurwadziwa? Iyena unopanganidza kuti: “Ngo ndaa yo aya ari kunditambudza.” (Pis. 6:6, 7) Zvakaizwa no anhu amweni kuna Dhavhidhi zvainga zvakashata maningi. Iyena wakarhwadziwa maningi mu ndangariro zvekutoti wakaguma pakucema.
12. Maererano na Pisarema 56:8, Dhavhidhi wainga ano rugondo rei ngezva Djehovha?
12 Kunyazi Dhavhidhi wakasongana no mugariro unoshupha, iyena aazi kukana-kana kuti Djehovha aimuda. Iyena wakati: “Djehovha acazwa kucema kangu.” (Pis. 6:8) Pa nguwa imweni, Dhavhidhi wakatara masoko atinogumira pana Pisarema 56:8. (Erengai.) Zvakabhuiwa na Dhavhidhi pa Pisarema ii, zvinobaya mwoyo uye zvinopangidza pamhene mushobo watinodiwa na Djehovha. Kuna Dhavhidhi zvaiita hingana kuti Djehovha ari kucengeta misodzi dzake mu mudziyo kana kuti aitarira mubhuku nguwa yese yaaicema. Dhavhidhi wainga ano rugondo rokuti Baba ake Djehovha ainyasa kuzwisisa zvese zvaibatana nazvo uye mugumisiro waizooneka kaari.
13. Amweni paanotitsukwarisa, cinyi catinodikana kuedzurira? (Onaiwo foto.)
13 Zvatinofunda. Imwimwi muri kuzwa kurhwadziwa ngokuti munhu wamaigonda waita zviro zvamusikapfariri uye zvamainga musikaetseri here? Pamweni imwimwi muri kurhwadziwa ngokuti namoro yenyu kana kuti mucato wenyu wapera ciriporipoco kana kuti munhu wamunoda wasiya kuseenzera Djehovha. Hama imweni yakasiiwa no mukadzi wayo yakabhuya kuti: “Inini ndainga ndisikakwanisi kutenderana no zviya zvaiitika kandiri. Inini ndaizwa kutsukwara maningi, ndaigara no shungu uye ndaiona hingana kuti pano ciro candashaisha.” Kana imwimwi muri kubatana no kuyangadziswa uye kusiiwa, edzurirai kuti Djehovha aazomusii. Hama imwe-imweyo yakapanganidza kuti: “Inini ndakazwisisa kuti anhu aazorumbwi akagondeka kandiri, asi Djehovha honde, ngokuti iyena ndi Buwe redu. Azvinei no zvingaitika, iyena ari ku dii redu nguwa dzese. Uye aazombosii aya akagondeka kaari.” (Pis. 37:28) Edzuriraiwo rudo rinozwa Djehovha kamuri, i rudo rakakura rinodarika ro munhu upi hake. Kunyazi zvecirhwadza maningi kubatana no kusiiwa uye kunyangadziswa, edzurirai kuti Djehovha aambocinji uye iyena anomudai maningi. Imwimwi munokosha maningi kaari. (Aro. 8:38, 39) Fundo nga iri: Azvinei nokuti munhu umweni wamubatai kudini, Baba edu ano rudo Djehovha anomudai maningi.
Bhuku ra Pisarema rinotigondesa kuti Djehovha ari dhuze no aya akaora mwoyo (Onai ndima 13)
14. Pisarema 34:18 inotipasa rugondo rei?
14 Pamunobatana no kuora mwoyo, mungagumirawo runyararo ngo kuerenga masoko anopfadza a Dhavhidhi pana Pisarema 34:18. (Erengai.) Tecibhuya ngezve pisarema ii, bhuku rimweni rinoti: “Aya akaora mwoyo” anoda kureya “anhu asina marangariro akanaka ku zviro zvo mberi.” Djehovha anoitei kuti abetsere anhu aya akaora mwoyo? Kuita hingana baba ano rudo anokhumbatira mwana wawo kuti amunyaradze pa mugariro wakashata, Djehovha “ari dhuze na” isusu. Iyena anotipangidzira usisi nguwa dzese uye akagadzirira kutibetsera patinorhwadziwa mwoyo, nge ndaa ye kunyagadziswa kana kusiiwa. Djehovha anoda maningi kutinyaradza uye kutiteramisa patinorhwadziwa mu ndangariro uye mu mwoyo. Uye iyena anotipasa zviro zvakanaka zvatingaetsera mune ramangwana, zvingatibetsera kuti tishingirire matambudziko atiri kubatana nawo nyamasi.—Isa. 65:17.
KUTAMA KARIRO
15. Cinyi cakaitika na Ezekiya cakamuita kuti aceme?
15 Paainga ano makore 39, Mambo Ezekiya we ku Djudha wakaziya kuti wainga ano nhenda isikarapiki. Djehovha akakumbira muphorofita Isaya kuti aende kooziisa Ezekiya kuti iyena waizofa ngo nda ye nhenda iyona. (2 Mad. 20:1) Zvaiita hingana kuti apana ciro caizokwanisa kuita Ezekiya. Iyena wakatsukwara maningi nge ndaa ye ciziiso ici uye wakacema maningi. Pedzepo iyena wakaita munamato we kudeketera kuna Djehovha.—2 Mad. 20:2, 3.
