MUSORO WE KUFUNDA 49
NGOMA 147 Upenyu Usikaperi Wakapikirhwa
Munodikana Kuitei kuti Murarame Nokusikaperi?
“Wese uya anotambira Mwana uye opangidza kuti anotenda maari [acaona] upenyu usikaperi.”—JUAU 6:40.
CINANGWA
Kuzwisisa kuti akadzodzwa pamwepo no mabira amweni acabetsereka kudini nge ndaa ye kudzipira ka Djesu Kristu.
1. Ngei anhu akawanda anorangarira kuti azvibviri kurarama nokusikaperi?
ANHU akawanda anoedza kurhya zviro zvakanaka uye kuita maezersisiyo kuti agare no uthongo wakanaka uye kurarama mazuwa akareba kana zvecibvira. Kunyazi zvakadaro, awona aaetseri kurarama nokusikaperi. uye anotorangarira kuti azvibviri kurarama nokusikaperi. Kunyazi zvakadaro, pana Juau 3:16 uye 5:24, Djesu akabhuya kuti zvinobvira kuti “aone upenyu usikaperi.”
2. Juau kapituro 6 inobhuyei ngezve upenyu usikaperi? (Juau 6:39, 40)
2 Zuwa rimweni, Djesu akaita cishamiso uye akapasa zvokurhya mamirionji e anhu pau uye howe. a Izvi zvakashamisa, asi zvakazobhuya Djesu pa zuwa rakazoteera zvinoshamisa kudarika izvi. Anhu akateera Djesu dakara ku Kafarnau, uye ikona iyena akaabvunza kuti anhu angamutswa, orarama nokusikaperi. (Erengai Juau 6:39, 40.) Rangarirai kuti izvona zvinoreyei ku shamwari dzenyu no adiwa enyu akafa. Zvakabhuiwa na Djesu zvinotipasa rugondo rekuti aya akafa angamutswa, zvekuti kunyazi imwimwi no adiwa enyu akafa mungakwanisa kurarama nokusikaperi! Asi zvakabhuiwa na Djesu pa mavhersikuro anoteera a Juau kapituro 6 zvakashuphira anhu akawanda kuti azvizwisise uye zviciri kushuphira anhu nyamasi uno kuti azvizwisise. Djesu akabhuyei?
3. Maererano na Juau 6:51, Djesu akafundisei ngezvake kamare?
3 Mumasure mekuti Djesu aita cishamiso ce kupasa anhu zvekurhya ku Kafarnau, awona akarangarira ngezve manaa akapaswa Aisraeri na Djehovha paainga ari ku renje. Matarhwa anodainza manaa hinga “pau inobva kudenga.” (Pis. 105:40; Juau 6:31) Djesu akaseenzesa manaa hinga fundo guru kuti afundise ciro cinokosha. Kunyazi manaa yainga iri ciro cokurhya cinoshamisa ca Mwari, aya akarhya, nokuhamba ke nguwa akazofa. (Juau 6:49) Nge dii rimweni, Djesu akabhuya nge zvake kamare hinga “pau inobva kudenga,” “pau ya Mwari,” uye “pau yo upenyu.” (Juau 6:32, 33, 35) Djesu akapanganidza musiyano unokosha pakati pe manaa na iyena kamare. Iyena akati: “Inini ndiri pau yo upenyu yakacita kubva kudenga. Kana munhu akarhya pau ii acararama nokusikaperi.” (Erengai Juau 6:51.) Adjudha aya akapererhwa no cokuita. Awona aazi kukwanisa kuzwisisa kuti ngei Djesu akabhuya kuti iyena ndi “pau” yakabva kudenga yekuti pau iyona yainga yakanakisisa maningi kudarika manaa akapaswa madzitsekuru awo na Mwari. Djesu akabhuya masoko akanaka maningi paakati: “Pau yandicapasa ndi mwiri wangu.” Iyena aida kureyei no masoko aya? Zvinokosha maningi kuzwisisa zvaanoda kubhuya, ngokuti mhinduro yakhona inotibetsera kuzwisisa kuti upenyu usikaperi ucagara kudini katiri uye no ku adiwa edu akafa. Ngatizwisise masoko a Djesu.
