Muphostori Pauro wakatarira mudoni wake Timoti wekuti wainga ari mukuruwo: “Ndinokukumbira pamberi pa Mwari na Kristu Djesu, no ngirozi dzakasanangurhwa kuti uteedzere nhungamiriro idzi usina dii raunotsigira kana kuita rusananguro.”—1 Ti. 5:21.

Pakutanga, ticada kubhuya ngezve kuti ngirozi idzona dzainga dzisiripi ani. Idzona acikwatapi ce 144 000. Muphostori Pauro paakatarira Timoti, rumuko re Akristu akadzodzwa rainga risati ratanga. Aphostori uye amweni akadzodzwa ainga asati agara zvisikwa zve kumwiya, hino awona ainga asikazogari “ngirozi dzakasanagurhwa.”—1 Ako. 15:50-54; 1 Ate. 4:13-17; 1 Juau 3:2.

Kusiya izvona, “ngirozi dzakasanangurhwa” adzidikani kugara dziya dzakapanduka pa Ndambi Huru. Ngirozi idzona dzakagara ku dii ra Sathani, dzakagara madhimoni uye dzakazogara azondi a Djesu. (Gen. 6:2; Ruka 8:30, 31; 2 Ped. 2:4) Mu nguwa yemberi, ngirozi idzi dzicasungwa dzokhandirhwa mu rindi rakadzikisisa ke makore anokwana kuita 1000, pedzepo dzicatsakatiswa pamwepo na Sathani.—Djud. 6; Zvak. 20:1-3, 10.

Ngokudaro, “ngirozi dzakasanagurhwa” dzakabhuiwa na Pauro dzinodikana kugara dziya dzinoseenza pamwepo na “Djehovha uye na Djesu Kristu,” kudenga dzekuti dzakapanganidzwa no mavhersikuro amwewo.

Kuno mamiriyonji e ngirozi dzakatendeka. (Aheb. 12:22, 23) Zvese zvinopangidza kuti Djehovha aapasi basa rimwerimwero ku ngirozi dzese. (Zvak. 14:17, 18) Ngo muezaniso, pa nguwa imweni, Djehovha akagadza ngirozi imwe basi kuti itsakatise masurudado e Asiriya anokwana 185 000. (2 Mad. 19:35) Uye ngirozi dzimweni dzingakwanisa kutambira basa re “kuunganidza, dzobudisa mu Umambo [wa Djesu] zviro zvese zvinokuhunyisa, ne anhu asikateereri mutemo.” (Mat. 13:39- 41) Dzimweni pamweni dzicapaswa basa re ‘kuunganidza akasanangurhwa’ kuti ararame kudenga. (Mat. 24:31) Uye dzimweni dzingagadzwa ‘kuti dzitidziirire mumakwanza edu ese.’—Pis. 91:11; Mat. 18:10; ezanisai na Mateu 4:11; Ruka 22:43.

“Ngirozi dzakasanangurhwa” dzinorekethwa pana 1 Timoti 5:21 pamweni dzainga dziri ngirozi dzakagadzwa kuti dzibetsere pa kucengeta ungano. Pa masoko e vherisikoro ii, Pauro wakapasa mazano ngezve kuti akuru aidikana kucengetedza kudini ungano uye ungano yaidikana kuabata no rureremedzo. Akuru e ungano pacawo, anodikana kucengeta ubaba wawo “asikasananguri, asina dii raanotsigira” uye aadikani kuita zvisananguro asikazi kunyasa kurangarira. Cikonzero cikuru uye cakanaka cinoita kuti akuru atondoedze mazano akafemerhwa Pauro ngecekuti awona “anoimirira Mwari, Kristu Djesu uye ngirozi dzakasanagurhwa.” Ngokudaro, zvinogara pamhene kuti ngirozi dzimweni dzinogadzwa kuti dzicengetedze ungano. Mabasa amweni anoizwawo no ngirozi ndi kudziirira aseenzi a Mwari, kuonerera basa re kuparidzira, uye kubvunza Djehovha zvese zvadzinonga dzaona.—Mat. 18:10; Zvak. 14:6.