16. Djehovha akadaira kudini munamato wa Ezekiya?
16 Paaiona Ezekiya ecicema uye ecideketerera upenyu wake, Djehovha akamuzwira usisi. Djehovha akati: “Ndazwa munamato wako. Ndaona misodzi yako. Ndiyo ndaa, ndinokuporesa.” Djehovha akapagindzira usisi wake, eciseenzesa muphorofita Isaya iyena, akagondesa kuti aizotunhudzira makore ake e upenyu uye kuti aizonunura Djerusarema mu nyara dze Asiriya.—2 Mad. 20:4-6.
17. Patinobatana no nhenda yakakura tingagonda kudini na Djehovha kuti tienderere mberi? (Pisarema 41:3) (Onaiwo foto.)
17 Zvatinofunda. Imwimwi muri kubatana no nhenda yekuti muri kuzwa kupererhwa? Itai munamato kuna Djehovha, kunyazi kuri kucema basi. Bhaibheri rinotigodesa kuti: “Baba e usisi ukuru uye Mwari we kunyaradza kese” acatinyaradza pa matambudziko edu ese. (2 Ako. 1:3, 4) Izvirokwazvo kuti nyamasi atingaetseri kuti Djehovha apedze zvinetso zvedu zvese, asi tingakwanisa kugonda naye kuti angatibetsera uye acatinyaradza. (Erengai Pisarema 41:3.) Eciseenzesa mwiya wake mucena, Djehovha anotipasa simba, ungwaru uye runyararo re mukati kuti tikwanisane no mugariro uwona. (Zvie. 18:14; Afi. 4:13) Mushobo umweni unoseenzesa Djehovha kuti atibambise, nge we kuseenzesa kariro yedu ye ramangwana, yekuti mbai-mbai pano matenda ese acatsakatiswa uye apanazve acarhwara.—Isa. 33:24.
Djehovha acadaira minamato yedu ngo kutipasa simba, ungwaru uye runyararo recemukati (Onai ndima 17)
18. I tsamba ipi inomunyaradzai pamunobatana no cinetso cakakura maningi? (Onai bhokisi rakazwi: “ Masoko a Djehovha Anonyaradza Mwoyo Wedu.”)
18 Ezekiya wakanyaradzwa no masoko a Djehovha. Isusuwo tingagumirawo runyararo mu Soko ra Mwari. Mu Bhaibheri, Djehovha akasiya tsamba dzakawanda dzinotinyaradza uye dzinoita kuti tizwe zvakanaka paya patinobatana no mugariro unoshupha. (Aro. 15:4) Onai muezaniso we hanzvadzi imweni ye ku África yakacema maningi payakabvudzwa kuti yainga ino kankro. Iyona inobhuya kuti: “Tsamba yaindipasa runyararo nge ya Isaya 26:3. Kakawanda kakhona, isusu atikwanisi kuonerera matambudziko atinobatana nawo. Asi tsamba ii inondiedzurira kuti Djehovha angandipasa runyararo re mukati ricandibetsera kuonerera mazwiro angu pandinobatana no mugariro uwona.” Zvakadini na imwimwi, pano tsamba inomunyaradzai pamunobatana no migariro inoshupha uye hingana kuti apana camunokwanisa kuita here?
19. I kariro ipi yatinayo mune ramangwana?
19 Isusu tiri kurarama mu nguwa inoshupha maningi, mazuwa ekupedzesera. Ngo ndaa yazvo, isusu tinoetsera kubatana no matambudziko uye zviro zvakawanda zvinoita kuti ticeme. Hinga zvataona muezaniso wa Ana, Dhavhidhi uye Mambo Ezekiya, Djehovha anoona misodzi dzedu dzese uye anotsukwara paanotiona tecicema. Misodzi dzedu dzinokosha maningi kuna Djehovha, ngokuti idzona dzinopangidza kuti isusu tinorumbwa takatendeka, kunyazi patinobatana no matambudziko. Hino, pamunobatana no migariro inoshupha funungurai mwoyo wenyu kuna Djehovha ngo kuita munamato uye pedzai nguwa no hama uye hanzvadzi dze mu ungano, erengai Bhaibheri kuti muone runyararo mu masoko anonyaradza a Djehovha. Uye garai no rugondo rokuti kana imwimwi mukarumbwa mecishingiria makagondeka, Djehovha acamukomborererai uye makomborero awona anobatanidzawo zvipikirhwa zvekuti nokukasika apacina munhu ucatsukwara, ucaora mwoyo, ucarhwadziswa uye kusama kugara no kariro. Djehovha acapukuta misodzi dzese idzi. (Zvak. 21:4) Kana nguwa iyona ikaguma, isusu ticacema no mupfaro.
NGOMA 4 “Djehovha Ndiye Muushi Wangu”