MASOKO OKUTI “PAU YE UPENYU” UYE “NYAMA YANGU” ANODA KUREYEI
4. Ngei anhu akashamisika maningi no masoko a Djesu?
4 Anhu amweni aipurutana Djesu akabathwa-bathwa maningi paakabhuya kuti: “Pau yandicapasa ndi mwiri wangu kuti nyika ione upenyu.” Masoko a Djesu akashamisa anhu akawanda. (Juau 6:52) Djesu akazobhuya masoko akazonyanya kuashamisa maningi. Iyena akati: “Kana mukatama kurhya nyama yo Mwana we munhu no kumwa ngazi yake, imwimwi amuna upenyu mamuri.”—Juau 6:53.
5. Ngei tino rugondo rekuti Djesu ainga asikareketi kuti anhu aidikana kumwa ngazi yake kamare?
5 Mu mazuwa a Nowa, Mwari akarambidza anhu kurhya ngazi. (Gen. 9:3, 4) Nokuhamba ke nguwa, Mwari akarambidzawo Aisraeri kurhya ngazi. Kana munhu upi hake akarhya ngazi “aizouraiwa.” (Rev. 7:27.) Djesu aizwira Mutemo. (Mat. 5:17-19) Hino zviri pamhene kuti iyena ainga asikazokumbiri kuti Adjudha arhye mwiri wake kamare kana kumwa ngazi yake. Asi nge kureketa masoko aya anoshamisa, Djesu zvezvirokwazvo ainga ecifundisa anhu kuti angaona kudini “upenyu usikaperi.”—Juau 6:54.
6. Tinoziya kudini kuti Djesu ainga ecireketa nge mushobo we kuezanisira pana Juau 6:53?
6 Djesu aida kureyei? Zvezvirokwazvo, Djesu ainga ecireketa nge mushobo we kuezanisira, nge mushobo umwewo paakareketa no mwanakadzi Musamariya paakati: “Munhu anomwa mvura yandinomupasa aazogarizve no mukaha, asi mvura yandinomupasa inozogara manyuko e mvura inopopoma mukati make kuti ipase upenyu usikaperi.” (Juau 4:7, 14) b Djesu ainga asikareyei kuti mwanakadzi uu Musamariya waidikana kundomwa mvura basi, pedzepo worarama nokusikaperi. Nge mushobo umwewo, Djesu ainga asikarei kuti anhu e Kufarnau aizorarama nokusikaperi kana akarhya mwiri wa Djesu kamare kana kuti kumwa ngazi yake.
MIGARIRO MIIRI YAKASIYANA
7. Anhu amweni anobhuyei ngezve masoko a Djesu ari pana Juau 6:53?
7 Anganani anobhuya kuti pana Juau 6:53, Djesu zvezvirokwazvo ainga ecireya kuti anhu anodikana kuitei pa Kurarira ka Tenzi, ngokuti iyena akaseenzesa masoko akatodzana. (Mat. 26:26-28) Anhu anobhuya kuti ese aya ari pa Kurarira ka Tenzi anodikana kurhya pau uye kumwa vhinyu. Kodi izvona zviri mu gwanza here? Zvinokosha maningi kuziya mhinduro iyona, ngokuti makore ese mamirionji e anhu mu nyika anosobatanidzwawo pa ciitiko ici cinokosha. Ticaona musiyano uripo pakati pe masoko ari pana Juau 6:53 uye pa masoko akabhuiwa na Djesu pa Kurarira ka Tenzi.
8. Ngaipi misiyano minganani iripo pakati pe migariro ii miiri? (Onaiwo mifanikiso.)
8 Ngationgorore musiyano muiri pakati pe migariro ii. Wekutanga, Djesu akabhuya masoko ari pana Juau 6:53-56 kupi uye rini? Iyena akabhuya masoko aya ku Adjudha mu Garireya mu gore ra 32 K.A. Irona rainga riri gore rekutanga asati aita Kurarira ka Tenzi. Wecipiri, masoko aya aiabvunza ani? Iyena aibvunza masoko aya ku Agarireya ainyanya maningi kubatikana pa kupsvaka zve kurarama nazvo uye ainga asikadi kufunda ngezva Djehovha kana Umambo wa Mwari. (Juau 6:26) Zvezvirokwazvo, Djesu paakareketa zviro zvinganani zvekuti zvakaashuphira kuzwisisa, awona nokukasika akaima kutenda maari. Kunyazi anganani e afundi ake akasiya kutenda maari. (Juau 6:14, 36, 42, 60, 64, 66) Anhu aya ainga akasiyana maningi no aphostori 11 akatendeka ainga ano Djesu mumasure me gore rimwe, muna 33 K.A. pa Kurarira ka Tenzi. Pa nguwa iyona, aphostori ake 11 ainga ari ipona kunyazi awona ainga asikanyasi kuzwisisa zvaifundiswa na Djesu. Asi aphostori aya ainga aakunyasa kutoziya kuti Djesu ainga ari Mwana wa Mwari ainga abva kudenga. (Mat. 16:16) Djesu akasimba aphostori ake eciti: “Imwimwi ndimwi magara na inini pa miedzo dzangu.” (Ruka 22:28) Misiyano miiri ii inopangidza kuti pana Juau 6:53, Djesu ainga asikaedzi kupanganidza zvaizoitika pa Kurarira ka Tenzi. Asi pano musiyano umweni.
Juau kapituro 6 inobhuya zvakarekethwa ndi Djesu ku Adjudha akawanda ku Garireya (moko boshwe). Pa gore rakateera, iyena akazobvunzazve cikwata cidoko ce afundi akatendeka ku Djerusarema (moko kwawo) (Onai ndima 8)
MASOKO A DJESU ANOREYEI KAMURI
9. Masoko akabhuya Djesu pa Kurarira ka Tenzi ainga ecibhuya ngezve cikwata cipi?
9 Pa Kurarira ka Tenzi, Djesu akahambisa pau isina mbiriso ku aphostori ake uye akaabvunza kuti yaimirira mwiri. Pedzepo, iyena akaabvunza kuti vhinyu yaiimirira “ngazi yangu yecitenderano.” (Mark. 14:22-25; Ruka 22:20; 1 Ako. 11:24) Zvaakareketa zvinokosha maningi. Iyena akaadainza “citenderano cipsva.” Citenderano ici ngeca Djehovha no “nyumba ye Israeri” kana kuti ku aya basi acatonga na Djesu “mu Umambo wa Mwari,” haiwa ku anhu ese. (Aheb. 8:6, 10; 9:15) Pa nguwa iyona, aphostori ainga asikanyasi kuzwisisa zvakanaka ngezve citenderano icona, asi nokuhamba ke nguwa awona aizodzodzwa no mwiya mucena uye aizoita dii ro citenderano ici pamwepo na Djesu kudenga.—Juau 14:2, 3.
10. Ngaupi musiyano umwe wakabhuiwa na Djesu pa nguwa ye Kurarira ka Tenzi uye no paainga ari ku Garireya? (Onaiwo mufanikiso.)
10 Zvakabhuiwa na Djesu pa Kurarira ka Tenzi zvinoseenza ku anhu padoko basi, anodaizwa kuiti “cikwata cidoko.” Aphostori ainga ari pamwepo naye ndiona ainga ari ekutanga pa kuita dii iri re cikwata cidoko. (Ruka 12:32) Aya ndiwo akakumbirhwa na Djesu kuti arhye pau no kumwa vhinyu. Amweni aizogara dii ro cikwana ici nokuhamba ke nguwa, aizorhyawo pau no kumwa vhinyu pa nguwa ye Kurarira ka Tenzi. Aya ndiwo acapaswa cigaro kudenga pamwepo na Djesu. Hino, uu ndiwo musiyano umweni pakati pe Kurarira ka Tenzi no zvakaitika ku Garireya. Masoko a Djesu pa Kurarira ka Tenzi anoseenza basi pa cikwata cidoko, asi masoko aakareketa ku Kafarnau anoseenza ku numero yakawanda yo anhu.
Aya anorhya pau no kumwa vhinyu anoita dii re cikwata cidoko, asi “umwe na umwe” unokwanisa kupangidza kutenda muna Djesu Kristu uye oona upenyu usikaperi (Onai ndima 10)
11. Ndi zvipi zvakabhuiwa na Djesu ku Garireya zvinopangidza kuti ainga asikareyei ngezve cikwata cidoko?
11 Djesu paainga ari ku Garireya mu gore ra 32 K.A., anhu ainga ecicedza naye aida kurhya basi. Asi Djesu akaedza kuabetsera kuti azwisise kuti kainga kuno ciro cinokosha kudarika zvokurhya basi—ciro icona ndi upenyu usikaperi. Djesu akatobhuya kuti aya akafa angamutswa orarama nokusikaperi. Mukusiyana no Kurarira ka Tenzi, apa pa tsamba ya Juau 6, Djesu ainga asikadi kureya ngezve makomborero aida kutambirhwa no anhu padoko basi, asi iyena akareketa ngezve makomborero aizotambirhwa no anhu ese kamare. Zvezvirokwazvo, iyena akati: “Kana munhu akarhya pau ii acararama nokusikaperi; . . . Pau yandicapasa ndi mwiri wangu kuti nyika ione upenyu.”—Juau 6:51. c
12. Zvinyi zvinodikana kuizwa kuti tione upenyu usikaperi?
12 Kodi Djesu aida kureketa kuti anhu ese akamborarama aizoona upenyu usikaperi here? Haiwa! Anhu aya basi ‘aizorhya pau’ kana kuti aya basi ano kutenda muna Djesu ndiwo aizoona upenyu usikaperi. Akawanda anodziti kuti ndi Akristu anotenda kuti acaponeswa kana akapangidza ‘kutenda muna [Djesu]’ uye kumutenda hinga muponesi wawo pacawo. (Juau 6:29) Asi mu Garireya mainga muno akawanda ekuti akatotenda nokukasika muna Djesu, asi pedzepo awona akazoima kumuteera. Ngei?
13. Zvinyi zvinodikana kuizwa kuti tigare mufundi wa Djesu?
13 Anhu akawanda aiteera Djesu basi ngokuti iyena aiapasa zviya zvaaida. Awona aida kuti Djesu aaporese, aapase zvokurhya uye aabvunze zviro zvaaida kuzwa. Asi Djesu akapangidza kuti painga pano zvakawanda zvinodikanwa kuti awona agare afundi ake. Iyena akasiya pamhene kuti aazi kuuya pa nyika kuzoapasa zviya zvaaida basi. Anhu aidikana ‘kuuya’ kaari kana kuti kumuzwira uye kumupurutana.—Juau 5:40; 6:44.
14. Cinyi catinodikana kuita kuti tibetsereke no mwiri uye no ngazi ya Djesu?
14 Djesu akafundisa kuti nge kupasa mwiri wake no ngazi yake, iyena aizoita kuti anhu ararame nokusikaperi. Asi anhu aidikana kutendera cokwadi ici uye ogara no kutenda maciri. Kutenda ikona kaikosha ku Adjudha, uye kunokoshawo katiri. (Juau 6:40) Hino zvakabhuiwa na Djesu pana Juau 6:53, zvinoreya kuti tinodikana kugara no kutenda mu rusudzunuro kuti tione upenyu nokusikaperi. Uye makomborero aya anobvira ku anhu akawanda.—Aef. 1:7.
15-16. Zviro zvipi zvinokosha zvatafunda pana Juau kapituro 6?
15 Zvakatarhwa pana Juau kapituro 6 zvinokosha maningi katiri tese isusu uye no ku adiwa edu akafa. Ipona tafunda kuti Djesu anoda maningi anhu. Paainga ari mu Garireya, iyena akaporesa anhu, akafundisa anhu ngezve Umambo, uye iyena akapasa anhu zvokurhya. (Ruka 9:11; Juau 6:2, 11, 12) Asi cinonyanya kukosha, iyena akafundisa kuti ndi “pau yo upenyu.”—Juau 6:35, 48.
16 Izvirokwazvo kuti aya akadainzwa na Djesu kuti “mabira amweni” aadikani kurhya pau no kumwa vhinyu pa Kurarira ka Tenzi. (Juau 10:16) Kunyazi zvakadaro, awona anobetsereka no mwiri no ngazi ya Djesu. Zvingaitika kudini? Awona anobetsereka pa kudzipira ka Djesu uye no zvese zvinobatanidzwa kuti zviitike. (Juau 6:53) Nge dii rimweni, aya anorhya pau no kumwa vhinyu, anopangidza kuti anoita dii ro citenderano cipsva uye ano kariro ye kutonga kudenga. Hino azvinei nokuti tinoita dii ro akadzodzwa kana kuti ro mabira amweni, zvakatarhwa pana Juau kapituro 6 zvinokosha maningi katiri. Izvona zvinopangidza kuti tinodikana kugara no kutenda kakabamba mu rusudzunuro kuti tione upenyu usikaperi.
NGOMA 150 Psvaka Mwari Kuti Uponeswe
a Juau 6:5-35 yakafundwa mu fundo yakadarika.
b Mvura yakabhuiwa ndi Djesu inoimirira zvakaizwa na Djehovha kuti paoneke upenyu usikaperi.
c Pana Juau kapituro 6 panoseenzeswa masoko ekuti angaturikirhwa kuti “ndiani” kana kuti “wese uya” zvecida kureya anhu angararama nokusikaperi.—Juau 6:35, 40, 47, 54, 56-58.
